ذكرياات بقي

مش عارفة ليه اول ما بفتح دولابي بشوف ترنج المدرسة اللي كنت شغاله فيها

واللي كان الموجه بتاعنا دايما يقولي

بصي يا ابله حافظي علي الترنج دة عشان دة عهدة ولازم تتسلم بعد انتهاء فترة عملك من المدرسة

واللي كنا بنغنيله

يا ترنج الايمان يااا ترنج الايمان

يا مدفي الحران ومسقع البردان

ودة عشان المدرسة اسمها الايمان

هي كانت خاصة بس عربي

بفتكر ايام حلوة قضيتها في المدرسة

وازاي زمايلي اللي معايا خلوني لاول مرة اكل فول من عربية الفول اللي ادام المدرسة

ولا ساندوتشات الكبدة والسجق اللي علي العربية اللي علي اول الشارع

كنت دايما بشارك كل مدرس ومدرسة في كوباية الشاي بتاعته

وكان كل مدرس يجيب شاي يبص حواليه يشوفني موجودة ولا لا

ولو شافوني جاية يقوموا من مكانهم

لدرجة ان مدرس العربي مستر سمير كتب فيا قبل كدة مقطع من قصيدة بتقول

والاخت انجي يا رجاله

خفة وحركة ومهارة

1,2,3,4,

دايما معاها الصفارة

في الدور السادس تسمعها تقول انذار بالغارة

لما تشوف في ايديك الشاي

تعمل معاك والله حوار

تمسك من ايدك الكباية

ولما تشرب يا اخوانا

تضحك وتقول اورفار اورفار

يارب يحميكي يا انجي

اصل يا بنت وكله عمار

كنا تلات بنات من دفعه واحدة تخصص تربية رياضية انا وحنان وناهد

كنا اعلي مرتب في المدرسة كلها

مش عشان حلوين لا سمح الله

لا دة عشان صاحب المدرسة خريج تربية رياضية وبيحب مجاله

وطبعا اعلي مرتب دة كان 225

وتلات ولاد سالم ومحمد واحمد

دفعه واحدة برضه بس تخصص اداب قسم فلسفه

اترموا علي الالعاب عشان مش لاقين تخصصهم في اي حته

كان مرتبهم 165 عشان مش تخصص

وايه اللي رماك علي المر

ورئيس قسم التربية الرياضية اللي كنت دايما اناديه واقوله

يا موجهههه

انت فين يا موجهههه

يقوم يقولي طب احترميني عشان سني

هو انا بشتمك يا موجه

يقولي اومال دي ايه

الله مش دي وظيفتك

ويضحك ويقولي هروح فين من لسانك

السبت كان اجازة رسمي بس كنا بنروح عشان بنعمل انشطة رياضية

والعيال كانوا بيجوا

طبعا بعد دفع اشتراك النشاط الرياضي اللي بيطلعلنا منه نسبه

في الاول كان النظام ان كل مدرس يقبض علي العدد اللي يجيلوا

لكن المدير كان رايه

يا نعيش عيشة فل يا نموت احنا الكل

يعني اي كان العد اللي يجي يتقسم علي 7

كان في شهر مش معانا فلوس خالص دة كان كل شهر والله

ونطلع احنا الستة ناخد سلفه كل شهر

وفي مرة سالم قالي

هو احنا قبضنا فلوس النشاط بتاعت شهر فبراير

هو احنا في شهر ايه

احنا يا بنتي في شهر ابريل

تصدق لا

طب بقولك معاكي فلوس

ولا اعرفك انا ايه اللي جابني هنا اساسا

ايه يا انجي انتي هتطلعي واطية معايا انا

يا ابني الوطينة دي فن

واد يا محمد ياحمد ياناهد يا حنان تعالووووووووووو

احنا لازم نقبض شهر 2 بتاع النشاط

محمد بص لسالم وقاله

استاذ ياسر بيحبك

اطلعله انت

وياسر دة المدير المالي اللي في نفس الوقت اخو المدير شوف ازي

طب انا طالع

ونزل سالم وعلامات التهزيئ مخرمة علي جسمه

ايه قالك ايه

هزئني وطردني

ما تطلعلوا انت يا محمد

