Saturday, December 23, 2006

حياة ميتة او موت حياه المهم انها حياة

انا مش عارفة ايه اللي هيخليني اقول الكلام اللي هقوله جايز اندم عليه
بس حسيت اني مخنوقة اوي وان لازم الناس تفهم وتعرف ان هما ممكن يضيعوا عمرهم وعمر ناس تانية
الصورة اللي فوق دي كان نفسي احس بيها اوي
كان نفسي احس ان في ايد ممدودة ليا بحنان
ان في صوابع بتمشي علي خدي وبوسة رقيقة علي جبيني ودفا في حضن محدش ممكن يتخيل انه ينتزع منه
كان نفسي احس اني بايدي الصغنتتة دي بمسك صباع بعلق عليه امالي واستشف منه الدفا
لكن صعب
محدش بيبلاقي اللي عايزه
تمر سنةة ورار سنة
وبكبر ولاقي مشاكل وضرب واهانات بسبب ومن غير سبب
وقبل ما انام بلاقي دمعه علي خدي ولوحدي
خايفة ؟؟؟؟؟؟؟؟؟؟؟؟؟؟؟ خايفة اوي
عايزة حد يحضني عشان يضيعلي خوفي
بس محدش منهم فاضي
امي بتتضرب وابويا بيتخانق
طب احوش
لالالا هتضرب انا كمان
خليني هنا احسن في زاوية مقهورة بفكر وكالعادة دمعه حبيسة خايفة تنزل
اصل لو شافني بعيط ممكن يضربني انا كمان
بس كانت دمعه محبوسة والسلام
تمر ايام بعدها والحرمان مسيطر والحزن معشش
مكنتش طفلة طبيعية زي باقي الاطفال اللي بتفرح لما باباها يجي
بالعكس كان قلبي يدق جامد واجري علي اودتي واستخبي تحت بطانيتي وانا ركبي بتترعش من الخوف
وكل ما اسمع صوته انكمش اكتر طالبة لرحم امي انه يرجعني تاني
بصوت محشرج مكتوم محدش سامعه غير جدران قلبي بقول يا ماما تعالي انا خايفة
بس برضه بنام واستسلم لعفاريت نومي
كنت دايما مستعدة للسفر في اي وقت
مش بره مصر لا
مشاكل كتير بتحصل وانا صغيرة وامي بتتطرد من بيتها
هنروح لمين ونقول يا مين ينصفني منك
بقيت عاملة زي اللاجئين كل شوية في مكان

تقريبا بيني وبين نفسي شايلة كيس اسود مخبياه في دولابي في هدومي الطفولية عشان لو ماما مشيت امشي معاها او لو مشيت الحق الم هدومي عشان بابا يرمينا عند اي حد ياخد باله مننا ومش يزعق لما اتاخر

كنت دايما رافع شعار الاستعداد

مش عارفة ليه جدتي مش كانت بتحبني لانها كانت شايفة فيا صورة امي

كانت دايما تعمل الغلط وتقول لبابا ان انا اللي عملتوا

وكنت بخاف اتكلم وكانت مرة واحدة اتكلمت وقلت مش حصل دة تيته هي الي ..... وقبل ما اكمل

اتكلم تاني ليه انا خايفة

انا عارفة نصيبي لو اتكلمت

عمر المذاكرة ما كانت بالقهر كنت بخاف

لمذاكرة كانت ضرب ويحط القلم بين صوابعي ويدوس جامد عشان مش قادرة احفظ

واحفظ ازاي وانا خايفة

ومش غريبة عليا لحد دلوقتي اني مش اكون حافظة جدول الضرب وانا عندي 25 سنة

وتعدي سنين

وابقي ملك بابا رسمي وقانوني

بقينا في حضانته

كان عندي 10 سنين

الطلاق كان غيابي

الخبر السعيد كان ليا انا واخويا اللي اصغر مني بسنة

ان انا هطلق امكم

10 سنين و 9 سنين مش عارفين يعني ايه طلاق

بس اللي حسيته اني مش هشوف امي تاني

وقبل ما الاشارات العصبية تروح لمخي عشان مخي تخلي عيني تدمع كان رد الفعل موجود والخوف برضه اتملكني وحبست نفسي جوايا ودبحت دمعتي

كان نفسي اقول اه

بس مش قدرت

كان نفسي احضن امي جامد ساعتها واقولها الحقي يا ماما مش هنضحك تاني مع بعض

ومش هشوفك تاني

وبين ساعة والتانية ضاعت ماما

ماما يا بابا

اعتبروها ماتت

وبرضه ممنوع البكا

ممنوع الرفض والتعليق

وفجأة بعد ما كان دوري محصور علي الاكل والنوم والمذاكرة والخوف والبكا بيني وبين نفسي

مجبرة اني اراعي بيت حاكم انا مش هجيب ناس من بره يخدموكم انتي كبرتي وتعرفي تشيلي مسئولية

10 سنين

ماما مش علمتني

اصلها كذا وكذا وكذا

قمة المهانة لما اخبط علي الجيران من وراه قبل ما يرجع من الشغل لانه محرج علينا نكلم حد

هو الرز بيتعمل ازاي يا طنط

ولا المكرونة بحطلها ملح اد ايه

وبرضه مننوع الكلام

شفتوا بقي اننا في عصر الممنوع

فاتت سنين ولقيت انا في تانية اعدادي

وبعد رجوعي من امتحان الترم التاني وقيامي بالمهام المنزلية واللذي منه

والمذاكرة نمت

صحيت علي وجع في بطني جامد وضهري

مش قادرة اقول الاه

الم بشع مش قادرة استحمله

يااااااه دي النهاردة 15 في الشهر ميعادها

بس هي جاياني بوجع ليه كدة

واخرج علي الفجر الاقي بابا قاعد

مالك مش فيه

اومال عملانةكدة ليه

اصلي ؟؟؟؟ الي بصراحة باطني بوعجني

كانت الساعه 4 وتلت الفجر مش سابنا انا واخويا الا الساعه 5 ونص الفجر من الضرب بحجة اننا بنجيب اكل من بره ودة اللي وجعلي باطني

من غير ما يسال وحتي لو سال مش اتعودت اني اتكلم في الامور دي مع حد

حد زي مين انا مش ليا حد

انا عرفت الحاجات دي بالفطرة

ومش غريبة اني لما اتعب لحد النهاردة ولو بموت عمري ما اشتكي لحد لاني بخاف

لبست ورحت الامتحان وانا بدمي وعقلي خايف

وبعيط علي الورقة زي ما يكون بقالي قرن مش عيط

فاضل نص ساعه والامتحان يخلص انتي يا بنتي مش كاتبة حاجة

والله يا مس مش شايفة الورقة اصلا

انتي مذاكرة والله مذاكرة

وتأتي الرياح بما لا تشتهي لانفس واجيب ملحق

بص بقي يا خويا مالهاش حل غير اننا نهرب

نروح فين بس يا سمرا

نروح لماما

ولما رحنا تهنا

لا مش في الشوارع تهنا بين المحاكم والقواضي والمحامين

عشان حقنا

وتفوت شهور ومش في نتيجة دة احنا سقطنا في الملحق طبعا كنتوا عايزين ايه

واحدة بتروح محكمة وتقف ادام قاضي وتقول ابا وماما

سقطت ورجعنا لبابا تاني

ودي كانت لحظة انتقال في حياتي في اول يوم دخلت فيه المدرسة مع الدفعه الجديدة

برضه خايفة ومقهورة وعيطت جامد اوي ساعتها

محبتش اني اكون فاشلة

محدش قالي اعملي حاجة

بس الاحساس دة كان وحش اوي اقسمت اني مش امر بيه

رغم صغر سني لكن عقلي كبر اوي عن سني باربعين سنة

وسنة واللتانية بنجح وبقول انا اهو في وسط ظروفي دي

نيجي بقي لتانية ثانوي

اللي فجأة صحيت منها علي ضرب مش خلصني منها غير اخويا اللي لو مش كان لحقني كان زماني ميتة

عايزين تعرفوا السبب

السبب اني سبت كيس العيش مفتوح

بس السبب الرئيسي بقي واضح لما رحنا انا واخويا مشاوار مع بابا واحنا مش عارفين فين وخايفين نسال

وادام العمارة عرفنا احنا هنا ليه

بابا هيتجوز

واحدة عندها ولدين وبنت

ويغيب بابا يومين ويرجع وفي اايده مراته

اللي اول شهر بس حسيت ان هي هتعوضني عن كل اللي اتحرمت منه

طيبة

بس هي مرات اب

180 درجة اتغيرت شفت اسؤ معاملة

وبرضه مش بتكلم وساكتة وراضية

مش عشان حاجة عشان برضه خايفة

وعذاب ورا عذاب ورا عذاب

وقهر وظلم وكبت وجرح

تقريبا كنت انا اللي مرات لبوها مش هي

والنتيجة الحتمية لهذه الزيجة المبنية علي الطمع هي الفشل

مش مهم مين طمعان في مين

بس اهي فشلت

وامتي

قبل امتحان اخر السنة بيوم

يعني صابح عليا امتحان العربي بتاع اخر السنة

محدش يسالني انا ازاي جبت اتنين وتسعين في الميا

وتفوت تالتة اللي شفت فيها شتي الوان العذاب

بس بصراحة مقدرتش اصمد كتير

واقوي في نفسي

حاصل السنتين ستة وتمانين وستة من عشرة

كنت فخروة بنفسي اوي

بس كنت خايفة اوي لاني عارفة ان دة مش هيعجبوا

مش مهم كان ادامي كليات كتير ممكن ادخلها بس دخلت تربية رياضيه

اشمعني يعني

انا اتعودت اني احلم وحلمي مش يتحقق واتعودت اني اتمني ومش الاقي

واتحرمت

بس انا لاعبة ولو دخلت اي كلية تانية يبقي انسي حبي للعبة دي

لا بقي لازم ادافع عن حبي لحاجة واحدة بس

لازم اكون انا بيني وبين نفسي

هتمرد

مش هخلي حد يحرمني من حاجة بحبها ودخلت تربية رياضية عشان اقدر اكمل في لعبتي اللي لسة بلعبها لحد دلوقتي

ودخلت

اولي في تانية وكان بابا جايب عروسة تانية

بس انا بقي اتعلمت الدرس

ومريت بتجربة حب قاسية وفاشلة برغم اني فهمته ابعاد حياتي

اللي قرا قصة قلوب لا تنبض فانا كنت بطلة القصة دي

انا اللي قلبها نبض بالحب ومات

انا اي نعم في الاخر مش مت ولا حتي حاولت بس استسلمت لرغبة جوايا بتقول

ان اصلا مش في حب ودة كان بمثابة موت جوايا

الموضوع دة منتهي من خمس سنين

يعني كان عندي 20 سنة كدة

نقف ها شوية بقي

دخولي الكلية كان بمثابة انطلاقة تانية لشخصيتي

يا اكون يلا اكون

ادامي اختيارين مش ليهم تالت

فقررت اني اكون انا

ضحكت ولعبت زي الطفلة برغم اني كبرت بس جوايا قلب كتكوت صغير برئ

انفصلت عن العالم الانساني بطفولتي وبراءة كلماتي وشجاعتي في شغلي حتي وانا طالبة كنت بشتغل

ابتديت اقول لا علي اي حاجة

اهو تمرد والسلام

واهو اي حاجة بقي

اتخرجت بتقدير عام جيد جدا وفي تانية ماجيستير ومتعينة في كليتي معيدة

سافرت مرتين بره مصر

مرة كاحتراف للعبتي في سلطنة عمان والمرة التانية للاردن لتمثيل مصر في حاجة هبقي اقولهالكم بعدين

يعني انا اخترت اني اكون انا

ظاهريا انا ناجة جدا والكل بيعرف اني قادرة علي تحمل نفسي من الالف للياء من غير ما اشاور حد

بس المشكلة جواية

مش ملاحظين اني مش جبت سيرة ماما في الفترة اللي فاتت دي

لانها مش ليها دور في حياتي

هي كمان ليها مشاكل

ودوري اني انا اللي امها اخدها في حضني واحل ليها مشاكلها واساعدها

دوري اني اساعد صحابي اللي بحس باوجاعهم لاني مجربة يعني ايه وجع

طب وانا

مش غريبة اني اروح ادور علي شخص يكون ليا كل شئ وارمي عليه مسوليتي لدرجة اني اسيبله القرار في انه يختار انا ممكن اكل ايه

مش غريبة اني اروح ادور علي الحب اللي من ساعه ما اتولدت مش شفته وبسمع عنه

وحتي يوم ما حبيت اعيشه كان وهم

عشان ينسي بيا حبيبته الاولانية

مش غريبة اني احن لطفولة وبالونة ماسكاها ومصاصة في بقي وبجري ورا العيال

مش غريب اني وانا بضحك الاقي غصب عني دمعه نازلة من عيني مش من الضحك لا من قهري

مش غريب اني اكون لوحدي محدش يعرف عني شئ ولا عن مشاكلي

مش غريب ان يحصل فتور بيني وبين امي واخد علي بعادها بالشهور

مش غريب اني مش اسال علي اهلي اللي مش في حد منهم سال عليا ولا دافع عن حقي

مش غريب اني ساعات ببقي ماشية في الشارع ببص في عين كل واحد واقوله اوعي تطلق مراتك وترمي عيالك

