Sunday, May 24, 2009

حنين


مش عارفة اقولك ايه

بس انا بحبك اوي

وخايفة عليكي اوي

كتير اوي قالولي انك مش جاية

واني ممكن اتحرم منك اصلا واني مستحيل اشوفك

وعلي فكرة انا مشتقالك اوي

ووحشتيني اوي

تعالي بقي عشان مشتاقة للمستك

واني اخدك في حضني وابوس جبينك

وانسي دنيتي كلها بنظرة منك او ابتسامة

حاسة اني هسيب الدنيا واطلع للسما وانام علي كل النجوم

واجيبلك اجمل نجمة احطها في ايدك لما تضحكيلي

حاسة اني هدوب لما تمسكي ايدي

مش عارفة اقولك احساسي ايه لما الاقيكي بتجري عليا

وانتي بتعيطي وانا بين كل الناس

وانا الوحيدة اللي جريتي عليها عشان تترمي في حضنها

مش عارفة اقولك احساسي ايه لما الاقيكي نايمة علي رجلي

او من حنينك ليا تنامي علي صدري

انا عارفة انك اول ما هتيجي هتبقي ساكتة

بس خليكي عارفة اني هبقي مشتاقه لصوتك اوي وانتي بتناديني

عارفة

اقولك علي سر بس مش تقولي لحبيب عمري

في اول جوازي كنت فاقدة الامل في وجودك

بس لقتني بعد 4 شهور من جوازي بتمناكي اوي مش عارفة ليه

رغم اني عارفة انك هتشغليني عن حاجات لو جيتي

بس وقتها لقتني بتمناكي اوي وبنادي عليكي

بصيت لحبيبي ولقتني بقول من جوايا انا عايزاها

عايزة احس بيها بقي

وطلبت انك تكوني شبهه وشبهي

سمرا بشعر ناعم وبعيون عسلية

تجمعي بيني وبينه انا بس

ساعتها كان عندي حنين جامد اوي لكل حاجة حلوة

حنين ليك يا طارق وحنين للحب

وحنين لكل لحظة حلوة هلاقيها معاك ومعاها

من اول يوم كنتي فيه جوايا بطريقة ما كنت حاسة بيكي

بس كنت بكدب نفسي ما هما قالولي انك مش جاية

لكن فاتت اسابيع واتأكدت انك موجودة

انا عارفة انك هتزعلي لو قلتلك اني انهرت

لما عرفت انك موجودة

خفت

اصلي خفت اوي

اصلي انتي مش عارفة انا تعبت اد ايه في حياتي

ورغم اني في البداية لما كنت شاكة في وجودك

كنتي قوية اوي

قوية بدرجة غريبة

ومتمسكة بيا اوي

انتي كنتي عايزاني

رغم ان اللي عملته كان ممكن يخليكي مش موجودة بس انتي اتمسكتي بيا

وقلتي انا جواكي

رغم ان في الفترة دي شغلي كان صعب وبتنطط كتير

وبشيل حاجات تقيلة اوي وانتي متمسكة بيا

لحد ما اتاكدت انك موجودة بجد

رغم زعلي واني اتعرضت مرتين اني اخسرك

بس باقل مجهود كنتي انتي برضه متمسكة بيا

كنتي قوية

زيي

وزي السبب في وجودك

كنت خايفة اوي لما تيجي تاخدي حبيبي مني ويحبك اكتر مني ويهتم بيكي اكتر مني

بس لما لقيته بيدعي انك تطلعي شبهي مكنتش غيرانة اوي

انا لسة مش شفتك

بس متخيلاكي

بتقربي كل مرة من الحقيقة

فاضل شهرين وتبقي حقيقة

واخدك في حضني بجد

واحطك علي صدري عشان تشربي حنيني ليكي

حنين

قررنا انا وابوكي نسميكي حنين

عشان ساعتها هتعبري باسمك دة عن اللي بيني وبينه

عن اللي بيني وبينك

حنين مشاعر وامومة عشت فترة طويلة اوي مفتقداها

وحشتيني

حنين ليكي

حلو اسم حنين

رغم اني قعدت سبع شهور مش عارفة انتي ايه بالظبط

لحد ما قالولي انك بنوتة

زي ما اتمناكي ابوكي بالظبط

عارفة لما كانوا شاكين انك ولد ابوكي قال الحمد لله

رضا ,اللي يجيبوا ربنا كويس

ولما رجعوا قالوا انك بنوتة

مش قادرة اوصف مشاعر ابوكي كانت عاملة ازاي

كان طاير من الفرحة ومش كان مصدق نفسه

الكل فاكر ان هو زعلان عشان انتي بنوتة

بس انتي مش عارفة ان هو السبب في وجودك

