Monday, January 01, 2007

انسان العصر الحجري

عودة للنكد
اثناء نضافتي لاودتي اللي عمرها ما بتنضف خصوصا مكتبي الحبيب اللي كان عليه ملايين من الكتب اللي عشقت مكتبي وانا شخصيا مش عارفة عنها حاجة وقع كتاب ..
مش مهم اسمه ايه بس كان بيتكلم عن الانسان الحجري القديم اتفتحت صفحة مرسوم عليها رسمة تحت منها لفت نظري كلمة (صوان) .؟
وفكرت في مليون كلمة بسمعها عن الحجر زي (الدبشة) و ( الدشمة)... ساعتها بس
قلت لنفسي ان الانسان الحجري دة اعظم انسان
بعد اخر ليلة في سنة 2006 واللي انتهت بمأستين
اولهم وافجعهم موت صدام اللي واجعني اوي من جوايا
والتانية هايفة بالنسبة ليكم هو زعلي انا واخويا من بعض.
لقيت اننا محتاجين نتعلم اصول الحياة يمكن تنفعنا في السنة الجديدة
ساعتها جريت علي الكتاب وفتحتوا
لقيتني بنادي علي الانسان ....
ناديت علي بطل العصر الحجري
اللي انا سميته دشمة دبشة الصوان
خليته يتكلم ويقول:
دشمة دبشة الصوان...؟
دة اسمي متستغربش!؟
مانا اول حجر اتبني
في صلب بني الانسان
ههه هو انت متعرفش...؟
عود شديد.... وتر حديد!!ّّ؟
همجي يمكن !!!؟؟
بس
مش حيوان
شفت بعين من حجر
نبت الشجرساقط علي الوديان
ولان الحجر في ايدي
وطرح عود ريحان
ساكن حجر الكهوف
وعايش بالمعروف
يومين بتوع زمان
علي وسطي ورقة شجر تسترني
من غدر الزمان
اللي جبرني بقسوته
اني اكون انسان
دشمة دبشة الصوان
دة اسمي !..؟
لكن ماليش عنوان
عنواني فوق الشجر
تحت الحجر
في جوف بركان
قبل ما يعرفوا الكتابة
قبل الجوع والفقر
وزمن الغلابة
خطيت انا اسمي
وكتبت اول سطر علي جبين السحابة
وغني السحاب قصتي علي صوت الربابة
وقال السحاب :,,؟
ياااااااااا ناااااس
يا فاقدي الاحساس
كان يا ما كان
في سالف العصر والاوان
كان عايش علي الفطرة
بيشرب من الندي قطرة
واحد اسمه
دشمة دبشة الصوان
عايش علي الارض
واخد من الحياة قرض
مالحقش يسده
اصل الزمن هده
وراح للنسيان
قلبه يمكن كان من الحجر مصنوع
لكن صخر قلبه كان ينشق
ويخرج للحياة ينبوع
يزهزه وش الكون
ويقول للحب كن فيكون
وانا من مكاني هنا بقول:؟
دشمة يا قاهر الحياة
طريقك واصل منتهاه
صحصح بحبك نور الجبين
واحلف علي الحق ميت يمين
يوصل قلوبنا لبر اليقين
واغزل من الحرير تاج الحياة
بشبش وشوش من حجر
واكتب علي وش القمر:؟
دشمة دبشة الصوان
راجع يعلم الانسان
تاريخ البشر
ايوة انا كنت بقتل اه
كنت بحارب لاجل الحياة
ادواتي من حجر
عشان يعيش ورايا بشر
جايز اكون مت من ملايين السنين
بس دفاعي كان علي حق
وغضبي كان براكين
ليه يا بشر دلوقتي تايهين
يا دشمة
سامعني وانا بناديك
اصل الاصول انت
وساعه الوصول نلاقيك انت
مادد لينا ايد القدر
تخدنا من جهل الزمان
اللي طاح فينا ما خلا
لنسيم الحب ضلة
واتمحي فينا الامان
خوفنا ساكن بين كهوفك
ورد ربيعنا بين خريفك
انفض توبك
واكسر طوبك
وارجع بينا لاصل الحياة
ابعت لينا جواب حجر
مختوم بطابع البشر
يحكيلنا عن روح البساطة
وعن بساطة الروح
خلي قلوبنا كتاب مفتوح
وقول للحق خلاص مسموح
تعود من تاني تنزل مطر
دشمة دبشة الصوان
هنستناك
بكرة مع بسمة الفجر
تعلمنا بدون اجر
معني الحياة
وتضحك بوشك الحجر
وتقول:...؟
انا راجع من تاني
اعلم الانسان تاريخ البشر
سنة سعيدة مع تعاليم دشمة
وكالعادة حقوق الطبع والنشر والكتابة ليا انا منعا للشك وللتوضيح

Labels:

77 Comments:

Blogger شمعى أسعد said...

بكل سرور وبكل فخر
وبكل همة
انا قاعد اهو
فى اول
صف
تلميذ للعم دشمة

Mon Jan 01, 02:23:00 AM GMT+2  
Blogger الجحيم هو الحقيقه said...

يا عم دبشه قوم اتعشى

وبعد ما تتعش
شد اللحا ف واتغطى

عشا ن الجو رطوبه عليك
وحا ول متحلمش
لان الحلم مش وارد فى اعر افنا ومتفكرش
لان خلاص معدش يفيد غير التهيس
ونفض الايد
لان خلا ص بقينا خلاص

خر وف العيد

Mon Jan 01, 02:27:00 AM GMT+2  
Blogger copa said...

اه ياريت لو دبشه ترجع تاني بس يا خوفي لا نحار علشان الدبشه سعتها هيندم انه قال اني راجع علشان اصلح الانسان و زي ما قال شمعي اسعد انا واقف في اول صف جنبك تلميذ للدشمه

Mon Jan 01, 02:39:00 AM GMT+2  
Blogger smraa alnil said...

شمعي

كنت خايفة لترد عليا ببث مباشر من الماسنجر بس كويس
دشمة عمل عملته ومنعك
وشاطر انك قاعد في اول صف
بس اهم حاجة معاك مقومات التعليم
تفتكر هينفع نتعلم

___________________________________

من ظن ان حياته جحيم
ومل من صراعه مع ذاته فقررالصراع مع الغير


هتخليه يقوم يتعشي
ما هو طول عمره عايش في رطوبة وسقعه
طب ما هو الراجل جه عشان يعرض علينا خدماته عشان مش يبقي في تهييس
بس عارف احبطتني يا جحيم
هههههههه
شكرا
___________________________________

كوبا
حتي انت يا محمد هتقعد في اول صف
يا ابني روح ذاكر بقي
اقعد في دروسك اولي

بس تفتكر ان دشمة هيندم فعلا

Mon Jan 01, 03:02:00 AM GMT+2  
Blogger aymen.farouk said...

