Tuesday, May 27, 2008

النكسة ....بلا وكسة

مش عارفة ابتدي ازاي
بس هو مجرد اقتراح
انا عن نفسي هنفذه
مش لاني ديكتاتورية
ولكن لاني بحب البلد دي
يوم 5 يونيو كتب التاريخ التي تأبي الاعتراف بأننا الشعب الاضعف دلوقتي بتقول ان اليوم دة
كان يوم نكسة
كان يوم الشعب فيه مات
مات من جواه وفقد الامل
اعتقد اننا كمان في وكسة
قصدي في نكسة
ودة لان ظروفنا منيلة
هنعمل اضراب ومش هنرح الشغل
خصم وتحقيق ومشاكل وحبس واعتقالات
مش هتشتري حاجة اليوم دة
الراجل الغلبان اللي فاتح محل بقاله واللي بيرجع اخر اليوم لعياله بمرتبه
هيجيب عشاه منين
وتفتكروا لو عملنا كدة هتبقي في نتيجة
اضراب مايو بيقولوا انه فشل
والعالم كله عرف انه فشل رغم انه نجح
جايز يكون كلامي فيه شئ من الغلط او انه كله علي بعضه غلط
طب ايه اللي يمنع اننا نعلي صوتنا وهيوصل وهيبقي ملفت كمان
بدل ما نعمل اضراب او اي حاجة
نعيش حاله حداد
يعني ايه؟؟؟؟
نلبس اسود
كل مصر تلبس اسود
شبان وبنات ورجاله وسيدات يلبسوا اسود
القاهرة وبورسعيد واسكندرية وطنطا وبني سويف والجيزة وحلوان و6 اكتوبر
بما انهم بقم محافظات كله يلبس اسود
ننشر دة برة كمان
نخلي العالم يلبس اسود
بريطانيا تلبس اسود
نبعت لدافيد سانتوس دة ونقولوا البس اسود
ووالله هيعملها
ولو حد جه سالنا
نقول اللي احنا عايزين نقولوا
قول لابس اسود عشان البنزين غلي
عشان المواد التموينية الاساسية مش بقينا نلاقيها
قول عشان الاسعار غليت
قول عشان التعليم بايظ
قول عشان مدوا حاله الطوارئ
لابس اسود عشان الاقتصاد اللي بقي في الحضيض
لابس اسود عشان حزين علي البلد دي
لابس اسود عشان بيفكرني بيوم موت الامل
ودلوقتي امل ماتت
لابس اسود عشان اعبر عن قضية
لابس اسود عشان لما يصورونا يصوروا شعب بيعبر
مش شوية اقلية واقفين في ميدان التحرير ومحاوطين بالاف العساكر وامن الدولة
لما يصوروا يلاقوا شعب اسود
حاله حداد
حاله حزن
حالة من الاعتراض السلمي
نجرب مش هنخسر حاجة
ياريت اللي موافقني علي الاقتراح دة
يبتدي يشتغل هو فيه
ويعلن عنه ويوصله للناس كلها
بطريقتي .. بطريقتك .. بطريقة اي حاجة بقي
مش هتفرق
المهم نوصل ونعبر
انا عن نفسي هعمل كدة
مين معايا؟؟

Labels:

65 Comments:

Blogger محمد عبد الغفار said...

حماسك اعجبنى ، اما الفكره فلا

Tue May 27, 01:01:00 PM GMT+3  
Blogger نيران said...

مافيش لون اسود يعبر عن اللي احنا فيه..

السواد بقى لابس كل حاجة حوالينا..

و صدقيني كوننا نلبس اسود مش هايلفت انتباه اي حد..

انا معاكي في الفكرة لو هاتتنفذ..

يمكن انا عندي كم احباط كبير اوي، مخليني شايفه ان الأسود مش كفاية،

هو مافيش لون اسود مسود؟؟

انا مش عارفة كدا انا معاكي ولا لا؟

فكري انتي معايا، الاسود كفاية؟

Tue May 27, 02:46:00 PM GMT+3  
Blogger واحد مش فاهم حاجة said...

حاسس كدة اننا بقينا مجموعة خرس عاوزين يحرروا بلدها بالكلام

رغم الحماس اللى فى البوست

الا انى محبط جدا

Tue May 27, 02:52:00 PM GMT+3  
Blogger آلام وآمال said...

أنا معاكي

Tue May 27, 03:38:00 PM GMT+3  
Blogger karakib said...