مش غريب اني ابقي ماشية في الشارع بقول يا جدعان انا نفسي في حضن واي حد هيقابلني ان شالله يكون زبال حتي هحضنه

مش غريب اني ابقي جبل بعد كل دة

وابقي ورقة مرمية وسط صحرا في ليل شتا

مش غريب اني اقول الكلام دة مش للشكوي

لا

بس نفسي الناس تبص لبعيد

تفتكر ولادك هنجحوا في درساتهم زي انا

تفتكر ان هما هيقدروا يعملوا حاجة

تفتكر ان هما من جواهم حتي لو نجحوا سالمين وجواهم طمأنينة

مش كل الناس زي سمراء النيل

اللي طلعوه عليا اصحابي الاردنين

مش كل الناس هتبقي زي اخويا

اللي دخل كلية السن واتخرج منها

مش كل الناس هتلاقي ضربة وتقويها

انا عن نفسي ضهري مقطوم بس بئاوح

انا من جوة طفلة حزينة جريحة عايزة اللي يدخلها غرفة الانعاش

مش عايزة اللي يقرا الكلام دة يشتمني او يشتم والدي

انا مش بقول كدة عشان اشهدكم عليه

انا نفسي الناس تفكر لبعيد وانت من مكانك كدة وقبل ما تتجوز

هي دي اللي هتبقي ام لولادك وهتحافظ عليها

لو عصبي اتحكم في عصبيتك

عشان مش تزرع جواههم خوف

برغم قوتي بس لسة خايفة

نفسي بقي الاقي امي معايا واحس بايديها

نفسي حد يحكيلي حدوتى قبل مانام ويلعب بشعري

نفسي حد ياخدني في حجره ويطبطب عليا واحط راسي علي صدره

انا مش جربت دة بس سمعت عنه من صحابي لما بيحكولي ماماتهم كانت بتعمل كدة

نفسي اروح بيتنا الاقي في اكل ليا مستنيي وان في دفا وحب وامان

نفسي احس ان انا ليا بيت

نفسي احس بالامان

لما بكون برة برغم برد الشتا عليا بحس بدفا عن بيتنا

اول ما تخشه تلاقي الدينا ساقعه

نفسي لما انام الاقي حد بيجي يغطيني

ولما احلم حلم وحش الاقي حد واخدني في حضنه بيقولي مش تخافي كل شئ هيبقي كويس

اللي انا عايزاه دة عايزاه من امي ومن ابويا

بس يا ريت يكونوا ام واب تانين

محدش يسالني ليه مش عايشة مع مامتك طالما ان انتي متكفلة

لا اهلها مش راضين عشان نظرة المجتمع الشرقي للبنت الي قاعدة مع الام وسايبة الاب

غلط الاب هيحافظ علي بنته اكتر فالراجل الذئب لماا يجي للبنوتة ام فستان احمر ويعرف انها عند باباها هيعرف انها محترمة

اهلي دول بقالي سنتين مش شفتهم

اما اهل بابا فلو شفت عمي ولا حد من ولاده وجها لوجه مش هعرفهم

يعني الاحساس باليتم وش

مش اعرف مين الجيران اللي ادامنا

ولا اللي ورانا وانتو الصاقين

يعني شغلي ودراستي وصحابي هما دول اهلي

انا مش لوحدي في الهم دة ولا الحزن دة

في مليون غيري زيي ويمكن اسؤ مني وفيه اللي احسن مني

والل يشوف بلوة غيره تهون عليه بلوته

لا بابا ولا ماما كان ليهم دور في تكوين شخصيتي لان كل واحد منهم مشغول بامور حياته ومشاكله

انا ربيت نفسي بنفسي

قدرت اميز الصح من الغلط

خصوصا اني قعد فترة طويلة لوحدي وبابا الصبح في شغل وبليل في شغل

يعني مش فاضي يربيني

انا واخويا ربينا بعض وقوينا بعض

بس دلوقتي لما كبرت في حاجات بعملها مش ببقي عارفة هي صح ولا لا

في شغلي ودراستي مش عارفة انا صح ولا لا

ومش بلاقي حد اخد رايه غير عقلي

طولت عليكم اوي بس انا اسفة


انا زي ما قلت بقول الحكاية دي لهدف

ومرة تانية مش هسمح باي تعليق يمس والدي باي اهانه او اي حد من عيلتي

لانهم في الاول والاخر سيظلوا اهلي

ولو سمحت مش بحب التعليقات اللي فيها يا حرام ومعلش

لاني مش ضعيفة

انا بس بنت وخايفة

Labels:

119 Comments:

Blogger الحصان الأسود said...

تعرفي احسن حاجة انك فتحتي قلبك واتكلمتي
انا عارف ان دة بيريح لاني مجربة


وأقولك برضة برافو عليكي انك برغم كل الأحداث دي حافظتي على نفسك وكبرتي وربيتي نفسك بنفسك و طلعت الوردة من الوحل

بس تعرفي كونك اتكلمتي وحكيتي ووقفتي على رجلك دة ينبيء انك ستنفجرين قريبا في وجه من لم يراعموا طفولتك و سنك و براءتك عارف انك عمن قريب حاتنطقي وتقوليلهم اللي ماقدرتيش تقولية من سنين
عارف انك مش مستعده تشوفي اللي انتي شفتية وانتي صغيرة من تاني دلوقتي ومش مستعده تتقبلي دلوقتي اللي اتقبلتية زمان

الوضع يختلف انت لم تعودي طفلة

ولم تعودي تلك التي تعتمد عليهم كليا

وهم يجب ان يسمعوا يجب ان يعرفوا كم ظلموك وكم كنت انت في احتياج لحض يدفئك وقلب يرعاك و يد تربت عليك

أدعو الله ان ينولك من تستحقين و يستحقك ويعوضك عما مررت بة

تحياتي ممزوجة بألمي

Sat Dec 23, 09:42:00 AM GMT+2  
Blogger Music Gates said...

الاول اقوليك قولي الحمد لله
انتي برضه في نعمه
مع ان لو شخص في مكانيك ينهار بس ده فضل من عند الله انه داعميك بالقوه لتصمدي امام هذه الاهوال .. و الحياة مليئه بالتجارب و انا نفسي كلاميك ده لمس تجارب واقعية حدثتلي و ايضا تجارب شفتها ويمكن مش انتي لوحدييك ده يمكن الناس كلها عايشه في صراع و نسينا احببنا واهلنا انا نفسي واقع في مشاكل كتير مع اهلي و مع اخويا الي يمكن ملناش غير بعض زي ما قلتليك انتي ربنا اداكي نعمة و حلوه جدا انيك قوية يمكن يكون في ضعف لان اي مشكله بتسبب ضعف و قوة لكن ارجع واقوليك قولي الحمد لله و انا والله ما عارف اقوليك ايه

Sat Dec 23, 09:58:00 AM GMT+2  
Anonymous Anonymous said...

أولا ميرسي على زيارتك الحلوة وسؤالك .. وسبب غيابي يا سمارة هو انشغال شوية.. أصل الوقت المخصص للنت بقى معظمه للويكيبيديا .. لأني بعيد عنك وعن السامعين بقيت - إداري - وده بياخد من الوقت والتركيز

لما دخلت النهاردة ولقيت البوست ده .. اللي باعتبر انه - أعظم - حاجة كتبتيها أو هتكتبيها .. لأنها قصة من - لحم ودم -ة قصة فيها أرواح معذبة وألم .. ألم يعيش مع الواحد سنين حتى بعد ما ينتهي ويسبب له عاهة مستديمه

أي كلام .. مش ممكن يمحي ذكريات شكلت شخصية وكيان الواحد.. النهاردة وبكرة وبعد عشرين سنه .. وأعظم مافي الموضوع هو الهدف .. هدفك من الحكاية .. مش بس فضفضة والسلام ... أبدا .. قصدك منها - العبرة - علشان كل واحد يفكر ألف مرة قبل ما يعمل حاجة هيترتب عليها مصائر ناس وأعمار هتتعاش في الدنيا في ظل الألم والخوف

على الرغم من أن قصتك مش جديدة .. أبدا .. بتتكرر كل يوم ويمكن على أسوأ زي ما قلتي .. لكنها عاملة زي البصمة .. مش ممكن تتكرر مع أن الناس كلها عندها بصمات

إللي اقدر أقوله ان قصتك عبرة ياريت تغير فكر - أي حد - من اللي عايشين يومهم بس ما بيفكروش في بكره ولا في نتايج أفعالهم على الناس وخصوصا على الأطفال اللي بيخرجو للدنيا عاملين زي الورد اللي لازم يتحافظ عليه

وبرضه عايز أقولك انه على الرغم من كل اللي حصل ادينا عايشين ما متناش .. صحيح نشعر بالالم ...بس في داخلنا أقوى
ورحمة ربنا أوسع من ظلم عباده لبعضيهم.. لأن أي حياة في الدنيا فيها الحلو وفيها الوحش وربنا عجلك الوحش في الأول .. يارب يكون اللي جاي أحلى وأأمن وتلاقي فيه اللي انتي تستاهليه - علشان انتي عديتي الدورة واجتزتي التجربة .. تجربة الكوماندوز .. انتي كوماندوز معاكي فرقة صاعقة دلوقتي .. جاهزة لأي حاجة سوا كانت حلوه ولا وحشة .. وربنا يحلي ايامك ويجازيكي ويديكي نصيبك الحلو من الدنيا قادر يا كريم

وعلى فكرة انا متأكد مليون في المية انك هتكوني سعيدة في المستقبل .. عارف ليه؟؟

لأن التجربة دي هتخليكي تعملي عكسها تماما.. هتخليكي احن انسانة في الدنيا ... واكتر انسانة تحرص على الحب والحنان والعش الهادي .. وولادك هيكونوا اسعد اطفال في الدينا - ياريتني واحد من عيالك هههههههههههههههههه .. المسألة مسألة وقت يا سمارة.. وبكرة تشوفي كلامي

أنا سعيد أوي بالبوست ده .. وأنتي اوعي تندمي عليه ابداً.. لأن كده أصحابك اللي يبيقروا لك .. تقريباً شايفينك وهيشجعهم يكتبوا التجارب اللي يتكسفوا منها علشان الناس تقرب من بعض

وللمرة العشرين السلطنة نورت الشوية
دول
آسف على التطويل بس الموضوع يستاهل

تحياتي يا ست البنات

Sat Dec 23, 10:06:00 AM GMT+2  
Blogger smraa alnil said...

الحصان الاسود

انت بتقول فيها انا تقريبا يثور لاي حاجة دلوقتي
ودايما بنتقض كل شئ حواليا
وفعلا مش مستعدة اشوف اللي حصلي دة يحصلي تاني ولا يحصل لغيري
المشكلة بقي اني مش بقيت طفلة ودي اكتر حاجة واجعاني
كان نفسي احس اني طفلة زي باقي الاطفال بتلعب وخلاص
وبعدين انا لم اعتمد عليهم كليا ولا حاجة
انا عمري ما اعتمدت علي حد
من نايحة ان هم هيسمعوا
فاعتقد ان حسني مبارك يسيب الحكم اهون
ههههههههههههه
___________________________________

كوبا


محمد انا برضه مش عارفة اقولك ايه
بص يا ابني انا وانت نهرب ونروح في اي حتة ونلبس هدوم مقطعه ونشحت ورزقي ورزقك علي الله
بس انت خلص الثانوية بتاعتك واحنا هنعيش
وهنكسب كمان ملاين

Sat Dec 23, 10:13:00 AM GMT+2  
Blogger smraa alnil said...

barrcuda

مش تتخيل كلام اسعدني اد ايه وريحني اد ايه
احيانا برضه بقول لنفسي ان بكرة اكيد احلي
وان السئ مش هيجي اسؤ من اللي فات
بس زي زي اي انسان
احيانا بفقد امل بقول مش فارقة بقي فرحي من بكايا
ولا راحتي من شقايا
وبعدين انا يشرفني ان يكون ولادي اللي هيجم يبقي زيك كدة

وبعدين انا فعلا معايا فرقة صاعقة من الاردن
بس مش كوماندز
اسمي مغامرة
هههههههههه
شكرا ليك مرة تانية

Sat Dec 23, 10:21:00 AM GMT+2  
Blogger islamz said...

هذا ما جناه ابي وما جنيته على احد ..

كل واحد بيقابل فى حياته مشاكل لو ضعف قدامها بيفضل ضعيف .. ولو قابلها بقوة بتتكون شخصيته على الاساس ده ..

الفضفضة بتريح اوى .. لككن عارفة ايه اللى يريحك اكتر .. انك تتكلمى مع والدك ووالدتك .. تقوليلهم اد ايه هما عذبوكى طول عمرهم سواء بقصد او من غير قصد .. اساليهم عن السبب عشان نفسك ترتاحى
اساليهم ليه خللوا حياة طفلين تتحول لجحيم بدل ما الطفلين دول يتعلموا يعنى رحمة وود وحب .. تجربتك واضح انها طلعت بجد شخصية قوية .. وانسانة اكيد ناجحة .. ونجاحك مش هيبقي فى دراستك بس هيبقي مع اسرتك اللى هتبنيها كمان .. هتخافى على بيتك واولادك .. مش هقولك انسي اللى فات لا خليكى دايما فاكراه
عشان كل ما هتفتكرى اللى كان بيحصل هتقوى اكتر وهتتحدى نفسك اكتر واكتر

تحياتى ليكى بجد على شجاعتك قدام نفسك
كتير بيفتقدوا الشجاعة قدام النفس ... كتييير اوى ...