كل سنه وانتى طيبه ماشى
برغم الالم اللى ممكن احس بيه بعد كل بوست بتكتبيه لكن انا النهارده بجد بحييكى
وبقولك انا سافرت مع كلامك ورجعت تانى ولقيت نفسى سرحان ومش بفكر فى حاجه الا حاجه واحده وهيا
دشمة دبشة الصوان

Mon Jan 01, 04:12:00 AM GMT+2  
Blogger cat_eyes(همس الليل) said...

مش عارفه كنت مكسوفه اقول ان السنه دى من اول ثانيه فيها شكلها نحس
انا بردو مديقه ومن اول السنه عندى مليون موقف وحش حصلى
بس لقيت نفسى مش لوحدى معايا اختى انجى
وكمان عم دشمه
الله يسامحك يا دشمه ياريتك سبتلنا الديناصورات قرقشتنا وخلصنا من الحياه دى بئا
***********
بالمناسبه اسلوبك منتهى الجمال
على فكره انا بستغرب وبحسد اى انسان بيكتب كلام منظوم بالعاميه لانى بعجز عن طريقه الكتابه دى بجد كتابه السهل الممتنع
ربنا يخليكلك موهبتك الجميله
ويارب يصالحكو على بعض انتى واخوكى ويخليهولك يارب

Mon Jan 01, 04:18:00 AM GMT+2  
Blogger smraa alnil said...

ايمن فاروق

المهم انك تكون سافرت في عالم غير اللي احنا عايشين فيه
تصدق بقي ان انا حبيت الراجل دة اوي
عشان كدة بجد كتبت كدة ونفسي يرجع بجد
يعرف الناس يعني ايه حنان
وحب
ويخلينا كلنا نسافر بعيد عن ارض الزيف
___________________________________

همس الليل

رفيقة احزاني

تصدقي انا كمان كنت عايزة اقول كدة
هي مش نحس
بس مخلية قلبي ينقبض كدة
مع بداية السنة الجديدة
حاسة بحاجات كتيييييييييييييييييييييير اوي
حاسة اني حزينة اوي
حاسة اني مخنوقة اوي
****************
بالنسبة لاسلوبي فانا عايزة اقولك ان دي تعتبر رابع مرة بكتب فيها عاميي
يعني انا اصلا كنت بحاول اتحدي نفسي لاني مش كنت عارفة اكتب عامي خالص وانا صغيرة كانت ليا تجارب فاشلة ورهيبة
ربتا يخليكي انتي ليا يارب
تعرفي ان في انس قالوا ان انتي شبهي وانك اقرب ليا

Mon Jan 01, 05:35:00 AM GMT+2  
Blogger aymen.farouk said...

انجى بجد سوأل صغير اوى
انتى بتقدرى تطلعى الكلام ده ازاى من جواكى وفى نفس الوقت لسه بتعرفى تضحكى وتتكلمى انا قلتلك من كام يوم واحنا بنتكلم انتى ذكيه جدا يا انجى فاكره
والنهارده بقولهالك تانى انتى اشد ذكاء مما كنت اتصور

Mon Jan 01, 05:51:00 AM GMT+2  
Blogger aymen.farouk said...

اه
انا عارف ان عالمنا اللى عايشينه ممكن يكون عالم من الزيف وقلب الحقائق
بس انتى معايا اننا منقدرش نكون على طول مسافرين
صح
ولا ايه

Mon Jan 01, 05:57:00 AM GMT+2  
Blogger smraa alnil said...

صديقي ايمن
صدقني الموضوع مش محتاج ذكاء
بس اكيد الحياة اجبرتني علي وشوش كتيرة
لازم اضحك
يعني هعمل ايه
دة قدري ونصيبي اللي كتبوا عليا ربنا
وبحمد ربنا عليه
بالنسبة للذكاء اللي اشد مما كنت تتصور
فدي شهادة اعتز بيها برغم اني بستغبي كتير اوي
ههههههههههه
وبستغبي نفسي
بس هي دي الحياة يا ايمن
ابقي سلملي علي شهد اوي
وخليها تزور مدونتي
هي عملتها مرة واحد وسكتت بعدها ليه

Mon Jan 01, 06:07:00 AM GMT+2  
Blogger smraa alnil said...

مش في حد بيسافر علي طول يا ايمن للاسف
لازم نصطدم بوجع الواقع اللي احنا فيه
واللي عايشينه
بس علي الاقل بنحلم حلم سخيف يمكن نخرج منه ولو مؤقتا من ارض الزيف اللي قلت عليها
بس لينا ربنا
هو القادر علي زرع الصبر في قلوبنا لتحمل اما سفرنا الطويل او تحمل واقعنا المرير

Mon Jan 01, 06:12:00 AM GMT+2  
Blogger elkamhawi said...

اوك انا معاكو ومستعد اتعلم منه اى حاجة حراااام عشن هو الى بينفع فى الزمن

Mon Jan 01, 06:58:00 AM GMT+2  
Blogger smraa alnil said...

يا قمحاوي


دشمة مش بيعلم حرام

دشمة جاي عشان يعلمنا معني الحياة واصول التاريخ

احنا اللي خلينا الحرام ينفع في اليومين دول

Mon Jan 01, 07:08:00 AM GMT+2  
Blogger elkamhawi said...

اية يا بنتى انتى نفضتى ليه عموما انا بعتلك ميل وجهزتلك الحوار قشطة

Mon Jan 01, 07:44:00 AM GMT+2  
Blogger smraa alnil said...

قمحاوي

قشطة طبعا
بس انا السي دي عندي مش بيشغل سي ديهات دي في دي
عشان كدة قلت مش في داعي اني افتح الموضوع تاني
فخمتوا ولا لا

Mon Jan 01, 07:53:00 AM GMT+2  
Blogger 3rby said...

جميل جدا
بس في جوف بركان ازاي يعني
ده لو كان دبشة حقيقية كان داب
بس الباقي تحفة بجد

Mon Jan 01, 02:50:00 PM GMT+2  
Blogger sherif gharib said...

جميل قوى ان الانسان يتعلم تاريخ البشر
بس يا ترى التاريخ هيعلمنا ايه هيعلمنا
ان اول جريمهخ فى التناريخ كانت بين اتنين اخوات
انا راى ان كل واحد يصنع تاريخه هوه
ممكن يتعلم من اللى فات بس اللى هيتعمل ده بتاعه هوه
لاننا بقينا فى وقت الكل بقى فيه عم دبشه يعنى كل واحد بقى معلم نفسه
تحياتى

Mon Jan 01, 07:20:00 PM GMT+2  
Blogger sherif gharib said...

