Tuesday, December 16, 2008

كلام مش مفهوم


كلام مش مفهوم

مش عارفة مش مفهوم بالنسبة لمين
بس انا متاكدة انه مش مفهوم


بقالي خمس شهور وعشر ايام متجوزة مش كتبت فيهم غير بوستين وبس

فكرت انا ليه مش بقيت اكتب زي الاول رغم ان في مليون حاجة تتكتب

مرة اقول لنفسي عشان تامر الكلب

ومرة اصل مش عندي وقت خالص

بس الحقيقة الللي اكتشفتها النهاردة

اني خايفة

اصل حاسة اني اتغيرت

في الاول كنت بكتب وانا مسؤلة عن نفسي وبس

بكتب عن احساس بالحرمان والحزن ومشاركة ذكريات مضحكة بالنسبة ليا

كنت انسة
______________________


تصدقي

بعد تعليقك عندي مش عارف اكتب اي بوست تعليقك وجعني اوي

حسيت ساعتها اني لسة بأثر في الناس وان ليا لزمة وان لسة جوايا حاجات كتير
________________________



يا بنتي بلاش تنكدي علي جوزك دة راجل طيب والله

بس يا انجي انتي مش عارفة حاجة دة جوزي وانا عارفاه كفاية انه مش بيعاملني زي ما طارق بيعاملك

كنت عايزة اقولها وليه مش بتعامليه زي مانا بعامل جوزي

____________________________


بس بعد كدة فكرت انا بعمل ايه لجوزي

لقتني مقصرة مليون مرة رغم انه مستحملني وبيدفع معايا تمن اللي عشته واتعودت عليه
_____________________________


اخوكي اتصل بيكي

لا

بعتلك رساله
لا

يوم عيد ميلادي

اخوكي ....

لا يا ماما لا اتصل ولا بعت رساله لا هو ولا المحروسة مراته

___________________________

مكنتش بكتب كتير جايز عشان هرتاح هنا

جايز عشان هبعبع باللي جوايا

حاله غريبة اوي




--------------------------------------------


مالك يا انجي في ايه

مش فاهمة الناس دي بتفكر في ايه مش فات اسبوع علي جوازي وزعلانين اني مش بتصل بيهم
وال ايه انهم كانوا مستنين مني كدة علي اساس اني قليلة الاصل ومش بيتمر فيا

فات شهرين علي جواز اخويا ومراته لا بتتصل بامي ولا بيا ولا بحد

اتصل بيها ليه

عشان هي عروسة

بقالها شهرين

برضه عروسة
______________________________

وانا كنت بنت كلب يعني


--------------------------

انا رجعت من عندك هارية نفسي عياط

ليه يا طنط كريمة ( دي مرات ابويا ودي اول مرة تزورني فيها اذا انا اعتبرت ان
زيارتها ليا في الصباحيةمش تتحسب)؟

عشان البوم الصور بتاعك

ماله

مش ليا فيه ولا صورة للدرجة دي بتكرهيني

هههههههه يا سيتي يعني انا اللي كنت بصور تزعلي لو كنت سبتني في الكوشة وصورت انا

لا كان في صور وانتي اللي شلتيها من الالبوم


يا نهار اسود

انتي فاكرة ان ليكي صورة معايا وانا شلتها

اه

علي الاقل انا هبقي فيها

مانتي مش طايقاني

يا سيتي الالبوم زي ما هو من ساعه ما اخدتوا من حمايا

ثم انا في الاول وفي الاخر بحترمها

كنت عايزة اقولها كلمة اسكندرانية

ان محدش فيهم فكر ان يصورني لكن صور الفرح كلها حمايا اللي مأجر مصوراتي


--------------------------------------

حوار بين مرات اخويا وكريمة

ايه يا بت دة انا مش موجودة في الصور عندك كتير ليه

يوه مانتي اللي كنتي عماله تتنططي وتروحي هنا وهنا

وابص عليكي الاقيكي مع اهلك

طب ناديني

جري ايه يا كريمة انتي هتستهبلي
مين اللي ينادي علي مين

ههههههههههههههههه البت دي واخداها بلطجة معانا
________________________________


ادركت حينها ان لا مكان للشرفاء




________________________


ايوة يا ماما

ايوة يا حبيب ماما ممكن تجيبلي كيس شيبس وانت جاي

هههههه حصل يا حبيبي وجبتلك هوهوز وبسكويت وجيلي كولا ومصاصة كمان

ههههههههههه طب مش تتاخر بقي


-------------------------------------------

كان نفسي اسافر اوي

اغير جو
اشوف خلق جديدة

بس لما اعيش لحظة حلوة مع طارق ونقعد نضحك

بقول يلعن ابو الخروج علي السفر

بس برضه عايزة اسافر ان شالله حتي بركة السبع او كفر طهرمس

حاجات كتير مش بقي انفع اعملها عشان بقيت مدام
ومسؤلة من زوج وعن زوج

وعشان بقيت مدام

ما دام الا وجه الله


---------------------------

مبسوطة يا انجي

عايز الحق

لا

ليه

هتبسط اكتر لو انا في بيتي

زهقتي من القعدة في بيتكم

دة مش بيتي يا طارق

بيتي هناك في الهرم بيتنا

-------------------------------

لادرك حينها ان لا مكان لي الا في بيتي انا
واني غريبة
________________________

بت ياا انجي

نعم يا دكتورة

انتي يا بت خسيتي اوي كدة ليه
دة انتي اتعدمتي هو الجواز بيعمل كدة برضه

ههههههههههههه لا ابدا يا دكتورة بس دة تأثير ما قبل الفرح

لا بقولك ايه الرجاله بيحبوا الستات الملظلظة هتخلي الواد يطفش من دلوقتي

ههههههههههههههه لا مش تخافي يا دكتور


بعد مرور تلات شهور علي جوازي


هي هي نفس الدكتورة

بت يا انجي

نعم يا دكتورة

انتي طخنتي ولا انا بتهيالي

لا يا دكتورة بتهيألك انا بس رديت شوية

لا انتي في الاول كنتي حلوة

لا يا دكتورة علي الاقل بان ليا ملامح دة انا كنت عصايا اوي

لا بقولك ايه الراجل مش بيحب الستات المليانة لازم تبقي فرنساوي علي طول
لتطخني ويلف علي غيرك