والسلام ختام ..
:]

Sat Dec 23, 12:19:00 PM GMT+2  
Blogger smraa alnil said...

واد يا اسلام انا مش قلتلك روح ذاكر يا واد

وبعدين تعالي هنا اقول لمين واتكلم مع مين

كل واحد منهم مش شايف اه غلطان في شئ
وان الطرف التاني هو اللي ظلم الطرف الاولاني
وبعدين فات الاوان اني اتكلم لان محدش هيسمع لان هم من وجهه نظرهم والمجتمع اللي انا فيه ان هم مش غلطانين
يعني لما حاولت اتكلم لقيت الناس بتقول ابوكي ومن حقه يعمل اللي هو عايزه طوب ما هو راجل
من امتي الرجولة بتتقاس بالضرب والاهانة والحرمان
الموضوع اكبر من اننا نتكلم
انا قلت اتكلكمم معاكو انتو عشان تاخدوا بالكم
ومش تخاف ان كدة كدة مش هقدر انسي ودايما فاكرة دة
بس سيبك انت برضه روح ذاكر يلا

Sat Dec 23, 12:29:00 PM GMT+2  
Blogger أسوور said...

ابكيتينى حتى النخاع .. دموعى نازلة زى المطر من قصتك .. على فكرة انا .. للسف .. واحدة من المليون .. القصة فيها إختلاف .. مع ان فيها تشابه .. قضيت عمرى زيك .. وعشت حياتى معاكى .. من غير ما نتقابل ..
ولما فكرت انى لقيت الحضن .. لقيت الحب .. لما فكرت ان الدنيا ضحكت .. رجعت كشرت تانى . وبشدة ..
وعشان ولادى ما يعيشوش زيى .. فضلت انى أقبل حياة اتعودت عليها .. قهر .. ظلم .. غدر .. ما أنا خلاص .. اتعودت .. والمنحوس منحوس
المهم البنتين ما يعيشوش زيى
مش هقدر أوصفلك كم الدموع .. انتى محتاجة حضن .. زيى تمام .. تعرفى .. نفسى نبقى أصحاب .. بجد مش بس فى البلوج .. عاوزة أشوفك لحم ودم قدامى

Sat Dec 23, 01:08:00 PM GMT+2  
Blogger ALiaa said...

هقول لك : ان حياة العظماء عمرها ما كانت سهلة و مليانة أغرب الأحداث و أقساها..... ماتخيلتش كدة عنك خالص لأنك علي طول بتضحكي... بس اللي بيضحك كتير بيداري أكتر..... ربنا يوفقك يا انجي

Sat Dec 23, 01:19:00 PM GMT+2  
Blogger Lion king said...

الله يسامحك يا سمارة
كلامك وجعني اوي بجد
ومقدرتش امسك نفسي من الدموع
مش شفقة عليكي لا بالعكس انت حد حلو اوي
وجميل اوي
وصادقة اوي
ولو سبت نفسي اعلق مش هيكفيني كل التعليقات اني اعلق
انا بس عاوز اعلق على حاجة صغيرة
عاوز اقولك متخافيش من جواكي
انا عارف انك قويه لكن ترجمي القوة الي من براكي الي تفائل من جواكي وحبي نفسك حبيها اوي وافتخري بيها اوي
لانها حقا يفتخر بيها و
لان انت الوحيدة الي جديرة بحبك :)
وعاوز اقول حاجة
سيدنا محمد قال الخير في وفي امتى الى يوم الدين

يعني اكيد ربنا شايلك خير حلو ان شاء الله

وعاوز اقول كمان اعفو عن من ظلمك
واحسن لمن اساء اليك
المهم انك قبل ما تحطي راسك على مخدتك
انك بنيتك تعفي عن كل حد زعلك في حاجة وتسامحيه ان الله يحب المحسنين

وانا كنت كتير لما بتخنق بحس ان محدش بيحبني وان لوحدي لكن سبحان الله بلاقي ناس بسيطة جدا ممكن مكنش انا واخد بالي منهم بيرسموا بسمه على لما بسمع منهم كلمه بسيطة

المهم انك فعلا حد جميل اوي وتستحقي كل الاحترام والتقدير ومن كل قلبي بدعي انك تلاقي كل حاجة انت مفتقداها وقريبا ان شاء الله

وعلى فكرة احنا في ايام حلوة دلوقت
ويوم عرفه ينزل الله الي السماء الدنيا ويباهي بعبادة ملائكته في السماء
ورحمته تسع كل شيء فيارب فك كربك وكربنا جميعا وارضى عنا
اسف للاطاله
ويارب :) الابتسامه ما تفارقيش امين.

Sat Dec 23, 02:47:00 PM GMT+2  
Blogger tota said...

سمراء

مش هقولك اى كلمة من اللى انتى مش عايزاهم
هقولك انتى انسانة كنتى بارة بنفسك وبأهلك
هقولك ان ربنا عادل واى حاجة اتحرمتى منها هتتعوضلك تانى فى حاجة اجمل واحلى كتير
هقولك ان الدنيا علمتنا ان الضربة اللى ما تكسرناش تقوينا

هقولك انى حسيت بكل كلمة بسيطة قلتيها حسيتها كاحساس
لما اتكلمتى انتى خرّجتى حمل كبير من جواكى لمااتكلمتى انتى عرفتى انتى كمان من كلامك انتى عايزة ايه

انتى شاركتينا كلنا تجربتك ومش طالبة مواساه انتى بكلامك بتقولى رسالة بتقوليها و بتوجهيها لكل اب وام انهم قبل ما يفكروا فى نفسهم يفكروا فى مشاعر اولادهم لانها مش حاجة هينة ده كائن كونتوه واتخلق فى الدنيا مش علشان تعذبوه

عارفة فى مليون حضن دافى هتلاقيه من اصحاب ومن ناس بتحبك كتير بس افتحى ايدك وسيبى نفسك فى حضنهم

انا سعيدة بانك قوية ومش مكسورة وناجحة اللى بتدورى عليه مش صعب لكن تصورى لو بتدورى على النجاح والكيان واللاعتماد والشخصية كان هيبقى صعب قوى حد يديهولك انت ربتيه فى نفسك وده الاهم

تعالى بقى خدى حضن كبير على الشجاعة فى المواجهة مع نفسك ومع الاخرين
قصتك لا شىء يعيبها حتى لا تعترفى بها وانت شايفة الصورة كاملة

عسى الله ان يعوضك خيرا على صبرك

تحياتى

Sat Dec 23, 03:47:00 PM GMT+2  
Blogger elgharep said...

احييك على مدى الصراحة العميق الذى ظهرت بيه أمامنا فى ما كتبتيه أنا لا تتصورى أد أيه أحترمتك أو بمعنى أدق أزداد أحترامى ليك عارفة ليه لأنك الوحيدة فينا اللى قبلت أنها تعرى نفسها أمامنا (أسف على التعبير)ولم تعبأ بأى شئ آخر حقيقة ومش مجاملة أنت أصح واحدة فينا لأننا كلنا مليانين بلاوى ومع ذلك لا نجرأ أننا نتكلم عنها أو حتى نهمس بيها لحد
نصيحة لا تنظرى للماضى أنا عارف أنه بقى جزء من تكوينك النفسى لكن صدقينى أنت ضربتيه عرض الحائط عندما تحدثت عنه بمثل هذه الصراحة والمكاشفة دون أى خوف أجتماعى سطحى
الى الأمام
الغريب

Sat Dec 23, 03:51:00 PM GMT+2  
Blogger فريسكـــــــــــــــــــــــــا said...

اولا احيكى على صراحتك وصدقك
ثانيا احب اقولك ان ربنا قال (فان مع العسر يسر إن مع العسر يسر
بجد كل اللى انتى وصليله لغاية دلوقتى يخليكى قوية مش ضعيفة
بالعكس انتى يمكن تكونى اقوى من اولاد عاشو فى حضن امهاتهم وابائهم لكن لابيعرفو يتحملو مسؤلية ولا بيعرفو يكونو صادقين مع اللى حوالهم

ودلوقتى فهمت سؤالك اللى سالتهونى فى مدونتى يا ترى ماماتى هى كمان بدور عليا
حاولى تلتمسلها اى عذر اكيد هى كمان مش مبسوطة

وافتكرى دايما فإن مع العسر يسر ان مع العسر يسر

لكى خالص تحيااااااتى

Sat Dec 23, 04:20:00 PM GMT+2  
Blogger بين الأمل و اليأس said...

والله العغظيم انا لما دخلت افتكرت اننا دخلت مدونه غلط والله لغاية لما خلصت القرايه وكمان لما لقيت الموضوع السابق عرفت اننا دخلت صح بس ياه بجد انا حسيت بكل ده بجد قلبي معاكي انا مش بعزي او بهدي لا انا بس دخلت في جو الموضوع والله معارف اطلع منه
احساسي بالكلمات وخصوصا اننا عشت مواقف شبيه من الحرمان ولكن بصور مختلفه بصورة ان المال هو اللي هايعيشنا وان متقليش غربه وبتاع ومش عارف ايه بس
لكن للدرجه دي فعلا انا اتأكدت ان خلف كل ابتسامه جبل من الاحزان
لكن اهم حاجه لازم تعرفيها انك انسانه قويه جدا والحرمان ده صدقيني هايتعوض مع ولادك وابن الحلال ولو سمحت متقليش ان مفيش حب لا فيه بس الله اعلم يمكن ظروفك اللي مريتي بيها عشان ربنا شايلك حاجه احسن في علم الغيب وربنا مع كل انسان مر بالظروف دي مر بالحرمان والحنين
انا مش هاقول ولا كلمه اكتر لاني مش عارف اتكلم خالص ولا اقول غير قد ايه انا هايف وقال ايه فاكر نفسي حزين وبضحك على نفسي
لكن كمان مره ربنا اقوى وقادر على كل شيء ومحدش عارف الخير فين وانا مش عايز اتكلم في تفاصيل او تعليق عن الموضوع لان مهما اتكلمت فكلامي مش هايغير احساسك لاني مهما حسيت فاستحاله اننا احس مثل احساسك هذا وربنا هو المستعان
وصحيح انا سمعت انك انسانه خفيفة الظل ودمك خفيف ياريت نشوف من ده بعد كدا ونبي احسناليومين دو الظروف صعبه اوي عند الكل
ونسيت القبعه صحيح احب اخلع القبعه وانحني تواضعا واحتراما لهذه الكلمات الراقيه
اي ضهري اتقسم من كتر الانحناء
؛))).
وربنا يسترها

Sat Dec 23, 05:27:00 PM GMT+2  
Blogger Mody Rap said...

السلام عليكم
شكرا لزيارتك مدونتي

في الواقع انا انجذبت بشده لمدونتك لما فكرت لوهله اني ازور مدونة صاحبة الرد الموقع في مدونتي
لا توجد لمحة كذب واحدة في اسلوبك و لا اري انك تصنعين التكلف و المحسنات اللفظيه و انما تتخذين الاسلوب المباشر دون قيود و مواربة
قصتك مروعه بعض الشيء بالنسبه لمن لم ير الكرب في حياته

لي صديق لما اديته اللنك بتاعك عشان يقرا مستحملش يكمل البوست بصراحه و قاللي لأ مش عقدر اكمل .. ده عن حق

مشكلتك موجود منها كتير بس الاهم انك دلوقت تخلصتي من الركائز الاساسيه و قدرتي تبني نفسك

يمكن يتدوري علي الحب و الحنان.. انت اللي تقدري تلاقيه بنفسك

و انا كنت متاكد و انا اقرا البوست ده انك مش من النوع اللي بيقبل الشفقه و الكلام المعسول .. و لما وصلت للاخر و قريت السطور الاخيره
صدق حدسي

ربنا يوفقك في حياتك و تلاقي الشخص اللي يقدرك و يعوضك عن اللي فات

مطرب الراب المغمور

Sat Dec 23, 05:53:00 PM GMT+2  
Blogger smraa alnil said...