على فكره انا سمحت لنفسى انى اضيف الميل بتاعك عندى بس
انا للاسف مش بلاقيكى اون لاين خالص
لو ده يدايقك انا ممكن امسحه عادى يعنى
تحياتى

Mon Jan 01, 07:23:00 PM GMT+2  
Blogger مـحـمـد مـفـيـد said...

كم انتي رائعه
ودائما ما تحرجيني برقه ذوقك
كل عام وانتي بخير

Mon Jan 01, 09:35:00 PM GMT+2  
Blogger ادم المصري said...

سمرا الجميلة
حرام عليكي مش هقدر علي كدا يا جميل

كل سنه وانتي طيبة

علي فكرة انتي معزومة

علي ايه ؟

مش هقولك

Mon Jan 01, 09:45:00 PM GMT+2  
Blogger pegasuselmasry said...

فى كل مرة بتشدينا من اول الموضوع الى اخره بطريقة جميلة و رائعة

و سلامى لعم دشمة و العصر الحجرى كله و اسمحيلى اضيف المدونة بتاعتك عنى فى المدونة

Mon Jan 01, 10:22:00 PM GMT+2  
Blogger أنـــا حـــــــــرة said...

احساسك سواء ادبيا او اجتماعيا عالى
و اختيارك للموضوع مميز
الادب عجبنى و لا غبار عليه
تنضيف ام عبده تمام
:)

اما بقى من الناحية اللى اجتماعيه
فانا بحجز مكان و هاجى تانى

________________

اى حاجه ادم عازمك فيها انا هاجى بقولك اهو
فيها يا اخفيها

خاف الله خاف

Tue Jan 02, 12:05:00 AM GMT+2  
Blogger Amr Ahmed said...

ايه ده هو لو اخوك زعلك هاتبدعي كده

طب انا بقي خليه يزعلك كل يوم

كده ودكه متزعليش

جميلة جدا جدا

ومؤثرة ايضا

انتي موهبة رائعة

Tue Jan 02, 12:38:00 AM GMT+2  
Blogger frozen love said...

حميلة قوي ..سعيد اني عثرت على مدونتك لما نوؤتي مدونتي...مرحبا بيكي في هذا العالم..فكرة جميلة وكلام معبر

Tue Jan 02, 02:46:00 AM GMT+2  
Blogger el2ahwagi said...

manzooma gameela awi...mal3ooba bgad we fekra 7elwa w kalam a7la..!

elensaan fe3lan 3ala 2ad mabeyettawar...3ala 2ad mabeyzeed zeefo... zeefo 3an koono insaan..!

tab3an feeh omam mabtettawarsh bas bardo beyzeeed zeefha..3adi..

ya reet 3am King Kong...2asdi dabsha elsawaan yel7a2 ye3mel 7aga 2abl fawat el awan...!!

masa2 el foll..!!

Tue Jan 02, 04:24:00 AM GMT+2  
Blogger soul said...

فظيعه خرافه....متسكتيش على نفسك
اه والله .... يعنى روحى احترفى فى نادى بره واللا اى حاجه
إعذرينى بس التيمه عجبتنى يا أختى وحبيت أفضفض
ــــــــــــــــ
دشمه دبشه صوان
أخويا الإنسان
يمكن ملحقتش أشوفك
بس حاسس بيك تمام
آسف-اخويا-اقولك
إن الزمان بقى غير الزمان
وغدره غير الانسان
نساه اصله و فطرته
خلاه بقى حيوان
السحاب يسطر قصته
للجيل اللى جى كمان
دشمه دبشه صوان
عندى ليك إعلان
خلاص روح البساطه
معدش ليها مكان
واخوك خلاص تعبان
لو لسه ليه مكان
إحجزلى كهف صغير
أعيش فيه و أموت
ولا إنى أشوف صغير
والحجر فى إيديه بيموت
والغجر
يقولو خطر
على شعب أصله حيوان
هه..(سامى)عليه بيقولو
خنازير وقرده- كان
و إحنا نقف نقول
إخوان ..احباب.. جيران
وقال إيه يقولو سلام
دشمه دبشه صوان
أخوك بيبكى
زهقان
أنا إيه هيه لزمتى
فى عالم بقى خربان
دشمه دبشه صوان
هسيك تاخد فرصتك
وانا هنا مستنى
بتقول خزلان
قول معدش يفرق كلام
بس أمانه عليك
معاك وانت راجع تاخدنى
أخوك خلاص فيص
و هيودوه المورستان
تماااااااام
شكرا لسعة صدرك
انا خلصت ورايح انام
واهى حاجه عالتيمه والسلام
والسلام ختام
ـــــــــــــــــ
مره كمان ...بجد روعه يا فندم ..و بإذن الله هيكون ليكى شأن كبير قريب
موهبه فذه
بس خلاص

Tue Jan 02, 05:51:00 AM GMT+2  
Blogger smraa alnil said...

عربي

ازيك يا ابني
كان عايش في جوف بركان يعني مش شرط ان البركان كان يبقي شغال وعملان يطلع نار
فهو كان عايش فيه وقت خموده ودة اللي بتقوله الكتب ان هو سن الكهوف وجوف البراكين وعندما كان يشر بالهزات الارضيه بيتنبأ بوقوع براكين وكان بيلم عفشه وديله في سنانه وهاتك يا جري
فهمت
مش تظلم دبشة بقي
انت اللي تحفه
ربنا يخليك يارب يا عربي

___________________________________


شريف غريب

بغض النظر عن اول جريمة في التاريخ
بس كان من راي ان في انسانية وفيه حق
انت لو جربت تصنع تاريخك بايدك ممكن تفشل لان في غيرك بيحاول يقتل حلمك وتاريخك دة
لازم يحصل انقلاب من جوانا كلنا في نفس الوقت
وفي لحظة واحدة عشان نقدر نعمل تاريخ
صدام عمل تاريخ لوحده
مبارك عمل تاريخ لوحده
بوش عمل تاريخ لوحده
انا عملت تاريخ لوحدي
وانت عملت تاريخ لوحدك
وبعدين
مين الصح
ومين الغلط
هتقولي الصح والغلط باين
بس وقت فعلك للغلط انت مش عارف ان دة غلط ومقتنع انه صح


بس تفتكر ان كل واخد فعلا بقي دشمة دبشة الصوان


اشك
بالنسبة لاون لاين فانا يا ابني الكمبيوتر بتاعي علي طول مفتوح
بس انت ركز بس
ههههههه

Tue Jan 02, 02:24:00 PM GMT+2  
Blogger smraa alnil said...

