تاج حياتي يا عين ما شفتوا زيه تاج

تاج تاني يا لطيف اللطف يارب

طب اقولكم ايه بس

هو مش في غيري في البلد دي ولا ايه

عامة التاج دة اتبعتلي من انسانة وحلم

وطبعا الاتنين مش هقدر ارفضلهم طلب

بس دة تاج خبيث اوي

هو انا ناقصة فضايح

مانا فاضحة نفسي علي الملأ عادي يعني

المهم التاج دة سؤال واحد بس

اللي هو ايه بقي

خمس حاجات مش في حد يعرفهم عني؟؟؟؟؟

يا لهوووووووووووووووي

دة مليون حاجة وحاجة مش في حد يعرفهم عني

انا شخصيا مش اعرف حاجات عني

عامة هجاوب وربنا يسترها برضه

اولا: اللي مش في حد يعرفوا عني اني اتعرضت لاصابة وانا في الكلية لحد النهاردة الاصابة دي مأثرة علي ضهري ورقبتي وكتفي اليمين

بس بما ان انا عندية فمش في حد عارف بيها واني بمارس حياتي عادي جدا وبروح تمريني

بس بتسببلي الم جامد وانتوا اول ناس تعرفوا الكلام دة

ثانيا: العيد بالنسبة ليا اني البس بيجاما جديدة واسيب شعري وخلاص كدة وابقي عيدت

وزمااااااااان اوي رحت قعدت عند جدتي لوالدتي وكان اول يوم العيد

ونزلت الشارع العب وانا لابسة البيجاما الجديدة وفرحانة اوي وكنت كل شوية اعدي الشارع اروح من رصيف لرصيف

وشايفة عجلة جاية من بعيييييد

وبرضه رايحة جايه مش اتلم لا برضه

والعجلة قربت

وانا بقي فاكرة ان الحياة هتبقي بيس وهعمل عملية مراوغه واعدي

لحد مانا اللي شفت العجلة طريقها فين وبقدرة قادر اقوم رامية نفسي عليها

واقع في الطين

واصرخ واعيط برغم ان انا اللي غلطانه

ويجي خلاني الاتنين

وانا اعيط اوي واقولهم الحمار دة خبطني ووسخ البيجاما بتاعتي

عاااااااااااااااااااااااااااااااااااااااااا

والواد يحلفلهم ميت يمين ان هو مش غلطان وانا عملانة اعيط واقولهم لا انت الي غلطان ولقتني بقولهم دة انا حتي كنت واقفة علي الرصيف

ويوميها يا عيني مش حسيت بالعيد خالص لاني اضطريت اني البس بيجاما مش بتاعت عيد والواد خد حته علقة

وكل اللي كان يكلمني اقوم معيطة واقولهم هو اللي كان غلطان

ثالثا: برضه في الفترة اللي كنت فيها عند جدتي

نزلت الشارع كالعادة

تقريبا كان عندي 4 او 5 سنين وللقيت بت اكبر مني كدة راحت واقفة ادامي

بصيتلها اوي وهي فضلت متنحالي

انا بيني وبينكم خفت فكان معايا ملبس وقلتلها بمنتهي البراءة تاخدي ملبسية وانا ببتسم ليها

لقيت بنت اللذينا دي سفكاني حتة قلم علي وشي

وجريت

لقيت نفسي بطريقة لا ارادية واول مرة في التاريخ اصمم اني اخد حقي وهاتك يا جري ورا البت دي

والبت تجري وانا وراها من شارع لشارع ومن حارة لحارة

ولقيت البت وصلت لحارة غريبة كدة وراحت واقفة ادامي

وحطيت اديها في وسطها وقايلالي انتي عايزة ايه وبتجري ورايا ليه

بصتلها ببراءة قلتليها انتي ليه ضربتنيي؟؟

قالتلي اضربك واعمل اللي عايزاه ولقيتها جايبة شوية عيال واقفين وراها اتاري البت وصلت للمنطقة بتاعاتها وبقيت في امان بقي

وانا هاتك يا عياط واصرخ وادبدب في الارض

لحد ما لقيت واحد كدة شاب قالي مالك يا شاطرة

قلتله البت دي ضربتني وانا تايهه ومش عارفة اروح

قالي انتي ساكنة فين قلتله مش عارفة

قالي طب تقربي لمين

قعدت اقوله علي اسامي خلااني

لحد ما عرفهم وقالي تعالي اوصلك

وانا مقهورة من العياط

واول ما وصلت للشارع قلتله والنبي ما تقول لحد وكفاية كدة

الواد سابني وانا عملانة اعيط لحد ما خالي جه وشالني وقالي بتعيطي ليه

بصتله اوي وصعبت عليا نفسي وعيطت اكتر ولو كانوا عرفوا كانوا هيضربوني ويزعقولي وكل اللي قدرت اقوله وانا متشحتفة