ياسمين


بجد مش عارفة اقولك ايه
انا اسفة لو كنت فكرتك بحالة انتي عايشاها او خليتك تشوفي حاجة تزعلك
بس انتي قلتيها المنحوس منحوس
وطبعا يشرفني ان انا وانتي نكون اصحاب
واشوفك كمان عشان نحط همنا علي بعض
ههههههه
بالنسبة بناتك ربنا يخليهوملك
كل اللي هقدر اقوله ليكي اصبري وان شاء الله ربنا يعوض صبرك خير
عشانهم هما
هكلمك قريب ان شاء الله

__________________________________

علياء

عظماء مرة واحدة
قوام خلتيني عظيمة
يا ستي اضحكي الحياة والله فيها مليون حاجة تضحك في الدقيقة مش اضحك ليه يعني
مش كفاية النكد اللي الواحد فيه
شفتيش انتي اخر نكتة






اخر نكتة
اصلي مش لحقتها لانها كانت اخر واحدة
ههههههههههه

Sat Dec 23, 08:29:00 PM GMT+2  
Blogger smraa alnil said...

lionking

هو انا شتمتك
هههههه
انا بجد اسفة لو كلامي وجع اي حد
انا مش اقصد
وشكرا ليك بجد
يمكن الخوف مش هقدر اوعدك بيه دة محتاج مني وقت كبييييييييييييير اوي عشان اقدر انتزعه من جوايا
بس انا اتعلمت اني احب نفسي اوي زي ما انا بعيوبها ومميزاتها
بحزنها وفرحها
وعندك حق في واحدة صاحبتي في مرة قالتلي
هو مش ينفع تتجوزي نفسك
هههههههههههههه
البت شايفة ان مش في حد هيفهمني غير نفسي
ودي حقيقة
وانا متأكدة ان فعلا ربنا كاتبلي خير
بالنسبة للاساءة والعفو
انا مش بعرف اعيش وانا بكره حد
انا في الاول مش كت بسامح وكت قاسية عليهم اوي من جوايا
بس اناخلقت ليهم اعذار واهية عشان اقدر اسامحهم واقول معذورين
بالسبة للناس البسيطة
فانت معاك حق
انا ليا قط صدقني في عز حزني بيخليني اضحك من قلبي خصوصا لما يدلع عليا او هو اللي ينادي عليا
ويارب الابتسامةهي اللي تبقي معاكم وفي وشكمعلي طول
ويارب يبعد عنكم الاحزان كلها
تحياتي

__________________________________

tota

اولا شكرا ليكي
ثانيا هقولك فعلا الضربة اللي مش تموت تقوي
بس انا بقي ضهري اتقطم زي ما قلت
مش عندك اي مسكن ليه
ههههههههههه
انا فعلا خرجت حمل كبير اوي يمكن قعدت سنين مدارياه عن الناس
لدرجة ان الناس بتقول ان البت دي هيفة ومش عندها مشاكل من كتر ما بهزر ودايما بضحك
انا فعلا مش كان الغرض من كلامي الي قلته اني اشتكي او اخليحد يشاركني
لا انا الحمد لله عندي ربنا
بس انا عايزة اوصل رساله فعلية لكل واحد عايز يبقي مسئول عن اسرة واي ام عايزة تجيب ولاد
دي مسئولية كبيرة اوي
وبعدين فين الحضن اللي انتي قلتي عليه
:)
اسال الله ان يعوضني ويعوضك عن كل مكروه يارب
شكرا ليكي يا توتا

Sat Dec 23, 08:30:00 PM GMT+2  
Blogger micheal mohsen said...

أتمني لكي السعادة و التوفيق في حياتك

Sat Dec 23, 08:30:00 PM GMT+2  
Blogger smraa alnil said...

الغريب

اعتقد يا غريب ان مش انا الوحيدة اللي عريت نفسي وحقيقتي ادامكم
اعتقد ان في ناس تانية بتتكلم عن نفسها وتجارب هي عاشتها بصراحة متناهية
كلنا ملاينين بلاوي انت صح
بس ممكن مش بيقولوها لان ممكن مش يبقي في افادة لغيرهم
عكس تجربتي
انا مش هنكر اني احاينا ببص ورايا واتحسر واقول ليه كدة
كان هيحصل ايه لو ........ وارجع استغفر ربنا واقول الحمد لله وارسم غصب عني ابتسامة رضا بالمقسوم ليا
بالنسبة للخوف الاجتماعي فباي حال انا عليه انا فخورة بنفسي والحمد لله اني صريحة يعني حياتي دي مش غامضة ولا سر يعني
دي ظروف عادية بتحصل لكل واحد فينا في اليوم مليون مرة بس الشاطراللي يتعلم منها
وشكرا ليك بجد

___________________________________

موج البحر

انا عارفة اني ولله الحمد قوية وقوية جدا كمان ومش بقي هل ان حد تحداني او يقهرني او يكسرني
دي بقت من المستحيلات عندي
والي انتي قلتي عليه اني احسن من ابناء عاشوا في حضن امهم وابوهم دي برضه رالة ليهم
اللي عايز يبقي حاجة ممكن يكون حاجة
وبالنسبة للاباء اللي في حضنهم ولادهم
لازم يتعلموا ان في جانب خفي جوة ولادهم لازم اخدوا بالهم منه
لازم يخافوا عليهم من اي لحظة حزن ويراعيهم عشان مش يحسوا بالغربة واليتم

بالنسبة لامي انا عارفة انها بتدور عليا وانا كمان بدور عليها
لكن بالنسبة لامي في حاجات كتير زي الامل اتبرته امي والحب وبلدي والحنان اعتبرتهم امي من ناحية غريبة شوية
عشان كدة سالت تفتكري ان امي بتدور عليا
والدتي طيبة اوي اوي اوي
ومش باديها حاجة ولا حول ولا قوة الا بالله بيها
والحمد لله فرج ربنا قريب اوي ان شاء الله

Sat Dec 23, 08:30:00 PM GMT+2  
Blogger smraa alnil said...

بين الامل واليأس

دخلت غلط ليه بس انت مش دخلت برجلك اليمين
وبعدين ميت مرة اقولك اقاع الشوز بتاعك وانت داخل
الواحد تعبان ي النضافة طول اليوم
هههههههه
كل واحد منا عاش ظروف مشابهة مش لازم تكون مطابقة ويكون عندك ظروف مماثلة
ممكن تكون اتعرضت مرة لضرب او اهانة او حرمان من شئ
والحاجت الصغيرة دي لازم الواحد يراعيها
بالنسبة للتعويض عن الحرمان فدي حاجة في علم الله
لعل الله مش كاتبلي الخير في الدنيا ومحوشهولي للاخرة

وبعدين مش عارف تتكلم ليه
القط بتاعي اكل لسانك
ههههههههههه
انت بجد لا هايف ولا حزين ولا بتضحك علي نفسك ولا حاجة
انا كمان بحس اني هايفة اوي ادام مشاكل بسمعها كل يوم
واقول انا فين من دة كله
علي الاقل انا ليا بيت يلمني
وبعدين ايه سمعت دي ان دمي خفيف
دة الواقع يا بابا اللي المفروض تكون مؤمن بيه
حاجة كدةبديهية
هههههههه
بالنسبة للحاجة الجديدة بقي فدي مش اوعدك بيها دي حسب الحالة المزاجية
وابقي خد القبعه كل شوية
مش كل مرة تطلع بحجتها
ابي اقلعها يا سيدي قبل ما تيجي


سلامة ضهرك
هههههههههههه

___________________________________

مودي راب


استني كدة بقي
انت بتغني بجد
طب ما تسمعنا حاجة كدة لطلب في ثوبه الجديد

اولا مش تشكرني انا بجد اعجبت بمدونتك
ثانيا انا اللي بشكرك علي زيارتك ليا وتعليقك الجميل دة
وبعدين اتخذ الاسلوب الغير مباشر ليه مش في احسن من الدوغري
وبعدين قصتي مش مروعة للدرجة دي يعني
اومال تعمل ايه بقي في طفل شاف امه وابوه بيموته ادامه ومحدش من اهله عايز ياخدوا
والشارع هو مصيره
ولا طفل ابوه وامه رمينه وبيقعد يذاكر علي عامود نور في الشارع
يعني ادنيا مليانة بلاوي كتير بس احنا نتعظ منها ونقول الحمد لله علي اللي احنا فيه
وبالنسبة لصاحبك خلي بس يشرب ديو ويجمد قلبه ويدخل يقرا البوست بتاعي تاني

انا قررت اني مش انا اللي الاقي الحب
لاني كنت في الاول انا اللي بجري وراه وعايزاه
لكن اتعلمت ان هو وقت ما هيجيني هيجتاحني دون ابق انذار
يعني هو اللي هيلاقيني مش انا
وانا فعلا مش بحب التثبيت والكلام اللي يواسي دة
لانه مش يلاكل عيش ومش يؤدي الي حل لمشاكلنا
احنا عايزين نفكر ونقول صح ونتعلم

اللهم امين

ما تغنيلنا حاجة بقي

Sat Dec 23, 08:30:00 PM GMT+2  
Blogger smraa alnil said...

مايكل محسن

شرا علي زيارتك ليا وعل تعليقك الرقيق دة وربنا يتقبل منك يارب
بشكرك مرة تانية

Sat Dec 23, 08:35:00 PM GMT+2  
Blogger بين الأمل و اليأس said...

والله نظيفه حتى لسه مستحمي وبتلمع اهه
:((
وبعدين مين قلك يابنتي اننا كنت بنضرب هو حد نشرها على النت ولا حاجه
دنا الحمد لله ولا مره انضربت طول عمري حتى بالاماره اخر مره انضربت قبل نتيجة الثانويه العامه بيومين
ومن بعديها الحمد لله كان كله تهزيء يعني ارحم من الاول وعلى راي اودي عادي بقه
وبعدين الدم الخفيف بيبان على وزن الجواب بيبان من عنوانه
وبعدين خففي شرب الميه بقه عشان يبقه دم نقي وصافي
وياستي ربنا يفرجها وتروق الغزاله كدا وتبق فايقه
وربنا يسترها

Sat Dec 23, 09:16:00 PM GMT+2  
Blogger smraa alnil said...

وكمان عاوز تموتني من العطش
دة انت قلبك قاسى

اقولك علي حاجة
ربنا يسترها
انت بس ادعيلي

Sat Dec 23, 09:39:00 PM GMT+2  
Anonymous Anonymous said...

انت جبل يا سمراء
ربنا يعينك و يوفقك

بجد انت شجاعة فعلا علشان تكتبى حياتك بكل
تفاصيلها بالشكل ده الوحش فيها قبل الحلو

و انا شخصيا أحيك على شجاعتك دى

و اقول لك اذا لم تكن حياتك هكذا فربما كنت شخص اخر

انظرى للأمر انه الضاره النافعه و ليس العكس

اعانك الله و ووفقك
أحد اصدقائك القدامى
الذى له الشرف بمعرفتك و الفخر بصداقتك

Sat Dec 23, 10:40:00 PM GMT+2  
Blogger smraa alnil said...

طارق باشا

ربنا يخليك يارب
وتفضل كدة رافع من معنوياتي
انا مش عارفة ارد عليك ازاي لانك معايا من فترة طويلة وتقريبا عارف مين سمرا
يعني كل اللي هقوله ربنا يخليك ليا ويديم صداقتنا دي يارب علي طول

Sat Dec 23, 10:44:00 PM GMT+2  
Blogger أسوور said...

سمراء

ايميلى
yasminamr6@hotmail.com

مستنية رسالة منك

Sat Dec 23, 11:03:00 PM GMT+2  
Blogger انحلت سيور العربه وسقط المهر من الاعياء said...

يا ه ه ه ه يا سمرا

حر ام عليكى والله
انها الدر اما السو داء
تلك هى حيا تنا
سلسله طويله
من القهر والالم
سلسله
من البحث عن
الحب
والدفء
فنفا جا
با لبر وده
والقسوه
وسنظل نبحث
عن الحب
عن الحنان
تلك الاحا سيس
الضا ئعه
فهل ستنجح رحلة البحث؟

Sat Dec 23, 11:06:00 PM GMT+2  
Blogger Music Gates said...

والله فكره اهو الفترة دي مينفعش فيها غير كدا و اهو حتي نجيب فلوس كتير و ان شاء الله اخلص الثانوية العامه و نخش الكلية و تبقي اخر حلاوة و نشوف في سكتنا حد تاني عايز يهرب

Sat Dec 23, 11:33:00 PM GMT+2  
Blogger albida said...

أنا عيطت!! أقسم بالله أول مرة أقرأ بوست وأنا بعيط بالشكل ده

تعرفى انى حسيت بكلامك أوى بخصوص احتياجك للحضن والأمان وغيرتك من أصحابك وهما بيحكوا عن أهلهم؟ ببساطة لأنى عندى نفس المشكلة!! بس أنتى أحسن منى بميت مرة.. لأنك قدرتى تتكلمى.. أنا بقى بعبى نفسى وبسكت!! بخاف اتكلم مع حد... بكره عبارات الشفقة.. مهما اتكلمت محدش هيفهمنى
أنا اه عايشة مع بابا وماما.. بس أكنى عايشة مع أغراب, ما علينا.. مش هتدخل فى التفاصيل
بس ربنا هو الوحيد اللى عالم ازاى أنى بنام كل يوم معيطة.. ازاى بضحك للناس وأنا بتقطع من جوه.. ازاى لما ببقى مضايقة وعايزة أعيط ادخل أى مكان واقفله على نفسى لحد لما أهدأ!! والله أنا فهماكى ومعجبة بصراحتك وقوتك على مقاومة الظروف دى
بس صدقينى أن ملقيتش الراحة غير عند ربنا.. انا مليش حد أكلمه, لا اصحاب ولا أهل.. جت عليا فترة كنت حاسة أنى هنفجر لحد لما ابتديت افضفض لربنا!! يااااااه.. متتخيليش قد ايه ارتحت والله يا بنتى.. حسيت أنى بكلم واحد عرفنى من زمان أوى.. فاهم كل اللى جوايا من غير ما أقوله. ومن ساعتها واعدت نفسى أنى محكيش حاجة لحد وأنى أحاول أكون عكس الانسانة اللى مفروض تعملها ظروف زى دى
كل دمعة نزلتها بحاول أحولها لبسمة على وش حد تانى.. كل ألم اتئلمته بأحاول أخليه فرح فى قلب حد تانى
فعلا أكتشفت ان السعادة الحقيقية أنك تثبتى نفسك وتحاولى تخلى اللى حواليكى سعدا حتى لو أنتى حزينة

كل ده كلام أنا كتبته.. يا خرابى!! تصدقى قبل ما انشر الكومنت ده فكرت أمسح الحتة بتاعت ماما وبابا؟ بس يالا.. هسبها وخلاص!! مع أنى اول مرة اتكلم
هى الدنيا كده! ربنا يخرجنا منها على خير يا بنتى

قبلاتى وأحضانى
:)
manal

Sun Dec 24, 12:13:00 AM GMT+2  
Anonymous Anonymous said...

