احتفالات 6 اكتوبر

كل سنة بيجي علينا احتفال 6 اكتوبر والذي يحضره السيد مبارك
مع لفيف من الوزراء ( حلوة لفيف دي )المشاركين في هذا الاحتفال مش راقصين محترفين ولا حاجة
دول غالبا بيبقوا مجموعه من معهد البالية علي طالبات من كلية تربية رياضية سواء الزقازيق او الاسكندرية

وهذه السنة احتفالات 6 اكتوبر كانت في رمضان ووقع الاختيار علي كليتنا المصون
للاشتراك في احتفالات 6 اكتوبر

هتسالوني هتعملوا ايه هناك؟؟

هقولك بمنتهي البراءة هنرقص يا ريس
ووقع الاختيار برضه علي الفرقة الثانية كلها حوالي 300 بنت
وسيتم معسكرة البنات لمدة ثلاثة اسابيع
ام هند

عميدة الكلية قامت بترشيحي انا وثلاث معيدات للاشراف علي البنات في المعسكر والاقامة معهن
هنقيم معهن فين يا معلمة

في المدينة الجامعيه بحلوان
وبما اني قاهرية فلم يتنسي لي القاء نظرة عن ماهية المدينة الجامعيه بحلوان

لميت بؤجتي واستعجلت الرحيل وقلت اهج لبلاد حلوان
فين الاتوبيس اللي هياخدنا يا عم الحاج؟

لا انتو هتقضوها مترو

مترو في رمضان ؟؟

هيبقي في اتوبيسات بعد كدة
اوكي

اول ما رحنا التقينا بالاشراف علي السكن في المدينة الجامعيه واخبرونا
بان كل 6 طالبات هيسكنوا مع بعض في غرفة ونحن المشرفات لنا جناح لنقيم فيه

اووووووه سويت يعني

يلا يا دكاترة نطلع السويت بتاعنا عشان نحط البؤج

الارضية طالعه من الارض
والبياض متشقق
والمراتب يقرف منها الكلب الاعور
ومش في ملل خشب علي السرير

والعناكيب ملية الاوضة
دة غير الروايح
والحمام مشترك في الطالبت اللي ريحته تقريبا جايبة لوادي حوف

يعني غرفة تعذيب لغير الادميين

هو دة اللي محضره الجيش للبنات ولينا عشان هنرقص ادام الريس
وللعلم المبني المقيمين فيه البنات يبعد عن المطعم اللي هنفطر فيه ايام رمضان تلت ساعه مشي

وما ادراك ما اكل المدينة الجامعيه

وتمت الشكوي من الاكل وانا شخصيا كلمت شخصية ما في الجيش لاحضار طعام للبنات
دة انتو جيش يعني ؟
وتم بيات البنات في تلك الغرف المليئة بالاصدقاء الاليفة
وبما اني كنت جدعه جدا ولا يمكن اسيب بناتي في تلك المحنة
اطمنت انهم سكنوا في اوضهم واتسحروا وجري علي محطة المترو
عشان ادخل بيتنا الساعه اتنين ونص بليل
ولا يفوتني اني امسك كيس فول وانا ماشية وشايلاه ورافعاه بايدي كدة ال يعني نزلت اجيب السحور
سمعتي برضه

تاني يوم كان اول يوم بروفة علي مسرح الجلاء
البنات كانت صايمة
وتم نقلنا من حلوان لمسرح الجلاء ولمدة خمس ساعات لم يتم توفير مياة لنا رغم شكوي البنات وتعبهن
لافوجئ بوجبات كنتاكي وهارديز من بتوع التليفزيون رايحين لبتوع معهد البالية

الحقي يا دكتور شوفي جايبين ايه؟؟

شايفة شايفة يطفحوهم بالسم الهاري
عادي يا بنات
اصل احنا ولاد البطة السودة

بقوولكم ايه ؟
ادعوله ادعوله

وبعد انتهاء البروفة خرجوا البنات ووقفناهم 4 قاطرات

وكان في واحد لابس فوق كتافه حاجات كتير
اشي نسور علي سيوف علي نجوم علي دبابير
كتفه كان بيقع منه يا عين امه

ويجي واحد لابس بدلة عادية والاقي ابو السباع السالف ذكره مرعوب وبيضربله التمام وهو بيترعش

وبص للبنات ودار الحوار كالتالي

سأل رئيسة قسم رعاية الشباب

ادا هما كلهم محجبين كدة
هي : ايوة يا فندم

هو : لالالالا كدة مش ينفع
انتي عندك كام بنت مش محجبة

هي : مش كتير يا فندم حوالي 10 بنات بس

هو : لا حاولي تدوري علي بنات مش محجبة ومش مهم دفعه سنة تانية

انا بقي : ( ومش الم لساني دة ) علي فكرة حضرتك لو نكت الكلية كدة بطلابها
بدكاترتها بفراشينها والدادات مش هتطلع 25 واحدة

هو : زغرلي حتة زغرة وقالي : انتي بقي معيدة

انا : ايوة

هو لينا كلنا: طب ينفع يقعلعوا الحجاب

البنات كلهم : لالا مش ينفع ازاي حرام يا نهار اسود بيتكلم يقول ايه ادادا هو قال ايه بلابلابلابلابلا

انا بقي تاني : مين اللي يقلع الحجاب

هو : البنات

انا : ازاي يعني مش ينفع

هو : لا لازم دة بامر من المشير

انا : مشير مين دة

هو : الرياسة يعني دة بامر من السيد الرئيس محمد حسني مبارك
انا وانا كلي ثقة ومش عارفة جبتها منين : يا سلااام

ايه يعني حسني مبارك هو حسني مبارك دة فوق ربنا البنات مش هيقلعوا الحجاب

هو بمنتهي الحزم والهيبة في نفس الوقت: انتي عارفة انتي بتتكلمي مع مين

انتي بتتكلمي مع مدير سكرتارية الريس

انا وانا افع حاجبي: هو في منصب كدة

هو : انتي قلتيلي انك معيدة شكلك عايزة ترجعي طالبة تاني
انا : ان شاله ترجني في بطن امي تاني لكن البنات دي مش هتقلع الحجاب مش كفاية هترقصوهم

انتي قلتيلي اسمك ايه بقي

وبصراحة كنت هعترف
لولا زمايلي ورئيسة قسم رعاية الشباب قالوله

اسمها سماح حضرتك

وتاني يوم جه قرار رئاسي برفض بنات كلية تربية رياضية بنات الجزيرة من المشاركة في احتفالات 6 اكتوبر
وجابوا بنات اسكندرية

مين بقي السفيه اللي قال اننا في دولة اسلامية

ما علشان احنا غلابة نتبهدل

انما لو كنا مزز كنا اتشالنا فوق الراس
مش قلتلكم قبل كدة الله يخربيتك يا حنفي