محمد مفيد

بل انت اللي رائع
ومش فيها احراج ولا حاجة
انا فعلا معجبة بكتاباتك وارائك
وانت بالصحة والسلامة وسلملي علي عبد الله

___________________________________

ادم المصري

تصدق بقي ان انت هتتضرب
انت فينك يا ابني الفترة دي كلها
طب واله وحشتني طلتك
عامة انا عارفة انا معزومة علي ايه
وعايزة نصيبي خالص مخلص
ومش هتنازل عن حتة فتفوتة
وانت بالصحة والسلامة ويارب تنجح

Tue Jan 02, 02:25:00 PM GMT+2  
Blogger smraa alnil said...

بيجاسوس المصري

في كل مرة انت بتحرجني بكلامك دة
وعامة سلامك هيوصل
وطبعا دة شرف ليا انك تضيف مدونتي عندك
والله ببقي مبسوطة اوي

___________________________________

انا حرة

انتي فين يا هانم

بالنسبة اللي لا غبار عليه دة
فانا عايزة اقولك اني طردت ام عبده
ست رغايه ومش حبيتها خالص
المهم
مكانك محجوز بس ابقي الحقي بقي
طبعا انتي فيها بس المهم مش تاخدي نصيبي في اللي ادم عازمني عليه

Tue Jan 02, 02:25:00 PM GMT+2  
Blogger smraa alnil said...

عمرو احمد

دة انت شراني
شيرس انت يا عمرو
عامة مش تخاف انا واخويا علي طول زعلانين من بعض وبنكد علي بعض
يعني لو عايزة ابدع كنت بدعت من زمان
وبعدين انت بتسمي دة اابداع
دي فضفضة كدة علي ما اوسم
اتفضل معانا
هههههه
ربنا يخليك يا عمووووور يارب

___________________________________


frozen love

وانا سعيدة بمرورك عليا
ودي اول مرة تزورني فيها
وبجد انا مبسوطة اني عايشة في العالم دة اللي انا اخترته لنفسي
شكرا ليك علي زيارتك وابقي كرها تاني

Tue Jan 02, 02:25:00 PM GMT+2  
Blogger smraa alnil said...

القهوجي

مش اتعودت منك تيجي من غير الشاي والذي منه
انت الاحلي اكيد
الزيف دة بقي حاجة خلاص مرتبطة بالانسان
انا من راي يعني ايه انسان
يعني زيف
عرف الزيف والخداع والغدر
هتلاقيه انسان
بالنسبة لدبشة
فهو مهما حاول يغيرنا لازم يكون عندنا استعداد من جوانا اننا نرجع بني ادمين تاني بدل اللعب الخشبية اللي تسكنا
انت عندك استعداد
___________________________________

soul

لااااااااااااا
ما تيجي انت تكتب بدالي احسن
هههههههههههههههه
والنبي يا ابني ما ساكتة
دة انا باخد ادوية اد كدة دعواتك معانا بقي
انت فعلا اللي روعه ويسمع من بقك ربنا
بس انت برضه مش قلتلي يعني ايه متكاظي



علي فكرة بقي كلامك جميل جدا
يا ريت تنشرها عندك لانها بجد معبرة اوي لانك انفعلت في اللي انا كاتباه


أنا إيه هيه لزمتى
فى عالم بقى خربان
دشمه دبشه صوان
هسيك تاخد فرصتك
وانا هنا مستنى
بتقول خزلان
قول معدش يفرق كلام
بس أمانه عليك
معاك وانت راجع تاخدنى


جامدة اوي اللي انت كاتبه دة
بجد عجبتني
وبجد ياريت تنشرها
وانا سامحالك بكدة ويلا ان شالله محد حوش
هههههههههه
تحياتي

Tue Jan 02, 02:25:00 PM GMT+2  
Blogger أنـــا حـــــــــرة said...

لا كده مينفعش
كل ما اجى اقول رأيى اجتماعيا الاقى القصيدة بتشدنى و تدوخنى يابت
انتى حاطة فيها ايه ؟


عموما انتى قولتى كل حاجه فى القصيدة
هحاول اجى تانى
بس ربنا يستر و ام ادوخش برضه
انا مش ادك يا ستى

Tue Jan 02, 05:39:00 PM GMT+2  
Blogger Egyptos said...

(علي وسطي ورقة شجر تسترني
من غدر الزمان
اللي جبرني بقسوته
اني اكون انسان
دشمة دبشة الصوان
دة اسمي !..؟
لكن ماليش عنوان
عنواني فوق الشجر
تحت الحجر
في جوف بركان
قبل ما يعرفوا الكتابة(

ياه حتى الحجر صعبان عليه يبقى إنسان و مش متقبل إن الزمان يجبره يبقاه

طبعا انت عارفة إنه مش مجاملة ولا نفاق

حقيقى رائعة و المقدمة الدخلة بتاعتك جميلة جدا و تمهيد جيد للتالى
...
تحياتى

Tue Jan 02, 06:11:00 PM GMT+2  
Blogger mano said...

مع انى مش عايزه اشوفك زعلانه
بس الكلام اللى كاتباه حلو و معبر
اسلوبك تحفه

يا ريت تكونى صالحتى اخوكى

Tue Jan 02, 08:07:00 PM GMT+2  
Blogger soul said...

انتى كمان أدويه
لا حول ولا قوة إلا بالله
كلنا هذا الرجل
ماعلينا
اما انى انشر الكلام ده عندى
لا يا عم انا مخدش حاجه مش بتاعتى
ثالثا متكاظى معناها ككلمه فى بوستى اللى جاى
اما معناها كفعل فزى ما قلت فى البوست هما المجموعه الشارده اللى فى الآخر

وأخيرا كلمه عايز أقولها
أنا فرحان بيكى جدا لانى كنت قربت أفقد أمل فى بنات بلدنا
بجد ربنا يكرمك يا فندم يا رب

Tue Jan 02, 08:35:00 PM GMT+2  
Blogger هيثم ابوعقرب said...


هو مش برضه الوصف ده يمشي علي اي بني ادم
لسه نضيف في زمن
مش قادر كل الصابون الي بيصنعه ينضف جزء منه
ها ايه رايك

Tue Jan 02, 09:19:00 PM GMT+2  
Blogger ody911 said...

هوه أنا مكتوب عليا أعلق على الأسى والحزن دايما كدة


سمراء حبة فرفشة كدة زى ميكوباس 26

ماشى يا جميل

ألا صحيح إنتى بتلعبى إيه ؟؟
أوعى تكونى بتلعبى مصارعة

ههه
وعادى بقة
أودى

Tue Jan 02, 09:38:00 PM GMT+2  
Blogger tota said...

