Thursday, February 21, 2013

لن انتظر احد

مش هجري ورا حد ولا اتحايل عليه عشان  يسمعني و اتكلم معاه

مش هلمح لحد اني محتاجة اتكلم 

هحاول مهتمش بحد غيري لان مفيش غيري بيسمعني 

انا مش محتاجة حد يحطلي في خطط وحلول لمشاكلي ويشرحلي كيفيه التصرف في حياتي وفي نفسي 

انا مش عايزة كل دة ومش محتاجاه لاني انا كفيله بيه 

انا كل اللي بحتاجه اني اتكلم وانقي قلبي من الحزن اللي جواه 

اني اعقل عقلي من افكاره اللي اوقات بتبقي مغلوطة 

حضن استخبي فيه من غضبي وفشلي 

ايد حاضنه وشي بتمسح دموعي 

صدر اهرب فيه من كل الدنيا اللي بقي صعب الوليد يعيش فيها 


سؤال ولو بسيط " عامله ايه "؟

مش هجاوب بغير الحمد لله كويسة وتمام

بس انامش هبقي كويسة ولا هبقي تمام

كلما اشتقت لاحد اشتاق اكثر لذاتي 

فلا يسعني غير تكرار المقوله لنفسي 

لا تنتظر احد ..... فلن يأتي احد 


Monday, December 31, 2012

جيتلك عشان مكسورة


عايزة اقولك انك وحشتيني 
الفيس خد مني كل وقتي ونسيتك ومش بجيلك غير في اوقات حزني واترمي بين حروفك وكلامك واحاسيسي اللي كتبتها عندك وسيبتهالك امانه
المهم انك وحشتيني 
والاهم اني كالعادة مش بجيلك غير عشان افضفضلك باللي جوايا واللي حاسه بيه 
عارفة 
ادق وصف ليا دلوقتي اني مكسورة اوي 
مكسورة ومش هتنفع معايا لا طبطبة ولا كلمات تشجيع زي الاول او اني اقوي نفسي زي الاول 
عشان حاسة ان ضهري اتقصم واني من جوايا متكسرة لمليون فتفوته
كنت لما بقابل مشكلة في حياتي كنت بعند واقول مش انا السبب ومش ذنبي ان الناس فاهماني غلط 
لحد ما تحولت الي امرأة لها الف سجان وليها الف عيون وتحاسب علي الكلمة والنظرة والحركة 
بقيت كل ما اقع في مشكلة وتواجهني ازمة اقول انتي السبب غيري من نفسك ومن اسلوبك ومن حياتك عشان تسعدي اللي حواليكي 
قررت اكون وحيدة الخليه 
وابقي انا جوايا 
قررت اتغير وابقي كل حاجة كل واحد حلم بيها عشان اسعد اللي حواليا رغم تعبي وحزني 
في ناس مقدرتش اعمل معاها كدة عشان جرحهم ليا اقوي من اي مشاعر تانية وبقي كرهي ليهم اقوي من اي حاجة تانية 
وفي ناس انكسرت ادامها 
مش عارفة ليه ؟
يمكن عشان اصعب عليهم ؟
يمكن عشان يعذروني ؟
يمكن عشان انا فعلا مكسورة 
مش من كتير اتغيرت من كام يوم بس 
من كام يوم بس قررت اكون وحيدة الخليه ولسة مافيش كلام 
مفيش نظرات 
مفيش اهتمام
مفيش اي حاجة 
احساس باليتم بشع 
لسه الاهل هم الاهل 
لا انا قادرة اكلمهم ولا هما عايزين يكلموني 
زي مانا 
بضحك وانا موجوعه ومكسورة 
مبقاش يهمني مين السبب 
اللي يهمني النتيجة اللي انا عايشاها
يجي بقي الجرح مني او من اهلي او من غيرهم 
اللي بقي يهمني الحاله اللي انا فيها 
الصورة اللي فوق دي هي واقع وتمني في نفس الوقت 
دي انا مع حنين بنتي اللي عايزة اجيبلها الدنيا كلها تحت رجليها 

