يا نجاتي انفخ البلالين عشان عيد الميلاد
دة مش عيد ميلاد واحد دول اتنين
يعني اتنين في واحد برت بلاس
فاتت سنة كاملة علي مدونتي
صرخت فيها كتير
وبكيت عليها اكتر
وضحكت عليها اكتر واكتر
والاهم من دة اني حبيت فيها برده
فاتت سنة علي مدونتي اللي فيها اتعرفت علي ناس مش هقدر اقول اي شئ عنهم سوي انهم ملايكة بجد
سنة علي بنتي الصغنونة
اللي بتكبر ادامي
بكرة مدونتي هتم السنة بالظبط
يا مدونتي انا بحبك اوووووووووووي
وكل سنة وانتي معايا وموجودة
مش تزعلي مني اني كنت هحرمك مني وهحرمني منك
اصلي عيلة اوووووووووي
بكرة ان شاء الله الموافق 15/11
عيد ميلادي انا كمان
هتم 26 سنة
احساس غريب اني بكبر اوي
واني فاضلي 4 سنين وابقي علي مشارف التلاتين
يامين يعيش
26 سنةهتمهم
مش مصدقة بس احساس غبي وغريب
بحاول اتاقلم عليه من فترة
حاسة اني مش هقدر اكون عيلة من تاني ولا اني اكل مصاصة زي ما كنت بعمل علي طول
زي فكرة جوازي برضه
اللي لحد دلوقتي مش متخيلة اني هبقي زوجة ان شاء الله
احيانا بحس اني لسة عيلة اوي وصغيرة
بس علي راي امي
صغيرة ازاي وانتي شحطة كدة
المهم بقول لمدونتي كل سنة وانتي طيبة
وبقول ليا كل سنة وانا عيلة
وبقول لطارق كل سنة وانت معايا
وبقول لكم كل سنة وانتو معانا علي طول وانا بحبكم
الي تحت دي تورت عيد الميلاد
اوعو تحفوا بقي
خليكم رشيقين
عشان مش تتخنوا
طارق انا مخليا التورتة اللي بالشيكولاته لينا احنا
ومش عايزة اقولكم بقي ان الهدية هتبقي مضروبة في اتنين
مرة ليا ومرة لمدونتي
هتقولولي هنديهالك ازاي
بسيطة
يوم الجمعه الجاية ان شاء الله
في حفلة لعلي الالفي مع فرقة ايامنا الحلوة في ساقية الصاوي
الساعه 7 ونص
نيجي كلنا ونحتفل هناك ونسمع احلي صوت سمعته
صوت علي
ربنا يوفقك يا علي
Labels: خاص ومقابلات ومناسبات
65 Comments:
احجز مكان يا نجاتى
عيد ميلاد سعيد يا اجدع سمراء شربت من مياة النيل
وعيد ميلاد سعيد لاخف مدونة على الشبكة العنكبوتية كلها
وعقبال كدة لما ابقى قاعد انا والمدام والعيال سنة 3007
بنقرا فى مدونتك
ومستنين البوست الجديد
ان شاء الله
واحد مش فاهم حاجة
ههههههههههههه
هو نجاتي فاضيلك عشان يحجز
دة بينفخ البلالين
ربنا يخليك يارب
بس مش شيف ان 3007 دي وسعت منك شوية
كل سنة وانت طيب
فين الهدية ياعم الحاج
العزيزه انجي
كل سنه وانتي طيبه وبخير وتالق وابداع
بجد من المدونات التي بجد بستمتع بها
من ابداع الي ابداع وتقدم
كل سنه وانتي طيبه
العزيزه انجي
كل سنه وانتي طيبه وبخير وتالق وابداع
بجد من المدونات التي بجد بستمتع بها
من ابداع الي ابداع وتقدم
كل سنه وانتي طيبه
كل سنه وانتى وطارق والمدونه كمان طيبين
وعيد ميلاد سعيد .وحشانى والله يا سمراء :)تحياتى
العزيز محمد مفيد
بجد اخلجتني
واعذرني عيل تقصيري
بس ان شاء الله هرجع من تاني
دي شهادة بجد بتخليني فخورة اوي
ويشرفني ان مدونتي تكون من المدونات اللي بتشدك
وانت طيب يارب
________________________________
سهر الليالي
وانيت طيبة يا قمري
وانتي كمان وحشاني اوي
كلكم واحشني اوووووووووي
سمراء
اهلا بعودتك يا قمر
بجد كنتي قلقتيني عليكي
و كل سنه و انتي طيبه
و مدونتك بخير يا ىرب
زيزي
السلام عليكم
حمدلله علي سلامتك
انا قولت انك خرج ولم يعد
كل سنه وانتي طيبه
