Tuesday, July 28, 2009

حنين جت يا ولاد

يا ولاد

حنين جت

وبقيت ام
والله وشفتك ام يا انوج

بقيتي ام يا بنت الفقرية
اولا بجد وحشتوني جدا
ثانيا بقي ودة الاهم حنين جت يا ولاد
شكلنا كدة عايزين قاعدة ونحكي
اتفضلوا اقعدوا علي الارض واستربعوا عشان هنحكي
كنت خايفة اوي من الولادة
هي اي نعم كانت قيصرية
بس انا اكتشفت اني جامدة نوعا ما بغض النظر عن كمية الصريخ اللي صرخت بيه
بعد ما فقت من البنج
انا جبت حنين يوم الاتنين اللي فات
يعني تاريخ 20 /7 دة يتحفظ لزوم الهدايا
شهر 7 دة اللي اتجوزت فيه واللي بعد جوازي بيوم عيد ميلاد جوزي
واللي بعد جوازي باسبوعين هيبقي ان شاء الله عيد ميلاد حنين

رغم اني عارفة انها كانت بنوتة بس اول ما شفت طارق قلتله انا جبت ايه
الراجل يا عيني قال دي بتخرف وخدني علي اد عقلي
بس لما جابوهالي مش كنت شايفاها من تاثير البنج
بس طلبت اني اشمها
طلب غريب بس مش في حد هيحس بيه غيري او اللي زيي
غير كدة ان لكل واحد مننا له ريحة خاصة كدة
حبيت اكون اول واحدة تميز ريحتها بما اني مش اول واحدة شافتها عيني
البت يا جدعان تحس انها مش شبهنا
هي والله بسم الله ما شاء الله قمر
مش عارفة طالعه لمين
بس الحمد لله البت واخدة رجلي مقاس 42
ودة اللي اداني امل انها ممكن تكون بنتي

وهي عندها يومين تعبت مني وسخنت وبقيت اعيط
ونزلت بيها انا وطارق نروح للدكتور
الكل استغرب اني والدة قيصري وانزل بعد يومين
بس قلبي مش طاوعني اني اسيبها وتبعد عن عيني لحظة
الغريب بقي لما رحت اطعمها كان عندها 5 ايام
كانت في واحدة قبليا وبياخدوا من بنتها تحليل دم من كعب رجليها والبت تعيط وانا اعيط معاها
واحدة قالتلي انتي بتعيطي هي بنتك ولا ايه
قلتلها لا بس بنتي هتعيط زيها
بس البت حنين طالعه لامها استحملت بس انا اللي مش استحملت وقعدت اعيط برضه
مش كنت فاكرة اني هبقي معاها حساسة اوي كدة
رغم اني بزهق بسرعه بس علي راي طارق
ربنا بيزرع جوة كل واحدة الصبر والقدرة علي التحمل
اللي هي الامومة يعني
خلاصة الرغي
اني فرحانة بيها رغم اني مش بعرف انام طول الليل منها
فرحانة بيها رغم انها عايزة اللي يقعد معاها ال 24 ساعه
وايه كمان
بقيت اقول بنتي وحنين بنتي
يا نهار ابيض يا جدعان
سمرا بقت ام
شفتوا الزمن
ادعولي ربنا يباركلي فيها ويخليهالي انا وابوها وتبقي سبب في حاجات حلوة كتير

ملحوظة

علي المتقدمين للزواج تقديم طلباتهم للنظر فيها
فاهمني طبعا

65 Comments:

Blogger Ahmed Shokeir said...

الف مبروك يا إنجي ربنا يباركلك فيها ويخليها ليكي ولطارق

Tue Jul 28, 05:08:00 PM GMT+3  
Blogger فتاه حالمه said...

هييييييييييييييييييه
انا اول تعليق
مبروووووووووووووووووووك الف مليون تشيليون ترليون مبروك يا احلي انجي
حبيبتي حنين تسلملك من كل شر وربنا يعجلها نعمه الابنه الاباره بامها وابوها يا قلبي
الف حمد لله علي سلامتك يا انجي
ومبروك لابو حنين
بالله عليكي بوسيهالي
وقوليلها دي من مي
اموااااااااااااااااااااااااة كبيره لحد بكره
مش طماعه انا
حمد لله علي سلامتك وحمد لله علي وصولها ليكي يا حبيبتي
مبروك

Tue Jul 28, 05:10:00 PM GMT+3  
Blogger فتاه حالمه said...

