اتبرع واجري وابقي حاسبني

عاملين ايه في رمضان ياولاد

علي الله تكونوا صايمين .

طبعا رمضان خلاص بيودعنا ومش هنشوفه الاالسنة الجاية

وهيجي العيد فرحة يا سلام واجمل فرحة يا سلام هيه هيه هيه

معلش دي كانت فقرة غنائية

اصلي بنسي نفسي تقولش ام كلثوم يا خي

يلا ما علينا انا بقي عايزة اتكلم عن حاجة مختلفة هي مش مختلفة خالص

بس هقولها وخلاص واحد ناصح من معجبيني الاجلاء والجمهور العريض يسالني

ايه هي الحاجة المختلفة دي يا انوج

اااااااااااه هرد واقولك انت نبيه والله يا ابني او يا بنتي

الحاجة اللي انا هتكلم عليها هي التسول العاطفي

نعم يا اختي

هرد بس بلاش تهزيئ

الواحد مننا يا عيني صايم وجعان وعشطان وطالع عينه في شغله او في دراسته

او في المطبخ او في بيته اي كانت الوظيفة

وتحب ترتاح شوية تقوم تفتح التليفزيون

انت اصلا متسحر بس جعان ومش في حاجة في بطنك خالص

تقوم تفتح التليفزيون تلاقي ولد صغنتت يقولك بصوت حزين

انا اسمي احمد

تقوم تقوله ها يا عم احمد عايز ايه

يقولك انا عندي السرطان

لا حول ولا قوة الا بالله العلي العظيم

خلا معدتي تتقلب برغم انها فاضيا وهرجع اللي اكلته رغم اني بتسحر زبادي

الدمعه كانت هتفر من عيني ما احنا بشر برضه يا ناس وحسيسين بقي

الكلام دة كان من رمضان اللي قبل قبل اللي فات تقوم تكلموا كانه هيسمعك طب عايز ايه يعم احمد

يقوم يقولك اتبرع

نقوم في اقرب وقت نتبرع باللي فيه النصيب يجي رمضان اللي بعده بقي

وانت بقي ايه قاعد بتفطر وبتتفرج علي بكار ورشيدة وحسونة

وفي منتهي السعادة انك بتهبر اللحمة والفراخ وما لذ وطاب وتلاقي فقرة اعلانية بتقولك

انا اسمي احمد

اهلا يا سي احمد وحشنا والله ياراجل فينك من السنة اللي فاتت

ولا انت مش بتيجي غير بالشكيلايتة قصدي في رمضان

نكد علينا وقول يقولك انا الحمد لله خفيت بركة بركة الحمد لله ربنا استجاب لدعايا

وتمسك المعلقة وتتثبت قبل ما تدخل بقك ويقولك

بس ليا زمايل تانين عندهم برضه السرطان

وكمان جايبلي زمايلك واقوم من علي الاكل وانا نفسي مسدودة

وعلي عيني سايبة شوربة لسان العصفور اللي باللورة والحبهان ومرقة فاين فودز

طب نعمل ايه يا ابني انا متبرعة بنص مرتبي رمضان اللي فات

يلا هنتبرع عشان خاطر اخواتك يا احمد رمضان اللي فات بقي

لقيت احمد خدها حلوانا في سلوانا ولامم كل العيال وجايلي يقولي ابنيلي مستشفي

علي عيني يا ابني منين دة انا يا دوب معيدة بقبض 300 جنية

وفعلا كنت هتبرع بس وقفت لحظة تعالوا نعمل فلاش باك كدة علي الاعلانات

اللي بتطلعها جميعة الباشمهندس جمال مبارك والبودي جارد بتوع شباب المستقبل ولا جيل المستقبل

اللي متبني فكرة فكر جديد نصب جديد هلاقي الراجل العسولة اللي بيعمل اعلانات الضرايب