 اللي هفضل طول عمري اخد بالي منها من غير ما ازهق ومهما غلطت وعملت عشان هي مني 
وتمني اني نفسي اكون انا الصغيرة دي حد ياخد باله مني من غير ما يزهق مهما غلطت ومهما عملت
وحشني حضني اوي وطبطبتي عليا 
وحشني ان اشتاق لذاتي 
متزعليش مني بقي عشان غيبت عنك كتير 
عارفة اني كل مرة بقولك كدة وبوعدك اني هشاركك معايا في كل حاجة وباجي ابعد عنك ومجلكيش الا وانا مكسورة 
بس انتي قلبك كبير وبتحبيني زي مانا بحبك اوي 


Labels:

Thursday, July 28, 2011

كنت فتاه




في البداية نظرت الي مرآتي فلم اعرفني
تغيرت ملامحي كثيرا
استشعرت بتجاعيد الحزن تعلو وجهي
نظرت الي شعري القصير كم كان طويلا مسدلا علي ظهري واصبح لا يتجاوز اكتافي المحملة بالهموم والاحزان
نظرت الي مرآتي فلم اعرف تلك الفتاه
فتاه!!!!!!!!!!!!!!!!!!!!. اي فتاه
كنت الفتاه المجنونة التي رغم احزانها تضحك وينطلق لسانها بكلمات الفكاهه
كنت تلك الفتاه التي تحلم وتتمني وتسعي لتحقق احلامها رغم انوف الجميع
كنت تلك الفتاه التي تشارك نفسها فقط احزانها
كنت تلك الفتاه الي نامت في احضان مدونتها وغازلتها تارة واحزنتها كثيرا
كنت تلك الفتاه التي تصرخ من داخلها وتبكي مرارا لكنها تساعد وتقوي نفسها
كنت الفتاه التي كانت
اما الان
الان انا امرأة
امرأة محسوب عليها انفاسها ...خطواتها ... جلساتها .... كلماتها .... ضحكاتها
امرأة تفكر كثيرا قبل ان تنطق
تفكر كثيرا قبل ان تجلس
تفكر كثيرا قبل ان تفكر
اصبحت امرأة لم تعد تهتم لمشاعرها
اصبحت هادئة ... حزينة ... مستسلمة .....لم تعد تري العالم بعيونها بل لم تعد تري العالم اساسا
تشعر انها تري حياتها من خلف الزجاج
من خلف النوافذ
وكأن انسانة اخري هي التي تعيش حياتها
اصبحت المرأة التي لا اعرفها
( انتي مين .. انا بجد مبقتش عرفاكي )
اشعر باني اصبحت بلا هوية ... وبلا ابتسامات مرضية
قلبي يكاد يموت بالبطيئ
قد تكون كلمات بسيطة تحي قلبي من جديد لكني ادرك بانها ستكون مفتعلة
ما عدت انا .. وما عاد هو
هو ؟؟
هو الذي كان يذوب في كلامي فيشعر بحزني فيحزن ويبكي بدلا مني
هو الذي كان يقرأني رغما عني فيقرأ ابتساماتي فيقع من الضحكات
يري دمعاتي فيبكي
الآن هو عقل فقط
واقعية في زمن الواقعية
واقعية في زمن يموت فيه القلب المشتاق المحب
المهم اني ماعدت انا
لم اعد اعرفني ولم اعد كما كنت
اصبح من المستحيل الرجوع للوراء
اصبح من المستحيل الخروج
اصبح من المستحيل اجبار الاخرين علي فهمي ومعرفتي
باني انا الفتاه المجنونة الطيبة التي لا تفقهه في العقل شيئا
اصبح من المستحيل اقناع الاخرين باني تلك الفتاه التي تحيا من كلام الحب
وقصص العشق
اصبح من المستحيل ان ارضي بافعال الواجب التي لا علاقة لها بالحب
كيف لشخص ان يعطي حقوقه للاخرين رغم انها حقه ويخبره بان هذا هو الحب
الحب !!!! ويلي من الحب
الحب كلمة
فعل الحب اكبر من مال او طبطبة او ابتسامة بل هي واجبات
الحب ان لا تبتعد
الحب هو ان تشتاق دوما
الحب هو تعرف ما الذي يسعد الاخرين وتفعله
الحب هو رساله
الحب هو وحشتيني رغم انك قدامي
الحب هو ان تساند ولا تمل
الحب هو ان تقتل الاف المرات عندما تري الحزن في وجه الحبيب
الحب هو ان تري فيا كل شئ جميل
كيف لي ان اري الحب بداخلي وينظر هو الي الحب بانه افعال واجبة
وعقل واقعي
لا يتقابلان يا سيدي
اما ان تفكر بعقلك الواقعي فتنسي قلبك
او تفكر معي بقلبك
انتظرت كثيرا الابتسام فما وجدته فقد حفر فمي من ابتسامات لكي ترضي
وتنسي همومك واحزانك حتي كدت ان انسي كيف هو الابتسام الحقيقي
المهم اني ما عدت انا وما عاد هو هو
لكن الاهم اني ما عدت تلك الفتاه واصبحت تلك المرأة