عشان كان بيدعي بجد انك تبقي انتي حنين

البنوتة السمرا الجميلة

مستنياكي اوي

عايزة اعملك حاجات كتير اوي

واجيبلك الدنيا كلها واعوض عمري كله معاكي ومع بابا

بس خالي بالك ان انا هفضل البنوتة الاولي في حياته

مش هنغير من اولها ماشي

اقولك علي سر لما بحس بحركتك

احيانا بحس انك بتلعبي معايا وببستم اوي

وبستني حركتك اول ما اصحي من النوم

واوقات بحس انك عايزة تثبتي نفسك وتقولي انك موجودة

ومن كتر حنيني ليكي عنيا بتدمع لما الاقيكي بتتحركي جوايا

عارفة اني هفتقد الاحساس دة بعد ما تبقي حقيقة

احساسي وانتي بتتحركي جوايا

ربنا يجيبك بالسلامة وتبقي زي ما اتمنيت

وتبقي قوية زي ما اتزرعتي جوايا

بحبك يا حنين

وربنا يخليكي ليا يارب


42 Comments:

Anonymous ahmed abozied said...

أنجى
ألف مليون مبروك أولا
ويارب حنين تشرف وتنور الدنيا
ثانيا كلامك جميل قوى
واصف شعور رأءع لأنتظار أول مولود
وحجات كتيره قوى فى كلامه ليها معنى وفيها مشاعر

أن شا ءالله حنين تيجى تنور الدنيا وتكون أجمل بنوته فى الدنيا
ومره تانيه ألف مليون مبروووووك

Sun May 24, 06:38:00 PM GMT+3  
Blogger No Fear said...

السلام عليكم
مبرووووووووووووووووووووووووووووك
يا أم و أبو حنين
ربنا يبارك لكم فيها يارب
ربنا يسعدكم دايما يارب
و الله يا إنجي أنت حاليا الوحيدة اللي بتديني أمل في الحياة بجد و الله مش تهريج
ربنا يكرمكم يارب
و إن شاء الله معزوم في السبوع زي الفرح كده
أوك

Sun May 24, 06:48:00 PM GMT+3  
Blogger magi said...

مبروك حنين اسم حلو جدا ربنا يجبها بالسلامه
بجد انا عمرى مقريت كلام صادق اوى اد الى انت كتبتيه لحنين
ربنا يوفقك

Sun May 24, 07:56:00 PM GMT+3  
Blogger رحــــيـل said...

ربنا يوصلها للدنيا بسلامه
وتكونى بخير
وهى كمان بخير
وكل حياتكم تبقى حب فى حب انتى وحنين وابو حنين

فى اتنظار حنين تنور الدنيا كلها
ربنا يهينكو يارب

Sun May 24, 08:26:00 PM GMT+3  
Anonymous hanaa said...

ياااااااااه كل دى مشاعر......ربنا يجبهالك بالسلامة ويارب تكبر وتعرفتقرا عشان تقرا الكلام الجميل ده وتعرف قد ايه انتى بتحبيها قبل ماتشوفيها

Sun May 24, 10:24:00 PM GMT+3  
Blogger romansy said...

السلام عليكم
الف الف مبروك نعمه كبيره من ربنا نعمه الحمل والاولاد

ربنا يجيبها بالاسلامه

Sun May 24, 11:40:00 PM GMT+3  
Blogger ساعه الغروب said...

حبيبة قلبى

ربنا يهنيكى يا رب ويسعدك ويتمملك على الف خير
وتشوفى حنين جنبك وبين ايديكى باذن الله

ربنا يعو1ضك بيها عن كل لحظ تعبتى فيها ويجعلها ليكو يا رب الذريه الصاحله

بحبك اوى ياام حنين ووحشانى اوى

انا عارفه انها بتحبك اووووووووى اووووووووووى اوووووى

انتى عارفه انك الحضن الوحيد اللى قدر يريحنى ويحسسنى باحتضانه ليا بجد
فما بالك بقى بحنين
:)



مش عارفه اوصل لاى رقم ليكى عشان خاطرى اتصلى بيا طمنينى عليكى عشان خاطرى يا انجى

انت بجد وحشانى اووووووووووى

ربنا يتمملك على كل خير ويسعد قلبك وقلب طارق بحنين

ربنا معاكى وطمنينا عليى ارجوكى دايما
ولما تيجى حنين بالسلامه يا ريت طارق يبلغنا هنا لان دى حاجه لازم نعرفها اكيد من هنا كمان

ربنا معاكى و يطمنا عليكى

Sun May 24, 11:56:00 PM GMT+3  
Blogger bos bos said...