مليش دعوه بقي
عاااااااااااااااااااااااااا
انا الاولي
هاه
وبوسه تانيه بردو لحد الاسبوع الجاي
اموااااااااااااااااااااااااااااااة

Tue Jul 28, 05:10:00 PM GMT+3  
Blogger smraa alnil said...

احمد شقير

الله يبارك فيك يا استاذ احمد يارب
وامين يارب
_____________________

فتاه حالمة
ههههههههههههه

معلش في حد سبقك اوعي تزعلي بقي
الله يبارك فيكي يارب
ونقول عقبالك بقي
هههههه

الله يسلمك يا قمر
ومش تقلقي انا اصلا هرياها بوس من غير ما تقولي فهقولها دي من طنطك مي
حلوة طنطك دي صح؟
تسلميلي

Tue Jul 28, 05:19:00 PM GMT+3  
Blogger رحــــيـل said...

بجد بحد بجد
ربنا يبارك فيها ويفرحكوا فيها ويهنيكوا دايما
انا مبسوطه ليكم كده ومبسوطه بحنين قوى
ربنا يحميكم يارب

Tue Jul 28, 05:26:00 PM GMT+3  
Blogger فتاه حالمه said...

سوفت يا انوج سبقوني اذاي
مس هسعلي عسان خاطر حنين
انا لو كنت مكانك كنت هريها بوس ده انا مش هنيمها من كتر البوس اصلا
وربنا يخليكي يا رب
بجد انا بحبك اوي وربنا اعلم
ربنا يباركلك فيها ويهنيها ويرزقك برزقها ويرزق ابوها كمان ده الحمد لله وما شاء الله والله اكبر
مفيش احلي من رزق البنات ودي مش اي بنات دي حنين حبيبت امها وباباها
وطنطها مي
ههههههههههههههههههههه
حلوه طنطك انا موافقه كل الي يجي منك انتي وحنين عسل وسكر
مش تنسي بوسيهالي اكتر
سلام يا احلي ام حنين في العالم
وعقبالي بس لما القي ابوها الاول
هههههههههههههههههههه
سلام يا سكر

Tue Jul 28, 05:31:00 PM GMT+3  
Blogger smraa alnil said...

رحيل

يارب تتبسطي اكتر واكتر وربنا يسعدك يارب

وعقبال كل واحدة قولي امين

ربنا يخليكي يارب وتسلميلي
________________________________


فتاه حالمة

هههههههههههه
انا برضه بقعد اتكلم كدة
الكلام سهل يا اختي

يعني لما اهريها من كتر البوس ومش تنام اعمل انا ايه بقي

تعالي انتي مكاني هي ساعتين وهلاقيكي بتقولي يارب تنام خمس دقايق
هههههههههههههههه
ربنا يخليكي يارب ويخليلي حبك ليا
وان شاء الله تلاقي ابوها
بس انتي قولي يارب
هههههههه

Tue Jul 28, 05:50:00 PM GMT+3  
Blogger فتاه حالمه said...

اقولك هاتيها كلها اسبوعين ومش هقول حاجه
هههههههههههههههههه
بقول يا رب بس عشان اجيبها بس لكن هو مش مهم
كدابه طبعا
هههههههههههههههههه
بس ربنا يكرمك يا قمر
ملحوظه حلو الشات بوكس الي في التعليقات ده

Tue Jul 28, 05:55:00 PM GMT+3  
Blogger smraa alnil said...

طب انا موافقة تاخديها اسبوعين
بس تاخديني معاها انا وابوها وتبقي مسؤلة عننا الفترة دي كلها

هههههههههههه يا كدابة
كنت بقول زيك كدة برضه
ههههههههه

وبعدين اي خدمة
زورونا تجدوا ما يسركم

Tue Jul 28, 06:00:00 PM GMT+3  
Blogger بيتنا القديم said...