Labels:

Tuesday, November 24, 2009

بعيدا عن كل شئ

بعيدا عن ما يحدث لمصر والجزائر
وبعيدا ان العرب هيحتفلوا بالعيد كل واحد في اليوم اللي يناسبه
وبعيدا عن كل المشاكل تعالوا شوفوا حنين





دي وانتي عندك ساعه ونص يعني اول ما اتولدتي
وكنتي مغمضة عنيكي
كنت انا في غيبوبة البنج ولما قالولي جبتي بنت زي القمر قلتلهم هاتوها اشمها
واول ما شوفتك مش عارفة اوصفه بايه كنت عايزة اعيط رغم اني كنت مفستكة
لما هتكبري شوية هقولك يعني ايه مفستكة


دي بقي وانتي في حضني وكنتي فتحتي عينك
انا قلت اكيد بدلوكي لانك كنتي ومازلتي جميلة اوي مش شبهي
وكل اللي يشوفك يقول عليكي نسخة من طارق
يمكن





تحس انها قرفانة اوف بقي
ليها حق ما هي نزلت للدنيا

كنتي يوميها عروسة زي القمر في يوم السبوع
يا جماعه السبوع كان عائلي بحت
هو مش كان سبوع انا عملته وانتي عندك 11 يوم
المفروض نسميه حدشور

متوترناش يا ناس
اوعو من وشها هتتنرفز وهتتحول
تقريبا بتزعقلي انا
قليلة الادب

تسلملي ضحكتها يارب انا اللي بتضحكلي


ايه يا جدعان البت محتاجة تشجيع
جو يا حنين جو

التركيز مقطع نفسه
سبوها تركز عشان تركيزها صعب شوية


ربنا يحرسك من العين يارب



الصورة دي بموت فيها وانتي نايمة وحاطة ايدك علي خدك تحفة


دي بعد ما حنين سبقتهم كلهم وطبعا شايفين فرحة النصر


بتحب طارق اوي بتبقي حلوة يا مجرمة وانتي في حضن بابا


مش عايزين نقول بقي ان الطقم دة اقل حاجة عندنا

من الاخر هي مش مكلبظة دي الصورة اللي مبيناها كدة
لزوم الحسد يعني

يا جدعان البت دي بتضحكلي انا بس
طب اروح فين بعدها

سااااااااااااااااااااا الخير
صباح الدماغ العاليا

بحبك يا حنين اوووووووووووووووووووووووووووي

وكل سنة وانتم بالف خير وسعادة
وكل سنة وانا طيبة عشان عيد ميلادي كان من 9 ايام
وكل سنة ومدونتي معايا عشان عيد ميلادها التالت كان من 10 ايام
واقولها انها وحشتني اوي وانتو كمان وحشتوني اوي

