جئت يا يوم مولدي
يا نجاااااااتي انفخ البلالين عشان عيد الميلاد
انبارح كان عيد ميلادي
وبقي عندي 27 سنه
مش باين عليا صح ؟؟؟؟؟؟
لسة شباب برضه
اصل الدهن في العتاقي
وانبارح كان عيد ميلاد مدونتي
بقي عندها سنتين
ياااااااااااااه كبرت اوي
في الاول لما تميت ال 26 سنة فجأة حسيت اني كئيبلة ودمي تقل
لاني حسيت اني بكبر اوي من غير لازمة
لكن دلوقتي فرحانة بس مش اوي يعني اني بكبر بس وانا مع طارق
اما مدونتي بنوتي الصغيرة اللي بقي عندها سنتين
واللي فيها 85 موضوع
شافت كتير من احزاني
وشافت كتير من ذكرياتي المهببة
وشافت قصة حبي مع طارق
وخطوبتي وجوازي ليه
كل سنة وانتي معايا
شافت حاجات عامية
زي رجل البنطلون فردة وفردة
ودشمة دبشة الصوان
و وشوش
وعلامة استفهام مقلوبة
ويقال انها لغه عربية
زي لحظات
وعشق الهمسات
وابجدية ارقام
ويقال برضه انها قصص قصيرة
زي عالم الدمي والصمت
ورقصة مع المطر
وشرقية ساذجة
وفتاه في عصر الممنوع
وقلوب لاتنبض
ومواقف انا مريت بيها
زي انا وامل وشجرة التوت
وانا وامل في ميكروباص 26
واول مظاهرة مشيت فيها
واتحدوا يا نساء مترو الانفاق
وارجوك عفوا لا تتبول مكاني
وذكريات بقي في مدرسة الايمان
حبيت فيها طارق كتير وزعلت فيها اكتر وحكيت مواقف من حياتي الشخصية
دة غير التاجات
واعيد الميلاد والمناسبات واللقاءات السرية لبعض المدونين
دة غير المواقف السياسية والاراء الشخصية ليا في البلد بحكم اني استراتيجية محنكة
مش تزعلي مني اني كنت سيبتك فترة مليانة تراب
بس صدقيني غصب عني انتي عارفة بقي لخبطة الجواز
وغلاسة حنفي وتامر بتاع النت الله يسامحه بقي
هما اللي بعدوني عنك
بقي عندي 27 سنة ومدونتي بقي عندها سنتين
عقبال ما اشوفك يا حبيبتي عندك 100 سنة ولو انها واسعه شوية
كل سنة وانتي طيبة
وكل سنة وانا طيبة
ودي تورتي ليكي
Labels: خاص ومقابلات ومناسبات
posted by انا اللي كاتباها هو في غيري يعني at 5:28 PM
42 Comments:
انا مبسوطه انى اكون اول واحده اهنيك بعيد ميلادك وعيد ميلاد مدونتك مدونتك اكبر من مدونتى بشهر
احنا كمان اتعلمنا منك كتير انجى من صبرك وتحملك وضحكتينى كتير
بجد مفتقده تواجدك ومفتقده كلماتك
كل يوم وانتى وطارق فى سعادة وسرور وهنا وتفاهم واخلاص وحب
اللهم امين يارب العالمين
كل سنه و انتى طيبه يا انجى
كل سنه و طارق معاك
كل سنه و مدونتك بتكبر معاك
كل سنه و انتى بالف صحه و اتم حال
كل سنة وهو وانتى واحنا وحنفى وتامر والهزيز طارق
بخير
لفيت على البوستات دى كلها
ومش افتكرتها هى بس لا افتكرت بوستاتى وافتكرت احادث كتير حصلت فى سنتين
كل سنه وانتى طيبه
وكل سنه ومدونتك بألأف خير
تحياتى
كل سنه وانتي طيبه
و السنه اللي جايه ان شاء الله يكون معاكي النونو الجميل
السلام عليكم
كل سنة و أنتم طيبين و بخير و مع بعض دايما في سعادة
من اجل مصر
شارك في الحملة الشعبية للقيد بالجداول الانتخابية وادعو غيرك
ضع بنر الحملة علي مدونتك