سمراء
ولان حلمنا دايما ارض الفضائل واهل الفضيلة هنفضل ندور على رموزها ونحلم بوجودهم ودورهم فى حياتنا ولو دورنا هنلاقى اننا احفاد دبشة ولاده من صلبه ورثنا كل صفاته بس مارسنا منها ايه واخترنا ايه نحتفظ بيه وايه نواريه

عارفة ان كل واحد فينا فيه فضائل دبشة بس محتاجين نطلعها من تحت الانقاض محتاجين ننقذها ونحييها
محتاجين نشوفها فى بعض علشان نحس قيمتها المفقودة
محتاجين الانسان اى كان حجرى او عصرى المهم يكون انسان

تحياتى وعايزة اقولك فى رموز كلامك معانى جميلة بتقول جكاوى بجد اصيلة

Tue Jan 02, 10:49:00 PM GMT+2  
Blogger tamer said...

عارفة ياسمرا احسن حاجة عشان الواحد يعرف يعيش يخلص اول بااول من كل شىء حاسس انة نخنوق منة او كان سبب زعل انسان منة

وبعدين خليها قاعدة عندك دوام الحال من المحال
ربنا يهنيكى وعيد

سعيد

Tue Jan 02, 11:54:00 PM GMT+2  
Blogger Ironcobra said...

يا صباح النكد عدنا و العود أحمد , أنا لسة ماقريتش بس الكتاب باين من عنوانة , أنا قلت بس أعلق على العنوان و بعدين نقرا و نعلق عالمحتوى , رغم أني عارف أني قريت ماقريتش مافيش فايدة و برضة مش هافهم أي حاجة بس ماعلينا .

Wed Jan 03, 12:34:00 AM GMT+2  
Blogger Ironcobra said...

قرينا :
أولا أنت متخانقة مع أخوكي لية , انتوا مش هتكبروا بأة .... قطيعة و جعتوا قلبي معاكم , ياعيال مش قادر عالمناهدة .

ثانيا :
عارفة ساعات باكرة نفسي و باكرة أنتمائي لفصيلة البني أدمين و أقول لية ربنا ماخلقنيش أعجم حمار او كلب مثلا ؟ لية أثقل عليا بمحنة الأختيار ؟ لية خلقني من الفصيلة الحيوانية الوحيدة على وجة الأرض اللي بتقتل حبا في القتل و أستمتاعا برؤية عذاب أبناء نفس الفصيلة ؟
لية ماخلقنيش أسد أو نمر أو حتى ذئب أقتل بس لما أكون جعان أو دفاعا عن نفسي ؟
بس أرجع و أقول لنفسي نعمة العقل و الأختيار زي ماهي نعمة من عند ربنا فضلنا بيها على سائر الفصائل الحيوانية الأخري الا أنها أيضا أبتلاء من اللة اللة و أمتحان ربنا يصبرنا علية و ينجحنا فية .

Wed Jan 03, 12:41:00 AM GMT+2  
Blogger Ma-3lina said...

smrah

مش قلنا نبطل نكد شوية مفيش فايدة يلا ما عليناااا

ايه متخانقين ليه انتم ملكوش غير بعض

ironcobra:

انا برده كان نفسى اباه حاجة تانية قعدت ادور على حيوان او طير مستريح ملقتش علشان الانسان مش سيبهم فى حالهم لا بيقتلهم لحبسهم

Wed Jan 03, 01:00:00 AM GMT+2  
Blogger Ironcobra said...

المسألة ياماعلينا مش مهم أذا الأنسان قتلني المهم أن يبقى ضميري مش مثقل بأي شئ و ماكونش حيوان زي الأنسان .

أنت عارفة فية مقولة بتقول Knowledge is a burden and Ignorance is a blessing.

أنا حاسس بالعبئ دة و تاعبني .

Wed Jan 03, 01:14:00 AM GMT+2  
Blogger albida said...

أنوجى النوجى كونوجى
بجد وحشتينى مووووووووت!! كل سنة وأنتى طيبة يا جميل, ومرسى على سؤالك عليا.. متخافيش أنا لسه عايشة
:)

طبعا يا بنتى.. كل ما الأنسان بيتقدم ويتطور ومظاهر الحضارة بتغطى عليه, حيوانيته بتزيد وبتغلب على أدميته

manal

Wed Jan 03, 01:56:00 AM GMT+2  
Blogger ahmEd_H said...

دشمة دبشة الصوان لسه قافل معايا التليفون و قالى ابلغك انه متشكر جدا لانك و صفتيه لينا بالظبط و انه كان نفسه يقول الكلام دا من زمااااااان و كمان
بيقولم اوعى تزعلى اخوكى و بيبلغك انه اول لما حيقدر يعدى عليكى فى المحل حيعدى

Wed Jan 03, 02:42:00 AM GMT+2  
Blogger 3rby said...

انا قررت اتجوزك علشان اعتزرلك انتي ودبشة

Wed Jan 03, 11:51:00 AM GMT+2  
Blogger Lion king™ said...

:D
ازيك
يا عم الجمال دا بس
تسلم ايدك ويارب ميكون في نكد خالص
ولا زعل
انت عارفا وانا بقرا الكلام دا فكرتيني بايه؟؟

افتكرت افلام الكرتون الي معموله بالصلصال
فاكراها الي كانت بتيجي في رمضان
كنت بحبها اوي
حسيت الشخصيه الحجريه دي شبهها اوي
:)
جميل يا انجى بجد

Wed Jan 03, 03:58:00 PM GMT+2  
Blogger smraa alnil said...

ها استعنا علي الشقا بالله
يلا بقي عشان ننجز

الاول

انا حرة

اجيبلك ماية بسكر يا ياسمين
طب حد معاه كولونيا هنا
عامة يا قمر كل ما تيجي ابقي هاتي معاكي حاجة مسكرة عشان الدوخة
ابقي تعالي
اديني مستنية
هههههههههههههههه
___________________________________

ايجيبتوس

طول عمرك بترفع من معنواتي
دة انا حسيت ان المقدمة هبلة اوي
بس يلا اهي عجبتك
شكرا ليك
___________________________________

مانو

برغم ان انا شخصيا مش بحب اشوفني زعلانة
بس يلا اهو كله بيطلع في الغسيل
احنا بنتكلم عادي جدا مع اخويا
وشكرا ليكي ادعيلنا انتي بس

Wed Jan 03, 06:54:00 PM GMT+2  
Blogger smraa alnil said...

soul

هههههههههه ايه انتي مان ادوية دي
شتومة دي ولا ايه
هو انا بقولك انشر كلامي
انا بقولك انشلر تعليقك علي كلامي وابقي يا سدي اكتب اسمي تحت كلامك علي الاقل ابقي مشهورة
مصلحة يعني
امممممممممممممممم بقي دي معني متكاظي
دي بني لغة بقي
تصدق ان انا الي قربت افقد ثقة في البلد كلها
بس بجد اكتشفت حاجة طول ما في ناس زيكم بجد الدينا هيبقي لسه فيها خير
يلا دونيا
___________________________________

هيثم ابو عقرب

انا راي اننا نستخدم رابسو احسن
بينضف برضه
الوصف دة بيمشي علي اي بني ادم لسة مش اتولد

___________________________________

اودي
هههههههههههههههه
فين الاسي دة يا واد
يا سيدي قلت مليوم مرة بلعب ريشة طايرة ومش عايزة تريقة
يعني ممكن اطيرك
هههههههههههه
واهو اي حاجة بقي

Wed Jan 03, 06:55:00 PM GMT+2  
Blogger smraa alnil said...

