انا وامل وشجرة التوت

امل هي الساعه كام دلوقتي؟؟
الساعه 3 ونص
ايه القرف دة يعني كلها نص ساعه ودكتورة الاشراف تيجي تقرفنا وتمشينا من الكلية
انتي عايزة تروحي؟؟
طبعا لا مانتي عرفة ......فين بقية بنات الشعبة؟؟؟
بيطفحوا في الكافتريا
تعالي نروحلهم
بقولكم ايه يا بنات ما تيجي نتمرن؟؟؟
دلوقتي يا سمرا انتي بتهرجي انتي عارفة اننا بنسافر وهناكل ونمشي
طب مين هيقعد معانا انا وامل؟؟؟
اميرة معانا طب قشطة يا امل
!!!!لقيت واحدة من ورايا بتزعق
انتو قاعدين كدة ليه فين رئيسة الزفتة دي؟؟؟
قصدها الشعبة
وبما اني كنت محببة جدا من البنات وكلهم بيحبوني وبيخافوا عليا موت فبلا استثناء ال 13بنت شاوروا عليا
رحت ضاربة ايدي تعظيم سلام للدكتورة وايدي مغطية وشي
ازيك يا دكتور واحشاني والله
يا تتمرنوا يا تروحوا انتي فاهمة
وحركت راسي يعني اه فاهمة وراحت سيبانا وماشية
امل انا نفسي اكل توت
وانا كمان

طب ما تيجي نجيب توت من الشجرة اللي عندنا؟؟؟
بس الشجرة الصغيرة العيال خلصوا منها التوت شفطوها يا عين امها
في في الشجرة العالية اللي في ملعب كرة اليد
يا سلام يا اختي وهنجيب منهاالتوت ازاي بقي
بصيت بنظرة كدة وانا عاقدة جبيني واللمبة الي فوق راسي نورت
تعالي يا اميرة انتي وامل
جريت ورا الدكتورة ودموع التماسيح في عنيا اللي مليانة كلها براءة

طب قولينا هتعملي ايه

تعالوا بس
الحقيني يا دكتور هنسقط يا دكتور اصل دكتورة منيرة قالتلنا لو مش جيتوا بكرة متمرنين علي كرة اليد

هاه كرة اليد يا دكتور هتسقطنا كلنا
طبعا اميرة وامل فهموا وامل الله يخربيتها
قالت ااااااااااااااه
كورة يد يا بنت الناصحة
وبعدين فاقت
وقالت اه يا دكتور لو سمحت امضلنا نجيب كور يد عشان نتمرن دة احنا هنتمرن جامد اوي يا دكتور

وبعدين يا دكتور الوقت ازف الوقت ازف
يا بنتي انا بتاعت العاب قوي
مش مهم يا دكتور بقي اي حاجة نحدف بيها التو.... احم قصدي التومريرة الكرباجية(التمرية الكرباجية دي مهارة من مهارات كرة اليد)
يا بنتي ممنوع اصلا اني امضي علي حاجة مش تخصصي

بس الدكتور بقي ضعفت ادام دموعنا المنهمرة وتوسيلاتنا اللي تقطع القلب الحزين
ومضتلنا علي كورتين يد
وطبعا كان ولا بد اننا نتظاهر باننا بنمررها لبعض وفجأة نحدفها علي الشجرة واول ما تنزل توت تقولش جالنا هوس توتي ونقوم نهجم عليه وطبعا الامر لا يخلي من ضرب بعض وتقطيع هدوم بعض عشان خاطر توتاية
اللمبة نورت تاني
بس بس
انا جاتلي فكرة
قولي يا زعيمة يا عبقرية (دي امل واميرة في نفس الوقت)؟
احنا نخش المطعم نسرقلنا صينية عشان نلم فيها التوت دة
يا سلام يا اختي والعسكري الي قاعد علي ام المطعم دة
رحت ماسكة ودان امل وهاتك يا وش وشو وش وش
وجرينا ناحيةالمطعم واحنا مستخبين ورا الحيطة ولا اجدعها حرامية
وبص للعسكري والزق جنب الحيطة كاني بستنجد بيها وابص في الساعه واقول لامل
فاضل خمس ثواني علي العملية استعدي
1 2 3 4 جوووووووووو
وتجري امل وهي ملهوفة ومخضوضة اووووي
الحق يا عمو العسكري في حاجة مرمية في حمام السباحة تعالي شوفها بسرعه
وقفشته من ايده وجريت بيه علي حمام السباحة والراجل ياعيني مذهول
باب المطعم مقفول بس في ضرفة ازاز من الباب مكسورة وانط انا من الضرفة دي

واسرقلي صينية من جوة واحطها جوه البنطلون من ورا
يحححح ساقعه
طبعا الصينية مستطيلة وكان منظري زباله فقلعت توب الترننج وداريت بيه التهمة الي ورايا دي
ونطيت
ولمحة العسكري وهو بيزعق لامل
وهي بتحلفله ان الحاجة اللي شافتها دي اتبخرت في الهوا وبمنتهي البراءة اللي خلقها ربنا فيها تقوله يكونش عفريت حب يطري علي نفسه وينزل البسين
عامة بقي يا عمو انا اسفة
ورحنا للشجرة واميرة تصرخ

عملوها الوحوش يا ريتني كنت معاهم
وانا رافعه الصينية بايد وعلامة النصر بايد تانية وبحي الشعب الغفير ولا كاني حسني مبارك في زمانه
ونحدف الكورة ونجمع في الصينية
المرة دي امل اقترحت انها تتسلق الشجرة عشان اكيد في توت احنا مش هنلاقيه غير فوق خالص
وفعلا بدئت امل تتسلق الشجرة لحد ما وصلت لفوق اوي
وركبت فوق غصن وبقيت تهزه وينزل التوت كتيييييييييير وانا واميرة نجري ونجمع في الصينية
امل ضهري اتقطم انزلي وانا هطلع
مش هتعرفي يا سمرا
وبعدين انا مش عايزة انزل