يااااااااااااااااااااااااااه مبسوطة قوى ليكى يا انجى ومبسوطة بحنين وبفرحتك
وان شاء الله توصل حنين للدنيا بالسلامة وتبقى أحلى حنين وأحلى فرحة ليكى ولطارق

مبرووووووووووووووووووووووك

Mon May 25, 12:57:00 AM GMT+3  
Blogger Ma 3lina said...

Mabrooooooooook alf alf mabrook msh motkhila sa3aty bgd, rabna ye2wemk bel salama isa enty w hia we ybarklek feeha isa :)))))

Mon May 25, 03:53:00 AM GMT+3  
Blogger الشنكوتي الكبير said...

ههههههههههههههههه

انا مش مصدق نفسي
الف الف مبروك يا سمراء
الف الف مبروك بجد ليكي انتي وطارق

الحمد لله
انا فرحان ليكم جدا انتي اصلكم اتبهدلتوا قوي يا بنتي وربنا بيعوضك كل خير لأنه كريم

ربنا يبارك فيها ويحفظها ليكم

وربنا معاكم بقى في البامبرز
لحسن الناس هنا بتشتكي منه قوي
هههههههههههههههههه

طلعيها حلوه كده علشان اشوفلها عريس كويس بقى يستاهلها

هههههههههههههههههههه

الف الف مبروك

عموما احساسك وكلامك بيأكد انها هيبقى ليها والدين هايلين هيهتموا بيها ويحافظوا عليها وحبوها ويربوها صح

هتعوضيها عن اي حاجه شوفتيها انتي وكانت صعبه
معلش بكره هيبقى بيها احلى

سلاااااااااااااااااااااااااااااام
اخوكي ايهاب

Mon May 25, 09:17:00 AM GMT+3  
Blogger يوميات شاب منوفى said...

الف الف الف مبررررررررررررررررررررررررررررررررررررررررررررررررررررررررررررررررررررررررررررررررررررررررررررررررررروك
وعقبال ماتشرف للدنيا وتطلع دمها خفيف زيك ياسمرا وبلاش الغيبة الطويلة دى

Mon May 25, 11:52:00 AM GMT+3  
Blogger إنـســـانـة said...

ما شاء الله لا قوة الا بالله

ربنا يجيبها بالسلامة ويجعلهالك طفلة صالحة وبتسمع الكلام وبتحبك انتى وبابا ومشرفاكوا ورافعة راسكوا دايما اللهم آميييييييييييييين

Mon May 25, 11:58:00 AM GMT+3  
Blogger آلام وآمال said...

بسم الله ما شاء الله
ربنا يجيبهالكم بالسلامة يارب وتفرحوا بيها ويجعلها ذرية صالحة
ويوفقك انتي وطارق

انتي بتكتبي بأسلوب مبهر يا أم حنين
:))

Mon May 25, 03:51:00 PM GMT+3  
Blogger YHYيــوســف الـمصـرى said...

ألف مليون مبروك
ربنا يبارك وتوصل وتشرف بالسلامة
ونطمن عليها وعليكى أن شاء الله
:))
سموها يوسف بقى خليكوا جدعان
هههههههههههههه

سلامى لطارق باشا

:)

Mon May 25, 05:24:00 PM GMT+3  
Blogger مها العباسى said...

ربنا يطمن قلبك عليها وتوصل بالسلامه وتفرحى بيها وتسعدك وتسعديها
:)

Mon May 25, 08:13:00 PM GMT+3  
Blogger مها العباسى said...

ربنا يسعدك

Mon May 25, 08:13:00 PM GMT+3  
Blogger فوكيره said...

انا فرحاااااانه اوووي يا انجى
فرحانه اووي بجد

عارفه انا بقرأ وعينى بدمع وبشوف حنين بتقرا كلامك ليها

و بيجري قدامى خط عمري ... تعب و خنقه وراحه احيانه ومن بعدها التعب تانى

شرييييط طوييل ...

حنين خليته هين اووي اووي ...