البنر موجود علي مدونتي
اذا كنت ترغب في وضعه علي مدونتك ارسل ميلك كي ارسل لك كود البنر
ارجو المعذرة للدخول بلا مقدمات لأني ادخل علي مئات المدونات يوميا
كل سنة وانتي وهي طيبين ياانوج
ويارب عقبال 100 مليون سنة
تعيشيهم في سعاده مع طارق وتدويني فيهم زي مانتي عايزه ياستي
كل سنة وانت راس يا عمي !!! قصدي كل سنة وانت طيبة يا أميرة
تحياتي العطرة
كل سنه و انتي طيبه يا انجي ومدونتك مستمره و فيها جديد دايما
نتمني دايما تكوني موجوده و زي الاول كلامك كتير
:)
تحياتي
ايه الايام المفترجة دى
يعنى خلال يومين بس 15/16 نوفمبر
يكون عيد ميلاد مدونتك
وعيد ميلادك
وفووووووووووز الاهلى بكاس افريقيا..اووووه اهلاوى
كل سنة وانتى طيبة يا سامورة ....وكل عام وانتى الى الله اقرب
وان شاء الله السنة الجاية تكتبى البوست بتاع عيد ميلادك ..وانتى على حجرك نونو بيقرف فيكى :p
سلام يا انوجى
السلام عليكم ورحمة الله وبركاته
كل سنة وانت طيبه يا انووووووووج ويارب عقبال مليون سنه في سعاده انت وطارق
سلام ياقمر
كل سنه وانتي طيبه يا ستي
عارف اني مقصر معاكي
بس المهم اني اطمنت عليكي
واتجوزتي وريحتينا من مشاكلك
هههههههههههههه
مبروك متأخره صحيح بس مش مشكله كل يوم حلو ليكي مع طارق حبيبك تستاهلي عليه مبروك جديده
ولا ايه؟
سلاااااااااااااااااااااام
اخوكي ايهاب
الف مبروك
و كل سنة و انتي طيبة
و عقبال 99 سنة
و ربنا ما يكتر من الأحزان
و فين بقى تورتة عيد الميلاد
كل سنه وانت طيبه
السلام عليكم
كل سنه وانتي طيبه يا إنجي وعقبال 200 سنه مش ميه بس
ويارب دايماً تكون كل سنه أجمل من اللي قبلها سواء في حياتك أو في حياة المدونة
معلومه
على فكرة انتي تعتبري من المدونين بقالك أكتر من سنتين
ماتنسيش السبيس بتاعك اللي كان قبل ماتعملي المدونه
يعني تقدري تقولي بقالك ثلاث سنين في التدوين وسنتين في المدونة دي
خالص تحياتي
وكل عام وانتي بخير
كل سنه وانتى طيبه
وكل سنه وأى حاجه بقى طيبه
وكل سنه وانتى طارق بتعيشو حب أكبر من السنه اللى قبلها
وعقبال ما تخاوييها
((:
كل سنه وانتى طيبه يا قمر وعقبال مليوووووووووون سنه وانتى بتكتبى دايما كل حاجه فى مدونتك الصغيره عجبنى جدا احساسك بالكتابه والتدوين حسيت بجد انها المدونه دى بنتك وانتى نفسك تكبريها يا رب دايما تفضلى تعملى كل الى انتى حباه ويا رب مش نشوف فى كتابتك اى حزن يمر فى حياتك وتكونى دايما سعيده
كل سنة وانتي طيبة يا انوج..انا عارفة اني مقصرة بس غصب عني والله
هييييييييه الدنيا مشاغل وتلاهي..وانا بصراحة اكتر واحدة ملهية ومشغولة :)
يلا كل سنة وانتي مبسوطة قوي قوي
الف مبروك علي اول عيد ميلاد ليكي
في بيتك طبعا
وكل سنه وانتي بالف خير
وكل سنه ومدونتك طيبه
وتفضلي فيها طول العمر
عيد ميلاد سعيد
معلش متأخرة شوية لأن 20 صديق سبقوني وقالوهالك.
ربنا يسعدك ويجعل كل أيامك أعياد ويديم الحب والتفاهم بينك وبين طارق إن شاء الله.