ههههههههههههههههههه لا يا دكتورة مش تخافي

___________________________

الو
ايوة يا حبيبي انت وصلت الشغل

نظرة جانبية من امرأة تقريبا في منتصف الاربعينات تجلس بجواري
في المترو ( جيزة شبرا)

طب يا روح قلبي حمدا الله علي سلامتك

مء حاولت اكتب تعبيرها بس مش عرفت

لا انا لسة في الطريق عندي محاضرة متاخر
خلص شغلك بقي ومش تتاخر عليا عشان انت واحشني

تيب هكذا قالتها

هههههههههه
بقولك ايه

ما تيجي نتقابل

سهوكة

طب خلاص هستناك في البيت
سلام

لا دي قله ادب

حضرتك بتقولي الكلام دة لمين

ليكي يا حبيبتي

انا عملت لحضرتك حاجة
شوف ياختي البت بتكلم الواد بتاعها عيني عينك كدة وتقوله تعلالي البيت
ومستنياك وهنام .. لالالالا كلام كتير اوي


دة انا قلت كل دة

اشحال ما كنت قاعدة جنبك وسماعكي

علي فكرة انا مش هرد عليكي لانك ست كبيرة وكويس اوي اني مسهوكة وقليلة الادب مع جوزي

وحطيتلها الدبلة في عنيها

ولا كونش متسهوكة وقليلة الادب وبسمع الناس اللي جنبي
عن اذنك محطتي جت

نازلة الجاية حضرتك

تتلفت بابتسامة وتخبرني

لا اتفضلي يا مدام

علي فكرة انتي جدعه اوي

____________________________


يا بنتي مش عارفة انا عايزة ايه بس اللي اعرفه اني مش عايزاه
انتي نسيتي كلام الدكاترة

دول حمير

ثم مش عايزة نعمة ربنا.....كتير اوي بيتمنوها

عارفة

بس مش لما اكبر انا واربي نفسي الاول

ههههههههههههه هو هيربيكي

وهو مين هيربيه في الايام السودة دي

يا ساتر

سبيها علي الله

سكتي ليه

تفتكري ربنا بيحبني ؟؟؟؟؟

53 Comments:

Blogger حزيــــــــــــــــــن said...

انجى انا مش عارف اقول ايه
حقيقى الكلام والمشاعر اختلطت فى حاجات كتير مفهمتش انت عايزة تقولى منها ايه بس تقريبا عشت الحاله كلها معاك
أقولك على حاجه انسى
...
بس اللى انا متأكد منه انى بعلق بس عشان اسلم عليكى لكن البوست دا مينفعش التعليق عليه خصوصا من حد زى انا على الاقل
ربنا معاك

Tue Dec 16, 07:37:00 AM GMT+2  
Blogger أنـــا حـــــــــرة said...

انجى


الف مبروك متأخر كتير بس عادى الأهم ان ربنا يباركلك ف كل وقت و أى مكان

بالنسبة لى المشاعر المش مفهومة بتبقى الى حد ما واضحة ، بس مش مهم نفهم المهم نحس

انجى هقولك حاجه .. طبيعى جدا انك تتغيرى ، طبيعى جدا تقييمك للامور يختلف ، طبيعى جدا تسيبى حاجات قديمة و تروحى لحاجات جديدة

بس المهم تفضلى انتى انتى ف كل دول

ربنا يتمملك بخير يا قمر

Tue Dec 16, 10:20:00 AM GMT+2  
Blogger sakayar said...

أنا أفتكر ان ربنا بيحبك ولا أذكي على الله أحد لكن أفتكر يعني

بصي يا انجي يا اختي
مش عارف اقول يا مدام انجي ولا هتضربيني بحاجة ف وشي فيه ناس بتتضايق ... وفيه ناس بتفرح من قلبها لما يتقال لها يا مدام ... مادام إلا وجه الله على رأيك
بصي بقى
بصيتي؟؟
طيب
انتي قلتي على حاجة مهمة جدا ف البوست
وهي ان طارق بيحبك
وطالما فيه النقطة دي ف حياتكم
يبقى سيبك من أي جو خارجي
دلوقتي طارق باشا يبقى هو أصل حياتك كلها ... عيشي وخليه دايرة حياتك وحاولي تسعديه وتسعدي نفسك معاه وهو جدير بكده على الرغم اني معرفوش اووي او متابعتش مدونته كتير بس من كلامك واضح هو ممكن يعملك ايه ... انا عن نفسي حسيته ابوكي واخوكي وكل حاجة
ربنا يسعدكم سوا
أما عن التدوين فأنا شايف بما انك فعلا كنتي دخلتي ف موود حزن كتير وكتير بتتكلمي ف احزانك وووو فممكن يبقى فيه حتة كده زي انك خايفة يتقال هو طارق مغيرهاش او مش محسسها بسعادة ووو .... لكن المفروض نفصل بين كوننا مدونيين وبين الحياة الشخصية اللي الناس تعرفها
وانتي لما بتحكي عن حياة شخصية ف المدونة مش لازم يبقى كل شيء متعلق بطارق
متهيألي ممكن تسألي طارق نفسه عن رأيه ف المواضيع اللي بتدور ف بالك قبل ما تنشريها ... وساعتها متهيألي هيبقى حل مرضي ليكي وأكيد له .. بما إنك بتقولي حياتك معادتش بتاعتك لواحدك
دمتي بخير وسعادة وكل خمس شهور وانتم بأحسن حال

Tue Dec 16, 10:34:00 AM GMT+2  
Blogger walaa said...