ربنا يكتبلك السلامه ياا رب
ويطمنى عليكى ...
---
حنين : انا عارفه انك في يوم هتقري كلامى

ماما دي احسن حد في الدنيا استحمل كتير
وحبك اووي من قبل ما تكونى

انا عارفه انك دلوقتى اكيد سعيده
في وسط اتنين بيحبووكى اووي

ربنا ميحرمكيش منهم وميحرمهمش منك
وتعيشوا سعداء لاخر العمر وتعدو سوا ازمات الحياه بسلام

بنحبك من قبل ما نشوفك :)

Mon May 25, 11:25:00 PM GMT+3  
Blogger نبض اسكندرية said...

سمراء

اسمى ياانجى بجد هايوحشنى جدا لانى بحبة اوى لكن حنين ست البنات اكيد تستاهل اننا نناديكى بيها واكيد انتى كمان فرحانة اننا نقولك يام حنين

انا فرحانة اوى وسعيدة جدا جدا بالبوست دة لانى حسيت فرحتك ياانجى بيها

ربنا يخليكى ليها ويخليها ليكى
وتكبر قدام عنيكى وتشوفيها احلى البنات كلهم

:))

Tue May 26, 12:05:00 AM GMT+3  
Blogger فتاه حالمه said...

يااااااااااااااااااااااااه يا انجي
واسفه لو بقولك انجي كدا كاني اعرفك من زمان بس انتي وصفتي احساس جوايا اوي
لدرجه اني بكيت والله لما قريته
عارفه احساسك ده كويس اوي بس عارفه احساسي انا خيالي انا ولا مخطوبه ولا متجوزة
بس عندي بنوته في خيالي بنتي حبيبتي
وكنت محتاره بين اسمين حنين وحبيبه
وباذن الله لو ربنا كرمني في يوم وجبت بنات هتكون ان شاء الله الاولي حبيبه والتانيه حنين
عارفه لما تكوني مغمضه وتلاقي صوت بيقولك يا ماما انتي نايمه وتفضل تمسك ايدك وتشدها قومي بقي قومي بقي
وانتي عامله نفسك نايمه عشان تفضل تقول يا ماما يا ماما
ياااااااااااااااااه يا انجي تعرفي اني في يوم حلمت بيهاجايه بتجري عليا ودخلت جوه حضني وفضلت ضمها ليها ودموعي بتنزل في الحقيقه وفي الحلم
الله اعلم امتي هشوفها بس هي مهما بعدت عني هي جوه قلبي بنتي حبيبتي

معلش يا انجي كلامي مش متناسق ولا مفهوم بس بجد كلامك رقيق اوي
ربنا يباركلك في حنين وابو حنين ويكرمكم ويخليكم لبعض وتفضلي ديما بخير وسعاده وتشوف حبيبه وجمالها قدامك ولما يجيلك حنين لاحساسك بيها جواكي متنسيش تسميها ساعتها باذن الله حبيبه
ربنا يكرمك بكل الخير
انا شوفتك علي فكرة يوم حفله توقيع كتاب انا انثي
بجد باذن الله هتكوني ام جميله وحنين هتكون بجمالك وطيبتك وملامحك المصريه الجميله

ربنا يتتملك علي خير وتكوني اجمل واسعد ام باجمل واسعد بنت حنين
مبروك ليكي ولابو حنين
تحياتي

Tue May 26, 01:55:00 AM GMT+3  
Blogger مـحـمـد مـفـيـد said...

الله يبارك لك في حنين ويجعلها قره عين ليكي ولطارق
والا نقولوا ياابو حنين
مبروك يا انجي وربنا يكرمك فيها ويجعلها من خير الخلف

Tue May 26, 11:46:00 AM GMT+3  
Blogger ๓คภ๏ภค said...

الف مليوووووووووووون مبروك يا انوج

وعقبال يارب يارب ماتشوفى ولاد ولاد ولادها باذن الله ياحبيبتى ربنا يباركلك فيها ويحفظهالك يارب اللهم امييييييييييييييين

وبلييييييييز ادى لنفسك فرصة تفرحى حرام عليكى بطلى خوف

Tue May 26, 07:09:00 PM GMT+3  
Blogger islamz said...

يا رب يا انجى ربنا يخلف عليكى انتى وطارق بالذرية الصالحة ... ويكرمكوا يا رب ...
مفتقد مرورك على البلوج يا اختى العزيزة ....

:]

Tue May 26, 11:33:00 PM GMT+3  
Blogger Ehab said...