ان الملبس وقع مني

رابعا: كنت في مرة راكبة المترو وكالعادة نازلة متاخرة ومش هعرف احضر المحاضرة

ونازلة بجري وتصادف ان المترو جه قعدت اجري عشان الحق عربية السيدات بس مش لحقتها والباب كان هيقفل

رحت ناطة في عربية الرجاله

المهم خدتلي ساتر ووقفت في موقع استراتيجي اوي بحيث ان مش في حد يقدر يقف جنبي ويضايقني

محطة والتانية والمترو اتزحم جدا

والناس تقول يوو ايه القرف دة الناس دي هنجيبلها مكان منين عشان تقف

يا جدعان شوفولكم صرفة وخلي الباب دة مش يتفتح

ومن هنا الاقي لمبة افكاري نورت

واقوم اتزحزح كدة واقول بصوت عالي خلي حد يخلع حزام بنطلونه واقفلوا بيه الباب من المقابض بتاعته

والباب مش هيتفتح وبالتالي مش في حد هيركب

الناس كلها وانا بتكلم كانت منصته ليا باهتمام وبلمحة البصر بمجرد اني خلصت كلامي لقيت كمية احزمة لو اتباعت في العتبة كان زمان اللي بييبعها بقي من اغنيا اغنياء العتبة

وكل واحد ماسك الباب بقوة وتيجي المحطة والناس اللي برة تشد الباب عشان تفتحه والناس اللي جوة كلها اصرار وعزيمة وقوة انها تقفل الباب

لكن قوي الشعب الخارجية بقدرة قادر تنتصر

وتفتح الباب وهي بتلعن وتسب في اللي عمل كدة وفي اللي ابتكر هذه الفكرة

ودارت خناقة ما يعلم بيها الا ربنا

علي اثرها المترو وقف

يجي عشر دقايق بحالها

وانا بقي فلفصت من بين الناس لحد ما وصلت لتالت باب عشان مش يدوروا عليا

وطبعا مش في حد عارف عني كدة اصل اهلي بعيد عنكم فاكرني رقيقة اووووي

خامسا:

واخيرا وليس اخرا كيفية غسل التوت

في بوست كنت حاكية فيه ازاي انا وامل جبنا توت من علي الشجرة وغسلناه

اللي مش في حد يعرفوا بقي احنا غسلناه ازاي

خدنا الصينيه اللي كانت تاعبة معظم الناس اللي علقوا

وقعدنا ندور علي حمامات عشان نغسل فيها التوت

يا تلاقي حمام ريحته معفنة ونقرف يا نلاقيه مقفول

المهم امل قالتلي ما تيجي تغسله في القصر ( والقصر دة فعلا قصر موجود جوة كليتي ودة مقر العميدة) قلتلها تعالي

لقينا القصر مقفول

قلتلها بقولك ايه في حمام في الدور الارضي للقصر تعالي نشوفلنا صرفة

المهم مش عرفنا نخشه

قلتلها مش بدها بقي غير اننا ندخل من الشباك

وعشان ندخل من الشباك لازم يشوفونا بتوع الكافتريا

اللي كانوا خلاص بيقفلوها

وقفت ادام الشباك انا وامل وحطينا الصينية علي الارض وقعدنا نفتح في الشباك لحد ما كسرناه

ورحنا ناطين لفوق انا وهي وغسلنا التوت ورحت ناطة انا الاول واديتني الصينية وهي نطت ورايا

لقيت بتوع الكافتريا جاين ورانا وعايزين يبلغوا عننا

قلتله يا اابني انت فاهم غلط احنا مش كنا بنسرق احنا كنا بنغسل التوت

ولقيته بيهددني وبيوقولي والله لابلغ عنكم

وامل تقولوا طب استني بس هنتفاهم

لحد ما الكلام شد بينا

و رحت قايلاله بكل ثقه لو جدع روح بلغ عنا

وفعلا راح قايل لواحد اسمه امير روح يا امير هات الامن اللي علي البوابة

رحت قايلة روح يا امير وانا كمان هبلغ انك ماشي مع البت شمس وبتخرج معاها بعد الكلية والبت مش بتحضر المحاضرات عشان تقعد معاك

وبتأكلها بلاش

وساعتها بقي يا حلو الكافتريا دي العميدة هتقفلهالك

قاله تعالي يا امير

دول كانوا بيغسلوا توت بس

وقالي ماشي واحدة بواحدة يعني

وسابني ومشي ورجعنا تاني للملاعب وكلنا التوت كله زي مانتوا عارفين

امرره لمييييييييييييييييين؟؟؟؟؟؟؟؟؟؟

تقريبا الناس كلها عملتوا

احنا بقينا كتاب مفضوح ادام بعض

فمش عارفة مين اللي مش عملوا

بس تقريبا همرره علي تامر ابو افكار حرة

سيف من خشب وبتمني انه ينفذها

the eagles

ساعه غروب رضوي رودي

dead man