الف مليون مبروك يا ام حنين أنت وابو حنين..الخلفة للرجالة..والأمومة للجدعان..!
فاكرة يا ام حنين لما قابلتك انت وابو حنين في عمر بوك ستورز..كنت فرحان جداً ان مركبكم تقترب رويدا رويدا من شاطئها..والحمد لله ربنا اداكم هدية الوصول..حنين..!
(:
تتربى في خيركم وحنانكم وعزكم..ونسأل الله ان ينبتها نباتاً حسناً وان يجعلها قرة عين لأمها وابيها..وان يرزقها دوماً بشباشب وصنادل وسابوهات مقاس 42 ..!
(:
تحياتي للأسرة الجميلة..ماشاء الله لا قوة الا بالله..!

Tue Jul 28, 06:06:00 PM GMT+3  
Blogger فتاه حالمه said...

انا موافقه يا ستي
كله يهون عشان خاطر حنين بس
وانتم علي راسي بس هاخدها منك علي طول بقي بعد الاسبوعين
ههههههههههههههههههههه
ايون طبعا ضريبه

كنتي بتقولي زيي بردو وفكرتي في اسم حنين وانا بردو
وانا الي مش كنت عارفه بعزك وغاليه عندي اوي كدا ليه
اترينا واحد
ههههههههههههههه
ميرسي يا قمر
سنزوركم دئما وابدا
بس متزهقوش مننا

Tue Jul 28, 07:05:00 PM GMT+3  
Blogger bos bos said...

مبروووووووووووووووووووك يا أنجى مليون مبروك والله فرحانة ليكى جدا زى ما أكون أنا اللى جبت حنين
تصدقى انا كمان بحب الاسم ده قوى ونفسى لما ربنا يكرمنى اجيب بنت واسميها حنين لانى بحب الاسم ده قووووووووى

مبروك يا أم حنين مبروووووووووك

Tue Jul 28, 08:15:00 PM GMT+3  
Blogger انكسارات .. احمد البوهى said...

الف مبروووووووووووووووك
ربنا يبارك فيها ويباركلك ويجعلها قرة عين ليكى ولطارق

:)

Wed Jul 29, 12:05:00 AM GMT+3  
Blogger Ehab said...

مبـــروك مبــــروك
مليون الفين مبروك
و الله الواحد الدمعة فرت من عنية و الله
مبروك و ربنا يباركلك فيها يا رب
طب فين بقي الصور بتاعتها عشان نيجي نتقدم

:)

ربنا يطرحلك فيها البركة يا رب

Wed Jul 29, 12:16:00 AM GMT+3  
Blogger farida said...

مبروك يا إنجي
حتكوني أجمل أم في الدنيا
إسمها جميل جدا جدا
ربنا يبارك لكم فيها و يجعلها خلف صالح
آمين

ببوس حنين بوسة كبيرة جدا
و لو انها اكيد لسه صغنونه جدا
ربنا يبارك فيها

Wed Jul 29, 12:27:00 AM GMT+3  
Blogger maioya said...

يارب ياانوج يخليهالك
ويخليكو ليها
ويجعلها قره عين ليكم
ويباركلكم فيها
وتبقي سبب كل حاجه حلوه ليكم
ياارب :)

Wed Jul 29, 01:05:00 AM GMT+3  
Blogger حاسوباتيه said...

الف الف مليون مبروووووووووووك ربنا يخليهالك يارب ويحميها ويخليكوا لبعض

Wed Jul 29, 04:35:00 AM GMT+3  
Blogger قلب ينبض بالحب said...

مبروك ياانوج مبروك انا كمان لسة خالتو جديدة من يوم 25/7 لمولود زي القمر اسمه محمد يالا بقى قدمي طلبك نبحثه ونشوف الولد يرضى ببنتك عروسة ولالا حمد لله على سلامتك يانوج وعقبال ما تخوياها

Wed Jul 29, 10:17:00 AM GMT+3  
Blogger مـحـمـد مـفـيـد said...

مبروك يا ام حنين
ومبروك لطارق
وربنا يجعلها قره عين ليكم
:)

Wed Jul 29, 11:23:00 AM GMT+3  
Blogger صاحب المضيفة said...

أنبتها الله نباتا حسنا ورزقكما برهما وجعلها قرة أعينكما يارب


تنفع التانية ؟؟

:):):):):)

Wed Jul 29, 12:42:00 PM GMT+3  
Blogger Mr.ProiD said...