ازيك يا انجى
مش مفهوم لكن انا فهمتك حسيتك بس صدقينى احساسك طبيعى مش بسهوله نقدر نتغير وخصوصا لو كنا واحنا بنتغير حاسين ان احنا بنتغير وقتها بيبقى التغير صعب ومش مفهوم وكمان بنبقى خايفين منه ومش عارفين هنبقى مين
لكن اقولك عيشى التغيير كله حسيه كله وخليكى خايفه وفى نفس الوقت شجاعه
واقولك حبى طارق قوى حبيه كل وقت ومتخليش الخوف يبعدك عنه
وسلامى ليكى وله

Tue Dec 16, 12:34:00 PM GMT+2  
Blogger فارس عبدالفتاح said...

قد يكون اصطدام بالواقع على خلفية غير واعيه بما هو قادم

وفقك الله واحسن حالك

Tue Dec 16, 12:38:00 PM GMT+2  
Blogger shayma said...

ياااااااااااااااه يا انوووج
ايه ده كله
كلام من جوه اوى وكلام بجد يلمسك اوى
يمكن انتى شايفه انه مش مفهوم عشان احنا مش انتى
بس بجد فهمتك وحسيت بيكى

وعايزه اقولك حاجه سيبك من الى عدى والى فات وخليكى فى دلوقتى وبكره وبس
متخليش حاجه فاتت مهما كانت تاثر عليكى وعلى بكرة
انتى بنت النهارده ومعاكى ابن النهارده يبقى عيشو النهارده وبكره من غير كلاكيع ومن غير متعملى حساب لحد او لموقف ميستاهلش

انتى اجمد واكبر من كده
وبالنسبه بقى للى فاكره انه مش هيلاقى حد يربيه متقلقيش هاتيه انتى بس والبلوجريه يربوه
:))))
هو فى احسن من كده
هههههههههههههههه

سلامى يا قمر يا حلوة اوى
:)))

Tue Dec 16, 01:38:00 PM GMT+2  
Blogger shayma said...

واكييييييييييييييد ربا سبحانه وتعالى بيحبك طبعا انشاءالله

Tue Dec 16, 01:39:00 PM GMT+2  
Blogger مـحـمـد مـفـيـد said...

ليه كده
ليه كل ده
طبعاً لا تعليق علي جزء معين وانتي عارفاه
ولكن لازم تدوسي علي حزنك وتبصي لبكره
لانك طول ما انتي كدجه محدش هيحس بيكي غير طارق وده في حد ذاته غلط

Tue Dec 16, 01:39:00 PM GMT+2  
Blogger smraa alnil said...

حزين

البمهم انك حسيت انا بقول ايه

لان يانا شخصيا مش فاهمة هههههه

ووالله انا بحاول انسي بس تقريبا اللي حواليا مش عايزين ينسوا ومش عايزين يسبوني في حالي

ربنا يكرمك ويفك حزنك انت كمان

_______________________________


انا حرة

الله يبارك فيكي يا ياسمين عقبالك بقي عشان عايزين نخلص منك

انا عارفة ان انتي هتحسي باللي كتبته

انا عارفة انه طبيعي بس يمكن انا مش كنت مستعدة للتغييير دة

بحاول افضل انا بس زي ما تقولي كدة في حاجات هتلاقيها بعد كدة بتجبرك انك تتغيري ومش تبقي انتي

بكرة تجربي وتشوفي
:)))

ربنا يخليكي ييا جميلة

Tue Dec 16, 02:23:00 PM GMT+2  
Blogger smraa alnil said...

sakayar


ادينا بلصينا

طبعا هتتضرب بحاجة في وشك

انا طبعا عارفة ان طارق بيحبني وانا كمان بموت فيه

يا ابني هو كل حاجة زي ما قلت واكتر والله

مانت يا ابني مش عايش في الدنيا لوحدك

الناس مش بتبقي عايزة تسيبك في حالك

جايز فعلا اللي انت قلته اني خايفة من التدوين لتكون الناس فاكرة اني فعلا مش مبسوطة
او ان طارق مش قادر يسعدني

المدونة هي حياتنا صعب انك تفصل

اي نعم مش كل حاجة بتتكتب في حياتنا الشخصية علي المدونة بس

هي انت

هههههههههههههه

طارق بيحب كتابتي بغض لنظر هقول يه بس بقي ليه شوية تحفظات

عامة هجرب نصيحتك
وعقبالك بقي
_______________________________

ولاء


ازيك انت يا ولاء

انا عارفة انه طبيعي بس لما تيجي انتي تعيشيه ممكن مش يبقي طبيعي ليكي


ممكن اعيش التغيير زي ماناا

والله بحبه لدرجة الجنون

بس بحاول وخايفة افشل


الله يسلمك يا قمر

Tue Dec 16, 02:43:00 PM GMT+2  
Blogger smraa alnil said...