و ليه نعمل اضراب ... طيب ما نتفق علي اننا هننشر فكرة معينه
مثلا مثلا
لا للوصم
يعني ننشر كلنا و نتكلم مع اللي نعرفهم عن الوصم
اقري عن الموضوع ده
http://justice4every1.blogspot.com/2007/09/blog-post_14.html

Tue May 27, 07:11:00 PM GMT+3  
Blogger EmY said...

انا معاكي في الفكره من غير عنف ولا تخريب ولا اذي لاي حد
نعبر عن رفض و تعبنا و سخطنا بأسلوب متحضر هاديء

تحياتي

Tue May 27, 11:44:00 PM GMT+3  
Anonymous koko said...

متهيألى الفكرة دى ظريفة .. عارفه ياهوو فى يوم 11 سبتمبر بيقلب كله و يبقى ابيض و اسود مافيش الوان خالص .. تعبير سلمى عن الحزن لكن جامد جدا و ملفت جدا .. انا معاكى

بس نلبس طرح سوداء كمان و لا ممكن ابيض ?

Thu May 29, 10:55:00 AM GMT+3  
Blogger smraa alnil said...

محمد عبد الغفار

وليه الفكرة مش عاجباك

ادينا جربنا كل حاجة
ما نجرب دي والله شكلنا هيبقي ملفت وممكن نوصل
___________________________________

نيران

انا معاكي ان مش في اي حاجة ممكن تنفع انها تعبر عن اللي احنا فيه
ولا تعبر عن اللي جوانا

ومعاكي كمان ان الاسود بقي في كل حاجة في حياتنا

صدقيني انتي لو كلنا اتفقنا هنبقي ملفتين جدا
وممكن نوصل

قولي بس ان شاء الله
ونفذيها معايا وانشريها واديها تجربة ومش في حد خسران حاجة

انا كمان محبطة اوي
بس هعبر عن احباطي بطريقة متحضرة

الاسود مش كفاية
والمظاهرات مش كفاية
وتخريب البلد مش كفاية
والصويت والنحيب مش كفاية
والموت مش كفاية
نعمل انقلاب مثلا
مش كفاية
ولو حبينا نقتل الريس برضه مش كفاية
تفتكري انتي بقي ايه اللي يمكن يكون كفاية
بطلي احباط شوية
وخليكي معانا

Thu May 29, 11:18:00 AM GMT+3  
Blogger smraa alnil said...

واحد مش فاهم حاجة

وبدل ما نتكلم وبس
وبدل ما نتظاهر ونتأذي
بنعبر باي طريقة توصل فكرتنا

كلنا محبطين يا ابني
بس نحاول ويبقي عندنا امل
ان بكرة جايز يكون احلي
________________________________________

امال والام

اهو انت اللي فيهم يا حودة
يا ناصفني كدة
ابتي بقي انشر الفكرة عندك

Thu May 29, 11:22:00 AM GMT+3  
Blogger smraa alnil said...

كراكيب

احنا مش هنعمل اضراب يا هاني
انت مش كملت قراية البوست
انا بقول هنخرج ونروح شغلنا ونشتري عادي جدا
بس لابسين اسود
عامة هقرا الموضوع وارجعلك تاني
________________________________________

emy

برافو عليكي يا ريت بقي تساعديني وتنشري الفكرة دي عندك
________________________________________

كوكو

شوفتي بقي انه بيلفت

ياريت يا كوكو تبقي معايا وتنشري الفكرة دي بسرعه

يا سيتي اللي يريحك
ولو اني افضلها سودا كحل
:)

Thu May 29, 11:22:00 AM GMT+3  
Blogger محض روح said...

الفكره حلو
انوج انا خيافه عليكي

Thu May 29, 12:04:00 PM GMT+3  
Blogger رئـــــيسـة حزب الأحلام said...

مش عارفة اقولك اية
انا مش عارفة اكل عيش حتى لقمة العيش بقت مليانة طوب وزلط
ربنا يهدى
واهو بينظبطوا شوية ويرجعوا اسوا من الاول احنا بقينا ننفخ غفى قربة مخرومة

Thu May 29, 12:10:00 PM GMT+3  
Blogger كاميليا said...

تفتكرى هاتفرق؟

هانعمل حداد
برة البلد وجواها

رافضين بس ساكتين

مشكلتنا اننا ساكتين
بيعملوا فينا كل حاجه
واحنا ساكتين

مستسلمين وكأنه قدر مش نقدر نغيره
مع انهم بشر
المفروض بشر


تحياتى لحماسك

Thu May 29, 12:17:00 PM GMT+3  
Blogger رئيس جمهوريه نفسى said...