كنت حارمك انا من تعليقاتي المثمره
هههههههههههههههه
وكل سنه ومدونتك بخير
عقبالي يا رب
هانت كلها يا دوب كام شهر
بس انتي طلعتي اصغر مني
يالا مش مهم
عموما انا مش من سكان القاهره الحمد لله
اترحمت من الهديه
تحياتي
ومنتظرين بوستات بجد
كل سنة اونتي وهي طيبين
ويارب ياسمراء عقبال 100000000 سنة
وتعيشيهم سعيده مع طارق يارب
ومن اولها كده محطتيش تورة الشيكولاته
بس ولا يهمك ياستي احنا راضين
كل سنة وانتي طيبه ومعنا ومع طارق طبعا
كل سنه ومدونتك بالف خير
ويارب دايما فى نجاح وسعيدة على طووووووووووووووووووووووووووووووول
كل سنه وانتى طيبه يا نوجا
وعقبال مليون سنه وانتى بتكبرى وبتحلوى وزى القمر على طول
وعقبال مئه سنه تدوين ان شاء الله
انتى وحشانى أكتر يا قمر
معلش انى قافله التعليقات شويه
وحشانى كتير
يارب تكونى بخير
خلى بالك من نفسك
(K)
روحى
كل سنة وانتى بألف خير انتى ومدونتك اللى حبناها اوى وحبناكى اكتر منها بخير
وكل سنةوانتى دايما معانا وكل سنة وانتى مع طارق وفرحانة وسعيدة
ويارب السنة الجاية تيجى تعملى عيد ميلادك انتى وطارق وابنكوا ان شاء الله وعيد جوازكوا كمان
:D
وحشانى اوى ياوحشة
الاخ العزيز نجاتى
ههههه
بليز تشوفنى ببلونتين
اما الاخت العزيزة انجى
فكل سنة وانتى طيبة حاف من غير هدايا
هههههههههههههه
بس هديكى دعوة حلوة الا وهى
عقبال خمسميت سنة
بس مش هقولك بالنسبة ليكى ولا بالنسبة للمدونة
هههههههه
كل سنة وانتى طيبة يا انووج
كل سنة واحنا طيبين
عيد ميلاد سعيد ليكى ان شاء الله
وعيد ميلاد سعيد لمدونتك الجميلة
وحشانى والله يا بت
وحشانى بجد يعنى
لا صحيح صحيح يعنى
وحشانى
كل سنة وانتى وطارق بخيير
ومن غير منغصات الحياة التقليدية
ربنا يبعدكو عنها
ويبعد كل المشاكل عنكم
ويخليكو لبعض
ويخليكو لينا
وحشاااانى يا بت
:D
كل سنه وانتي طيبه مرتين
مره للمدونه
ومره ليكي
اوعي احساس الكبر ده يتسلل ليكي
26 سنه مش كبيره
طالما الروح شابه ومش حقول عيله
هههههههههههههههه
طالما الروح شابه حتفضلي طول عمرك شابه
اما الهديه بقى
دعوتين
ربنا يجعل مدونتك عامره بكتاباتك
وربنا يسعد سنينك وايامك
تحياتي
انوووج يابرج العقرب ياجامد
كل سنة وانتى طيبة ياحبيبتى تصورى بقى ان مدونتى سنها اكبر من مدونتك بشهر
بس مدونتى اتمسحت واتعملت تانى
بس انا مااتخيلتش ان بقالك سنة بس بتدونى لانك مجتهدة اوى ياانوج ماشاء الله ربنا يوفقك
ويسعدك
بقولك ايه انا مش هعرف اجى الحفلة ابعتيلى التورتة على البيت ابعتلك الهدية على طول :D
والله وحشااااااااااانى جدا ياانجى
ماتتصوريش فرحت اد ايه بردك فى مدونتى يارب اشوفك دايما زى زمان كدة
سلاماتى
كل سنه وانتى طيبه يا انوج وربنا يديمك ليا اخت بجد
وسورى بس بجد ما كنتش اعرف انه عيد ميلاد مدونتك كمان
فسورى وعديهالى دى
ربنا يسعدك ويكتب لك كل ما فيه الخير ليكى انتى وطارق
ربنا يخليكو لبعض
بحبك اوى
كل سنه وإنتى طيبة دة أولا
كل سنه ومدونتك طيبة دة ثانيا
كل سنه و إنتو طيبين دة ثالثا
كل سنه والناس طيبة
كل سنه وإللى ماشى هناك دهوة طيب
كل سنه والعالم أجمع بخير
وسلم عااااااااالاى سلم عالى لما جبلنى وسلم عالى يا سلام يا سلام سلم عالى
أنا عاوز من التورتة إللى تحت ماشى
حنفى
مفيش حنفى
لولولوولولولولوللى
كل سنة وانتى طيبة