ارفعلك قبعتي يا صديقة
ابكيتني


مش بقلك احنا زي بعض كتير

Sun Dec 24, 01:08:00 AM GMT+2  
Blogger Music Gates said...

بعد اذنيك يا انوج انا نفسي اضيف حاجه بعد albida واعلق علي كلاميك
عارفه انا يمكن حياتي الفكرة العامه بتاعته زيكم برضه اني اهلي مش حسين بيا بس الادها من كدا اني اهلي بيعتبروا تفكيري ان تفكير مراهق او انها نزوة و هتعدي انا طلبت من والدي اني اروح لدكتور نفساني تخيلوا رد عليا يقولي احكيلي وانا اساعدك مش قادر يتصور ان المشكله اني لو اتكلمت ممككن يتجرح مني و ممكن امي تتجرح برضه مني مش علشان هائسوا عليهم بس علشان اني هطلع الي جوايا تخيلي لما تبقي شايله الاحساس ده انا بجد بنفجر مع اصحابي ويمكن مش صحابي الاشخاص برضه الواحد لازم يحط قناع السعاده ادامهم بطلع الي جوايا مع الناس الي ميعرفونيش صحابي ال " ؟ " انا جربت زيك اني اشكي لربنا و فعلا كنت برتاح و اي حد كان بيبقي مدايق بقوله يعمل كدا بس تخيلي لما اهليك يكرهوكي في كل حاجه ويخليكي تعملي عكس المطلوب الانسان اوقات بيبقي حزين او مريض او ضعيف لكن اصعب حاجه لما يشوف نفسه وهو بينهار و بيقع و سعيد بس مش سعيد لانه بيقتل نفسه سعيد علشان حقق كونه انه يتمرد و يقول لا انا بحكي للناس حكايتي و هي متعرفنيش علشان هما الي فاهميني كل واحد فينا في الدوامه دي صاحبتيك و زميلك كله عايش كدا و نيجي ادام بعض يقوليك انا كنت كذا كذا علشان ميتفش الناس منه بس نيجي هنا و احنا منعرفش بعض كل واحد عنده هم يقوله تخيلوا البنت ممكن تبقي ضعيفه علشان طبيعة فترية في الانسان لكن لما ولد و يبقي عايش في بيته ضعيف مش خايف بس مكسور اه صوتي خشن و دقني طويله بس من ورا الناس قلبي ضعيف ابتسامه علي شفتي في وش ده و ده و حواجب تمانيات ادام نفسي بجد انا استريحت حبه لما فتفض و بقولكوا فضفضوا علشان متتعبوش وانا طولت اوي الصفحه هتبقي تقيله من كتر الكلام هههه بس عارفين مقدرش مضحكش :) سلاموز`

Sun Dec 24, 05:48:00 AM GMT+2  
Blogger basma saghir said...

اسمحيلي اقلك ان انتي انسانة قوية جدا
لو حد في مكانك كان زمان حاله غير الحال
الي انتي حكيتيه ده بيحصل كتير وكتير جدا بس مش اي حد بيقدر يخرج نفسه من الدوامة..بس انتي قدرتي ودي شجاعة اهنيك عليها
انا مش هقدر اقول اني حاسة بيكي قوي لاني معشتش الي انتي عشتيه بس كلامك قدر يوصلي جزء من الحياة الي كنتي عايشاها
اخر حاجة عايزة اقولهالك ...اوعي تفتكري ان الدنيا مفيهاش حب الحب موجود بس مش ظاهر قوي..دورنا اننا ندور عليه لغاية ما نلاقيه
اتشرفت جدا باني قريتلك

Sun Dec 24, 09:16:00 AM GMT+2  
Blogger مـحـمـد مـفـيـد said...

والله البوست ده لا يحتاج الي تعليق اكثر منه اشاده بلاابداع والجمال المتدفق منه

Sun Dec 24, 10:03:00 AM GMT+2  
Blogger الزعيـمة said...

عزيزتي سمرا

كل انسان بيمر فى حياتة بفترات عصيبة
وبينحرم من حاجات بس ربنا اكيد بيعوضة فى حاجات تانية ومحدش بياخد كل حاجة او بيفقد كل حاجة

لو بصيتي لنفسك من النصف الاخر من الكوب حتلاقي حاجات كتيرة كويسة منها انك اعتمدتي على نفسك وقويتي نفسك وتفوقتي فى دراستك ورغم الحرية الغير مقصوده من الوالدين الا انك كنتي جد وقوية ومحترمه واكيد حققتي ذاتك وربنا حيوفقك قريب بالانسان اليستاهلك

متعرفيش النهارده فية اية وبكرة حيكون ماله

كل البتمناه ليكي انك تكونى قوية كعادتك وخلينا اصحاب وانا اشبعك حنان ههههههههه

الصداقة احيانا بتكون اغلى من الاخوه

ارق تحياتي لك

Sun Dec 24, 10:31:00 AM GMT+2  
Blogger Amr Ahmed said...

انا بصراحة مش عارف ابدا منين

اولا اسمحيلي الومك لان الموضوع علي الرغم من السرد الرائع له

الا انه ممكن كنتي كتبتيه بسرد افضل شوية

علي الرغم من انها مؤلمة الا انها رائع

وهي بلا مبالغة من اروع القصص اللي قريتها بعد غادرة الكاميليا

وده بينبع من كونها حقيقية

ثالثا لكي الفل تحية وتقدير علي شجاعتك وقدرتك علي الافصاح عن الحقيقة

اللي كتير مننا وانا واحد منهم افتقدها شوية وخاصة في مجتمع زي المدونات

وطبعا

لازم احييكي علي مواصلة الحياة بل وتحقيق نجاحات يعجز الكثير ممن يعيشون في ظروف رغدة ان يحققوها

واظن ان ذلك يكفيكي فخرا


وقد يعوضك شئ ما عن ما افتقدتيه

اما بالنسبة لموضوع الحب


فهذا نصيب من عند الله وليس له علاقة بظروف الشخص


المهم بقي بعد الكلام الكبير ده

انتي رائعة وربنا بوفقك وتلاقي الحب الحقيقي

وربنا برضو يجمع شمل الاسرة

مافيش حاجة بعيدة علي ربنا

Sun Dec 24, 04:28:00 PM GMT+2  
Blogger ody911 said...

أولا دى أول زيارة للمدونة بتاعتك سمراء النيل
بجد المدونة فيها روح
وكلماتك جميلة وأحساسك عالى
وتصميمك جميل ياريت نستفيد بجد من إللى كتبتية وهوة الهدف الأساسى من الموضوع إنى كل واحد ياخد بالوا جدا من شريكت حياتوا وفى نفس الوقت أولادوا
شكرا للنصايح الغالية دى


على فكرة أنا كنت ماشى فى الشارع محضنتنيش لية
ههههههههه
بضحك معاكى
يابنتى الدنيا مليانة أسية
وعادى بقة
أودى

Sun Dec 24, 09:04:00 PM GMT+2  
Blogger smraa alnil said...

لجحيم

يا عم لا سوداء ولا حاجة
ما هي بيضا اهي وزي الفل
دة انا حتس بستخدم برسيل
بص هي فعلا حياتنا زي مانت قلت
انا عن نفسي قسمتها
نحن نولد ونبكي ونكبر ونبستم ونضحك فنحب فنتجوز فنموت
وبرضه دي سنة الحياة
بالنسبة لبحث عن الحب فصدقني مش في احسن من ان الحب هو اللي يدور عليك
زي التاكسي بالظبط وقت ما تبقي عايز توقفه مش هتلاقيه
هههههههههه حلو المثال دة
وبالنسبة لسؤالك
فاكيد ممكن ننجح
طول ما في قلبنا ايمان

_________________________________

copa

مش انا قلتلك يا ابني دة اللي ينفع معانا
سيبك انت من الثانوية العامة بتاعتك دي وتعالي كل معايا قرشين حلوين تجهز نفسك بيهم
وتبقي غني بقي وممكن تبقي عضو مجلس شعب
يعني هما اللي معاهم ثانوي يعني
وبعدين احنا ممكن نعمل مشروع ونلم كل الناس دي اهم برضه يستفيدوا
وبعدين روح ذاكر

Sun Dec 24, 09:06:00 PM GMT+2  
Blogger smraa alnil said...

albida

بصي يا منال
اولا انا اسفة بجد انك خليتيك تعيطي بالشكل دة
ثانيا انا والله العظيم مش غيرانه من اصحابي
بس بستغرب بس وببقي فرحانة ليهم بجد
اي نعم بتألم بس صدقيني مش غيرانه
زي ما قلت في الاول كل واحد فينا غربة وعيوب واحزان يا يقدر يكسرها يا هي اللي تكسره
انا معاكي في اللي انتي تقوليه انا اصلا مش بشتكي لحد ودة بيبقي سبب ان في كتير اوي بيفهموني غلط
وبرضه بيبقي معايا ربنا اللي بشتيكيلوا وبيهون عليا بزرع الصبر جوايا
نا بس كنت عايزة اقول للناس خدوا بالكم اوي اوي ودة مثال ادامكم اهو
انا مشكلتي الوحيدة اللي بتضايق الدكاترة فيا حتي وانا طالبة اني كنت علي طول مبتسمة وبضحك
انا زي ما قلت تجربتي زي اي تجربة في الدنيا دي
بس كان لازم الناس تاخد بالها من حاجات كتير اوي
واوعي تندمي علي حاجة قلتيها او حستيها
حبي نفسك كدة بتلقائيتك وباحساسك
وربنا يخليلك بابكي ومامتك ويهديهم للخير اللي ليكي يارب
وربنا يخليكي يا رب


انا مش عارفة اقولك ايه علي الاهداء اللي انت كتبتيه ليا
بجد ربنا يخليكي يارب
مش عرفة اقولك ايه بس شكرا واوي كمان

_________________________________

anonymous

اولا بشكرك
ثانية انا مش عارفة انت مين ولا انتي مين
بس بشكرا مرة تانية

Sun Dec 24, 09:07:00 PM GMT+2  
Blogger smraa alnil said...

copa تاني

بص يا محمد

بالنسبة لاهلك هما مش بيكرهوك هما بس يمكن مش واخدين بالهم منك
بس انت برضه قوي اوي
علي الاقل عايز تبقي نفسك
ودي حاجة حلوة اوي
وصدقني دة شئ طبيعي اننا كلنا نضحك واحنا قلوبنا مكسورة من جوانا
اهلك بيطلبوا منك انك تعمل عكس اللي انت عايزه عشان بيكرهوك
هما بس عايزين مصبحتك ودي طريقتهم في التعامل معاك
وكويس ان والدك حاول من ناحية انه يقربك منه
ليه لا مش تقعد معاه وتقوله علي اللي مدايقك منهم كلهم
مش جايز يفوقوا
ويا سيدي علقة تفوت ولا حد يموت
ههههههههههه
جرب
لازم تجرب
محدش هيعرف الصح والغلط فين الا لما يجرب
وصدقني مش هتخسر
وبعدين انت ارغي زي مانت عايز وفضفض
انا هسميها بعد كدة فضفضة بلوجارية
هههههههههههههه

___________________________________
بيسوو

اهلا وسهلا بيكي في بلوجري الموتاضع
واحب اني انا اللي اشكرك علي زيرتك ليا
وبعدين انا دايما بقول ان الانسان هو اللي بيصنع نفسه من تجاربه
اللي يا تقويه يا تكسره
صدقيني انا بقيت مؤمنة ان الحب مش هدور عليه هو اللي هيجيلي لحد عندي
لاني لما بدور مش بلاقيه زي التاكسي كدة
ههههههههههههه
تحياتي يا قمر وبشكرك مرة تانية

Sun Dec 24, 09:08:00 PM GMT+2  
Blogger smraa alnil said...

محمد مفيد

ربنا يخليك يا محمد وشكرا
والحمد لله ان كلامي عجبك

_________________________________

الزعيمة

الحمد لله عي كل شئ
بجد انا بحس ان ربنا عوضني عن الي انا فيه بحاجات كتير
واالغيب زي ما قلت في علم الله
واكيد طبعا بتمني صحوبيتك
عشان ابقي اتعرف علي حنان
الا هي مين حنان دي
هههههههههههههه
عندك حق انا فعلا ببص للصداقة بنواحي كتير اوي
ربنا يديم المعروف وانوي انتي بس وابقي شوفي مني اللي مش يتشاف

Sun Dec 24, 09:08:00 PM GMT+2  
Blogger smraa alnil said...