لو ليه راى
لبس الاسود مش حيعبر عن المراره الى جوانا والى احنا عايشين فيه والى احنا فيه كل الناس عارفاه والكل بيعانى منه حنلبس اسود ليه علشان نعبر عن الى احنا فيه ما هو معروف ومفهوم من حيث اسبابه وهدفه والسبب فيه والنتيجه الى حنوصل ليها
مش عايزين نلبس ونسكت عايزين نتكلم ونحاول نغير كفيانا سلبيه

Thu May 29, 12:36:00 PM GMT+3  
Blogger ولــــــــــو said...

انا كده كده هابقى ف الشغل بس اوعدك هالبس اسود واللي هايسألني هاقوله على السبب بجد
بس لو حكومة
هاقوله لابس اسود على جدي اصله اتوفى قريب

انا مش حمل بهدله \
كفايه عليا الصحرا

Thu May 29, 01:07:00 PM GMT+3  
Blogger محمد فوزي said...

ايه هو اللي احنا فيه ؟
انا شايف ان المشكله الرئيسيه
اللي كلنا بنتكلم فيها وبنشتكي منها
هي الفقر وضيق ذات اليد
وكل التفريعات والتنويعات اللي من نفس الأصل ده
زي فقدان الكرامه والفساد ووو

ومشكلة الفقر والغلاء دي مشكله عامه
والعالم كله بيشتكي منها
امريكا وفرنسا
واوروبا

وحلها هي العمل ثم العمل
ثم المزيد من العمل
ونسيبنا شويه من الكلام والشكوى

Thu May 29, 01:45:00 PM GMT+3  
Blogger فوكيره said...

انوج ... انا مقتنعه وموافقه
وعندى لبس اسود

معاكي

بس هو مش يوم 5 مايو ده خلص خلاص ...؟

حيبقا يوم ولا من هنا ورايح اسود ...؟؟

Thu May 29, 02:01:00 PM GMT+3  
Blogger خمسة فضفضة said...

السلام عليكم ورحمة الله وبركاته
هي فكره كويسه بس تفتكري حاجه زي كده ها تحوق ولا تجيب نتيجه

احنا بقينا زي اللي بيدنوا في مالطه

Thu May 29, 02:21:00 PM GMT+3  
Blogger محمد الكومي said...

على فكرة يا سمراء

موضوع الاضراب ده مش هيجيب نتيجة لان الناس في اكبر اضراب ليها يوم 6 ابريل ما جابوش نتيجة باضرابهم الكبير فمالوش لازمة الاضراب

هاتي من الاخر

التخريب هو الحل الوحيد لانتزاع الحق من النظام

و التاريخ خير شاهد مظاهرات الجامعة في نهاية عهد عبد الناصر و مظاهرات الغلاء مع السادات و مظاهرات المحلة

Thu May 29, 02:41:00 PM GMT+3  
Blogger ذو النون المصري said...

.....................
مفش اي مانع لكن لازم يكون فيه يوم نتفق عليه و الا لو كل واحد لبس من نفسه من غير ترتيب مش هيلفت اي نظر
بخلاف ان الدراسه انتهت و الاضرابات اصلا قامت علي شباب الجامعه و تلاميذ المدارس و في حالة عدم وجودهم هيكون الاثر ضعيف جد

Thu May 29, 03:21:00 PM GMT+3  
Anonymous youma said...

في عز حماسك بتفقعي الواحد من الضحك

بقى امل ماتت؟؟ ياخبر

اهو انا مش حألبس اسود عشان بس مبعترفش بموت امل

بس اكيد حلاقي حاجة البس عشانها اسود

ولو حتى عشان دمعة نزلت في يوم وحش

Thu May 29, 04:37:00 PM GMT+3  
Blogger مدحت محمد said...

نلبس اسود

هى الناس لاقية تلبس اصلا

بلا نيلة

Thu May 29, 05:42:00 PM GMT+3  
Blogger أسوور said...