وكل سنة ومدونتك مليانو بوستات فرح وحب وسعادة
كل سنة وانتى وطارق مع بعض
كل سنة والفرحة مالية قلبكوا
عايز اشوف قريب بوست عن شهر العسل
:D
خالص تحياتى وامنياتى
تشي
كل سنة وانتِ طيبة يا ستي
والحمد لله ان المشاكل دي كلها عدت الحمد لله
وكل سنة ومدونتك بخير وسعادة
بس بقالك سنة بس دا انا في التدوين من قبلك بقي
هههههههه
ربنا يكرمك ان شاء الله
هحاول احضر يوم الجمعة
تحياتي
محمد
ألف الف الف مبروك يا جميله و عقبال من نخش نبارك فى السنه العشره للمدونه و انتى بتشكلنا من وجع دماغ العيال و الدكاتره و المدارس و ووووو
و كل لحظه فى عمرك يا قمر و أنت طيب
و عقبال من نبارك و ناكل من تورته الليله الكبيره
انجى
كل سنة و انتى طيبة
كل سنة و انتى مع طارق
كل سنة و مدونتك بتكبر
كل سنة و انت بالف سلامة و خير
كل سنه و انتي طيبه يا انجي
والسنه الي جايه ان شاء الله تكوني حققتي كل الي بتحلمي بيه
وكل سنه وانتي طيبه يا بلوج
:)
والحفله بقي ابقي حطي شويه صور للبشر الي مش هتقدر تيجي تتفرج علي الاقل
:)))))))))))
تحياتي
كل سنه وانتى طيبه ياانوج
ومدونتك بخير
ويارب تفضلى معانا على طول
ويهنيكى انتى وطارق يارب
وطبعا مش تنسبى تعزيمينا على الفرح
يلا حالا بالا بالا حيوا ابو الفصد هيكون عيد ميلاده الليله اسعد الاعياد
فليحيا ابو الفصاد
هيييييييييييييييه
انا قولت اغنيلك الوقتى عشان مش هعرف اجى
تحياتى ليكى
كل سنه وانتى طيبه ياقمر وربنا يسعدك يارب السنه الجايه نقولهالك وانتى مع طارق فى بيتكم ربنا يسعدكم ويخليكم لبعض .... وبعدين نصيحه ماتقلقيش حتى فى عمر التلاتين وحتى بعد التلاتين كلى مصاصه زى مانتى عايزه عادى هههههه.... كل سنه وانتى سعيده .....سلمى
كل سنة وإنتي طيبة ياجميل
وعقبال 100 سنة
أشوفك إنتي وطارق يوم الجمعة أكيد
تحياتي
السلام عليكم ورحمة الله وبركاته
سنة حلوه يا جمييييل ...سنة حلوه يا جمييييييييييييل ....سنة حلوه يا انووووووج.... سنه حلوه يا جميييييييييل
كل سنة وانت طيبه يا قمر وكل سنه وانت منوره البلوج سبوت بتدويناتك الجميله
اختاري الهديه اللي انت عاوزاها ابعتهالك دليفيري
كل سنة وانتي سعيدة كل سنة وانتي طفلة مدللة كل سنة وانتي عاشقة كل سنة وانتي حبيبة كل سنة وانتي منورة مشرقة كل سنة وانتي انوجا الجميلة بقالي كتير نفسي اتعرف على القمر بس القمر بينله ملهوش نفس كان نفسي قوي احضر الحفلة بس الوقت مش مناسب سلاميليكي ولطارق ولكل الي هتشفيهم في الحفلة
كل سنه و انتى بالف صحه و سلامه
و كل عام و انتم الى الله اقرب و على طاعته ادوم
تحياتى اليك
ابو مفراح
كل سنة وانت طيبة
وكل سنة والمدونة طيبة
كل سنه وانت طيبه
مرتييييين
كل سنة وانتي طيبة
ومدونتك طيبة
هوا نجاتى بقالوا كم سنه بينفخ بلالين
المهم كل سنه وحضرتك طيبة وعقبال 100 سنة حياة سعيدة وعقبال 100 سنة تدوين
كل سنه وانتى طيبه يا انووووووووووووج
وعقبال 100 سنه انشاءالله
اخيرا يا انوج مبسوطالك جدا
وعودن احمدن
:)))))))))))))))))
بوسيلى نفسك بقى
كل سنة وانتي طيبة ومدونتك كمان بالف خير
واعملي حسابي بقي في الحتة اللي ع الوش اللي فيها الشيكولاته
تحبى اجيبلك ايه
بقى ؟
انووجه
كل سنـه وانتى طيبه
يا صحبتى
عارفه رغم انى شفتك مره واحده بس
و يمكن كلمتك مره واحده بس ...