الف الف مبروك

ربنا يباركلك فيها يا رب

و تبقي من الصالحين اللي يدعولك

و خلي بالك منها

اه نسيت صحيح

بندحرج التماسي لو لسه في حد فاكرني

تحياتي

Wed Jul 29, 01:21:00 PM GMT+3  
Blogger يوميات شاب منوفى said...

الف الف الف مبرررررررروك وربنا يبارك فيها وتكون دمها زى العسل زى مامتها
وانا اول من يقدم طلب الزواج لعلى اجد القبول

Wed Jul 29, 01:47:00 PM GMT+3  
Blogger ادم المصري said...

الف الف الف الف مبرووووووووووووك
عقبال ما تخاويها ان شاء الله

Wed Jul 29, 04:44:00 PM GMT+3  
Blogger كراكيب عادل said...

مبروووووك ربنا يخليها لك وتفرحي بيها

بما اني لي اربعة من الصبيان

ارجو كتابة الاوراق الرسمية المطلوبة

في حين وددنا التقدم بطلب ايد

الهانم الصغيرة

Wed Jul 29, 05:35:00 PM GMT+3  
Anonymous Anonymous said...

الف مبرووووووووووووووووووك يا انجى
وربنا يباركلك فيها
انتى وباباها طبعا
وتشوفيها عروسه ان شاء الله

نور

Wed Jul 29, 06:34:00 PM GMT+3  
Blogger Monzer said...

مبروك عليكم وربنا يحميها

Wed Jul 29, 10:19:00 PM GMT+3  
Blogger No Fear said...

السلام عليكم
حمد لله علي سلامتك و مرحبا بقدوم حنين
و ربنا يبارك لكم فيها و يخليكم ليها يارب
.
كويس إنها مش شبهكم
هههههههه

Thu Jul 30, 09:00:00 PM GMT+3  
Blogger كلام فارغ اوى said...

مبروووووووووووووووووووووووك
عليكي حنين يا انوووووج
يارب بقى تدربي فيها كويس
بس ارفعى راسنا بقى قدام طارق
عايزينه يقول البت انوج دي مولوده ام
خلى بالك منها
وربنا يطرح لك فيها البركه

Thu Jul 30, 11:25:00 PM GMT+3  
Blogger رفقة عمر said...

الف مبروك ياقمر ربنا يخليهالك
اسفه انى متاخره بس والله لسه شايفه البوست حالا
ربنا يباركلكوا ويسعدكم اللهم امين

Sat Aug 01, 02:52:00 AM GMT+3  
Blogger حلـم،، said...

ياستي الف مبروك

وبصراحة

امتعتينا بهذا الاسلوب القصصي



ووجدت نفسي اتقاطع معكي في نمرة42


وايضا في برج السرطان

يعني ممكن اكون واحد من العيلة؟؟


الله يسعدك يارب ويخليك بنتك وتتربي

في حنانك وعز والدها


الف الف الف الف مبروك ياستي


الحمد علي سلامتك


اتمني ان ياتي تموز القادم ويون علي صدرك تائم ذكور

دمتي فاكهة بين محبينك

Sun Aug 02, 04:34:00 PM GMT+3  
Blogger kafrawy said...

و الذين يقولون ربنا هب لنا من ازواجنا و ذريتنا قرة اعين و اجعلنا للمتقين اماما


صدق الله العظيم

ربنا يحفظها يا انجى و يبعد عنها وسوسه الشيطان

Tue Aug 04, 04:05:00 PM GMT+3  
Blogger حزينه said...

السلام عليكم
عايزة اقولك انى بقالى كتير
مش دخلت مدونتك
واخر مرة دخلتها
كنتى فى اجازة الزواج
ولما دخلت دلوقتى ولقيتك عندك بنوته
فرحتلك اوى اوى
بجد ربنا يباركلك فيها
وربنا يجعلها قرة عين ليكى
وتجعليها ذريه صالحه ليكى

حزينه

Tue Aug 04, 09:14:00 PM GMT+3  
Anonymous Anonymous said...