قرر رئيس مجلس ادارة الجريدة مشكورا أن يتبنى كل ما يكتبه المدونون
وان يفرد مساحة لا بأس بها لبوستات البلوجرز
كما وافق على نشر البوستات المرشحة بتوقيع كتابها وصورهم
وذلك ايمانا منه بقوة التدوين وبأنها صوت المصريين
***
على كل مدون يرغب فى نشر مقالات - تحقيقات - قصص - نقد - ادب - شعر - سياسة او أى كتابات لم يرد ذكرها
ان يرسل البوست المرشح مذيل بتوقيعه وعنوان المدونة والإسم الحركى ان اراد
مرفق بصورة شخصية له
على الإيميل التالى

amyasser@hotmail.com

أو ترك اللينك الخاص بالبوست والمعلومات الخاصة بالمدون فى تعليق على العنوان التالى

www.amyasser.blogspot.com

تحت عنوان خاص لجريدة الأسرة العربية
الجريدة تصدر الإثنين من كل أسبوع

Thu May 29, 06:41:00 PM GMT+3  
Blogger اسكندراني اوي said...

انجي
انا هنا ملبيا لدعوتك عندي في البلوج

حماسك جميل وهادف
لكن للاسف التجارب اثبتت اننا شعب لم ينضج بعد
لا يعرف معنى الاضراب من التخريب
لا يعرف معنى الهتاف من الصياح

انستي اعتذر عن الاشتراك في نشر الموضوع

لا اريد ان اتحمل تبعاته امام الله ان اسيئ فهم المقصود واصيب احد بضرر من تلك الدعوه

ارجو ان تقبلي اعتذاري مره اخرى
اختلاف الأي لا يفسد للود قضيه

لكي كل التحيه والاحترام

Thu May 29, 06:54:00 PM GMT+3  
Blogger حسن ارابيسك said...

حزين عليكي يامصر
وحزين على ولادك
وفين خيرك يامصر
مابين ايدين أغرابك
حزين على بلدي وناسي
وكل مصري بيأسي
حزين عليكي يامصر

ياأم الكرم والأصل
واقف أنا على بابك
خايف أموت يامصر
ملقى مكان في ترابك
حزين على بلدي وناسي
وكل مصري بيأسي
حزين عليكي يامصر

كتير كتير صانوكي
في القرب وفي البعاد
وكتير كتير ظلموكي
وداسوا على العباد
حزين على الضمير الغايب
وكل فقير ماله نايب
ولأخر عمري فيكي دايب
حزين عليكي يامصر

Thu May 29, 08:08:00 PM GMT+3  
Blogger فوكيره said...

اوعوا حد يضــرب

5 يونيو

يا انجي ... ده غباء امتحانات مش اكتر انا مش كده على طول
والله

:))

Thu May 29, 08:42:00 PM GMT+3  
Blogger princess dodo said...

بس انا لسه عندى أمل

بفكر أكسر القاعدة والبس ابيض

إيه رأيك؟

.
.

سلامي ليكي

Fri May 30, 05:42:00 AM GMT+3  
Blogger وينكى said...

يوم اربعه مايو نلت من بيتنا ورايحه الشغل ولابسه الحته السودا
الدنيا كانت حر جدا وكنت باتشوي بس قلت معلش كله يهون عشان القضيه
وصلت التحرير ومشيت فى الشارع وحسيت ان الدنيا ربيع والجو فظيع
لا مش عشان الجو حلو .. لأن الناس كلها لابسه كل ألوان الطيف
انا الوحيده اللى كنت لابسه اسود
وكان الموضوع ماشي خلف خلاف
اتخنقت لسبب واحد بس
ان الدنيا كانت حر قوى يوميها
انا هشارك فى اى حاجه مافيهاش ضرر لحد غيرى
ماتقولوليش ماتشتريش حاجه
انا اساسا عايشه على اكل السوق.. ممكن اشترى حاجاتى من الأكشاك الصغيره
ومش هاقف فى مظاهرات لأنى مش مؤمنه بفايدتها أصلا
ممكن استحمل والبس أسود تانى

Fri May 30, 11:15:00 AM GMT+3  
Blogger el_assel said...

والله فكرة جميلة

اهي حاجة تعبر عن وجود شعب
شعب لا جثة هامدة مات شعورها

اكثر مايغضبني
مش ان البنزين غلي ولا ان الضرايب غلت
ولا انه شوية وحندفع ثمن الهوا اللي بنتنفسه

لا
انا اللي بيغضبني
هذا الصمت الرهيب
الشعب بياخد علي قفاه ويسكت
اكيد حيضرب مليون مرة
طالما مافيش اي رد فعل


انا معاكي
برغم ان الهدوم اكيد برده غلت
الا انا معاكي

فلتلبس مصر ثوب حداد شعبها


سلاماتي

Fri May 30, 07:31:00 PM GMT+3  
Blogger Hannoda said...