مين دي اللي مش هتعرف انتي هتستهبلي
طب بصي انا هطلعلك واميرة هتبقي تحت
وبعدين ننزل نجمع معاها تاني
طب اطلعي
التسلق كان ازاي بقي
جبت كرسي الاول وطلعت فوق السور بايدي الاتنين وهوبا نطة لقيت نفسي علي سطوح اودة الاساتذه
وبعدين وصلت للشجرة حطيت رجلي علي غصن جامد وابتديت اتسلق الشجرة لفوق

وبرضه نمت علي غصن عشان مش اقع وشوف الطمع بقي الاقي توتاية واحدة لونها احمر وكبيرة وتحفة
اقوم اتسرع وازحف ناحيتها وانا نايمة علي الغصن
وهووووووووووبااااااااااااااااااا
اتزحلقلك يا ريس
اقوم ماسكة في الغصن بايدي ورجلي مدلدلة للتحت كاني عاملة زي الدبيحة المعروضة في السلخانة والارض بعييييييدة
يعني يا كسر يا ارتجاج مش ليهم تالت
وامل بنت اللذينا بتضحك واميرة تصوت من تحتي
والمح الدكتورة جاية
يا لهوووووووووووووي
رحنا في داهية وهنترفد من الكلية واحنا في البكالوريوس يا سموووور
هودة اللي همك الله يحرقك حد يجيبني
مين الي ادام الدكتورة
اميرةّ!!!!
البت خدت الطرحة لانها مسكتها متلبسة
فين رئيسة شعبتك
والبت عنيها تبص لفوق ورقبتها علي صدرها ومش قادرة تنطق
يا جدعان حد يرميلي حبل ولا يحط تحتي مرتبة وانا هنط ايدي وجعتني يا ولاد الهرمة
انتي يا مفضوحة قولي حاجة (دي لامل)؟

ششششششششش
استني بس
اميرة قالتها دي مشيت يا دكتور
جدعه يا اميرة ولا وطمرت فيكي العشرة يا بت فكريني يا امل اديها درجتين زيادة
الدكتورة راحت مزعقة

انا هعرف شغلي معاكو يا سنة رابعه
وخدت اسم البت بالكامل واسمي بالكامل من اميرة ورقم الشعبة
وراحت لامحة صنية التوت وعليها توت وقالتها وكمان بتلمي توت
رحت لافحالها نص الصينية في اديها
تعبي وشقايا با بنت الطفسة
انا هعيط يا امل
اصبري بس يا سمورة هتمشي اهي وبعدين هنقذك
لا انا مش بعيط عشان كدة انا بعيط علي التوت اللي خدته الدكتورة

وراحت خدت الدكتورة اميرة لحد ما لبست وخرجتها من باب الكلية ومشيت معاها
الحقووووووووووووووووووووووونييييييييي
بقولك ايه امسكي نفسك
امسك نفسي ايه يا بنت الهبلة
انتي مش شايفة الحوسة اللي انا فيها
هموت يا امل ايدي عرقت يا بت طب اتشاهد الاول يا ناس
ولا اكفر عن سيئاتي وعن سرقة الصينية
انتي مش مدربة جمباز
وحد قالك اني لاعبة مصر الاولي يا فالحة

انا بمرن بس مش بلعب
اتصرفي بقي انا مش عارفة انقذك ازاي
منك لله يا امل
وفضلت اتحرك علي الشجرة ولا كاني اجدعها قرد في جنينة حيوانات
والمفضوحة التانية واقفه علي الشجرة تغنيلي
يلا يا قرد يابو ودان
هوبا يا قرد يا بهلوان
وعماله تقلد صوت القرد اوواواو
وحياة امك لما اخرج من الزنقة دي
المهم رحت لافة نفسي في الهوا ولا اجدعها قرد في زمانه
وركبت فوق الشجرة تاني مش اتعظ بقي
لا ازاي
فضلنا نهز في كل الغصون جامد وفي مطرة تحتنا من التوت
سمورة كفاية كدة بقي
ماشي
يلا ننزل
وطبعا نزلنا من الشجرة علي السطح ونطينا من السور علي ارض ملعب كرة اليد اللي بقي كله توت بمختلف الوانه
ونجيب الصينية ونجمع لحد ما بقينا عاملين زي ابو قردان
احنا لو كنا بعنا التوت اللي لميناه كان زمانا اغنيا دلوقتي
ورحنا غسلناه ومش في حد يسالني غسلناه ازاي عشان دة محتاج بوست لوحده
وقعدنا ناكل منه لحد ما خلصناه ولبسنا وروحنا
وتاني يوم الساعه عشرة ونص الصبح لقيت امل بتتصل عادي يعني بتشوفني موجودة ولا لا لان المفروض عندنا محاضرات من الساعه 9 لحد الساعه 4
لقتني انا اللي برد عيها
وهاتك لمدة ربع ساعه ضحك من غير سبب بمجرد اننا سمعنا صوت بعض
وطبعا السبب ورا عدم مروحنا الكلية في اليوم دة واضح طبعا

وهو ان احنا الاتنين جالنا اسهال

بس عشان خاطري الموضوع دة لحد النهاردة بجد مش في حد يعرفوا ماشي
انتو عارفين بقي
كان معكم قرد النيل قصدي سمراء النيل من فوق الشجر يا وهيبة