توتا

احنا نسينا يا توتا تعاليم دبشة اللي علمهالنا
وفي ناس منا كانت بتتعمد انها تموت التعاليم دي جواها
المشكلة يمكن تكون فيا انا
اللي مش قادرة اشوف التعاليم دي في اي حتة ولا جوة اي بني ام خالص
مش بقيت شايفة غير الزيف
ومش عشان انا باصة للدينا بنظرة سوداوية ولا حاجة
لا ابدا
بس عشان اتعاملت كتيييييييييير مع بشرية
وشفت دة
وبجد مبسوطة ان كلامي عجبك
__________________________________

تامر باشا

يعني معني كلامك اني اموت الاحساس او اي حد يزعلني
لاني مش فهمت الجزئية دي

بس اعتقد ان في حاجات مش هقدر اخلص منها
بس صدقني القاعدة الي انت بتتكلم عليها دي ااسية في حياتي وبصبر نفسي بيها اوي
فعلا دوام الحال من المحال
ربنا يخليك يارب

Wed Jan 03, 06:55:00 PM GMT+2  
Blogger smraa alnil said...

ironcopra

هههههههههههههههه
المهم بعد ما قريت فهمت
معلش والنبي يا خويا
انا كمان قلبي وجعني اوي
والنبي يا ابو احمد ما تتعب نفسك ياخويا
خليك انت ها وانا هنكتهوملك
مش تسالني الكلمة دي يعني ايه ها
مش عايزاك تحرجني

عارف انا بقي بكره كوني في وسط البني ادمين
مش هقولك اني ااتمني اني اكون مخلوق تاني
عشان مش هينفع
بس بجد اتمنيت اني اتولد من اول وجديد
اني انسلخ من جلدي وابقي قادرة اتلون بمليون لون زي البشر
يمكن احس اني لسة عايشة
واهو ربنا يصبرنا علي ابتلائه
___________________________________

ما علينا

هو دة اللي لفت نظرك خناقتي مع اخويا
ههههههههههههه
عامة يا سيتي انا مش بعرف ازعل منه
انا بس اللي زعلتوا ونكدت عليه فرحتوا
طب تفتكري بقي نقدر نكون ايه غير اللي انتي وكوبرا قلتي عليهم وانا معاكم علي طول
انا عن نفسي افضل اني اكون حجر زي عم دشمة

__________________________________

ironcopra

انا كما حاسة بالعبء وبقي تقيل عليا اوي يا كوبرا

Wed Jan 03, 06:55:00 PM GMT+2  
Blogger smraa alnil said...

منولتي النولتي كونولتي

ههههههههههههههه
وحشاني يا بت بجد
وانتي طيبة يا جميل
بجد انا قلقلت عليكي اوي
ويارب علي طول تفضلي عايشة ويديكي الصحة
يبقي الحل ان عم دشمة يجي يعلمنا الحياة

___________________________________

ahmed_h

عامة بلغه اني مستنياه عشان يدفع الفلوس اللي عليه
هو عاملي حجر وبيستعبط
وبلغه تحيااااااااااااااتي
هههههههه
__________________________________


عربي

لولولولولولولولولويييييييييييييييييي

هيييييييييييييييييييه
خلاص يا جدعان انا وعربي هنتجوز وهغني النهاردة فرحي يا جدعان

اول عرض بالجواز يجيني مين يزود
ههههههههههه
عربي انت عارف اني مش هلاقي احسن منك
يعني اروح اكلم بابا واحددلك معاد ولا ايه
عامة انا ودبشة بنقولك اننا اصلا مش زعلانين عشان تعتذرلنا

___________________________________

lion king
دة انت الجميل يا احمد بجد
وتسلم انت كمان يارب
بتاعت قصص الانبياء
لو قصدك علي الفلام دي
بجد تبقي حاجة تحفة بالرغم من ان وانا بكتبها مش فكرت في الموضوع دة خالص
دة علي كدة بقي الواحد ممكن يكتب حاجات كتير علي القصص دي
ومبسوطة والله انه عجبك

Wed Jan 03, 06:55:00 PM GMT+2  
Blogger ody911 said...

ماشى يا سمراء

أصلى أنا قلبى عليكى

تكونى بتتعبى نفسك فى التمرين

وبعدين مش تعرفى تتجوزى زى الناس كدة

ولونى مفيش جواز

بس أهوة يمكن
لعل وعسى

وعادى برضوا
أودى

Wed Jan 03, 07:27:00 PM GMT+2  
Blogger smraa alnil said...

هههههههههههههه لا من ناحية بتعب نفسي في التمرين فانا بتعب نفسي
بس مش في خوف دي لعبة بلعبها بالمضرب
مش عنيفة
وبعدين سواء بتمرن مش بتمرن مش في جواز ايه يا ابني دة اختراع انتهي من زمان
ولا انتي ايه رايك

Wed Jan 03, 08:14:00 PM GMT+2  
Blogger Lion king™ said...

:)
شفتي بقى انت فنانه ازاي
:)

Wed Jan 03, 09:37:00 PM GMT+2  
Blogger Utopian said...

ايه يا سمرا ده
انتي جامده اوي كده ليه:)

الفكره جديده جدا و افكارك بجد حلوه

Thu Jan 04, 12:12:00 AM GMT+2  
Blogger متغيرة شوية said...

بصراحة انا مش عارفة رديت قبل كده هنا ولا لأ

بس القصيدة جامدة جدا..مش عافة اتكلم عليها كتير ، بس انا قريتها كذا مرة وحبيتها جدا..

ربنا يوفقك

Thu Jan 04, 02:22:00 AM GMT+2  
Blogger بين الأمل و اليأس said...

انا بجد داخل وانا تعبان موووت ولسه مقرتش موضوعك
بس قريت المقدمة وعرفت الموضوع ووعد مني بكره هاعد اقراه ان شاء الله
وعلى فكرة انا مكنش ورايا غير الحجاره بس كانت حجاره ومكنتش بتنطق معايا كويس انها نطقت عندك
ومبروك على النظافه
وعلى فكره اسلوب الكلام جميل
والى لقاء اخر بعد القراءة التفصيليه للموضوع
وربنا يسترها

Thu Jan 04, 02:44:00 AM GMT+2  
Blogger soul said...