المرارة جوانا و بانت على وشونا و الأعمى يشوفها فخاوينا و نبرة صوتنا

أنا نزلت الأجازة اللي فاتت مصر لقيت الناس بتغلي في الشارع

كله مخنوق و بيطلع عصبيته في التاني
كله بيشوح لكله ومحدش مستحمل حد

الكلام ده من 10 شهور

بيتهيألي دلوقت الحكاية كبرت أكتر

و الخلق ضاق أكتر
و الغضب و الحزن مش محتاجين إسود

وشوش الناس يا |إنجي سوادها أغمق من اللبس

وأكيد اللي عاوزة تعرفيهم عارفين

أنا معاكي لبرر واحد بس

إن التعبير ده يمكن يواسينا إحنا
يحسسنا إن إحنا نفسنا حاسين ببعض
يمكن يحسسنا إننا بني آدمين بنتأثر و عندنا رد فعل
رد فعل إحنا بنحترمه و بنقدره وبنحس ببعض فيه

لكن ماتقوليش بنعمل عشان حد يحس
كل الناسحاسة
برة و جوة
مننا و اللي مش مننا بس اللي فينا مش فارق مع حد

مصر كلها مش فارقة معاهم والواقع واضح جدا
إحنا شعب مالوش أي وزن يا إنجي

معاكي و ربنا يستر لا يقوليلي في المطار و أنا داخلة"مادام حاشرة نفسك في اللي مالكيش فيه إرجعي بلدك بقى يا ماما"

Sat May 31, 10:03:00 AM GMT+3  
Blogger Sharm said...

اسود .. في الحر ده ؟
موعدكيش

Sat May 31, 03:18:00 PM GMT+3  
Blogger الشنكوتي الكبير said...

مبروك على الكتاب دي اولا

ثانيا بطلتي تزوريني خالص

براحتك بقى

المهم تكوني بخير انتي طارق


سللاااااااااااااااام

Sat May 31, 04:48:00 PM GMT+3  
Blogger micheal said...

لبسته يوم 4 مايو ومحصلش أي حاجة وكنت الوحيد اللي ماشي لابس أسود في أسود
:(
تحياتي

Sat May 31, 09:00:00 PM GMT+3  
Blogger بنت جامده said...

انا اولا مستغربة
انتى مش خايفة على نفسك
بس والله انا معجبة بيكى جدا
انا فى الاضراب بتاع الشهر اللى فات عشان يخففوا من غضب الناس قالولنا مبروك نزلكوا عقود مميزة على 306 جنية فرحنا اغوى وقالوا حيزيد عليكوا الكادر يعنى 400 جنية
والاسعار ارتفعت لما الخبر انتشر
النهاردة عرفت ان مرتبنا كلة حيكون 148 جنية
بس
والاسعار زادت
والمرتب ملاليم
نعمل اية بسد

Sat May 31, 10:28:00 PM GMT+3  
Blogger همس الليل said...

لا يسعنى الا ان اكتب رثاء فى وطن يحتضر
.
.
وحشتينى
ايه الحكايه معاكى يا بنتى قبل الخطوبه كنتى بتكتبى برومانسيه حزينه
الخطوبه خلتك تتكلمى فى السياسه ولا ايه
احنا لازم نوصى خطيبك عليكى شويه ههههههههههه
سلام يا قمر

Sat May 31, 10:33:00 PM GMT+3  
Blogger بنت جامده said...

أنا أولا مستغربة
انتى مش خايفة على نفسك
بس والله انا معجبة بيكى جدا
انا فى الاضراب بتاع الشهر اللى فات عشان يخففوا من غضب الناس قالولنا مبروك نزلكوا عقود مميزة على 306 جنية فرحنا أوى وقالوا حيزيد عليكوا الكادر يعنى 400 جنية
والاسعار ارتفعت لما الخبر انتشر
النهاردة عرفت ان مرتبنا كلة حيكون 148 جنية
بس
والاسعار زادت
والمرتب ملاليم
نعمل اية بسد

Sat May 31, 10:41:00 PM GMT+3  
Blogger رفقة عمر said...

انا بالبس اسود اساسا
يعنى مش جديد عليا
بس برضه ولا هياثر صدقنى الناس كلها محتاجه تغير علشان تتغير الدنيا من حوالينا

Sun Jun 01, 12:02:00 AM GMT+3  
Blogger Tamer Nabil said...

انووووج

التعبير بالكتابة وعرض الاراء افضل من الاتداء لون معين

وصدقينى انوووووووج محدش هيخد بالة لان بجد الناس اغلبيتها بقت لابسة اسود من غير اى حاجة

انوووووج ارجعى واكتبى زى الاول انووووج

تحياتى

Sun Jun 01, 04:49:00 AM GMT+3  
Blogger inksarat said...