الف مبروك يا انجى ربنا يبارك لك فيها يااااااااارب برغم وحشتينا والله وحمام السباحة صعب من غيرك
شيلى صورة البنت الحزينة دى
وحطى لنا صورة حنين
عشان كلنا يبقى عندنا حنين
سجدة

Thu Aug 06, 10:14:00 AM GMT+3  
Blogger camera_girl said...

الف مبروك ربنا يحفظهاللك ويفرحك بيها

Thu Aug 06, 06:15:00 PM GMT+3  
Blogger Big Code said...

حبيت اقول 100000000 مبروك
هو شعور جميل وغريب
بجد 1000 مبروك

Fri Aug 07, 12:57:00 AM GMT+3  
Blogger ساعه الغروب said...

الف مبروك يا انوجه

حبيبة قلبى ربنا يفرح قلبك دايما بيها ويكتبلك كل خير انتى وهى و باباها
لانكو بجد تستاهلو كل خير

و ربنا يحفظهالكو يا رب وتشوفوها عروسه كدا اموره وزى العسل

ربنا يفرح قلبك دايما يا انجى يا رب

Fri Aug 07, 11:36:00 PM GMT+3  
Anonymous Anonymous said...

الف مبرووووووووووك يا انوج
عقبال ماتخاويها يارب وتشوفيها بتتنطط قدامك وتقولك ماما
وقتها هتكون فرحتك بجد وهى بتجرى من كل الناس لحضنك
يااااااااااه فرحه ما بعدها فرحه بجد

وبعدين انا اخطبها لابنى بس نتفرج على صورها الاول ولا ايه
وأكيد تطلع زى القمر مادام مامتها عسوله كده
ربنا يخليهالك وتشوفيها عروسه وتشوفى عيالها وهى فرحانه بيهم زى ما انتى فرحانه بيها كده

Sat Aug 08, 12:31:00 AM GMT+3  
Blogger فوكيره said...

لو هقولك قد يه فرحت

ولو هقولك قد ايه عايزه اقولك مبروك بزمه
بحـضن وبوسه كبيره ليكى وليها

مش هعرف اقول ... بدعيلك من قلبي ربنا دايما يعوضك كل خير ..

عارفه ... حياتك اللي عشناها معاكى في المدونه .. بالنسبلى امل ودافع ..
بفتكرك دايما ...
ربنا يكتبلك السعاده دايما وتشوفيها قدام عينك تكبر وتفرحي بيها

مش مستغربه ... احساسك بيها
والعيط والحجات دى خالص
:)))

Sun Aug 09, 03:23:00 AM GMT+3  
Blogger أميرة ويلز said...

طبعا انا من اول الناس اللي قلت مبروك بس لازم نقولها هنا برده
بس على فكرة بقا انتي كلتي علينا السبوع خلي بالك
مبروك يااحلى ام واحن ام ياسمرا انا واثقة انك فعلا هتكوني كدة

Sun Aug 09, 04:45:00 AM GMT+3  
Blogger إبراهيم محسن said...

أقدم الطلب فييييييين

مبروووك وعقبال بقية اعضاء فريق السمراوات

سلميلي عليها

مستغربك وانت كبرتي كده وبقيتي أم

عقبال كل الناس

Wed Aug 12, 11:35:00 PM GMT+3  
Blogger Sharm said...

مبرووووك

اعمليلها مدونة

Sun Aug 16, 04:41:00 AM GMT+3  
Blogger sabrina said...

مبرووووك يا أنوج
عقبال ماتشوفيها عروسة
رمضان كريم يا قمر أنت وحبيبتك

Mon Aug 17, 12:43:00 AM GMT+3  
Blogger أحسن تـستاهـل said...

حالاقاتو
برجالاتو
يا رب يا ربنا
يكبر ويبقى أدنا

ألف مبروك .. وانا دايما كده.. اغيب اغيب واجي أدخل على مناسبة عندكو ههههههههههه

رمضان كريم وكل سنة وانتو طيبين

مها ميهوووو

Sat Aug 22, 12:18:00 AM GMT+2  
Blogger إسلام الحساني said...