تحياتي لكما
مبروك العودةوقبلها لجواز
مبروك عليكي طارق وهو مبروك عليه احلى سمراء
بارك الله لكما وعليكما وجمع بينكمافي خير
كل سنة وانتى طيبة
فرق بتاع 5 سنين كده ...عجوزة :p
بهزر طبعا ههههههههههههه
الف مبروووووووووووووووووووووووووووك
وعقبال كده لما نفرح بأول سليل ...ونلاقى اسمه هنا بيكتب معاكى
وطالما انتى مع حد بتحبيه هتحسى انمك بتصغرى معاه مش بتكبرى
او لو كبرتى هتكبرى بالراحه مش بسرعه
ربنا يخليكوا لبعض
:)
كل سنه وانتى طيبه يا انجى
وكل سنه و مدونتك الجميله طيبه و باحسن حال
كل سنه وانت طيبه يا قريبتى
وابقى سلمى على ام منه
كل سنة وانت طيبة
وعبقال ألف سنة
وان شاء الله تحققي كل أحلامك وأمنياكك
يبدوا ان الصداقة والتي هي أثمن شئ وقد أصبحت بلا ثمن في هذا الزمن
فكرتني بصديق لي قال نفس الكلام
واقتنع بأن هناك دخلاء علي عالم التدوين والصحافة
وأعطاني مثال بصاحبة مدونة" صحفية مع وقف التنفيذ"وكذلك هي نفسها صاحبة مدونة "كلمة سر" أنها تفعل أشياء كثيرة وتستغل مصطلح الصداقة والصحافة وهم منها براء-ولأنه ثبت لي انه لم يكذب فيما قال حاولت كثيرا
محادثة شيماء ولكن بلا فائدة ولم تثبت أنها علي غير ذلك وهربت
شكرا علي كلماتك والتي تفتح الجرح كلما ظن الناس انه شفي
وربنا ينعم عليك بنعمة الاخلاص في كل شئ وتجده في أحبائك وأصدقائك
كل سنة وانتي بخير وطارق معاكي ويارب قبل السنة الجاية يكون معاكي طارق الصغنون يااحلى انوج
من اجل مصر
شارك في الحملة الشعبية للقيد بالجداول الانتخابية وادعو غيرك
ضع بنر الحملة علي مدونتك
البنر موجود علي مدونتي
اذا كنت ترغب في وضعه علي مدونتك ارسل ميلك كي ارسل لك كود البنر
ارجو المعذرة للدخول بلا مقدمات لأني ادخل علي مئات المدونات يوميا
سنة حلوة ياجميل
مرتين
كل سنه و انتي طيبه و مدونتك بخير
يا سمرا
و مبروك مره تانيه
و مستنيه كتاباتك الجديده
كل سنه وانتي طيبه وعقبال 100 سنه انا اول مره ازورك صورك بتاعت الفرح حلوه جدا وكنتي زي القمر وعقبالي يارب وربنا يوفقك ويسعدكم سوا
لالا مش معقول
بجد مش مصدق
اغيب شوية وادخل مدونتك الاقي كتب كتاب وجواز وعيد ميلاد المدونة وعيد ميلادك كمان
كتير عليا يا رب
بجد والله متعرفيش فرحت اد ايه جدا جدا جدا بالجواز السعيد ده
ياريتنى كنت دخلت من زمان وعرفت على الاقل كنت حضرت والله
ربنا يسعدكم يا رب ويبارك لكم
وبجد زعلان من نفسي انى متأخر اوي كده
سامحيني يا اختى الكبيرة
وكل سنة ومدونتك طيبة
اللى اتعلمت منها يعنى ايه تدوين وكانت من اوائل المدونات اللى بتابعها
وكل سنة وانتى طيبة وعقبال 54654 سنة
وربنا يباركلك في عمرك يا رب
تحياتى القلبية لكي وللعريس
متأخره عليكي بزياده اووي سمحينى
كل سنه وانتى بـألف صحه وخير وسطينا
وبنحبك
كل سنه واحنا بنحب المدونه دي ونيجى عليها من وقت للتانى نحس ونفكر ونعيش معاكي زكريات
كل سنه وانتى انجي :)
كل سنة وانتي طيبة
وعقبال مييييييت سنة و تنورينا انتي و المدونة دايما
كل سنة وانت طيبة
يارب دايما أجي أحس بالفرحة في كلامك ربنا يسعدك
كل سنة وانتي طيبة
وكل سنة ومدونتك طيبة
عقبال مليووووون سنة ليكو انتو الاتنين
Brilliant posting!
Your work is Art! You are Master!
Have a great and pretty Day!!!
كل سنه وانتى طيبه
ومدونتك طيبه
وكل لحظه وانتى مع طارق متهنين
صوركوا جميله بجد
ربنا يوفقكوا
كل عام انتم بخير
كل سنه و انتي طيبه
تقبل الله منا ومنكم
وكل عام وانتم بخير
In case you are being guaranteed round the clock Customer Support and life long replacement then don’t rethink while you Buy facebook reviews from a service provider. buy reviews for facebook
Post a Comment
<< Home