وقعدت ادور على لينك مدونتى وسط السبع تلاف لينك اللى فى اليمين دول
وفى الاخر قررت البس اسود يوم النكسه
ـــ
والله يخرب بيت حنفى
واى حلجة بقى
ـــــ
تحياتى

Sun Jun 01, 08:48:00 PM GMT+3  
Blogger احساس لسه حى said...

عزيزتى
هو الاقتراح كفكرة حلوة

بس انا احب المواضيع دى التحضير ليها يكون كبير

علشان تأثر ويكون ليها معنى

ومش مهم نعمل ميت اضراب فى السنة وكل اضراب فيهم يشترك ناس قليلة

ممكن اضراب واحد بس يكفى بس الشعب كله يشترك فيه

فارجوا التحضير وبلاش نضيع معنى الاضراب بكتر الدعوة ليه

ارجوا يكون فكرى وصلك

وبجد محتاجيين نعدى النكسة الل عيشنها دى

تحيات ومودتى

سلااام

Mon Jun 02, 12:26:00 AM GMT+3  
Blogger maha miho said...

سمراء أمورة النيل انتي تاني واحدة تقول الكلام ده ادامي بس انتي عارفة، انا بقتنع أوي بالموضوع ده بس الشعب المصري محتاج يفهم ويعرف قيمة الحاجات دي
زي ما انتي شفتي الفرق بين اضراب ابريل واضراب مايو،، مش عايزة اشوف المنظر ده تاني ف يونيو
سمراء،، تفتكري امتى شعبنا يفوق كهد ويصحصح؟ لما الاسعار غليت نار وبرضه مش عارفين يعملوا حاجة صح؟ انا مقتنعة اوي ان اضراب ابريل قال كلام كتير بس فعلا نفسي نستنى شوية على نفسنا على شعبنا ما يفهم
الشباب اصقـفـله فعلا في الحاجات دي، انما بتبقى الحاجة اوقع لما تيجي من رجل الشارع العادي والبياعين والسواقين ولاد الذين اللي نفسي بجد يعملوا حاجة والبلد تقـف،، بجد بحلم باليوم ده
ححححححححححححح
سمورة،، ربنا يقوينا

Mon Jun 02, 03:04:00 PM GMT+3  
Blogger ibn nasser - ابن ناصر said...

سمعت الفكرة دي قبل كده
ربنا يوفق ونشوف المعارضه والعمال وكده
لكن مبدأيا موافقين

Tue Jun 03, 12:59:00 PM GMT+3  
Blogger darsh said...

انا قلت اجي امسي واشوف الجديد .. بس برضه ما لقيتش حاجه .. هو عموما انا حاسس بالحماس اللي انتي فيه ده جدا لاني كنت حاسس بيه برضه لكن شوية وبدأت احس ان الموضوع اي كلام لان اساسا الاضراب اول ما بدأ كان المفروض انه تضامنا مع المحله والمحله لحد النهارده لسه بيتبهدلوا والناس كل يوم عينيها بتتفقع وفي الاخر (ولا أي حاجه حصلت) وبرضه ما عملناش أي حاجه لهم ولا على الاقل مجرد مسانده معنوية ده احنا حتى نسينا احنا كنا بنضرب ليه اصلا

Tue Jun 03, 10:36:00 PM GMT+3  
Blogger كلمه said...

may be

Wed Jun 04, 01:14:00 AM GMT+3  
Blogger عمرو النوبى said...

اولا انا معجب بحماسك
بس تفتكرى اننا محتاجين نلبس اسود علشان العالم دى تحس بينا
طب مهو العالم كلو عارف اننا بقينا فى الحضيض وحالتنا اسود من السواد
وتفتكرى لو نفزنا فكره حد هيسمع لنا ولا حتى حد هيبصلنا وربنا هيلبسونا الوان بالعافية وهيخلونا نغنى الحياة بقا لونها بنبى
عارفة اية اكتر حاجه ممكن تتغير لو نفزنا فكرتك
ان القماش الى لونو اسود هيغلى اوى اوى
يعنى برضو خرباااااانة
يابنتى لا حياة لمن تنادى والشكوه لغير الله مزله
احنا انتهينا وربنا وحدو الى رحيم علينا
تحياتى ليكى
واتمنى انك تشرفينى فى مدونتى المتواضعة

Wed Jun 04, 04:36:00 AM GMT+3  
Blogger نهر الحب said...