فارس عبد الفتاح


ومين علي خلفية بما هو قادم

ربنا يكرمك يارب

وشكرا علي المرور

__________________________________


شيماء


كويس انك حسيتي بيا

احيانا من كتر التفكير في بكرة بتتعبي اوي ومش بتبقي عارفة تعملي ايه وبتوهي


صدقيني مش سهل انك تسيبي اللي وراكي

بس بحاول

هههههههههههههه

خلاص يا سيتي هديهولكو تربوه

وربنا يستر

ونععم بالله

________________________________


محمد مفيد

طبعا مش هعرف اعلق علي كلامك

بس اكيد انت عارف اللي فيها

Tue Dec 16, 02:44:00 PM GMT+2  
Blogger samamasr said...

أنا مش عارفة.أنا كنت فاتحة علشان أقول لحضرتك كل سنة وانتي طيبة وانتم الاتنين بخير..رغم برضه عدم المعرفة..بس حبيت حضرتك وحبيتكم فعلا في الله

مش تزعلي من حاجة..الزعل في يوم..هيعدي ويفوت..وإن شاءالله يارب كل خير
عيد سعيد عليكي وعليكم انتم الاتنين وانتم بخير يارب:)


ارمي الزعل اللي في يوم ورا..أهو عدى وفات :)


عيد سعيد مرة تانية مؤخرا:D

أختك وأختكم في الله..إيمان:)

Tue Dec 16, 04:02:00 PM GMT+2  
Blogger maha zein said...

اممممممممممممممممممم

علي فكرة بعد ما كنت متبعاكي بوست ورا بوست فقدت الامل انك ترجعي تكتبي تاني
قوم ايه
فوجئت انك معلقة عندي
ازبهليت وفرحت في نفس ذات الوقت
اه وربنا
فرحت جدا

عموما انا صراحة كنت اقصد انجي تانية بس صدقيني لو ادركت من زمان انك رجعتي مكنتش استنيت تيجي تسأليني انهي انجي دي

بخصوص كلامك هو صراحة شكلك انك معبية
فضفضي ياختي فضفضي

عوما اكيد كل لكامك وصل مية فكرة لمليون واحد...وممكن نكون اللى احنا فكرنا فيه مش اللى انتي تقصديه خالص

عموما انا في حالتك اني بالذات كنت منتظرة تتجوزي طارق عشان اشوف كلامك بعد كده
هل فعلا هتلاقي فيه كل اللى كنتي بتحلمي بيه
هل ي كل الناس كل حاجة بتتغير بعد الجواز ولا الدنيا حلوة
ده اللى انا مستنياه
متحوليش بقه توصليلي افاكار تحمل اكثر من معني عشان مبدأش اشك انا

عودا حميدا ليا انا عندك
رنا يسعدك

Tue Dec 16, 05:34:00 PM GMT+2  
Blogger new life said...

أنوج
يمكن ده اول تعليق لى عندك بعد التغيير الشامل و يمكن متعرفيش انا مين
لكن اللى عاوزة اقولهولك انى تابعتك لفترة طويلة عشت فيها أحزانك و فرحتك فهمت كتير من حياتك و عرفت قد إيه انتى انسانه حساسه بتتأثر بكل حاجة حواليها و يمكن كمان لقيت فى حياتك كتير قوى من حياتى بس اوعى تسيبى نفسك للحزن ياخدك تانى
انتى لقيتى اول خيط السعاده
امسكى فيه و امشى وراه متبصيش للى حواليكى
قابليهم بإبتسامة لا مبالاه
محدش عايش فى الدنيا لوحده لكن احيانا لما يكون اللى حوالية سبب فى متاعبه لازم يفكر بشكل مختلف و يقنع نفسه انه لوحده عشان يقدر يكمل

Tue Dec 16, 07:17:00 PM GMT+2  
Blogger maha said...

سلام عليكي يا انجي
الف الف الف مبروك يا جميلة لسه حالا شايفة صور الفرح
ربنا يسعدكوا يا رب و يفرح ايامكوا كلها
...
جميل انك تقولي كل اللي جواكي ..المهم تحسي انك ارتحتي ..متتخيليش فرحتي بجد اد ايه لما لاقيت في كلامك ان برغم كل المشاكل و الشد اللي كان في الاول ..بس اهم انسان في حياتك بقي خلاص الحمد لله جنبك ..يا رب سوا علي طول
انجي ..مدام انتوا سوا خلاص ..كفاية انك تكوني جواكي مطمنة انكوا مع بعض بعد كده كل شئ يهون
يا رب يسعدكوا يارب
ااااااااااااااااااامين
مها

Tue Dec 16, 07:56:00 PM GMT+2  
Blogger bagabigo said...

وحشتينى اوىىىىىىىىىىىىىىىىىىىىىىىى

Wed Dec 17, 10:30:00 AM GMT+2  
Anonymous مصطفي ريان said...

بصي يا انجي اللي انتي بتقوليه دة انا شايف انه طبيعي كتير مننا بيكتب كنوع من الفضفضة ولأنك الحمد لله طارق مالي عليكي حياتك فاكيد انتتي بتتكلمي معاه في كل شيئ على بالك وكل حاجة عايزة تقوليها هنا بتقوليها له بشكل او باخر فحاسة انه مش مهم للأن الكلام فعلا اتقال
- ربنا يخليكو لبعض ويبعد عنكم الشيطان
وتفضلو تتكلمو وتحكو
سلامي ليكي وللجميل طارق

Wed Dec 17, 10:35:00 AM GMT+2  
Blogger Doba said...