عمرو احمد

اولا ابدء من المكان اللي انت عايزه

وبعدين يا عمرو انا كنت في ايه ولا في ايه عشان اكتب بافضل من كدة
ههههههههههه
عامة صدقني الكلام كان بيطلع مني وانا مش عارفة بجد انا بقول ايه
غادة الكاميلية مرة واحدة
اديك قريت قصة غادة عبد السلام
قصدي سمراء الكاميليا
يووووووووووو
مش مهم بقي
الحقيقة لازم تكون جوانا ويبقي عندنا الشجاعه اننا نقولها عشان نقدر نفهم نفسنا
ونفهم اللي حوالينا
مش في احسن من الصراحة حتي بينك وبين نفسك
مش مهم عندي انك تخدع الناس او تنافقهم المهم اانك تكون صريح من جواك لنفسك
وبعدين انت بتحسدي ولا ايه يا عمرو
هههههههههههههههههه
وبالنسبة للحب ونعم بالله
ربك قادر
وسبحانه مقلب القلوب يقلب القلب بين اصابعه
وبنا يسمع منك يارب ويهدي الجميع يارب
شكرا ليك يا عمرو

Sun Dec 24, 09:09:00 PM GMT+2  
Blogger smraa alnil said...

اودي

اولا انا كت بشوف تعليقاتك في مدونات كتير وبصراحة كنت بتغاظ منك اوي
عشان كلمة عادي بقي
لان دي كلمتي اصلا وشعاري في الحياة
علي العموم عادي بقي

واتمني فعلا يكون وصلك الهدف من موضوعي واكون استفدت منه كتير اوي
معلش بقي اصل الدنيا كانت ضلمة ومش كنت شايفاك
وعادي بقي بس المرة دي مني انا مش منك
هههههههه
شكرا ليك وابقي زرني علي طول

Sun Dec 24, 09:13:00 PM GMT+2  
Blogger Ma 3lina said...

samra: rabna ysm7ek 3la my red eyes

yala ماا علينا

as much as i'm sad from ur story which i didnot imagine that u were in this horrible situation , but i/m happy by ur conquers.

u achieved many things that not normal happy people can do , u defeated ur circumstances nd survived to be strong , senstive girl.

i wanna remind u that u huv ur brother i think that ur close to each other now.

nd forget God he's always there for u , maybe not in live but when u pray telling what u feel asking for help it will help u very much

also u must appreciate the presence of ur frnds coz not everyone huv such frnds

i'm happy that u finally tell us ur story nd get what inside to outside

wish u find ur soul mate who can give u all the care u want isa:)

i appercitaed ur words at the end about ur mom nd dad coz whatever happens they r parents nd u huv to obey nd visit them

Sun Dec 24, 09:37:00 PM GMT+2  
Blogger smraa alnil said...

ما علينا


معلش بقي ابقي حطي قطرة لعنيكي
هههههههههه
ربنا ما يجيب زعل يا قمر ولا تشوفي الحزن ابدا
الحمد لله علي كل حاجة حصلت وبتحصل
وفعلا انا بحب اخويا جدا وصحابي جدا جدا
وطبعا انا عارفة ا ربنا معايا ومش سايبني
وان هو بيحبني وابتلاني في الدنيا عشان بيحبني
بتمني انك تستفتيدي وتفيدي من القصة دي
وربنا يخليكي علي زيارتك يا قمر
وربنا يخليكم ليا يارب

Sun Dec 24, 09:52:00 PM GMT+2  
Blogger تعتعة أزهرى said...

ربنا يوفقك يارب الى ما يحب ان يراكى عليه .. اللهم آمين ودا اول سطر احب اكتبه ليا فى اول تعليق فى اول زيارة لمدونتك الجميلة .. موضوع رائع وبجد مبروك عليكى الإحساس الجميل دا لكن .. توظيفه الصحيح احسن كتير من اكتشافه وصدقينى ماذا يفيد الشخص إذا ربح العالم باسره وخسر نفسه ؟؟ .. اتعرفى على نفسك وحاولى بجد يكون مرضاة ربنا فى الأول وفى الآخر ورضاكى عن نفسك واحساسك برضا ربك هو الأول والأخير فى كل شىء .. صدقينى بعد دا كله هيهون .. ربنا يعزك ويوفقك وبجد كلامك أثر فيا كتير .. انا هيكل ثانوية ازهرية .

Sun Dec 24, 11:29:00 PM GMT+2  
Blogger smraa alnil said...

تعتعه

انا لو مش كنت عارفة احساسي وصدقه من جوايا
مش كنت كتبت الكلمتنين دول اللي في البوست
الحمد لله انا مؤمنة بقدر ربنا
انت واضح انك مش فهمت هدف البوست
بس عامة سعيدة باول كومنت ليك عندي واتمني انه مش يكون الاخر
شكرا ليك

Sun Dec 24, 11:40:00 PM GMT+2  
Blogger sherif gharib said...

يااااااااااااه
ده انتى شايله كتير قوى جواكى يا بنتى
اكيد ما ينفعش انى اقولك انك لازم تكونى اقوى من كل ده و الكلام اللى مالهوش معنى ده بس اللى انا ممكن اقولهولك بعد ما فتحتى قلبك قوى كده انك لازم تدورى على اصحابك بس اللى بجد
لان دول هما اللى ممكن يكونوا جنبك الحب ممكن مانلاقيهوش فى حياتنا اللى نادر قوى
انتى انسانه قويه
لانك بالرغم من كل ده لسه واقفه على رجلك و لسه عايشه اكيد فيه حاجات كتير حلوه ماتت جواكى بس الاكيد برده ان لسه فيه حاجات احلى لسه موجوده
حافظى عليها
معلش انا يمكن اكون مش من حقى انى اقولك كده بس بجد و الله انا حسيت انك صاحبتى و حكتلى الموضوع ده يعنى انتى اتكلمتى بمنتهى التفصيل
و انا حاسس كتير قوى بيه
فمش لاقى الكلام اللى اقدر اقوله
تحياتى ليكى
و امنياتى ان تكون بدايه و ليست نهايه

Mon Dec 25, 12:27:00 AM GMT+2  
Blogger Ahmad Hegab said...

على فكره دى اول مره اقرا بوست بالطول دا و مازهقش منه بس دا مش علشان البوست لذيذ و عايز اعرف ايه الى حصل لا دا علشان انتى اتكلمتى عنى و انت مش واخده بالك
انا عندى 23 سنه الا حبه صغيريين بس انا برضه
ربيت نفسي بنفسي

قدرت اميز الصح من الغلط

انا برضه زيك و عايز اقولك على حاجه اوعى تخافى من حاجه صدقنى مافيش حاجه حتحصل اكتر من الى حصل
شكرا على البوست الرائع

Mon Dec 25, 12:28:00 AM GMT+2  
Blogger albida said...

حبيبة قلبى
أنا مش قصدى أنك غيرانة يعنى تتمنلهم حاجة وحشة, بالعكس! أنا بحس زيك كده والله.. أنا أحيانا تبقى صحبتى قاعدة معايا وتقعد تقولى أن ماماتها عملت كذا وكذا معاها امبارح... والله ببقى فرحنالها أوى وبقولها ربنا يخليهالك بس قلبى بيبقى بيتقطع من الحزن على حالى

على فكرة, أنا مرة كنت ماشية مع واحدة صحبتى تعرفنى من زمان وتعرف شوية عن ظروفى.. لقيتها بتسألنى سؤال عجيب أوى!! قليتلى: منال.. هو أنتى بقيتى كده ازاى؟ يعنى بتضحكى وتهزرى على طول معانا على الرغم من اللى بتشوفيه فى البيت!! والله مكنت عارفة أرد أقولها ايه... بس سكت, وفرحت أنى قدرت أخبى عن الناس ومنقلهومش حزنى وشعورى بالألم

يالا!! هييييييه... دنيا
وحدوووووووووه
:) :) :)

manal

Mon Dec 25, 05:11:00 AM GMT+2  
Blogger أميرة said...

يعنى امبارح اقرا مدونة مزمز وانتى النهاردة قاصدين تنكدوا عليا انتوا الاتنين!!!

انا توقفت عند نقط كتير حسيت انها لمستنى اوى واهى برده فرصة للفضفضة لان عمرة مافتحت قلبى زيك كدة انا بحسدك انك قدرتى

اول نقطة دراستك وتحملك المسؤلية
التانية حنينك لطفولة بريئة تجرى وتلعبى

التالتة كلمة قلتيها بجد حسيت انك بتكلمى عنى

أنا ربيت نفسى بنفسى

أنا حيت كدة بجد لو عدينا المواقف والمآسى مش هنبطل كتابة عارفة ان اللى قلتيه دة جزء صغير جدا

الحاجة الوحيدة اللى مش طبيعية بعد كل دة هو خوفك

شايفاكى قوية واللى يتعذب ويعانى فى بداية حياته زينا كدة بيقدر يواجه كل مصاعب الحياة اكتر من اى حد
انتى فعلا بالقوة دى وقدرتى تحققى نفسك
حالك افضل من ناس كتير ماقدروش يقفوا قدام ظروفهم زيك كدة ويميلوا الكفة لمصلحتهم ويحققوا نجاح

وعلى رايك اللى يشوف بلوة غيره

ربنا يوفقك

Mon Dec 25, 06:05:00 AM GMT+2  
Blogger عمر said...

سمراء الجميلة

بيني وبينك كتير مننا حتي لو مش واخدين بالهم ضحية مجتمع مشوش الأفكار وأهل مش عارفين هما عايزين إيه

رغم ان أهلي لم ينفصلوا وعشت معاهم طول عمري في استقرار الا اني كنت حاسس برده ببعض تشابه مع حكايتك في الجوهر وليس في التفصيلات، انا حاسس ان الأهل في بلدنا عموما عندهم مشكلة عويصة، الا وهي تعاملهم مع أولادهم علي انهم غير قادرين علي التفكير والاستقلال، نفس الاستهانة والتسلط اللي كان بيترجم إلي قسوة عند والدك بيترجم عند آباء وأمهات آخرين إلي محاولات دائمة لفرض الآراء والتوجهات علي الأبناء أو الاهتمام الزائد الذي يكون أحيانا مرضي عند آخرين... المجتمع يضعنها في قوالب جاهزة.. لو فكرتي حتلاقي ان كل تصرفاتنا في مصر بتنطلق من مبدأ "المفروض" نعمل ايه مش احنا "عايزين" نعمل ايه.. وبالتالي ده بيوقع الناس في أخطاء عديدة منها زيجات فاشلة أو علاقات اجتماعية مضطربة ويؤدي ذلك الي كثير من الانحرافات والسلوك غير السوي

احنا ينقصنا الكثير من الصراحة في مواجهة النفس.. لكن الحقيقة يا سمراء تلك الصراحة لا تنقصك إطلاقا! اجمل ما فيكي انك وضعتي ايدك علي المشكلة وتحررتي من قيود الفكر والتعبير

اما بالنسبة لموضوع الحنان والأمان.. فلقد اكتشفت مؤخرا ان المصدر الرئيسي للأمان هو قوة الإنسان واعتماده علي نفسه وقدراته في مواجهة أمواج الحياة العاتيه.. صراعات الحياة لا تنتهي وإذا صرنا أقوي منها صارت صراعاتها أجمل ما فيها... عن تجربة شخصية اعتقد ان الواحد يوم ما بيكونش محتاج حد فعلا، هو دة اليوم اللي بيكون مؤهل فيه للدخول في علاقة قوية متزنة

Mon Dec 25, 07:07:00 AM GMT+2  
Blogger 3rby said...

انا عاوز اقولك
رب ضارة نافعة
انا مثلا متدلع جدا
باحس اني ماقدرش اعتمد علي نفسي
حتي لو باعمل واجب درس لو مسالة وقفت قدامي مابفكرش فيها
باسال اي حد
لكن انتي قوية جدا
وصلبة جدا جدا
وعاوز اقولك اني بادمع دلوقتي
مش عارف الاحساس اللي انتي مريتي بيه
عشته دقايق
وعيشته في اولي ثانوي
كانت مدرستي كلها بتكرهني وكنت منطوي ومابحكيش لحد
بس التدوينة ديه اكيد نفعتك كتير
حلو الفضفضة
ومادام قلتي مش عاوزة حد يشتم ابوكي
هامسك نفسي زي ال51 اللي قبلي
وهاقولك بس انك جميلة جدا
وقوية جدا جدا
والبوست ده اثر فيا
لاني عصبي جدا جدا
اقولك علي حاجة
وانا صغير لما كنت باتنرفز كنت باسب الدين(استغفر الله العظيم)بس امي كانت دايما بتضربني
لما بطلت سب دين
بقيت لما اتنرفز اقلع ملط واقعد ارقص
مش عصبي...انا مجنون...بس لوقتي بقيت باتف عالي ينرفزني او اقعد اشتم
بس بعد البوست ده هاحاول ابقي هاااادي
وعلشان كده انا ماسك نفسي

Mon Dec 25, 12:30:00 PM GMT+2  
Blogger nour said...

الاول انا عايزة اقولك انى دخلت البلوج ده لما لقيتك كاتبه فى البروفيل انك بتحبى احلام مستغانمى..انا كمان بحبها اوى
ثانيا رغم كل هذا الوجع اللى انا حاساه دلوقت بعد ما قريت البوست ده مش هقولك يا حرام و معلش و الكلام ده..لانك قوية..جدا..و بنى آدمه محترمة جدا..انا لو مكانك كان زمانى متوفيه:)))
انك بى تتكلمى و تحكى دى شجاعة غير عادية..انا برفع لك القبعة يا انستى العزيزة
و يوم لما يكون ليكى بيت مستقل انا متخيله هيكون عامل ازاى..مليان حب و احترام..بس ابقى اعزمينى على كوباية شربات بقى:))))

Mon Dec 25, 01:09:00 PM GMT+2  
Blogger Yasmine Adel Fouad said...