الف مليون مبروك يا ستي
و من هنا و رايح انت هيكون اسمك ام حنين
سيبك من كل اسمائك القديمة
ام حنين احلي واحد فيهم
مبروك و عقبال ما تقومي بالسلامة
و ماتزعليش انك هتفتقدي حركة حنين جواكي عشان لما هتفقديها هتكسبي انها تكون في حضنك
:)

Wed May 27, 09:54:00 PM GMT+3  
Blogger كيكى said...

لمة اتحكلى على البوست دة وقالولى عليه
مستغربة ان الناس دى كلها علقت
بجد مش عارفة اعلق
عوووووو

Wed May 27, 09:56:00 PM GMT+3  
Blogger خمسة فضفضة said...

السلام عليكم ورحمة الله وبركاته

الف مبروك يا انوج


احتمال تكون اليومين دول حنين جت بالسلامه يارب يقر عينيك بيها دنيا وآخر والف حمد الله علي السلامة

Thu May 28, 10:54:00 AM GMT+3  
Blogger hamada said...

يفتح باب بيت المدونين ذراعيه لكل الموهبين في :
1/ القصة القصيرة
2/ الشعر بشتى أنواعه
3/ الرواية "رواية سنوية سنقوم بنشرها في الجريدة"
4/ المقال الصحفي
إذا وجدت في نفسك القدرة على المشاركة التواصل معنا على الميل التالي
arabicsabah@yahoo.com
مواضيعكم لأختيار الأفضل لنشره العدد القادم
كما نتمنى منكم التواصل معنا على جروب الجريدة الرسمي
http://www.facebook.com/group.php?gid=78080770039#/group.php?gid=78080770039

Thu May 28, 12:33:00 PM GMT+3  
Anonymous king said...

بصراحة احساس رائع

Thu May 28, 03:57:00 PM GMT+3  
Blogger blue-wave said...

يارب يكمل على خير وتيجى وتملى حياتك حب وحنين

Thu May 28, 07:53:00 PM GMT+3  
Blogger ميرام said...

الله
(:
بجد ربنا يكرمك
ويارب تيجي بألف سلامة ليكي وليها
بجد حسيت معاكي باحساس جميل
ربنا يتمملك على خير يارب
حقيقي من قلبي
...
حنين اسم جميل قوي
ربنا يحفظها
ويحفظك

Thu May 28, 11:39:00 PM GMT+3  
Blogger عبدالله said...

الف الف مبروك يا انجي وربنا يقومك بالسلامه و حنين توصل وتنور الدنيا بالسلامه

بوست جميل جدا مشاعرك كام رائعه بجد كلمات كالعاده مالهاش حل ربنا يسعدك ويباركلك في حياتك ابقي طمنينا عليكي

تحياتي

Sat May 30, 10:53:00 AM GMT+3  
Blogger جريدة الصباح العربي said...

شاركوا معنا في أختيار العمل الأفضل للنشر عبر صفحات جريدة الصباح العربي
http://sabaharabi.blogspot.com/
وذلك عن طريق التصويت في المدّونة على القصة التي أعجبتكم
أو التصويت عبر جروب الجريدة على الفيس بوك
http://www.facebook.com/group.php?gid=78080770039
وذلك لرعاية المواهب العربية الشابة

Tue Jun 02, 01:22:00 PM GMT+3  
Blogger أنـــا حـــــــــرة said...

بسم الله ما شاء الله
مبروووووووووووووووك يا نوجى
ربنا يقومك بالسلامة ان شاء الله و تفرحى بيها ، عارفة رغم انى ضد الخلفه ف اول الجواز و بما انى هتجوز ان شاء الله كمان شهر و كام يوم بقول يارب مبقاش حامل م الاول كده لاسباب كتير بس انا حاسة فرحتك و مبسوطالك عشان انتى مبسوطة اوى كده باين ف كلامك

يللا و اهو بدل ما نقولك يا مودام نقولك يا ام حنين


الف مبروك و ربنا يكرمك فيها

Thu Jun 04, 09:29:00 PM GMT+3  
Blogger micheal said...

مبروووووووووك وبإذن الله تفرحي بيها

Fri Jun 05, 02:25:00 PM GMT+3  
Blogger kalamfareghawyawy.blogspot.com said...

ربنا يقيمك بالسلامه يارب
وانا اقول البت مختفيه فين
ربنا يجيبها بالسلامه ويحميها
على فكره كلامك نزل دموعى
يلا تقومى بالسلامه
وحمدلله على سلامتى
انا جيت تانى

Fri Jun 05, 09:29:00 PM GMT+3  
Blogger جريدة الصباح العربي said...