Tuesday, July 28, 2009

حنين جت يا ولاد

يا ولاد

حنين جت

وبقيت ام
والله وشفتك ام يا انوج

بقيتي ام يا بنت الفقرية
اولا بجد وحشتوني جدا
ثانيا بقي ودة الاهم حنين جت يا ولاد
شكلنا كدة عايزين قاعدة ونحكي
اتفضلوا اقعدوا علي الارض واستربعوا عشان هنحكي
كنت خايفة اوي من الولادة
هي اي نعم كانت قيصرية
بس انا اكتشفت اني جامدة نوعا ما بغض النظر عن كمية الصريخ اللي صرخت بيه
بعد ما فقت من البنج
انا جبت حنين يوم الاتنين اللي فات
يعني تاريخ 20 /7 دة يتحفظ لزوم الهدايا
شهر 7 دة اللي اتجوزت فيه واللي بعد جوازي بيوم عيد ميلاد جوزي
واللي بعد جوازي باسبوعين هيبقي ان شاء الله عيد ميلاد حنين

رغم اني عارفة انها كانت بنوتة بس اول ما شفت طارق قلتله انا جبت ايه
الراجل يا عيني قال دي بتخرف وخدني علي اد عقلي
بس لما جابوهالي مش كنت شايفاها من تاثير البنج
بس طلبت اني اشمها
طلب غريب بس مش في حد هيحس بيه غيري او اللي زيي
غير كدة ان لكل واحد مننا له ريحة خاصة كدة
حبيت اكون اول واحدة تميز ريحتها بما اني مش اول واحدة شافتها عيني
البت يا جدعان تحس انها مش شبهنا
هي والله بسم الله ما شاء الله قمر
مش عارفة طالعه لمين
بس الحمد لله البت واخدة رجلي مقاس 42
ودة اللي اداني امل انها ممكن تكون بنتي

وهي عندها يومين تعبت مني وسخنت وبقيت اعيط
ونزلت بيها انا وطارق نروح للدكتور
الكل استغرب اني والدة قيصري وانزل بعد يومين
بس قلبي مش طاوعني اني اسيبها وتبعد عن عيني لحظة
الغريب بقي لما رحت اطعمها كان عندها 5 ايام
كانت في واحدة قبليا وبياخدوا من بنتها تحليل دم من كعب رجليها والبت تعيط وانا اعيط معاها
واحدة قالتلي انتي بتعيطي هي بنتك ولا ايه
قلتلها لا بس بنتي هتعيط زيها
بس البت حنين طالعه لامها استحملت بس انا اللي مش استحملت وقعدت اعيط برضه
مش كنت فاكرة اني هبقي معاها حساسة اوي كدة
رغم اني بزهق بسرعه بس علي راي طارق
ربنا بيزرع جوة كل واحدة الصبر والقدرة علي التحمل
اللي هي الامومة يعني
خلاصة الرغي
اني فرحانة بيها رغم اني مش بعرف انام طول الليل منها
فرحانة بيها رغم انها عايزة اللي يقعد معاها ال 24 ساعه
وايه كمان
بقيت اقول بنتي وحنين بنتي
يا نهار ابيض يا جدعان
سمرا بقت ام
شفتوا الزمن
ادعولي ربنا يباركلي فيها ويخليهالي انا وابوها وتبقي سبب في حاجات حلوة كتير