سمراء النيل

فضفضتك شفافة اوى
بصى انا مش هرتب كلامى و لا هفكر
و مش عارفة انا عايزة اقول ايه
بس عارفة انتى عظيمة
مش علشان استحملتى و كملتى
و بقيتى قدوة و مثل الناس بيقولوا الله عليه و هم مش عارفين اللى جوة
لكن لانك مارضيتيش حد يجرح والدك او والدتك ...

بصى يا سمراء
انا اعرف ناس كتير اهاليم منفصلين
و رغم ان القصص تتشابه الا انها فيها نقط اختلاف
لكن الأكيد ان اللى بيكون ظاهر للمجتمع ان الاولاد هم اللى بيدفعوا التمن

بصى هقولك كام حاجة كده


اولا الطلاق نظام اجتماعى زيه زى الجواز
و لان احنا عايشين حياة من غير ضمانات فاى جواز معرض للفشل
موضوع ضرب والدك لوالدتك ه مش محتاج نقاش
لكن صدقينى احنا فى زمن الاسقاط بمعنى ان والدك مصحيش بقى كده
اكيد فى اسباب خليته كده
ده مش مبرر ده محاولة للاستيعاب لعل الالم يقل نزفه

والدتك كمان كانت بتستحمل و دى نقطة تانيه فيها غلط بس مش نقاشنا برضه


تفتكرى انتو كنتوا اسعد مع والدك ووالدتك ؟
احيانا بيكون تمن الطلاق اقل اليما من وجع البقاء فى بيت مش مستقر


تفتكرى انتى و اخوكى الللى اتكسرتوا
اراهن ان مامتك كمان مكسورة
و بابا كمان اكيد فى حاجة مشروخة بس لانه رجل شرقى مش بيبين

سمراء
انتى خايفه و ده طبيعى
ربما انتى خوفك ليه ابعاد اكثر عمقا من ابعاد خوفى
او انتى خوفك ناتج من تجربة لكن خوفى ناتج من تخيل
انتى محتاجة حضن كلنا محتاجيين
بس كل واحد بطريقته


انا مش بحب اواسى حد لانى مش مؤمنة بالمواساة ... بس انتى يكفيكى صدقك مع نفسك علشان تتأكدى انك هتجتازى المحنة

و لعلمك ربما لو كانت حياتك اكثر سلاسه كنتى بقيتى انسانه سطحية

الحاجة الوحيدة اللى بس احب اقولهالك
و مش حكمة بس علشان بحبك
ما ترميش نفسك فى اول حضن يقابلك
علشان انتى محتاجة غير عن اقتناع حقيقى

و الاهم لو يوم فشلتى فى جوازك - بعد الشر - ما ترجعيش ده لده

عارفة انا نفسى فى ايه دلوقتى
احضنك جامد جدا
و عارفة انك هتحسى ده
بس انا عايزة احضنك فعلا
مش علشان انتى صعبانة عليا يا حرام
بس علشان انا لسه لما بحب حد بيطلع يستاهل و لسه نظرتى صح


كتبتلك ايميلى عندى فى بوست البحر
ضيفينى بقى علشان اعرف احضنك

:)


سلام خاص جدا لاخوكى

Mon Dec 25, 01:53:00 PM GMT+2  
Blogger Yasmine Adel Fouad said...

معلش انى اتأخرت بس النت كان بايظ

Mon Dec 25, 01:54:00 PM GMT+2  
Blogger smraa alnil said...

شريف غريب



شفت بقي انا شايلة اد ايه
طب تعالي ساعدني وشيل عني شوية
ههههههههه
بص انا برغم ان في ناس كتير حواليا بس محدش عنده استعداد انه يشيل هم التاني
بصراحة مش تقصير منهم
لا
العيب مني انا
لاني مش بحب الجأ لحد وعلي طول بكابر حتي في مرضي
بالاضافة ان في كتييييييييييييييييير منهم اوي مش يعرفوا باللي انا فيه
لاني الحمد لله علي طول بضحك
احيانا بحس زي مانت قلت ان في حاجات ماتت واحيانا بقول لا انا زي مانا مش اتغيرت
ولو انا شايفة انه مش من حقك انك تقول كل الكلام دة مش كنت كتبت البوست ا كنت لغيت التعليقات
يا عم قول اللي تقوله انا زي ما قلت صاحبتك
ممكن اكون اكبر منك او اصغر منك
بس بحب اسمع اراء غيري
زهي دي الديموقراطية
ههههههههههههه
لاني هنفذ اللي انا عايزاه برضه
ههههههههه
__________________________________

ahmed_h

انا مش كنت اقصد اجيب سيرتك يا احمد
هههههههه
اضحك صدقني مش في حد واخد منها حاجة
بص كلنا ربينا نفسنا بنفسنا
للاسف مش في حد بيقولنا اعملوا دة او دة
احنا اللي بنختار ونعلم نفسنا
واللي انت قلته اكيد انا عارفاه
انا دايما بقول اكيد اللي جاي اهون واحلي وافضل بكتييييييييييير من اللي فات
ومهما شفت اكيد مش هيجي زي اللي شفته قبل كدة
شكرا ليك انت يا جميل
بس انا بقي طلعت اكبر منك
كنت منمرة عليك
هههههههههههههههههههه
بهزر يا قمر

Mon Dec 25, 05:01:00 PM GMT+2  
Blogger smraa alnil said...

منولتي


سسسسسسسس حييييييييييييييييي
انا فاهمة قصدك يا قمري
بس حبيت اوضح وجهه نظري عشان انتي عارفة بقي النفوس الضعيفة والوحشة
هههههههههههههه
صح والله احنا بنفرح للناس اوي برغم الرعد اللي بيشرخ قلوبنا
ههههههههه علي فكرة السؤال اللي بيستالك دة انتي بقيتي كدة ازاي
بيستالي انا كمان
بس بيتسالي بيقولولي انتي ليه بتضحكي وبتضحكي ازاي وبتضحكينا ازاي
انتي وانتي
علامات استفهام للي يعرف
اما اللي مش يعرف
فبيقولي ايه البت الهايفة دي اللي علي طول تضحك كدة
دي باين عليها ملعه ومش شايلة هم حاجة
اهو دة بقي اللي يزعلني
وعلي رايك
هييييييييييييه دونيا
لا اله الا الله
سسسسسسسس حييييييييييييييييييي
هههههههه
___________________________________

اميرة القلم

ما انا ومزمز مستقصدينك
بس انا عن نفسي مش كنت اقصد يمكن مزمز قاصد
هههههههههه
بالنسبة لحنيني بالطفولة فانا للاسف يا اميرة عايشاها دلوقتي في سني دة :(
شفتي الهيافة بقي
هههههههههههههه
بالعكس انا حاسة خوفي هو دة الشئ الطبيعي بعد كل اللي قلته دة
لاني اصلااتربيت علي الخوف فمش قادرة انتزعه من جوايا
بس صدقيني انا بحاول
وعلي راي المثل ضربوا الاعمي
يلا اهي اي حاجة بقي
هههههههههه ميرسي يا قمر

Mon Dec 25, 05:02:00 PM GMT+2  
Blogger smraa alnil said...

عمر

انت لسة هنا ولا هناك
انا معاك في كل الي قلته بس في اهل تانين مش بيكتفوا كدة وبس لا دة دول كمان
بيفتكروا ان ولادهم عبارة عن جرادل ويجب ملؤها مش مهم بايه
بس اهم لسة صغيرين
انا برغم صراحتي اللي انت بتقول انها لا تنقصني
بس برضه احيانا بخاف منها وبفتقدها كتير اوي
علي الاقل مع اهلي
مش قادرة اكون صريحة معاهم
لما بكون في شغي وتمريني ووسط اصحابي مش بحس بيومي وبحس اني فعلا عايشة
بس عارف هي النقطة اللي لما بكون فيها لوحدي او بمر بمرحلة زعل او تصادفني مشكلة ساعتها بس بحس ان النيا كلها قفل في وشي
بس برجع لربنا وربك هو الي بيفرجها من عنده
بالنسبة بقي للارتباط فانها اتركها بين يدي الله
بس برضه انت هنا ولا هناك
ههههههههههههههه

___________________________________


عربي

صلي علي النبي يا عربي مش كدة خليك انت الكبير
ايه يا ابني دة
طب ايه رايك بقي ان انا فرحان جدا بالبوست دة عشان هيخليك تتغير
وبعدين انت مش مكسوف وانت بتقول انك مدلع
مانت شايفة كمية القهر الي فينا اد ايه
جاي تغيظنا يعني
ههههههههههههههههه
ربنا يديم عليك الغني والراحة يارب ويخليلك اهلك يارب
وبعدين دول مش 51 دول بقم 56 ومش اعتقد ان حد منهم عايز يشتم يا عربي
هههههههههههههههه
معلش خليك انت الكبير
تصدق ان انا برضه من اهم عيوبي الخطيرة اني عصبية جدا جدا جدا جدا
بس مش بشتم زيك كدة بقعد ازعق بصوت عالي ومش بعرف انا بقول ايه
هههههههههههههههههههه
بس ايه تقلع دي عيب يا ولد
امسك نفسك كويس اوي مش عايزين فضايح
وبجد اتعلم انك تمسك اعصابك وتتحكم في انفعلاتك لانها بجد هتسببلك مشاكل كتير اوي لما تكبر

Mon Dec 25, 05:02:00 PM GMT+2  
Blogger smraa alnil said...

نور

اولا بعد الشر عليكي
ان شالله الشر الوحش هو اللي يموت ويتوفي
تقريبا الناس كلها نسيت القبعه عندي في البووست دة ابقوا خدوها بقي ومش تنسوها تاني
ههههههههههههههههههه
اكيد هعزمك يا قمر
ومش علي شربات بس
اصل بصراحة الشربات غالي اوي
ههههههههههههههههه
مش تغلي عليكي حاجة
بس ان شاء الله ربك يرزق
ههههههههههههه

تحياتي

___________________________________

انا حرة

يا بنتي لا عظيمة ولا حاجة
والدي والدي مش عملو زي كتير من الاباء في ان هم يطردواا ولادهم
علي الاقل بابا سمحلي اني اسافر برة مصر لوحدي مرتين
وبيسمحلي اني اروح تمريني اي نعم انا اللي فرضا دة عليهم بس هو لو في دمااغه يمنعني هيمنعني
يعني برضه عمل شئ كويس
بالنسبة للطلاق زي مانتي قلتي
ومقدر علينا وكتوب
وانا احيانا معاه لو استحالت العيشة بينهم
بس اللي انا بتكلم عليه هو العند وحب السيطرة وعم الاحترام بين الطرفين
يعني اعتقد ان لو والدي تنازل شوية وقبل اننا نروح نعيش مع والدتي وهو اللي يصرف اكيد الوضع كان هيتغير
بس الحمد لله علي كل شئ
انا برضه احيانا بعزر والدي نظرا للظروف اللي مر بيها وهو برضه قدر يثبت نفسه في حاجات كتير بس دة برضه لا مبرر ولا شئ قابل للاستيعاب
اما والدتي فزي مانا قلت لا حول ولا قوة الا بالله
طيبة لدرجة بشعه
وبعدين احنا لا كنا مرتاحين وهما مع بعض ولا حتي بعد ما سابوا بعض
بس انا برتاح نفسيل لما بكون عندها
انا بس ببقي محتاجة لحضن جامد اوي لما بتعب من جوايا او مشاكلي تكتر واحس ان رئيسة القسم بتاعتي خانقاني ودي ليها بوست لوحده ان شاء الله
هههههههه
وتاكدي اني لو لا قدر الله
فشلت في جوازي مش هسمح لولادي ان يحصلهم كدة برضه
اضعف الايمان اني انا اللي هحتويهم
وان شاء الله هاكون قادرة علي تربيتهم ومصاريفهم وعنايتهم والمحافظة عليهم بحبي وحناني ليهم
وانا كمان بجد يا ياسمين نفسي احضنك لاني بجد بحس ان انتي فيكي شبه مني ونظرتي مش خيبت
ورربنا يخليكي ليا يارب
عامة انا ضفتك خلاص ومستنياكي
ههههههههههههه
بالنسبة لاخويا
فالواد بصراحة زي القمر
انا مش بغيظك انا بعرفك بس
هههههههههههههههههه

Mon Dec 25, 05:02:00 PM GMT+2  
Blogger كلبوزة لكن سمباتيك said...

الله عليكي رغم طول البوست الا انك بنعومة شدتيني لاخر كلمة
جميل اننا نتكلم و نحكي عن تجارب وجعتنا في حياتنا لان ده زي الغسيل ليها
انت لما خرجتيها من قلبك غسلتيه
و بقى الهم على الورق و انت صافية

اسلوبك عاجبني قوي
و حسيت اني عايزة اخدك في حضني و احضنك حضن اخوي و اقولك انت مش لوحدك
اختك كلبوزة النوزة كونوزة جنبك و انت كمان جنبي و احلى احساس في الدنيا اننا نكون اصدقاء

خالص احترامي و تقديري لقلبك و عقلك و قلمك
و كيبوردك الرقيق


قبلاتشي

Mon Dec 25, 09:25:00 PM GMT+2  
Blogger The Eagles said...