أنا هقولك فيه ايه
===========

لو بتسألى ربنا بيحبك فانا اقولك انه بيحبك قوى قوى - ليه بقى - لانه حباكى بعقل جميل قادر انه يميز ويختار يعمل الصح ويوقف الغلط وميعملهوش

ربنا حباكى بعقل اختار انك تدلعى جوزك وتهتمى بيه وتحببيه وتعلميه يهتم بيكى - وبالطريقة دى انتم الاتنين اختارتم انكم تبنو سوا اسرة سوية البنيان - فاوعى تقلقى او تتهزى وحافظى على بيتك بكل قواكى

ربنا ادالك قلب كله مليان طيبة بيحب يساعد من حوله ولكن لما متلاقيش نفس المساعدة والايد بتبعد مش بتتمد تساعدك متزعليش لان دى قواهم وقدراتهم

ربنا ادالك طيبة واللى بيها مش بتحبى تأذى حد او تستهبلى على حد وان بطرقك الشرعية دى انتى بتاخدى ثواب - الاستهبال طرقه وحشه قوى وآخرته عدم راحة وقلق انتى فى غنى عنه

ربنا مديلك قوة وحب وعقل وايمان انتى بس اللى مش قادرة تقدريه الخير اللى انتى فيه وتستمتعى بيه صح

الست لما بتتجوز بتقعد فترة طويلة مهزوزة لاختلاف العادات والمسئوليات وعلشان تتأقلمى علمى نفسك تحبى كل حاجة حواليكى وانك تعملى مسؤولياتك وانتى مبسوطة وبتحبيها

انجى - حبى نفسك شوية ودلعيها وبصى للدنيا بعيون راضية بتحب الخير وانتى هتكونى مرتاحة جدا وف منتهى السعادة

اعرفى ان اى عقبة بتقوينا وبتخلينا نتعلم ونقوى - فاوعى تزعلى على اى لحظة ألم - لانك قوية كده منها - كمان متبصيش لمرارة الزمن - لان طول مانتى مش بتحلى ايامك هتفضلى مخنوقة - ارضى بفرصتك ودلعى ظروفك

والسلام ختام
هبة

Wed Dec 17, 11:59:00 AM GMT+2  
Blogger utopian girl said...

علي فكرة بحبك و انتي بتخرجي كل اللي جواكي بطريقة سهلة و بسيطة و بعيد عن التعقيد

اللخبطة اللي جواكي دي ناتجة عن تغير ظروف الحياة

وانتي عيشتي بأسلوب معين لفترة طوييييييييييلة أوي

مش سهل ان الواحد يتغير في لحظة

وطالما طارق بيحبك ان شاء الله هيصبر

وانتي زي الفل

بس محتاجة تتعودي علي حياة جديدة أحلي

علي فكرة سيبك من الجو ده كله

و سيبك من كريمة

و سيبك من اللي قبل كدة

انتي دلوقتي بس مدام نوجا وبيتك زي ما قلتي في الهرم

بعيد عن كل الماضي اللي كان بيوجع

بت انتي متوجعيش دماغك باللي فات

ركزي في مملكتك بسسسسسسسسسسسس

Wed Dec 17, 01:51:00 PM GMT+2  
Blogger maioya said...

حسيت معاكي كل حاجه قولتيها
حسه ان مشاعرك مختلطه بعضها في مواقف كتير اوي
ربنا يهنيكي يارب
وافولك متحطيش في دماغك كلام حد
وعيشي لنفسك ولجوزك
انتي وهوا وبس مع نفسكم ولنفسكم
وسيبكم من العالم اللي بره ده ;)

Wed Dec 17, 02:48:00 PM GMT+2  
Blogger حبيبه said...

بصي ياانجي عاوزة اقولك ان الاحاسيس اللي جواكي دي طبيعية لاني جربتها قبلك
انتي بتكوني عاوزة جوازك ينجح فبتحسي انك مسئولة عن حاجات كتير وعاوزة تتصرفي صح دايما
دة غير اني فيه حاجات كمان كنتي متخيلة انها المفروض تحصل ولكنها محصلتش كل دة بيخليكي تتغيري ومشاعرك كمان تتغير
يارب اكون فهمتك وقدرت اوصلك اللي جواية
تحياتي لكي

Thu Dec 18, 12:09:00 AM GMT+2  
Blogger بيسوو said...

لألأ..متغيرتيش قوي يعني..هي الروح ممكن تتغير يا انجي؟

وبعدين يابنتي طبيعي انك تحسي بتغيير اكيد يعني انتي كنتي متوقعة حاجة زي دي

بتغيظيني لما تبقى الحياة ماشية معاكي حلو وزي الفل وتصممي تاخدي في بالك من عمايل الناس اللي حواليكي..متعرفيش تكبري الجي وتروقي الدي..هو انتي مش من البلد دي ولا ايه يابنت؟

بصي يانوجة يا حبيبتي..انتي عارفة طبعا ان انا اخر واحدة ممكن تدي نصايح في البلد دي..وعارفة كمان ني بحبك وبعزك اي نعم مش بقول كدة كتير ولا انا عارفة صلا اوصل ده ازاي بس هو ده الواقع

عايزاكي تعيشي يا انجي..لأ مش تعيشي وبس عايزاكي تعيشي صح وتنسي ما مضى حلو او وحش

ليكي وحشة :)

Thu Dec 18, 02:02:00 AM GMT+2  
Blogger الربان said...

تحياتي

اولا مبروك الزواج و لو ان التهنئة متأخرة ...معذرة.

ثانيا... انت انتقلت من مرحلة لاخري و محتاجة لوقت حتي تستقري و تتأقلمي

ثالثا...هذه المرحلة ستنتابك مشاعر
متضاربة و متناقضة....لكن ان شاء الله
ستتجاوزي كل هذا.