ملحوظة

علي المتقدمين للزواج تقديم طلباتهم للنظر فيها
فاهمني طبعا

Sunday, May 24, 2009

حنين


مش عارفة اقولك ايه

بس انا بحبك اوي

وخايفة عليكي اوي

كتير اوي قالولي انك مش جاية

واني ممكن اتحرم منك اصلا واني مستحيل اشوفك

وعلي فكرة انا مشتقالك اوي

ووحشتيني اوي

تعالي بقي عشان مشتاقة للمستك

واني اخدك في حضني وابوس جبينك

وانسي دنيتي كلها بنظرة منك او ابتسامة

حاسة اني هسيب الدنيا واطلع للسما وانام علي كل النجوم

واجيبلك اجمل نجمة احطها في ايدك لما تضحكيلي

حاسة اني هدوب لما تمسكي ايدي

مش عارفة اقولك احساسي ايه لما الاقيكي بتجري عليا

وانتي بتعيطي وانا بين كل الناس

وانا الوحيدة اللي جريتي عليها عشان تترمي في حضنها

مش عارفة اقولك احساسي ايه لما الاقيكي نايمة علي رجلي

او من حنينك ليا تنامي علي صدري

انا عارفة انك اول ما هتيجي هتبقي ساكتة

بس خليكي عارفة اني هبقي مشتاقه لصوتك اوي وانتي بتناديني

عارفة

اقولك علي سر بس مش تقولي لحبيب عمري

في اول جوازي كنت فاقدة الامل في وجودك

بس لقتني بعد 4 شهور من جوازي بتمناكي اوي مش عارفة ليه

رغم اني عارفة انك هتشغليني عن حاجات لو جيتي

بس وقتها لقتني بتمناكي اوي وبنادي عليكي

بصيت لحبيبي ولقتني بقول من جوايا انا عايزاها

عايزة احس بيها بقي

وطلبت انك تكوني شبهه وشبهي

سمرا بشعر ناعم وبعيون عسلية

تجمعي بيني وبينه انا بس

ساعتها كان عندي حنين جامد اوي لكل حاجة حلوة

حنين ليك يا طارق وحنين للحب

وحنين لكل لحظة حلوة هلاقيها معاك ومعاها

من اول يوم كنتي فيه جوايا بطريقة ما كنت حاسة بيكي

بس كنت بكدب نفسي ما هما قالولي انك مش جاية

لكن فاتت اسابيع واتأكدت انك موجودة

انا عارفة انك هتزعلي لو قلتلك اني انهرت

لما عرفت انك موجودة

خفت

اصلي خفت اوي

اصلي انتي مش عارفة انا تعبت اد ايه في حياتي

ورغم اني في البداية لما كنت شاكة في وجودك

كنتي قوية اوي

قوية بدرجة غريبة

ومتمسكة بيا اوي

انتي كنتي عايزاني

رغم ان اللي عملته كان ممكن يخليكي مش موجودة بس انتي اتمسكتي بيا

وقلتي انا جواكي

رغم ان في الفترة دي شغلي كان صعب وبتنطط كتير

وبشيل حاجات تقيلة اوي وانتي متمسكة بيا

لحد ما اتاكدت انك موجودة بجد

رغم زعلي واني اتعرضت مرتين اني اخسرك

بس باقل مجهود كنتي انتي برضه متمسكة بيا

كنتي قوية

زيي

وزي السبب في وجودك

كنت خايفة اوي لما تيجي تاخدي حبيبي مني ويحبك اكتر مني ويهتم بيكي اكتر مني

بس لما لقيته بيدعي انك تطلعي شبهي مكنتش غيرانة اوي

انا لسة مش شفتك

بس متخيلاكي

بتقربي كل مرة من الحقيقة

فاضل شهرين وتبقي حقيقة

واخدك في حضني بجد

واحطك علي صدري عشان تشربي حنيني ليكي

حنين

قررنا انا وابوكي نسميكي حنين

عشان ساعتها هتعبري باسمك دة عن اللي بيني وبينه

عن اللي بيني وبينك

حنين مشاعر وامومة عشت فترة طويلة اوي مفتقداها

وحشتيني

حنين ليكي

حلو اسم حنين

رغم اني قعدت سبع شهور مش عارفة انتي ايه بالظبط

لحد ما قالولي انك بنوتة