معلش يا فندم انا خاننى شويه الكلام فى الكومنت اللى فات

انا كان قصدى على الادويه إن الحال من بعضه
وحياتك انتى انا بدور على طريقه اتعالج بيها على نفقة الدوله...على اساس انها اصابة عمل يعنى
:)

أما بالنسبه للعصيده اللى كتبتها ..هو انا فديك الساعه لما أنزل الكلام ده عندى واسمك عليها..انا بس كان قصدى إن الكلام ده كان ليكى ومش حاسس إنه هيبقى ليه معنى غير هنا..ككومنت يعنى

على فكره الشعر بتاعك روعه..دى تالت مره أقراه ..كل مره أدخل عندك أقراه ..وكل مره أركز فيه توصلنى
حاجه جديده

دبشه طلع عميق أكتر ممما كنت متخيل

بجد ...انتى فلته ..خرافه

وأخيرا "الخير فى و فى أمتى إلى يوم يبعثون".. وبعدين انتى فاكره إن إحنا بس اللى آ..آ..آ..كده
لاااااااااا
ده احنا كتيير أوى
(عمارة يعقوبيان (حاتم رشيد
:D

فى رعاية الله
سلاااااام

Thu Jan 04, 03:17:00 AM GMT+2  
Blogger bosbos said...

يااااه..ده إنتى جايبه من بعيد أوى..من أيام دشمة!!بس كلامك جميل أوى وحساس سعيد للتعرف على إبداعك

Thu Jan 04, 03:47:00 AM GMT+2  
Blogger كلمه said...

bravo bravo bravo (tasfeeq) :D
sebek mel fekra elly 3agabetny sa7ee7 heya mesh gdeeda bs gamda
elfekra kolaha fe eslobek ..bgd beshedeny 2akamel lel2a5er w banbeher beh ....elkalam nafso gdeed w mesh mostahlak
kefaya y3ni esm elragel :D
btw ...mestany ba2eet elkesah bt3et elfara7

Thu Jan 04, 04:32:00 AM GMT+2  
Blogger bagabigo said...

اكيد خناقتك انتى و اخوك حاجة مهمة جدا مش تافهمة انا شخصيا مقدراها جدا يا رب تتصالحوا على خير

Thu Jan 04, 09:44:00 AM GMT+2  
Blogger الزعيـمة said...

هو دشمة دبشة الصوان
اد كدا كان بسيط ؟ اد كدا كان انسان؟

كل فكرى عنة انة حيوان متطور شوية
او انساني ساقط فى الهمجية
او حل وسط بين بني الانسان والحيوان

دا طلع اكتر بساطة وحكمة وانسانية
من اللبسوا بدل وحطوا برفانات

تسلم روعه ابداعاتك يا سمورتي
لا بجد ابداع

Thu Jan 04, 10:46:00 AM GMT+2  
Blogger واحـــد مـــــن الـنـــاس said...

بصي يا سمارة
اولا
كل سنة وانتي طيبة وسنة سعيدة عليكي يارب

بالنسبة للحج اخوكي اللي زعلتو من بعض

فانتي بس تشاوري لينا
واحنا هنيجي نقطعه
اومال ايه
دنتي وراكي رجالة بيكالو الزلط
واللي يزعلك نقتلوهولك
بالنسبة لعم دشمة دبشة الصوان
مش عارف ده يمكن يطلع قريب للمحافظ بتاعنا
احمد سعيد صوان

مش مهم
هما الاتنين من العصر الحجري اساسا

المهم لو احنا فكرنا كويس في حكاية انهو الاحسن احنا ولا الانسان الحجري هتلاي اننا احسن الف الف مرة
انا فكرت في الحكاية دي زمان والله
لقيت ان زمننا ده احسن بكتيييييييير

ثالثا بقا احب اقولك ان الشعر بتاعك ده برغم غرابة افكاره
الا انه شعر جميل بجد والله
ودايما بحس فيكي بحاجة مبلاقيهاش عند ناس كتير
وهيا المصداقية
ودي حاجة دايما بلمسها في كتاباتك


وربنا يخليكي ويخلي عم دشمة اللي طلعنا في الضلمة ده :)

Thu Jan 04, 05:10:00 PM GMT+2  
Blogger gamal said...

سمــراء النيــل
كل عام وانتى بخير
غبت قليلا ثم رجعت وقرأت مافاتنى من مدونات
واذبى أجد مالذ وطاب من المواضيع الشيقة والجميلة لديك
حقا انها موهبة أعطاكى الله أياها
لتنفعى بها الناس وتنفعى بها نفسك
وهذاهو الذى جعلك واقفة على أرض صلبه
لاتهزك الرياح ولا العواصف والرعود
لكى كل التقدير والأحترام
فأنا من المعجبين بقراءاتك
الى الأمام

Thu Jan 04, 06:32:00 PM GMT+2  
Blogger smraa alnil said...

lion king

تاني برضه فنانة
يا رافع من معنوياتي

___________________________________

utopian

جامدة يعني مش بتكسر
ربا يخليك وياريت تبقي تشرفني بزيارتك كدة علي طول
ومرسي علي تعليقك
___________________________________

متغيرة شوية

انتي تهتي ولا ايه
دة بس عشان المدونة بقيت بتاع فمش حاسة انك غريبة
ههههههههههههههه
وانا مبسوطة انك حبتيها
ودشمة وصاحبته كمان بيحبوكي
وبطلي تنامي كتير بقي

Thu Jan 04, 07:05:00 PM GMT+2  
Blogger smraa alnil said...

بين الامل والياس

اولا الف سلامة عليك
والبقاء لله
واكيد هستنا انك تقرا الموضوع وتقولي رايك
الحجارة نطقت عشان زهقت من اللي ادامها
اللي هو احنا
والله يبارك فيه عقبال عندكم
ههههههههههه
ان شاء الله ربنا هيسترها
___________________________________

soul

خلاص تعالي انا وانت نلف علي وزارة الصحة
عشان نتعالج
عامة انا كنت بدور علي مصلحتك في كتابة الكومنت عندك كبوست
كنت عايزاك تخش التاريخ
هههههههههه
اقراه كدة خمس ست مرات
واشرب عصير قصب بعدها
هتلاقي كل خير ان شاء الله
فعلا دشمة دبشة الصوان عميق اوي
بس مش اي حد يقدر يوصل للعمق دة
جايز اني مش قدرت اوصل عمق دشمة في الكتابة بس يلا ملحوئة
فلتة مرة واحدة
ليبتون ولا ايه
اه قلتلي عمارة يعقوبيان
انا كدة فهمت
في امان الله وسلاحف

Thu Jan 04, 07:09:00 PM GMT+2  
Blogger smraa alnil said...