الف الف الف مبروك يا انجى على المولود اللاطفال احباب الله والطفوله كمان حلوه قوى لا فيها قلب بيتألم
ةولاعقل تعب من التفكير ولا عواطف
تتقلب ولا فى رقيب بيحاسب الطفوله يستطيع ان يفعل اى شىء وهوه يبتسم



دى لحنين
احم احم
حنين يا ابنت القلب الحنين
يا قلب ملاك يا عيون المنين
يا شعاع صافى من ضى القمر
ياوجه رائع ونجم ساطع
ومقاس 42

ربنا يخليهالك يارب وتتربا فى عزك وعز ابوها

Sun Aug 23, 07:14:00 AM GMT+2  
Blogger إسلام الحساني said...

صح رمضن كريم عليكى ووعليها وعلى كل اصدقائك

Sun Aug 23, 07:17:00 AM GMT+2  
Blogger إسلام الحساني said...

صح رمضن كريم عليكى ووعليها وعلى كل اصدقائك

Sun Aug 23, 07:18:00 AM GMT+2  
Blogger سمو الأميرة سارة said...

الف مليووووووووووووووووووووووووووووووووووووووووووون مبرووووووووووووووووك

ربنا يحميها ويبارك لكم فيها يارب

بقولك ايه انا هبعت لك السي في بتاع اخويا علشان بندور له على عروسة ;)

Thu Aug 27, 12:27:00 PM GMT+2  
Blogger hasona said...

السلام عليكم

كل سنة وانت بخير
وكل سنة وجميع أحبابك بخير وصحة وسعادة
وكل سنة وكل المسلمين علي شريعة الله وسنة الحبيب المصطفي رضي الله عنه وأرضاه

وان شاء الله نستفيد من رمضان بكل السبل
ونخرج منه أفضل مما ولجنا به
يا رب أعنا علي القيام والصيام والصلاة
ووفقنا لما فيه الخير للجميع يا رحيم يا كريم

وارزقنا العفاف والرضا - والمحبة واهدينا يا عظيم

وأعنا علي القيام والصيام والصلاة والارتقاءالي جنة الفردوس

واجعلها لنا ميراث خير وسعادة

واجعلنا من عتقاءك في هذا الشهر يا معطي يا وهاب

وارزقنا حلاوة القرآن و حسن تلاوته
وتدبر معانيه وفهمها علي النحو الصحيح
ورطب ألسنتنا بذكرك يا الله

عايز أقول اننا في أيام مباركة ويجب استثمارها في الخير والتقرب من الله

Sun Aug 30, 11:29:00 AM GMT+2  
Blogger 3asef said...

الف الف مبروووووووووووووووووك
على حنييييين وانا عايز اتقدملهاااااااا
:D :D :D :D
الله يباركلك فيها وبأبوها
ويجعلها وش السعد عليكم
:)))))))

جد فرحتلكم الف الف مبرووووووووووووووووووووووووووووك
والف حمدلله على السلامة

Fri Sep 04, 01:41:00 PM GMT+2  
Anonymous Anonymous said...

10000 mbrook ya anooj..yadob lesa 3arf....mt2khra bs 1000 mbrok leky we ltar2 we rbna ybark feha yarb isa

mohamed hamd "frozen love"

Sat Sep 05, 05:05:00 PM GMT+2  
Anonymous Anonymous said...

ألف مبروك، ربنا يخليهالكم قرة لأعينكم، وتتربى في عزكم بإذن الله.



Iron Cobra

Tue Sep 08, 04:48:00 PM GMT+2  
Blogger هاتكلم said...

انتي ما تعرفينيش بس الف مبروك ، وربنا يباركلك فيها وتبقى قرة عين وذرية صالحه ليكي

Wed Sep 09, 06:40:00 AM GMT+2  
Blogger nimo said...

لذيذة مدونتك
دى اول مرة ادخلها
اولا مبروك العروسة الامورة وعقبال اخواتها لما يجو يونسوها
اتمنى اكون ضيف خفيف على مدونتك
خالص امنياتى لكى ولاسرتك بالخير
رمضان كريم

Thu Sep 10, 02:16:00 PM GMT+2  
Anonymous maha said...

سلام عليكي يا انجي
يااااه الف مبروك بجد فرحانه اوي ..اول خبر حلو من ايام و يكون من عندك
ربنا يباركلكوا فيها و يفرحكوا بيها و تملا حياتكوا حنين و حب يا رب
سلام
مها

Sat Sep 12, 10:44:00 AM GMT+2  
Blogger سوسه said...