اذا كان هزئك انت اومال هيعمل فيا ايه دة مش بعيد يضربني

هي موتة ولا اكتر دة حقنا يا جدعان انا طالعله

حمش يا احمد مجدع ياض

طول عمري اقول المدرسة دي مش فيها غير احمد

انت رجل والرجال قليل

ومسافة ما طلع احمد نزل احمد

ايه يلا قالك ايه

مش لحقت اخشله

لييييه بقي

لقيته متعصب وهو بيتكلم في التلفون فخفت ونزلت

يا موجههههه

عايزة ايه بلسانك دة

ما تطلع انت

انت راجل كبير كدة وبركة

وانا مالي حد تاني يطلع

ادا يا استاذ محمد انت خايف

استني انت يا احمد استني

يعني ايه انت مالك مش كفاية مش بتعمل حاجة في ام النشاط وتيجي تقبض زيك زينا

يعني ايه انت مالك

اعصابك يا انجي

استني يا سالم ال انا مالي ال

طب بصوا هو بيحب البنات حد منكم يطلعله

استغفر الله العظيم

جري يا شيخة ناهد هو انا بقولك روحيله الشقه انا بقولك اطلعيله في مكتبه فوق

طب اطلعي انتي يا حنان

لا يا عم انا جبانة

وطبعا للاسف مش في حد فكر فيا لانهم معتبرني الرابع بتاعهم لانهم لاغين فكرة اني بنت

ولمدة ساعه شغالين تهييس وكل اللي يعدي علينا يقعد يضحك علينا

وسالم يقوم يقف ويرقص ويقول

انا هطلعله وقوله

قبضني النهارة يسعدك تشك تشك

وفي الاخر الموجهه العبقري قال

عارفين بقي مين اللي هيقبضكوا النهاردة

ميييييييييين

البت ام لسان طويل اللي اسمها انجي

ياااااه تصدقوا كانت تيهه عننا

انجي اطلعي

لا

هجيبلك حاجة من الكانتين

طب ومحمد واحمد

انا هعزمك علي شاي

وانا هجيبلك ساندوتش من اي عيل

ماشي انا طالعه

احم احم

السلام عليكم استاذ ياسر

انا قلت مش عايز اشوف اي حد من القسم الزفت دة

القبض الاسبوع الجاي

لا حضرتك قبض ايه انا مش جاية عشان القبض

انا جاية عشان حاجة تانية

تعالي خشي واترزي

لا انا بحب اتكلم وانا واقفة ( لزوم الجري بعد الكلام يعني )؟

ها في ايه

انا جاية عشان اشتكي لحضرتك

ايه اللي حصل

يرضي حضرتك ان محمد جمعه يستلف مني الفلوس اللي معايا عشان يروح

وسالم يستلف من ناهد فلوسها عشان هيسافر قليوب

واحمد ياخد فلوس من حنان عشان جعان ومش معاه فلوس يجيب اكله

وناهد وحنان ياخدوا من الموجه

وانا طمعانه في كرم حضرتك استلف 75 قرش عشان تذكرة المترو - ايامها كانت ب75 قرش

قال يا سلاااااااااااااااااام بقي كل دة حصل

طب وغلاوة حضرتك عندي حصل

وغلاوة حضرتي ماشي يا انجي

ابعتيلي الكلاب اللي تحت

هتقبضنا صح

بعد نظرة قاتلة منه

ابعتيهوملي كلهم طيب

وبسرعه قبل ما ارجع في كلامي

اصلا كلامي كان مؤثر جدا لكن طبعا مش مقنع

ومش عارفة هو مشهالي ازاي

واثق الخطوة يمشي ملكا

ونازلة السلالم يا ماشالله عليها

استقبلوني بزفة

ها عملتي ايه؟؟

اطلعوا يا كلاب عشان تقبضوا

انتي تتكلمي بجد ولا بتشغلينا

لا والله بتكلم بجد

لقيت الموجه قالي انا كمان يا انجي

قلتله اه طبعا

قالك يعني ناديلي استذ محمد

لا

اومال ايه قالك ايه يعني

هو قالي ناديلي الست كلاب اللي تحت

واكيد انا مش منكم لاني كنت معاه فوق

وكل اللي كانوا حوالينا وقعوا عالارض من الضحك

والحمد لله قبضنا واتشبرئنا

وكان قبضنا

جنيه ونص 19 يا بلاش