اول مرة ادخل مدونتك
مدونة حلوة وفكرك كمان حلو
وكله حماس
فكرتك حلوة

بالتوفيق يارب

Wed Jun 04, 07:16:00 PM GMT+3  
Blogger حميد said...

أجمل حاجة إن الإنسان يكون

مبادر

مبدع

إيجابي


فكرتك حضارية يا فندم

وأعتقد يكفيكي لو محدش عمل ده غيرك

إن ده بيعبر عن فكر حضرتك المحترم

بس بيني وبينك

أحيانا

الإنسان هو اللي بيزود بذرة الحزن

الصغيرة اللي جواه ويفاجيء بعد كده إن

عنده إكتئاب م الهوا


خالص تقديري وتحياتي

Thu Jun 05, 05:31:00 PM GMT+3  
Blogger ادم المصرى said...

انا ليا رأى تانى اول حاجه السلام عليكم
****
تانى حاجه يا استاذه الموضوع مش موضوع اضراب اومظهرات او اى حاجه من دول ممكن اعرف ايه الافاده من الاضراب تفتكرى ده هيغير حاجه او هيذيد حاجه عادى جدا هينفضو لكل ده بردو اهم حاجه فى الموضوع كلو كلمتين****
****

لا يغير الله ما بقومن حتى يغيرو ما بى انفسهم صدق الله العظيم
****

تحياتى لكل المعلقين واتمنا زيارتهم مدونتى
*****
سلام عليكم

Sat Jun 07, 03:29:00 AM GMT+3  
Blogger yasmina said...

نكستكم ونكبتنا
والام الشعب العربي كله تستحق هذا واكثر
كان الله في عوننا جميعا

تحياتي ويا رب تكون الفكرة نجحت

Sat Jun 07, 10:13:00 AM GMT+3  
Blogger أسوور said...

جريدة الأسرة العربية
قرر رئيس مجلس ادارة الجريدة مشكورا أن يتبنى كل ما يكتبه المدونون
وان يفرد مساحة لا بأس بها لبوستات البلوجرز
كما وافق على نشر البوستات المرشحة بتوقيع كتابها وصورهم
وذلك ايمانا منه بقوة التدوين وبأنها صوت المصريين
***
على كل مدون يرغب فى نشر مقالات - تحقيقات - قصص - نقد - ادب - شعر - سياسة او أى كتابات لم يرد ذكرها
ان يرسل البوست المرشح مذيل بتوقيعه وعنوان المدونة والإسم الحركى ان اراد
مرفق بصورة شخصية له
على الإيميل التالى

amyasser@hotmail.com

أو بتعليق على هذا البوست نفسه
يترك لينك البوست اللى عايز ينشره الجرنال له
تحت عنوان جريدة الأسرة العربية
الشـــــــــــــــــروط
-مراعاة الصحة اللغوية والنحوي والإملائية قدر الإمكان.
-مراعاة الا يزيد البوست المراد نشره فى الجريدة عن صفحة ايه فور.
- أولوية النشر تكون للبوستات التى فيها موضوعات عامة تهم فراء الصحف.
-اولوية النشر للبوستات التى ترسل على الميل المذكور أعلاه كفايل وورد مرفق.
الجريدة تصدر الإثنين من كل أسبوع

Mon Jun 09, 12:27:00 AM GMT+3  
Blogger موجة said...

اخيرا
يا سلاااام
أخيرا الواحد رجع لعالم التدوين بسلام
الحمد لله
بعد كده مش حأغيب عنه تاني
على فكرة البوست ده جميل جدا قوي خالص

خالص تحياتي
أحمد توفيق

Mon Jun 09, 08:48:00 PM GMT+3  
Blogger esraa said...

انا لبست اسود يومها

Tue Jun 10, 12:17:00 AM GMT+3  
Blogger الأرمـوطــي said...

ازيك يا سمارة تحياتى ليكى من مقهى الارموطى الدولى بوست جميل كالعادة
سلام

Tue Jun 10, 08:29:00 PM GMT+3  
Blogger عـمـرو قـطامـش said...

مواااااااااااااااااافق

Wed Jun 11, 02:30:00 AM GMT+3  
Blogger casper said...

الصراحة انا مش شايفة اننا كدة عملنا حاجة ماشى هنلبس اسود وبعدين هل هيجبلنا شغل ولا اكل ولاولاولا.....مش الاسود الحل هو اكيد فى حل بس هو ايه مش عارفة

Thu Jun 12, 06:53:00 PM GMT+3  
Blogger david santos said...