بس و الله يا انجى بحس اننا اصحاب
واصحاب اووى كمان
انا مش عارفه اقولك انتى وحشتينى قد ايه ... بجد ي انجى وحشتيينى اوووى
كـل شويه اقول لما اشوف انجى تانى ... حقولها تعالى في حضنى ...
ربنا يبارك لينا في عمرك ...
ويبارك في صفحات المدونه ... ويجعل كل حاجه في الدنيت بالخير عليكى
وربنا يكملك على خير انتى وطـارق ياا رب
يا احلى انووج على كوكب الارض والكواكب المجاوره
وحشتيينى
:)
اولا الف حمدلله على السلامة يا انوووج
بجد وحشتيييييننيييي جدا
وكل سنة وانت بالف خير وسعادة يا اطيب انجى فى الدنيا .. ربنا يقويكى يا انجى ويوفقك فى حياتك .. ويخليكى انتى وطارق لبعض يا رب ... مرة تانية حمد لله على السلامة
ومتغيبيش تانى كده بجد وحشتينا :]
كل سنه وانتى طيبة ومدونتك كمان طيبة
ويارب تعيشى مع مدونتك ميت سنه
كل سنه وانتى بخير
تخياتى لكى
كل سنه وانتي طيبه
وعقبال لما يبقي عندك اممممممم
25 سنه
ومدمونتك تكبر تكبر تكبر
لحد ما تنفجر من البوستات
طبعا ده هايحصل لما مصر تروح كاس عالم
كل سنه وانتي طيبه انتي والمدونه
وياريت ترجعيلنا بقه
وبلاش حاله النكد الي كنت عايشاه فيها
كل سنة وانتي طيبة ياقمر
قلقتينا عليكي
بجد
خودي بالك من نفسك
يارب نشوف ولاد ولادك يارب
وتجيبي مدونات صغنتوتات كدا زي دي وتكبريهم ..
هابي بيرز داي تو يو
هابي بيرز تو يو تو
هابي بيرز للأتنين
يالا حالا بالا يالا هنوا ابو الفصاد هيكون عيد ميلاده الليله اسعد الأعياد
متحيوا ابو الفصاد
وانا اخوكي اللي مش غراب بقولك كل سنه وانتي طيبه
بس يعني مكانش في داعي تقعدي تمدحي فيه وتقولي ملايكه انا عارف انا اصلا تحفه وفظيع خالص والناس كلها بتموت فيا بس هاعمل ايه بقى
عموما يا ستي ربنا يوفقك ويسعدك انتي وطارق
وبعدين تاخدي التورته اللي بالشيكولاته لوحدكم ليه كفايه عليكم الحب سيبيلنا احنا التورته
تحياتي سلاااااااااااااااام
عقبال عيد جوازك
انوج كل سنة وإنت طيبة
وعقبال ما تتمى 25 السنة اللى جاية إن شاء اللة
علشان إنت عارفة البنات بتصغر مش بتكبر بعد 26
السلام عليكم
اهلا اهلا اهلا انوووووووووووووووووج
مرحبا بعودتك
عاملة اية
كل سنة وانتى طيبة
ربنا يوفقك ويكرمك انوووووووووج
تحياتى
طيب كل سنة وانتي طيبة
على المدونة
وعلى الستة وعشرين سنة
أنا ملاحظ إن كتير من المدونين بيحتفلوا بأعياد ميلاد مدوناتهم الأيام دي وأنا كمان منهم
ده تقريبا لأن الوقت ده كان فيه فعلا بداية قوية للإقبال على التدوين
عموما كل سنة وانتي طيبة كمان مرة
وعاش من شافك يا جميل
ومبتسأليش عننا خالص مالص
وحمدالله عالسلامة من الاكتئاب بتاع البوس اللي قبل اللي فات
وباي بااااااااااااي
كل سنه وانتي طيبه وكل سنه وانتي احسن من السنه اللي قبلها 26 مش كبيره لسه شباب ....مش تبصي انكـ قربتي على ال30 بصي إنك لسه في ال20
(f)
كل سنة وانتى طيبة
معلش جت متأخرة كتير
انهى جمعه بقى اللى قصدك عليها
الجمعه دى اللى فاتت ولا لسه اللى هتيجى؟؟؟
كل سنة وانت ومدونتك طيبين