زي ما اتمناكي ابوكي بالظبط

عارفة لما كانوا شاكين انك ولد ابوكي قال الحمد لله

رضا ,اللي يجيبوا ربنا كويس

ولما رجعوا قالوا انك بنوتة

مش قادرة اوصف مشاعر ابوكي كانت عاملة ازاي

كان طاير من الفرحة ومش كان مصدق نفسه

الكل فاكر ان هو زعلان عشان انتي بنوتة

بس انتي مش عارفة ان هو السبب في وجودك

عشان كان بيدعي بجد انك تبقي انتي حنين

البنوتة السمرا الجميلة

مستنياكي اوي

عايزة اعملك حاجات كتير اوي

واجيبلك الدنيا كلها واعوض عمري كله معاكي ومع بابا

بس خالي بالك ان انا هفضل البنوتة الاولي في حياته

مش هنغير من اولها ماشي

اقولك علي سر لما بحس بحركتك

احيانا بحس انك بتلعبي معايا وببستم اوي

وبستني حركتك اول ما اصحي من النوم

واوقات بحس انك عايزة تثبتي نفسك وتقولي انك موجودة

ومن كتر حنيني ليكي عنيا بتدمع لما الاقيكي بتتحركي جوايا

عارفة اني هفتقد الاحساس دة بعد ما تبقي حقيقة

احساسي وانتي بتتحركي جوايا

ربنا يجيبك بالسلامة وتبقي زي ما اتمنيت

وتبقي قوية زي ما اتزرعتي جوايا

بحبك يا حنين

وربنا يخليكي ليا يارب


Friday, February 27, 2009

عشان خاطر حريمك يا مصر


واد انت وهو وهى الكتاب اللى غلافه فوق دا اللى هو اسم النبى حارسه انا انثى لأ مش انا اللى انثى طب مانتوا عارفين انى انثى طبعا
لأ الكتاب هو اللى اسمه انا انثى
قوم ايه بقى الكتاب دا بيتكلم عن حريم مصر اللى هما ستاتها وسيداتها وانستها ومدامتها وهوانمها و فلاحاتها والكتاب هو انا لسه مقراتوش كله بس انا مشاركه فيه بموضوع لكن عارفه انه بسيط ومش معصب الموضوع

المهم بقى ان حفلة توقيع الكتاب يوم التلات الجاى
وتتشرف صاحبة هذه المدونة انها هتكون فى شرف استقبالكم يوم التلات الموافق 3/3/2209 واللى هو بردو فى نفس اليوم هتكون حفلة توقيع العدد التالت
والحفل هيكون فى تمام الساعه الرابعه والنصف بتوقيت القاهرة بالمركز الثقافى الدولى
17 ش السد العالى ميدان فينى الدقى الشارع المقابل لشيراتون القاهرة
الشارع اللى على ناصيته بنزيمه المتفرع من ميدان الجلاء

وبعيد بقى عن الدعوه الرسميه دى الحكايه كلها عشر دقايق مشى من محطة مترو الاوبرا
يكش حد ميجيش


Tuesday, December 16, 2008

كلام مش مفهوم


كلام مش مفهوم

مش عارفة مش مفهوم بالنسبة لمين
بس انا متاكدة انه مش مفهوم


بقالي خمس شهور وعشر ايام متجوزة مش كتبت فيهم غير بوستين وبس

فكرت انا ليه مش بقيت اكتب زي الاول رغم ان في مليون حاجة تتكتب

مرة اقول لنفسي عشان تامر الكلب

ومرة اصل مش عندي وقت خالص

بس الحقيقة الللي اكتشفتها النهاردة

اني خايفة

اصل حاسة اني اتغيرت

في الاول كنت بكتب وانا مسؤلة عن نفسي وبس

بكتب عن احساس بالحرمان والحزن ومشاركة ذكريات مضحكة بالنسبة ليا

كنت انسة
______________________


تصدقي

بعد تعليقك عندي مش عارف اكتب اي بوست تعليقك وجعني اوي

حسيت ساعتها اني لسة بأثر في الناس وان ليا لزمة وان لسة جوايا حاجات كتير
________________________