أولاً أرحب بكل من استجاب للدعوة وانضم الينا من جديد وأتمنى من الجميع الاعلان عن لينك جروبنا الجديد لكي نعود كما كنا في الجروب الثاني

ثانياً سنبدأ الآن وبإذن الله في مسابقة الشعر والخواطر "تفاعلكم معنا هو ما نرجوه"

عادل فاروق
صورة في برواز
http://sabaharabi.blogspot.com/2009/06/blog-post_3522.html

عبد الله العباسي
ألم بلا أمل
http://sabaharabi.blogspot.com/2009/06/blog-post_9605.html

د/ ايمان مكاوي
ابحث عنك
http://sabaharabi.blogspot.com/2009/06/blog-post_158.html

ايهاب سيد
خائن
http://sabaharabi.blogspot.com/2009/06/blog-post_6557.html

حليس حورية نصيرة
ذكريني
http://sabaharabi.blogspot.com/2009/06/blog-post_5130.html

انتصار طايل
اتوكأ بعصا الحب
http://sabaharabi.blogspot.com/2009/06/blog-post_6044.html

اسلام محمود
بتنساني وبتسبني
http://sabaharabi.blogspot.com/2009/06/blog-post_5269.html

اسراء حامد
لخبطة
http://sabaharabi.blogspot.com/2009/06/blog-post_7682.html

مصطفى محمود
عرفتِ اليوم آياتي
http://sabaharabi.blogspot.com/2009/06/blog-post_9758.html

sky angle
اترك لي هذا المكان
http://sabaharabi.blogspot.com/2009/06/blog-post_13.html

..........................................................................................

تحياتي وتمنياتي للجميع بالتوفيق

تم نقل الجروب الى العنوان التالى
http://www.facebook.com/group.php?gid=108978046672‎

Sun Jun 14, 04:48:00 PM GMT+3  
Anonymous Omaaaaa said...

alf mabroooooook ya enjy ya om 7aneen rabna yetemlk 3la 5er w yes3d ayamk ya gamelaaaaaaaa

fa7rna 3shank mn gwaaaaa

Wed Jun 17, 04:12:00 PM GMT+3  
Anonymous Semsem El Massri said...

عايز اتكلم معاكى لو مفهاش ازعاج مش عارف احط الاميل بس ممكن تسيبيلى رساله على صفحتى فى الهاى5

Sat Jun 20, 03:02:00 AM GMT+3  
Blogger maha said...

سلام عليكي يا ... ام حنين
ازيك يا انجي
فرحانه جداااااااااااااااااااااااااااااااااااااااااااااااااااااااااااااااااااااااااااااااااااااااااااااا ليكي ربنا يسعدكوا يا رب و يباركلكوا في حنين و يفرحكوا بيها و تنور حياتكوا بحب و حنين زي اسمها
..
بس لو سمحتي بقي تاخدي بالك من نفسك
اتفقنا
سلام
مها

Wed Jun 24, 08:42:00 PM GMT+3  
Anonymous Anonymous said...

أين ذهب هذا المبلغ الضخم وهو " 130 مليار دولار" ؟.....؟

فى حديثه بقناة الجزيرة فى سبتمبر 2004 قال الأستاذ محمد حسنين هيكل أنه خلال الثلاثين سنة الأخيرة حصلت مصر على 150 مليار دولارعلى شكل منح وقروض وهبات .. صرف منها حوالى 12 مليار دولارعلى مشاريع البنية الأساسية وستة مليارات دولارعلى مشروع مترو الأنفاق .. ومصيرالمبلغ الباقى غير واضح !!!! أين ذهب هذا المبلغ الضخم وهو " 130 مليار دولار" ؟.....؟

و لمزيد من التفاصيل أذهب إلى مجموعة مقالات ثقافة الهزيمة فى هذا الرابط:

www.ouregypt.us

Thu Jul 09, 07:28:00 PM GMT+3  
Blogger أسوور said...

يا بنتى مش هتبطلى توجعى قلبى حتى فى لحظات الفرحة

ربنا يسعدك يا انجى

Tue Jul 14, 11:07:00 PM GMT+3  
Blogger ~ Bato0ot ~ said...

Mabrooooooooooooooooooooooooooooooooooooooooooooooooooooooook

Fri Jul 24, 05:02:00 PM GMT+3  
Blogger semo said...

الف مبروك وانا بنوتى بردوة اسمة حنين ومش عايزين الاسم ينتشر

Thu Aug 20, 12:27:00 PM GMT+3  

Post a Comment

Links to this post:

Create a Link

<< Home