Excellent!
Happy weekend

Sat Jun 14, 06:50:00 PM GMT+3  
Blogger casper said...

This comment has been removed by the author.

Mon Jun 16, 09:49:00 PM GMT+3  
Blogger ahmed a.aziz said...

slmo 3lekomm :)

Tue Jun 17, 02:36:00 PM GMT+3  
Blogger tote said...

هو كلامك ممكن مش يبقى الحل واكيد فى حلول احسن من كدة بس وايه المانع اننا نجرب يا عالم وامنى منك الزيارة

Tue Jun 24, 12:49:00 AM GMT+3  
Blogger Beela said...

انا لما بكون زعلانه من حاجه بلبس اسود او غامق مش احتجاج بس اللون احساس سعات الواحد بيحتاج يستريح يعبر عن حزنه باللون

بس صدقيني لبس الاسود سهل
لكن الاحساس هو اللي صعب
متقوليليش كل مصري زعلان علي بلده
ده كلام فاضي
دول قله قليله و الباقي زعلان علي نفسه
واللا مكنش سرق
مكنش قبل الرشوه
مكنش تهرب من القانون حتي يا ربي في المرور
مكنش غش في الاكل وباعه منتهي الصلاحيه
ولااضاف للبن مواد تجبلنا السرطان
مكنش طبيب اهمل فحق مريض
مكنش تلميد اهمل في مزاكرته
مكنش حتي رمي زباله في الشارع
لو هنقول مصر بقت غابه
فده عشان ساكنها اسفه اوي(ابتعدوا عن الادميه)
ماشي مش كلهم
ده لو حتي نصهم شرفاء النص التاني بيحارب شرفهم
و حتي دي مش حقيقه

لما الناس بجد تحس بالزعل هتلبس الاسود زيك لوحدها
لما الناس تقرر تبطل سكوت و تعبر عن نفسها
لما الناس تقرر تبطل تستفيد من الفساد
لما كل واحد يشيل ايده من جيب اللي جنبه
لما كل واحده تشيل لسانها فبقها عن اللي جنبها
ويبقي كله خرج من ادينا
ساعتها هنلبس اسود منغير اي دعوه من حد

الاحباط لما هيقتلك ويقتلني يبقي علي الله السلام
لو كل واحد فينا بس فكر ازاي يبقي احسن واحد و يتخلص من عيوبه
كلنا هنبقي احسن من بعض

واخيرا يا عروسه النيل
بجد من يوم ماشفتك وانا بحس انك عروسه
مفيش عروسه بتلبس اسود:]
وحشتيني

سلسبــيـــل

Tue Jun 24, 06:39:00 PM GMT+3  
Blogger كاتب مصري said...

تحيتي
يشرفني أن أدعوكي لزيارة مدونت المتواضعة ووضع لمساتك عليها
أنتظرك سيدتي ولي عودة للتعليق على البوست
مدونتي هنا
http://kanyatklam.blogspot.com/

Wed Jun 25, 04:25:00 PM GMT+3  
Blogger أحمــــد said...

بسم الله الرحمن الرحيم
أدعوك لزيارة مدونتىhttp://ommee.blogspot.com وشكرا

Thu Jun 26, 07:10:00 PM GMT+3  
Blogger إبراهيم محسن said...

ربنا معاكي
على فكرة اعتقد ان فيه نقطة غايبة عنك

لو الحكومات عرفت الخطة دي هتخلي اسعار الملابس السوداء نيران
والناس كلها هتبعد عن الفكرة لأنه مش لاقي

ممكن تغيري الخطة وتخليها حاجة تانية
ربنا يوفقك
انا مش بهرج انا بتكلم بضحك
مجنونة دايما ياللي في بالي
وربنا يستر على بالي لأنك فيه

Fri Jun 27, 09:14:00 PM GMT+3  
Blogger catroz said...

معااااااااااكى يا انجى ...

Sat Jun 28, 06:15:00 AM GMT+3  
Blogger Hu-man said...

هي الفكره مش جديده ...وحصلت بشكل جزئي في الإضراب اللي فات ..لكن إزاي هاتقنعي المواطن البسيط بكده ..إحنا قبل مانفكر في ده ...نفكر الأول هانفذه إزاي ...وفي وجود أفكار باليه وسلوكيات سلبيه عند الشعب المصري ..المفروض نغيرها الأول ونبدأ بنفسنا

Sun Jun 29, 03:06:00 AM GMT+3  

Post a Comment

Links to this post:

Create a Link

<< Home