على فكره انا لسه مسجله انهارده لما قريت كلامك الجميل عجبنى اوى كلامك ربنا يخيلهالك يارب وتشوفيها عروسه زى القمر

Sun Sep 13, 01:31:00 PM GMT+2  
Blogger سوسه said...

انا اسمى انجى زيلك على فكرا ياريت نبقى صحاب

Sun Sep 13, 01:32:00 PM GMT+2  
Blogger أبو أمك said...

حنين جت ؟؟
وإيه اللي جايبها متأخر كده
ماعندناش حريم تيجي في نص الليل

Tue Sep 15, 02:58:00 AM GMT+2  
Blogger Hadota ... حدوتة said...

مبروك يانجييييييييييييي
ألف مبروك يا جميل

ربنا يخليهالك ويباركلك فيها

بوسيهالى بوسةةةةةةة كبيرة اوى


كل سنة وانتى طيبة انتى وطارق وحنيييييين

تحياتى

Tue Sep 15, 09:56:00 PM GMT+2  
Blogger حزينه said...

فينك

Sat Sep 26, 12:52:00 AM GMT+2  
Blogger رئـــــيسـة حزب الأحلام said...

الف مبروك وربنا يفرحك بيها
تحياتى

Sat Oct 03, 06:51:00 PM GMT+2  
Blogger سجود said...

اسمحي لي بالتطفل على تدوينك الجميل
بين كلماتك كلها قرأتك أم .. أم لأول مرة وكأن لها أمومة الألف عام
حنان حب احساس بالمسؤولية لهفة ترقب .. كل قلب الأم
الله يحفظ حنين ويبارك فيها ويجعلها قرة عين لك ولوالدها
تحياتي

Thu Nov 05, 08:48:00 AM GMT+2  
Blogger samamasr said...

مبرووووك

ربنا يهنيكم يارب:)

Sun Nov 15, 07:27:00 PM GMT+2  
Anonymous Anonymous said...

مهزلة مصرية جزائرية بقلم عبد البارى عطوان

تحتل اربع دول عربية المراتب الاولى على قائمة الدول الأكثر فسادا في العالم، اضافة الى افغانستان، حسب منظمة الشفافية الدولية، ولكن لم يخطر في بالنا مطلقا، ان تستخدم انظمتنا الرياضة من اجل تحويل الانظار عن فسادها ودكتاتوريتها القمعية، وبذر بذور الكراهية بين ابناء الأمة الواحدة، مثلما شاهدنا في الايام العشرة السوداء الاخيرة، التي بدأت وانتهت بمباراتي فريقي مصر والجزائر، في تصفيات نهائي كأس العالم الصيف المقبل في جنوب افريقيا.

نحن امام حرب حقيقية، وعمليات تجييش اعلامي ودبلوماسي لم يسبق لها مثيل، وكل هذا من اجل الفوز في مباراة كرة قدم بين فريقي دولتين وشعبين شقيقين، من المفترض ان الفائز من بينهما سيمثل العرب جميعا في هذه المسابقة الكروية الدولية.

عندما قرأت انباء عقد الرئيس حسني مبارك اجتماعا طارئا لاركان دولته، ابتداء من مجلس الوزراء ومرورا بقائد جهاز المخابرات، وانتهاء برئيس هيئة اركان الجيش المصري، تبادر الى ذهني ان مصر على ابواب مواجهة مصيرية مع اعداء الأمة والعقيدة......

باقى المقال فى صفحة الحوادث بالرابط التالى

www.ouregypt.us

Sun Nov 22, 08:14:00 PM GMT+2  
Blogger ساسو said...

ما شاء اله عليها بجد عسوله ربنا يخليهالك ويخليكم كلكم لبعض
فرحت والله انا منزمان مدخلتش عندك بس دخلت علي احلي خبر

Thu Dec 03, 08:30:00 PM GMT+2  
Anonymous Anonymous said...

now I stay in touch!

Fri Dec 11, 11:54:00 PM GMT+2  

Post a Comment

Links to this post:

Create a Link

<< Home