رابعا...حاولي ان تعيشي اللحظة بلحظتها بكل ما فيها من سعادة و مرح.

تحياتي و تمنياتي بكل التوفيق و السعادة....

Thu Dec 18, 10:50:00 AM GMT+2  
Blogger SemSem said...

اولزيارة لى فى المدونة
والحمد لله تهت فى البوست خالص وانا بقراه
بس واضح ان فيه حاجات محزنة
باذن الله زيارتى لن تكون الاخيرة

تحيااااااااتى
ادعوكم لزيارة حواديت

Sat Dec 20, 06:34:00 PM GMT+2  
Blogger šσяšαяαα said...

هو كلام ملخبط بس مشاهد مترتبة
مش عارفة ازاى:)

كل مشهد بيعبر عن حاجة جواكى عشتيها ولسا بتعيشيها

يعنى دى خولاصة الفترة اللى قضيتيها من غير تدوين:)

وبدعيلك بجد ياسمورة ان ربنا يديم عليكى السعادة ويرزقك بالذرية الصالحة
اللهم امييييييين
:)

Sat Dec 20, 08:22:00 PM GMT+2  
Blogger أحمد عيسي said...

اللي اقدر اقولهولك ان اي حد مش حيبطل يتكلم وان احسن حاجة تعمليها ان انك تبطلي تسمعي وتحطي جواكي

استمتعي بكل لحظة انتي سعيدة فيها لانها مش حترجع تاني..وانسي اللي فات

مبروك..وربنا يسعدك يا رب

Sun Dec 21, 09:01:00 PM GMT+2  
Blogger ذو النون المصري said...

يااااااااااااااااااااه
كل ده كتباه في بوست واحد و بتشتكي من قلة البوستات؟؟؟؟؟؟
كل سنه و انتي طيبه بمناسبة عيد الميلاد و ان كانت متاخره
تحياتي

Sun Dec 21, 10:45:00 PM GMT+2  
Blogger آلام وآمال said...

الحقيقة مش قادر اقرا كل الكلام ده
وكمان انتي بشرتيني من اولها وقلتي انه مش مفهوم
:))

قلت ادخل اسلم عليكي واكتفي بالزيارة سادة المرادي بس اقولك حمد لله على سلامتك
ونورتي مدونتك من جديد بعد غياب

Mon Dec 22, 02:48:00 AM GMT+2  
Blogger arsenalwy said...

يانهار ابيض

ايه ده

انا مش فاهم حاجه خالص

Wed Dec 24, 10:43:00 AM GMT+2  
Blogger Hamed Ibrahim said...

ألف مبروك يا إنجي
معلهش جات متأخرة
فرحت لك جدا
:)

Sat Dec 27, 05:37:00 AM GMT+2  
Blogger الدرويش المرووش said...

سؤال مهم جدا فى هذه المرحله الحساسه

هو أنا إسمى إيه و جيت هنا ليه

يا لهوى

أنا تهت من مجرد القراءه

أمال إنتى دماغك عامله إيه دلوقت

Thu Jan 01, 11:50:00 AM GMT+2  
Blogger Ehab said...

10/10
اللي عملتيه في الوليه طبعا
:D

Fri Jan 02, 11:31:00 AM GMT+2  
Blogger No Fear said...

السلام عليكم
أية الصداع ده كله
:)
.
أخبارك أية؟
يارب تكون الحياة زي الفل
.
كل سنة و أنتم طيبين و بخير و في سعادة يارب
.
كبري دماغك بقة
.
عيشي الأيام الجميلة دي
متخليش اللي فات يبوظ اللي جاي
.
و بلاش الكلام الإسكندراني علشان بيضايقني قوي
.
في حد محترم بعت لك رسالة في عيد ميلادك
:)
أخوكي بردوا
.
كل سنة و أنتم بخير و السنة اللي بدات دي تكون كلها خير و سعادة
و عيال بقة
:)

Fri Jan 02, 05:35:00 PM GMT+2  
Blogger david santos said...

FREE PALESTINE!!!

"Israel's war in Gaza , 450 killed and 2200 injured ... What's next ?"

SIONISM TERRORIST, NO!!!

FREE PALESTINE!!!

Sun Jan 04, 12:16:00 AM GMT+2  
Blogger حصان بري said...

هههههههههه تصدقي لسه انجي
بتضايقك يا مدام
يا فاشل يا فاشل:)

مهما اتغيرت اسامينا او ظروفنا بنفضل احنا يا انجي

وعلي قد مابنفضل احنا بيفضل تأثيرنا في الحياه وفي اللي حوالينا

:) بقولك ايه؟
سيبك من اللي مش عاجبك

Tue Jan 06, 07:51:00 PM GMT+2  
Blogger Malk Almasria said...

بجد الف الف الف الف مبروك على الزواج
وربنا يسعد ايامك ويهنيكى ويرزقك بالزرية الصالحة وبجد لو كنت اعرف من قبلها كنت عزمت نفسى غلى الفرح على العموم ان شاء الله اجى ابارك للمولود ان شاء الله


ملك المصرية

Thu Jan 08, 09:55:00 PM GMT+2  
Blogger كلام على بلاطة said...

الدنيا دنية بتتدنى بافعالها وافعال قادتها
فلم اتمنى العيش لارى غزة وما جرى بتربتها
بشاعة وشنـــــــاعة وقسوةحتى فى ابادتها
اراضى مقدسة دنــــست بالهمجية ووحشيتها
وبشريـــــــة مريضة لاظهار عنف شراستها
فيا ارض انشــقى وابلعينا لتطهر حركتها
فلا نستحق الحياة بعد ان فقدت الدنيا براءتها
والموت لذئاب لم تفهم رسالة السماء او قراءتها

Sun Jan 11, 01:51:00 PM GMT+2  
Blogger كلام على بلاطة said...