يا بنتي بلاش تنكدي علي جوزك دة راجل طيب والله

بس يا انجي انتي مش عارفة حاجة دة جوزي وانا عارفاه كفاية انه مش بيعاملني زي ما طارق بيعاملك

كنت عايزة اقولها وليه مش بتعامليه زي مانا بعامل جوزي

____________________________


بس بعد كدة فكرت انا بعمل ايه لجوزي

لقتني مقصرة مليون مرة رغم انه مستحملني وبيدفع معايا تمن اللي عشته واتعودت عليه
_____________________________


اخوكي اتصل بيكي

لا

بعتلك رساله
لا

يوم عيد ميلادي

اخوكي ....

لا يا ماما لا اتصل ولا بعت رساله لا هو ولا المحروسة مراته

___________________________

مكنتش بكتب كتير جايز عشان هرتاح هنا

جايز عشان هبعبع باللي جوايا

حاله غريبة اوي




--------------------------------------------


مالك يا انجي في ايه

مش فاهمة الناس دي بتفكر في ايه مش فات اسبوع علي جوازي وزعلانين اني مش بتصل بيهم
وال ايه انهم كانوا مستنين مني كدة علي اساس اني قليلة الاصل ومش بيتمر فيا

فات شهرين علي جواز اخويا ومراته لا بتتصل بامي ولا بيا ولا بحد

اتصل بيها ليه

عشان هي عروسة

بقالها شهرين

برضه عروسة
______________________________

وانا كنت بنت كلب يعني


--------------------------

انا رجعت من عندك هارية نفسي عياط

ليه يا طنط كريمة ( دي مرات ابويا ودي اول مرة تزورني فيها اذا انا اعتبرت ان
زيارتها ليا في الصباحيةمش تتحسب)؟