bosbos

عجبتني مدونتك كتير
الصور اللي فيها ابلغ مليون مرة من اي كلام
وانا سعيدة اني شرفتني بزيارتك
اتمني تكرارها

___________________________________

كلمة

بقي تدبسني يا راجل وتلبسني التاج
طب ايه رايك بقي اني ممكن اطنش
وبعدبن الفكرة مش جديدة ازاي
دة مش كان في منها غير نسخة واحدة
هههههههههههه
وصدقني انا مبسوطة ان اسلوبي عجبك اوي كدة
وحلوة ان كلامي مش مستهلك دي
مانا بجيبه طازة علي طول :)
ههههههههه مش تفكرني بقصة الفرح
عامة هبقي اكملهالك علي البوست عندك

___________________________________

bagabigo

علي فكرة احنا فعلا اتصالحنا
يعني تلاقينا كدة بنكلم بعض من غير لا عتاب ولا اعتذارات
الحمد لله
وبجد بشكرك علي تقديرك دة

Thu Jan 04, 07:09:00 PM GMT+2  
Blogger سـردية said...

ايها الناس
في الثامن عشر من يناير عام 1977
خرجت جماهير الشعب المصري بعفوية ضد مهازل النظام الفاسد الجاسم على أنفاسها
يومها خرج علينا رئيس الجمهورية السابق واطلق على انتفاضة الجياع في مصر لفظ حرامية على الانتفاضة وعلى فقراء وجياع شعبه
بعد أسبوعين من اليوم تهل علينا الذكرى الثلاثين لهذه الانتفاضة، علينا رد الاعتبار لهذا الشعب ولخروجة المقدس
ورد الاعتبار لشهداء يومي الإنتفاضة في القاهرة والإسكندرية الذي تجاوز الألفين من المصريين الفقراء

Thu Jan 04, 07:10:00 PM GMT+2  
Blogger smraa alnil said...

الزعيمة

انا كنت فاكرة كدة برضه يا زعيمة
بس لما جيت اقارن عن دفاعه عن شئ ودفاعنا
وسبب جريه ورا لقمة العيش والطمع اللي بقي عندنا
حسيت انه عظيم
كان بيقتل اه
كان بيحارب لاجل الحياة
ادواته كانت من حجر
عشان يعيش من وراه بشر
جايز يكون مات من ملايين السنين
بس دفاعه كان علي حق
وغضبه كان براكين

هو ابسط من اي حاجة يا زعيمة
انا عن نفسي بحبه اوي
وكتبت عنه عشان تشاركوني في حبه
وبعدين يا سيتي لا ابدعات ولا حاجة
ربنا يخليك ليا انتي بس

____________________________________

واحد من الناس

وانت طيب يا قمر
وبعدين تقتل مين يا عم انت
دة اخويا
دة اللي يجي جنبه اشرحه
ههههههههه
بس سايباك لغيره
اي حد هيضايقني هقولك عشان تقطعه بس اخويا لا
هههههههههههههه حلو اوي موضوع الاتنين من العصر الحجري
انت كدة هتدخلني في سياسة وهتوديني في داهية
لا يا بيه مش اعرفه دة هو اللي قال
شعري افكاره غريبة
انا مش شايفة انه غريب في حاجة
انا الي بحسه بقوله
يمكن عشان اللي بحسه بكتبه من غير زيف ولا ارتباط بلغه وقواعد عشان كدة بيطلع صادقة بس دي بجد شهادة اعتز بيها منك
ودشمة كمان بيقولك
ربنا يخليك
___________________________________

جمال

وانت بالصحة والسلامة
انا برضه قلت انك مش بقيت تيجي
عامة حمد الله علي السلامة
والحمدلله
انا كنت بحس اني بكتب اي كلام وخلاص
وطبعا شرف ليا انك تكون معجب بكلامي
بس انت بتجمع معجبين يعني
افهم من كدة ان هما كتيييير

هههههههههه
شكرا ليك يا جمال
وحمالله علي السلامة

Thu Jan 04, 07:11:00 PM GMT+2  
Blogger smraa alnil said...

الشعب

يعني انت مش وضحت المطلوب ايه وازاي نرد الاعتبار للشعب دة
يعني نعمل انتفاضة تانية ونموت الريس الحالي
ولا نعمل ايه
ابقي وضح المطلوب من الشعب ايه عشان نعمله
مش مجرد نقول عايزين وعايزين
من غير ما يتحدد ايه المطلوب مننا
عشان مش نتشتت يعني
ولا ايه

Thu Jan 04, 07:16:00 PM GMT+2  
Blogger zordeak said...

انوووجتى العزيزة


دايما بتبهرينى


وكنتى بتقولى ملكيش فى الشعر العامى .., وبتحاولى وخلاص


شكلك بتخزى العين

يا ريت تزورينى فى بلوجى الجديد

http://ma3nafsy.blogspot.com/

Fri Jan 05, 01:11:00 AM GMT+2  
Blogger بين الأمل و اليأس said...

وارجع بينا لاصل الحياة
ابعت لينا جواب حجر
مختوم بطابع البشر
يحكيلنا عن روح البساطة
وعن بساطة الروح
خلي قلوبنا كتاب مفتوح
وقول للحق خلاص مسموح
تعود من تاني تنزل مطر
بجد احساس رائع احساس بان الحجر ممكن يعلم البشر وصف فوق الاستيعاب الحجر اصبح يعلم بني البشر
وانا مش هاتكلم كتير
لان الكلام مش محتاج للتعليق هو واصف نفسه بنفسه بس لسه فيه امل في اننا نكون انسان
وربنا يسترها

Fri Jan 05, 07:02:00 PM GMT+2  
Blogger dead man said...

:'(

Mon Jan 08, 03:46:00 AM GMT+2  
Blogger الأباصيرى said...

وبيقولوا على دبشة لبصوان أنسان متخلف وهمجى


أحنا كمان متخلفين وهمجيين


بس الفرق أنة كان أنســــان


أحساسك فى القصيدة رووووعة

أشكريلى أخوكى اللى زعلك وخلاكى تبدعى بالطريقة دى

Thu Feb 08, 11:10:00 AM GMT+2  
Blogger smraa alnil said...

فؤش
انا طبعا زورتك في المدونة بتاعاتك مبروك ولو انك قفلتها دلوقتي
_________________________________


حازم
ربنا يخليك يارب

المهم ان الكلا عجبك

Fri Mar 16, 02:18:00 PM GMT+2  
Blogger smraa alnil said...

هواري

ايه بس زعلان ليه

___________________________________


اباصيري


المهم انها عجبتك
عامة هو كمان بيشكرك
وانت عندك حق الفرق بينا وبين دشمة انه كان انسان

Fri Mar 16, 02:19:00 PM GMT+2  

Post a Comment

Links to this post:

Create a Link

<< Home