الدنيا دنية بتتدنى بافعالها وافعال قادتها
فلم اتمنى العيش لارى غزة وما جرى بتربتها
بشاعة وشنـــــــاعة وقسوةحتى فى ابادتها
اراضى مقدسة دنــــست بالهمجية ووحشيتها
وبشريـــــــة مريضة لاظهار عنف شراستها
فيا ارض انشــقى وابلعينا لتطهر حركتها
فلا نستحق الحياة بعد ان فقدت الدنيا براءتها
والموت لذئاب لم تفهم رسالة السماء او قراءتها

Sun Jan 11, 01:51:00 PM GMT+2  
Blogger لحـــ الفرح ـــن said...

انجى .. او سمراء النيل .. او اللى

انتى بتحبيه اكتر .. يا زوجة طارق ..

ربنا يخليكى لطارق ويخليكى لكل اللى

بيحبوكى وانا اولهم .. عمرى ماشفتك

وعمرى مادخلت مدونتك غير دلوقتى بس

صدقينى اتمنيت تكونى اختى من امى

وابويا .. ربنا يسعدك حبيبتى

ويباركلك فى عمرك مع طارق وما تشوفى

ولا يوم حزين او مش ولا بد

ابداااااااااا قولى بس انتى

اميييييييييييين


ده مش كومينت على الكلام ده

دول كلمتين حسيت انى نفسى اقولهم لك اوى

اختك

لحن الفرح

Tue Jan 13, 05:16:00 PM GMT+2  
Blogger mostafa rayan said...

كل سنةوانتي طيبة وبخير
انتي وطارق الجميل
فينك ليه مش بتكتبي بقالك فنرة طويلة
طمنينا عليكي وعلى طارق

Mon Jan 19, 12:09:00 AM GMT+2  
Blogger محض روح said...

:) وحشتني بجد
وانا مقصره بجد
بس جيتي على بالي اوي
:)يارب تفضلي كميله كده على طول

Thu Jan 22, 07:48:00 PM GMT+2  
Blogger ادم المصري said...

كل اللي هاقوله انك لكم وحشة كبيرة
يارب يكرمك يا انجي يارب ويحفظك من عيون الناس
ويديم عليكي المحبة انت وطارق

Fri Jan 23, 06:02:00 PM GMT+2  
Blogger bota said...

جميل اوي فضفضتك ديه
جميله اوي كل مواضيعك
دايما كنت احب ادخل عندك لاني كنت هبقى عارفه اني هخرج مبسوطة سواء من كتر الضحك او من كتر ما بشوف حب الناس ليكي
يمكن لانك بتكتبي بتلقائية جدآ
بجد هو طلب ورجاء وتمني
ارجعي اكتبي تاني زي الاول
ومش هاقلك علقي كتير
بس انا عارفة ان اكيد في مدونات بتوحشك فاول ما توحشك ادخلي شوفيها

اسفة جدآ طولت عليكي

Sun Jan 25, 08:17:00 PM GMT+2  
Blogger روح said...

السلام عليكم
سعيدة ان دي اول زيارة ليا
لمدونتك وحزينة انها جات متاخر
رغم ان بشوف تعليقاتك
عند ناس كتير
بوستك دة عيشني في حالات كتير
انتقلت من حالة للتانية
عايزة اقولك تخلي دماغك كبيرة
وتخي بالك من نفسك ومن طارق دة اهم حاجة وماتحطيش حد في دماغك
وعاملي الناس بالحسني
فاهماني خلي دماغك كبيييييييييير
وقلبك كمان كبيييييييييييير
هتلاقي اللي حواليكي يا انجي
اتكسفوا من نفسهم والله هما هيحسوا بكدة
واحلفلك وخلي بالك من نفسك
بجد حبيتك وقريت بوست جوازك وفتح نفسي اوي للجواز وشجعني بجد
ومنتظرة زيارتك ياقمر

Wed Jan 28, 01:41:00 AM GMT+2  
Blogger catroz said...

ربنا يحفظكوا و يخليكوا لبعض ياااااااارب ..

Fri Jan 30, 06:11:00 AM GMT+2  
Anonymous Anonymous said...

A片,A片,成人網站,成人影片,色情,情色網,情色,AV,AV女優,成人影城,成人,色情A片,日本AV,免費成人影片,成人影片,SEX,免費A片,A片下載,免費A片下載,做愛,情色A片,色情影片,H漫,A漫,18成人

a片,色情影片,情色電影,a片,色情,情色網,情色,av,av女優,成人影城,成人,色情a片,日本av,免費成人影片,成人影片,情色a片,sex,免費a片,a片下載,免費a片下載,成人網站,做愛,自拍

情趣用品,情趣用品,情趣,情趣,情趣用品,情趣用品,情趣,情趣,情趣用品,情趣用品,情趣,情趣,情趣用品

A片,A片,A片下載,做愛,成人電影,.18成人,日本A片,情色小說,情色電影,成人影城,自拍,情色論壇,成人論壇,情色貼圖,情色,免費A片,成人,成人網站,成人圖片,AV女優,成人光碟,色情,色情影片,免費A片下載,SEX,AV,色情網站,本土自拍,性愛,成人影片,情色文學,成人文章,成人圖片區,成人貼圖

情色,AV女優,UT聊天室,聊天室,A片,視訊聊天室


UT聊天室,視訊聊天室,辣妹視訊,視訊辣妹,情色視訊,視訊,080視訊聊天室,視訊交友90739,美女視訊,視訊美女,免費視訊聊天室,免費視訊聊天,免費視訊,視訊聊天室,視訊聊天,視訊交友網,視訊交友,情人視訊網,成人視訊,哈啦聊天室,UT聊天室,豆豆聊天室,
聊天室,聊天,色情聊天室,色情,尋夢園聊天室,聊天室尋夢園,080聊天室,080苗栗人聊天室,柔情聊天網,小高聊天室,上班族聊天室,080中部人聊天室,中部人聊天室,成人聊天室,成人

Tue Feb 17, 11:34:00 AM GMT+2  
Blogger وينكى said...