عشان البوم الصور بتاعك

ماله

مش ليا فيه ولا صورة للدرجة دي بتكرهيني

هههههههه يا سيتي يعني انا اللي كنت بصور تزعلي لو كنت سبتني في الكوشة وصورت انا

لا كان في صور وانتي اللي شلتيها من الالبوم


يا نهار اسود

انتي فاكرة ان ليكي صورة معايا وانا شلتها

اه

علي الاقل انا هبقي فيها

مانتي مش طايقاني

يا سيتي الالبوم زي ما هو من ساعه ما اخدتوا من حمايا

ثم انا في الاول وفي الاخر بحترمها

كنت عايزة اقولها كلمة اسكندرانية

ان محدش فيهم فكر ان يصورني لكن صور الفرح كلها حمايا اللي مأجر مصوراتي


--------------------------------------

حوار بين مرات اخويا وكريمة

ايه يا بت دة انا مش موجودة في الصور عندك كتير ليه

يوه مانتي اللي كنتي عماله تتنططي وتروحي هنا وهنا

وابص عليكي الاقيكي مع اهلك

طب ناديني

جري ايه يا كريمة انتي هتستهبلي
مين اللي ينادي علي مين

ههههههههههههههههه البت دي واخداها بلطجة معانا
________________________________


ادركت حينها ان لا مكان للشرفاء




________________________


ايوة يا ماما

ايوة يا حبيب ماما ممكن تجيبلي كيس شيبس وانت جاي

هههههه حصل يا حبيبي وجبتلك هوهوز وبسكويت وجيلي كولا ومصاصة كمان

ههههههههههه طب مش تتاخر بقي


-------------------------------------------

كان نفسي اسافر اوي

اغير جو
اشوف خلق جديدة

بس لما اعيش لحظة حلوة مع طارق ونقعد نضحك

بقول يلعن ابو الخروج علي السفر

بس برضه عايزة اسافر ان شالله حتي بركة السبع او كفر طهرمس

حاجات كتير مش بقي انفع اعملها عشان بقيت مدام
ومسؤلة من زوج وعن زوج

وعشان بقيت مدام

ما دام الا وجه الله


---------------------------

مبسوطة يا انجي

عايز الحق

لا

ليه

هتبسط اكتر لو انا في بيتي

زهقتي من القعدة في بيتكم

دة مش بيتي يا طارق

بيتي هناك في الهرم بيتنا

-------------------------------

لادرك حينها ان لا مكان لي الا في بيتي انا
واني غريبة
________________________

بت ياا انجي

نعم يا دكتورة

انتي يا بت خسيتي اوي كدة ليه
دة انتي اتعدمتي هو الجواز بيعمل كدة برضه

ههههههههههههه لا ابدا يا دكتورة بس دة تأثير ما قبل الفرح

لا بقولك ايه الرجاله بيحبوا الستات الملظلظة هتخلي الواد يطفش من دلوقتي

ههههههههههههههه لا مش تخافي يا دكتور


بعد مرور تلات شهور علي جوازي


هي هي نفس الدكتورة

بت يا انجي

نعم يا دكتورة

انتي طخنتي ولا انا بتهيالي

لا يا دكتورة بتهيألك انا بس رديت شوية

لا انتي في الاول كنتي حلوة

لا يا دكتورة علي الاقل بان ليا ملامح دة انا كنت عصايا اوي

لا بقولك ايه الراجل مش بيحب الستات المليانة لازم تبقي فرنساوي علي طول
لتطخني ويلف علي غيرك

ههههههههههههههههههه لا يا دكتورة مش تخافي

___________________________

الو
ايوة يا حبيبي انت وصلت الشغل

نظرة جانبية من امرأة تقريبا في منتصف الاربعينات تجلس بجواري
في المترو ( جيزة شبرا)

طب يا روح قلبي حمدا الله علي سلامتك

مء حاولت اكتب تعبيرها بس مش عرفت

لا انا لسة في الطريق عندي محاضرة متاخر
خلص شغلك بقي ومش تتاخر عليا عشان انت واحشني

تيب هكذا قالتها

هههههههههه
بقولك ايه

ما تيجي نتقابل

سهوكة

طب خلاص هستناك في البيت
سلام

لا دي قله ادب

حضرتك بتقولي الكلام دة لمين

ليكي يا حبيبتي

انا عملت لحضرتك حاجة
شوف ياختي البت بتكلم الواد بتاعها عيني عينك كدة وتقوله تعلالي البيت
ومستنياك وهنام .. لالالالا كلام كتير اوي


دة انا قلت كل دة

اشحال ما كنت قاعدة جنبك وسماعكي

علي فكرة انا مش هرد عليكي لانك ست كبيرة وكويس اوي اني مسهوكة وقليلة الادب مع جوزي

وحطيتلها الدبلة في عنيها

ولا كونش متسهوكة وقليلة الادب وبسمع الناس اللي جنبي
عن اذنك محطتي جت

نازلة الجاية حضرتك

تتلفت بابتسامة وتخبرني

لا اتفضلي يا مدام

علي فكرة انتي جدعه اوي

____________________________


يا بنتي مش عارفة انا عايزة ايه بس اللي اعرفه اني مش عايزاه
انتي نسيتي كلام الدكاترة

دول حمير

ثم مش عايزة نعمة ربنا.....كتير اوي بيتمنوها

عارفة

بس مش لما اكبر انا واربي نفسي الاول

ههههههههههههه هو هيربيكي

وهو مين هيربيه في الايام السودة دي

يا ساتر

سبيها علي الله

سكتي ليه

تفتكري ربنا بيحبني ؟؟؟؟؟