والراجل ابو صوت حلو بيقوله من حقك تعرف فلوس الضرايب دي بتروح فين

واللي يقولك الفاتورة بتضمن حقك

ولولا الضرايب لا مستشفيات هتتبني ولا مدارس

حافظ علي حقوقك وحقوق اولادك

انا نفسي اعرف فلوسي بتروح فين سمعنا سمعنا يا سوبر نت بمناسبة الفقرات الاعلانية

يعني الفلوس دي بترجعلك في صورة خدمات كهربا ومايا وغاز وتلفون

الله لما انتوا يا حكومة الكلب بتديوني الخدمات دي من فلوس الضرايب

اومال فلوس الكهربا والنور اللي بدفعها كل شهر دي ايه وفلوس الصرف الصحي

وفواتير التليفون اللي قسمة ضهر الشعب المصري كله بالرغم من انه هم عاملينو استقبال

بس الفاتورة بتيجي عالية ومع ذلك بيدفعوا ماهما خايفين يشيلوا العدة

والخصخصة اللي بنسمع عنها يعني تبيعوا عمر افندي واالاراضي المصرية والبنات المصرية

كل دة بقي بيروح فين لما الشعب المصري هو اللي بيبني المستشفيات وكمان المدارس

اومال فلوس الضرايب والفواتير اللي بتضمن حقي

ولا فجاة الشعب كله بيظبط الشغل والفواتير

ومش بقي فيكي فلوس يا مصر عشان تبني لولادك مستشفيات ومدارس

رمضان دة بقي

اعلانات وجوايزوفلوس تترمي تحت رجليك بالالوفات

الله ما البلد اهي فيها فلوس وانا ليه اتبرع ولا هما فاكرين اني لما اتبرع

هاخد ضعفهم في فكر ثواني واكسب دقايق

ولا الحكومة شاطرة تبيض برج القاهرة وتعمل بطولة العالم للبتاع اللي مش عارف ايه دة

وتعمل حفلة لستة اكتوبر وتدفع فيها دم قلبها

ولا البطوبلة العربية اللي ليها موال تاني

ولا المراة ثون اللي كانت متبنياها كوزان سجارك

اللي اتدفع فيها فوق ال20 مليون

والله براوة عليكي يا حكومة

دة غير الارصفة اللي بتتهد وبيتعمل غيرها طب هديتوها ليه

والكباري اللي بتتعمل وبعدين يعيدوا ترميمها طب بنيتوها ليه

دة انا اللي حارق دمي ان شيخ الزهر الامربامر الحاكم اصدر فتوي دينية

بان الزكاة تروح لمستشفي 57357وان هي كدة مش تبقي صدقة يا سلام

من امتي واستنادا علي ايه يعني بدل ما اروح اكسي عيلة وادفع ليهم فلوس

ولا دار ايتام من المناطق العشوائيةاللي وزرة التضامن الاجتماعي مش عايزة تعرف عنها حاجة

اروح ادفع زكاتي للمستشفي اللي مبنية علي احدث طراز

واللي اتكلف شكل التجميل فيها اكتر من اجهزتها

قنعرة فارغه

وضحك علي الدقون

لا وايه هبني كمان مدارس

فلوسي...... فلوسي يا ولاد الفرطوسة اللهي ما تقعدلكم في عافيتكم قادر يا كريم

قول ياض انت وهو يلا امين ااااااااااااااااااامين

ما احنا لامؤاخذة زي الحمير بنمشي مطرح ما يودينا صاحبنا الحمار الكبير
فين الراسمالية والاقتصاد والبورصة فين فلوس الشعب يا ولاد الشششششششششعب

اتبرع ولو بجنيه بقالكم كام سنة لمين مننا جنيه كل دة بتبنوا في مستشفي

واللي حارق دمي دخلتوا كمان علي المدارس الاول هنبني المستشفي

اكبر صرح صحي لعلاج السرطان بالمجان وبعديها بنينا المستشفي طب حلو اوي

فلوسي يا جدعان جابت نتيجة

بس ناقصنا حاجة

ايه هي يا عم المستقبل

السيراميك اللي لازم يكون من سيراميكا كليوباترا اللي بتصدر لاكتر من 100 دولة حول العالم

ويكون فرز اول هي دي اي حاجة

والمعدات والاجهزة والذي منه

حاضر خدوا فلوسي ما هي فلوس حرام اصل بتعب وبشقي والحكومة بتطلع عين اهلي في المرتب

عشان اديهالكواجبنا الاجهزة الف بركة

لولا الجنية اللي دفعتوا مش كنتو هتعرفوا تجيبوا حاجة يا غجر

ناقصنا حاجةالله وبعدين ارغي يا عم الامور شلني وقولي ناقص ايه نستورد دكاترة!!!!؟؟؟

نعم يا خويا انت هتستهبل بقي دة عبيط دة ولا ايه؟؟؟

ايوة نستورد دكاترة من برة عشان يعلموا الدكاترة اللي جوة اصول اللعبة

علي الاقل عشان نلاقي حد يعيش

ماشي خد اهو

اتنبأ ليكوا بقي بالتبرع الجديد احنا عملنا معجزة بنينا المستشفي

وجبنا الاجهزة والاشاعات والمعدات وجبنا دكاترة علي اعلي مستوي

اتبرع اتبرع ولو بمريض مش كدة ولا ايه

فتحوا مخكم بقي جايبين شوية عيال يتسولوا بيهم

هو المرض بقي سلعة ولا اطفالنا بمرضهم وتعبهم سلعة رخيصة بتاجروا فيها

وطفل الصعيد اللي مش لاقي بطانية

ولا لاقي مائدة رحمن

علي حد علمي ان اهالي الصعيد الكل عارف بعض

والكل بيدلق خيره علي الكل

والله اعلم طبعا

بس ايه اللي يوصل اهل الصعيد لكدة

مش انتو

ولا انتو تغلطوا واحنا ندفع التمن

وبتشحتوا عطفنا اكمننا شعب عاتشفي انا مش ممنعا اني اتبرع

بس اعرف فلوس الشعب دي بتروح فين يا حزب السرقة الديموقراطي

فلوسي بتروح فين يا جمال

فلوسكم انتو بتروح فين

وانا من مكاني هذا اناشد كل فئات الشعب

ارجوك لا تتبرع

اللي عايز يتبرع تحل كل تبرعاته الي هذه المدونة الغلبانة

ولا اقولكم اتبرعوا لنفسكم

يمكن تقدروا تعيشوا صح عيشة نضيفة ساتراكم وساترة ولادكم

اسكتوا نسيت اقولكم مش هما هيلغوا العيد السعيد

وهيخلوه عيد مبارك او يا جمال العيد يلا ما هي كلها القاب يا ولاد .....ولا بلاش

اللهم اني صائمة

كل سنة وانتو طيبين

ادوها كحك وغريبة بسكو مصر