اللى يسمع كلام الناس هايعيش طول عمره محتاس
انتى يابنتى مالك فيه ايه
انا حاسه انك بتاخدى بالك من حاجات بجد لو فوتيلها هاترتاحى قوى
ويلا بلاش كسل مستنيه منك بوست جديد
هابي فالنتاين يا قمر
والله واحشانى

Tue Feb 17, 03:21:00 PM GMT+2  
Blogger 3abasya wa7ed said...

بسم الله

حمدا لله على السلامة فى التدوين

حاولى تدونى زى الاول عادى جدا

وخدى بالك من طارق لانه بجد انسان محترم وبيعزك وربنا يخليكم لبعض يارب

خلى دايما اهم حاجة فى حياتك هوا البيت وطارق وهتبقى أسعد إنسانة فى الوجود ومش مهم اى حد تانى


ربنا يوفقك ويحفظك ويعزك

عباسية :D

Thu Feb 19, 03:32:00 PM GMT+2  
Blogger 3abasya wa7ed said...

طول ما فى إبتلاء وفى تفكير فى ربنا

يبقى أكيد ربنا بيحبك

ان شاء الله

Thu Feb 19, 03:49:00 PM GMT+2  
Blogger ست الحسن said...

مساء الخير

عجبني البوست بتاعك خااااالص
فيه صدق وحب شديد
وشوية خوف صغيرين

انتي خايفة تكتبي اللي جواكي للناس تقول انك مش سعيدة ويظلموا جوزك ويظلموكي وانتي عارفة انكم بتحبوا بعض
في الوقت نفسه انت متلخبطة وحاجات كتير بتحصلك ... بيت جديد وحياة جديدة وتعاملك مع الناس اختلف
بقيتي شخص مسئول عن عيلة

هقولك على حاجة مش عارفة هتصدقيها ولا لأ
عندي أصدقائي متجوزين قريب عن حب بجد
وبردو متلخبطين وتايهين ومصدومين شوية في الحياة الجديدة
ودا عادي خااااالص وبيحصل لكل الناس
ومش معناه ان اللخبطة دي هتطول أو ان جوازتك مش هتبقى جوازة سعيدة
عادي يا إنجي دا الطبيعي
أصعب سنة جواز هي أول سنة

.....

الست اللي في المترو دي
كتبتيها حلو أوي
ضحكت فعلاً
وهم فعلاً بيحشروا نفسهم في اللي ميخصهمش

...

Sun Feb 22, 01:22:00 AM GMT+2  
Blogger كلاكيت تانى وتانى said...

ارجو نشر الايفنت لديك على مدونتك والدعوة لحضور الحفل بين كل المدونين وذلك لتأييد المدونات المشاركات فالحدث ويشرفنا حضورك
حفل توقيع العدد الثالث من سلسلة مدونات مصرية للجيب
كتاب "أنا انثى " ..لمجموعة من المدونات النساء

أول كتاب يناقش اهتمامات المرأة بقلم مجموعة من النساء ويطرح القضايا للنقاش

ضيفة شرف الحفل ..(غادة عبد العال ) صاحبة مدونة ..عاوزة أتجوز..والتي صدر لها كتاب بنفس العنوان عن دار الشروق

ومن المشاركات في كتاب ..أنا أنثى
نوارة نجم
اسر ياسر
ايناس لطفى
نرمين البحطيطى
شمس الدين
د . رشا عبد الرازق
بيلا شريف
مكسوفة
بسمة عبد الباسط
مريم الغنيمى
إيمان نادى
زهراء امير بسام
آية الفقى
مروة السيد
أميرة محمد محمد محمد
فاتيما
مذكرات عانس
نرمين البحطيطى
سلمى أنور
انجى سمراء النيل
سارة ابراهيم على
سمر مجدى
مروة النجار
شيماء حسن
نسرين عبد النعيم
د.مرام محمود
ايناس لطفى
نجلاء الشربينى
محاسن

يصاحب الحفل عرض فيلم قصير و==================================
المكان
المركز الثقافى الدولى
17 ش السد العالى ميدان فينى الدقى
الشارع المقابل لشيراتون الجزيرة
اقرب محطة مترو انفاق محطة الاوبرا
الزمان
يوم 3 مارس الساعه 4.30 عصرا

Sun Feb 22, 01:00:00 PM GMT+2  
Blogger arab girlscool said...

This is such a nice addition thanks!!!
عرب كول
شات صوتي شات
شات مغربي
دردشه صوتيه
إنحراف كام
شات عرب كول
صوتي شات كول
دردشه صوتيه
سعودي كول

Fri Nov 08, 01:49:00 PM GMT+2  
Blogger light-elrahman.com/ said...

شركة مكافحة النمل الابيض بالدمام
شركة تسليك مجارى بالدمام


Tue Apr 25, 09:33:00 PM GMT+2  

Post a Comment

Links to this post:

Create a Link

<< Home