انا اول مرة اجى عندك بس التعليق اللى انت سايباه عندى بجد كان تحفة
انت على فكرة اسلوبك جامد مووووت
ويا بنتى خليكى عييلة ولا يهمك
ماحدش واخد منها حاجة احنا يعنى هنعيش كام مرة
وانا اوعدك يا ستى انى لو شفتك هاجيبلك مصاصة
ولا يكون فى نفسك حاجة
كل سنة وانتوا طيبين انتي وبنتك
احساس غريب فعلا لما تلاقي نفسك بتكبري سنة كدة فجأة
انا باستغرب كل سنة
خاصة في سن العشرينات اللي ماسكين فيه بايدينا واسناننا
مش عارف فيه تورتة باقية في التلاجة لي ولا لأ
مش مشكلة السنة الجاية ان شاء الله هاجي بدري
كل سنة وانتي طيبة يا انووووووووووووووووج
عقبال مليون سنة
كل سنة وإنت طيبة
وعيد ميلاد سعيد
هي اكيد التورتة اتنسفت بس معلش اكني شفتها
وعقبال 25644585535566933365 يوم
كل سنة وانت طيبة
اتمنالك ايام مديدة سعيدة
والله انتي زي السكر
كل سنه انتى ومدونتك وطارق
والعيله كلها بخير
وعقبال 100 مليون سنه يا قمر
ضحكتيني بعد مادخلت مدونه ابن ناصر وجبهه التهييس الشعبيه رفعوا لي ضغطي من الهم اللي فيهم ، لكن دلوقتي ضحكت علي نجاتي ونفخه للبالونات كل سنه وانت طيبه ومدونتك طيبه برضه
=====================
وحشتيني
متاخرة بس معلهش
كل سنة وانتي و المدونة بخير
و كل سنة وانتي يا انوج طايرة و معاكي الفرحة
:)
حمدالله على السلامة
وكل عام وانت وطارق والمدونة بخير
والله هديتكم عندي بس لما انزل مصر ان شاء الله
طمنينا عليكم دايما ويارب يا رب يديم عليكم الفرحة رغم كل احزان الدنيا فالفرحة اقوى منها
بارك الله لكما وبارك عليكما وجمع بينكما في خير
:)
حبيت أسلم بس وحمدالله على السلامة
تحياتي من ماناساس البلد
a7la ta7ya le2a7la samraa
begad far7anaaalk awyyy
kol sana w enty tayeba w gamda keda w 2amora w far7aana
w kol sana w enty m3ana fe eltadwin w madontk mn agml el madonat elly b7bha
azon an el2awan b2a eny a3rfk bgd...3ayza aklmk w 3ayza ashooofk
kol sana w enty agml samraa fe edonyaaa :)
هى هى هى هى
طلعت الجمعه اللى فاتت ..:(
انا مررتلك تاج يانجي (:
سنة حلوة ليكي وليها
الحمد لله انك بخير
وربنا يديم عليكي الفرح والسعادة
يا انسانة نظيفة
تحياتي
انا و انتى القدر جمعنا على غير ميعاد فى المكان ده و باللون الاحمر اللى بيعبر عن مكنون حبى و هكذا من الكلام اللى
بيثبتوا بيه البنات...
خلينا مع الصور اللى كشفته و و هو لا يعلم ان هناك كاميرا تراقبه و تراقب تصرفاته
تابع
قصة حب
عمر افندى على موقعه
www.omarafandy.com
الف مبروك وعقبال ال120
وحمد الله على السلامة
كل سنة وانتى ومدونتك بخير يا انجى...مش عارفة ليه حاسة انك اختى الصغيرة.. يمكن عشان بتشبهى اصغر اخواتى ودمها شربات زيك ربنا يوفقك يا قلبى ويسعدك انتى وطارق بجد لما بادخل مدونتكم باحس ان الحياة حلوة
كل سنه و انتى طيبه يا احلى انجى
كل سنه و انتى مع طارق و يااارب على طوول مبسوطين
كل سنه و البلوجايه بتاعتك كويسه و حلوة و بتجمعنا بالناس اللى بنحبهم
فين الهديه بقى :p
Post a Comment
<< Home