السلام عليكم
سمراء النيل
انتى مصرية لذا فعلتى كل ذالك
انتى لمستى باصابعك التى تودى ان يتضنها احد جراح داخل كل من قراء هذا البوست وجراح من لم يقراه حتى الان
فى البداية انا فعلا كنت اعتقد بنت انا اعرفها قصتها تقريبا لا تختلف عن قصتك ودائما ما اواسيها واحاول انى اهون عليها لانها حسبما قالتلى انها مثلك لم تجد من تحكى له وتشكى له فقررت اننى سوف احاول قدر استطاعتى ان اهون عليها ما بها من جراح
واننى شخصيا لم اسلم من هذا الشعور الصعب الذى احسستى به بل لدى مشاكل فظيعة ايضا مع والدى مثلك لن يمحيها الزمن ابدا
ولكننى دائما ادعى ربى ان يهدنى من امرى رشدا ان كنت على خطا
ان شاء الله هيكون ليا تعليق اخر عندك
المهم قل لا يصيبنا الا ما كتبه الله لنا
وقولى دائما مثلى الحمد لله على كل شىء

اتمنى زيارتك لمدونتى المتواضعة
والسلام..........

Mon Dec 25, 11:08:00 PM GMT+2  
Blogger بين الأمل و اليأس said...

مش عارف بس انا كل شويه ادخلا واعد اقرا واقرا مرة واتنين وتلاته صحيح هي طويله اوي لكن مش عارف معلش عاجبني الاحساس ده اوي احساس بالقوة والثقه رغم الحزن والحنين والحرمان
مش عارف بس انا بجد معجب بان الانسان يصنع من ظروفه وانكساراته درجات سلم يرتقي بها
ولا املك سوى الدعاء لكي في حياتك المستقبليه ان تعوضي مافات
معلش انا رايح اقراها تاني
سلام
وربنا يسترها

Tue Dec 26, 02:09:00 AM GMT+2  
Blogger dead man said...

بصي التدوينة كلها لمست حاجة في قلبي .. بس عارفة أكثر حاجة ايه.. هتستغربي..

الحتة اللى في الاخر اللى قلتي فيها محدش يقولي معلش وبا حرام والكلام ده.. عارفه ليه علشان أنا لما حد بيقولهالي بابتسم واقوله ربنا يخليك.. ومن جوايا بقوله مانا عارف أنه معلش وحرام.. بس هو ده اللى حصل..

عارفة أنا أكثر أمنية في حياتي ايه.. أني أمسك بعدد الناس كلها ورد وأقف في الشارع وكل واحد معدي أديله وردة وأقوله والنبي حبوا بعض وخافو علي بعض..

ماعلينا (f) (f)(f)
دول كام وردة ليكي
وأمانة عليكي لما تيجي تنزلي تشتري مصاصة وتجري وراء العيال الصغيرة أبقى قوليلي علشان أبقى أنزل معاكي

Tue Dec 26, 04:52:00 AM GMT+2  
Blogger LAMIA MAHMOUD said...

لا تعليق
حسيت بكلامك قوي

Tue Dec 26, 08:27:00 AM GMT+2  
Blogger سابرينا said...

طيب ينفع أقول أه ه هه
أنت مش جدعه وبس أنت
the best
في كل حاجه ومع كل حد
حد ثاني كان يعمل مليون غلط ويتحجج بظروفه
يارب يا كريم بحق الأيام المفترجه ديه تلأقي اللي يعاملك كملكه زي ما تستحقي

Tue Dec 26, 02:37:00 PM GMT+2  
Anonymous Anonymous said...

مش هطول فى الكلام
بس هقولك كلمتين
هتكوني ام عظيمة وحنونة وهتسعدى اللى يعرفك


ربنا يسعدك
ويعوضك خير اكثر واكثر



لو محتاجه أخت
انا قلبي مفتوح لك ومش هتندمى ابدًا


نيرفانا

Tue Dec 26, 04:31:00 PM GMT+2  
Anonymous Anonymous said...

سمرا

بأفتخر بمعرفتي بشخصية مثلك اسمحيلي اقولك بانك انسانة رائعة نموذج حي للنجاح والأصرار

سمرا الكل بيمر بتجارب وبإنكسارات عديدة بحياتنا كلنا لينا هموم واحزان واوجاع والام بس انت شيء تاني قدرتي تحطمي كل شيء مشان ثثبتي لنفسك ولأخوك انك أقوى من أحمال القدر

بخبرك بشيء تاني انو الله بيحبك وكل داه هو امتحان من عندوا وانت اجتزتيه بتفوق
سمرا يوم الي تحبي تفضفضي لحد انا هون المسافة ابدا مابتعني اني مو جبنك المسافة مابتعني اني ماراح أحسك
أعتبريني اخت أعتبريني صديقة
راح كون حضن يقيك من الهم والأسى حتى ان اضررت أني روح لمصر ولو كزيارة راح أعملها كرمالك بس مشان تعرفي اني راح كون صديصة تعتمدي عليها

تحياتي

Tue Dec 26, 05:13:00 PM GMT+2  
Blogger Yasmine Adel Fouad said...

سمراء

اخوكى اد ايه طيب
يمكن اغير فكرتى فى الجواز

:)

Tue Dec 26, 07:02:00 PM GMT+2  
Anonymous Anonymous said...

بصي يا سمرا من غير مقدمات كدة أنا قولتلك هاعلق علبوست بتاعك لما أقراة بس بصراحة الناس اللي قبلي كلها قالت و كفت و مخلتليش حاجة أقولها خصوصا و أن الكل يعرف عني أني مش مكلمنجي و أن القلم مش طوع بناني , بس بجد كل واحد من الناس دي قال حاجة من اللي أنا كنت عاوز أقولها و فاكر أني هاوعظك العظة اللي هية و أجيب الديب من ديلة .
بس يمكن فية كام حاجة عايز ادلو بدلوي فيها :
أولا حتة سؤالك أنك مابتبقيش عارفة الغلط من الصح كونك ما أنت علية الأن أكبر دليل أنك تعرفي الصح من الغلط و بعدين حتى لو غلطت فأية يعني ماحنا بني أدمين و طبع البني أدم الخطأ و خير الخطائين التوابين , فأن واحدة في ظروفك تتعلم بالتجربة و أنها تغلط و تتعلم من غلطها و تصلح من نفسها مش عيب و لا حرام .
ثانيا مش هقولك أني مريت بنفس ظروفك لأني مامرتش بس أنت لمست موضوع هام جدا و هو العنف المنزلي , العنف المنزلي منتشر جدا في المجتمع المصري و بدرجات متفاوتة و صدقيني مش بس في المجتمع المصري و لكن في العالم ككل يمكن في مصر نتيجة الظروف الأقتصادية الصعبة و تدني مستوى الوعي ( حتى في أعلى الطبقات العلمية أو الأقتصادية ) فالوضع أسوأ , و خليني أقولك حاجة أنا يمكن وضعي مشابة لعمر شوية رغم أن والدي ووالدتي لم ينفصلا و لكن أنا فعلا ماحستش بالحنان من أي منهما ( هما ماكانوش قاسيين لكن خليني أوصفها بالطريقة دي هم كانوا صارمين و ماكانوش يعرفوا أزاي يعبروا عن مشاعرهم و في نفس الوقت نظرتهم ليا كانت دايما أني عيل و ما عرفش حاجة حتي لحد مابقى عمري 30 سنة و جمعت خبرات في هذة السنين الثلاثين معظم الأشخاص بيحتاجوا لضعف هذة المدة لتجميعها ) , طبعا الصرامة دي كانت بيندرج تحتها حاجات كتيرة زي الأهانة العلنية المستمرة و تسفية أرائي و في بعض الأحيان الضرب القاسي .
عموما ذكرياتي عن طفولتي مش تعيسة أعتقد اني عشت طفولة عادية ( بالمقارنة بالكثيرين ) لم أكن مرفها و لكن في نفس الوقت لم أتعرض لشظف العيش أو للقسوة المفرطة و لكنني في نفس الوقت أفتقدت الحنان الأبوي المتثل في ضمة أو قبلة أو تربيتة على الكتف أو نظرة في العين مع همسة أنا فخور بك I always had to prove myself and my wortheness لاحقا عندما كبرت و أدركت عرفت أن أبي كان دائما يفخر بي و لكن بطريقتة I could feel , see in his eyes even if he wouldn’t say or on the surface sometimes he would announce his disapproval but I could see in his eyes that he was proud of what I was doing and who I’m and what I’ve come to be , even on his bed of death he never really said directly but I felt in his voice despite the thousands of miles separating us , the following day he died .
سمراء أنا فخور بك و تأكدي أنك في يوم ما ستكونين في مثل عمري أنسانة ناجة في حياتك تشاركين حياتك مع شخص يعوضك عن كل ذلك و تنظرين من فوق كتفك على الماضي و تبتسمين و تفكرين في سرك ياة يالها من رحلة ثم تعودين الي الحاضر لتضمي أبناءك لصدرك و لتخبرينهم كم تحبينهم و كم هم متميزون .

Tue Dec 26, 08:13:00 PM GMT+2  
Anonymous Anonymous said...

في حاجة نسيت أقولها عندك مليون حق في رفضك أهانة أبوك و أهلك لأنهم في الأخر أهلك و الأنسان مالهوش أختيار في أهلة و في نفس الوقت أنا ممكن أقول اللي أنا عايزة عليهم بس ماسمحش لغريب يمس حتى شعرة من شعرهم .

Tue Dec 26, 08:16:00 PM GMT+2  
Anonymous Anonymous said...

محدش كان ح يعرف ينجح زي ما انتي نجحتي يا سمرا
ماشاء الله عليكي
والله يا ريت كل اب و ام و كل ابن و بنت يتعلموا الدرس

و بعدين يا عم انت اوعي تكون بتلعب كاراتيه و حتضرب لاااا انا رهيفة خاااالص و عندي امتحان و مش قادرة و انتي عارفة الباقي بقي

سلامي يا احلي سمرا

Tue Dec 26, 09:17:00 PM GMT+2  
Blogger مُصْعَب إِبْرَاهِيم said...

أنا متأكد إن في أضعاف اللي قلتيه،
إحساسك وسط السطور بيقول لي كده

أكثر أنواع الغربة قسوة هي الغربة بين الأهل، ومش هأقول لك اسألي مجرب، لإنك مجربة وأكتر مني كمان

أنا عاوز أقول كلام كتير، بس مش عارف أقوله، ومعتمد على إنك حاسة بيه.. اتفقنا؟


أنا عاوز أتأسف لك كمان إني ما قريتش التدوينة لما انتي بعتيلي اللينك علشان ما كنتش قادر أعمل أي حاجة، وأول ما دخلت على النت النهاردة دخلت قريتها وعلقت


لو الدنيا مليانة ناس قلبها أبيض كده كان هيبقى حالها غير كده خالص

أنا مش لاقي حاجة تاني أقولها ولا أملك الآن إلا الصمت، لكن إحساسي أكتر من كده بكتير

Tue Dec 26, 09:53:00 PM GMT+2  
Blogger مُزمُز said...

بصي بقى مش هاعلق على البوست مع إني كان فيه كلمتين مهمين عايز أقولهم

أنا بس هاقوللك
إيه التعلقيات دي كلها يا عم خلاص بقيتي مشهورة ومحدش قدك وبكرة تيجي في العاشرة مساء وتتغري وتبطلي تعلقي عالمدونات الغلبانة
إش إش
أنا بنق على فكرة ونيتي مش صافية خالص
يعني خدي بالك ممكن بكرة الصبح تلاقي المدونة ولعت من كتر أري عليها وعلى التعليقات الكتيييير دي
وبما إني لسه عيل صغير وببص عى اللي ف إيد غيري مضطر أغير منك
بس أنا ماليش دعواااااه
عايز سبعين تعليق أنا كماااااااااان
واااااااااء
واااااااااء
إشمعنى إنتيييييييييي
وااااااااء

Tue Dec 26, 10:02:00 PM GMT+2  
Blogger همس الليل said...

من غير كلام كتير وانا اكتر واحده تعرف يعنى ايه مش عايزه كلمه يا حرام او اى مشاعر شفقه
انا مريت بالحاله دى وكتبت موضوع فى البلوج بتاعى عنها لو تحبى تقريها هتعرفى انك مش لوحدك اللى حزينه يمكن انتى احسن منى لانك نجحتى فى دراستك وسط كل الفشل دا
انا يمكن حظى اوحش لانى تعبت وتوهت فى الحياه للاسف
اتعزبت اوى واتصدمت ومليش الا ربنا الحمد لله على كل شىء
************************************************************************
http://cat-alex.blogspot.com/2006/10/blog-post_13.html#links

Tue Dec 26, 10:17:00 PM GMT+2  
Blogger Elmesaharati said...

live your life as it is ,and try to get the best out of it
greetings

Tue Dec 26, 11:28:00 PM GMT+2  
Anonymous Anonymous said...

عيونك
دنيتين نونو
وسحر الليل
ومكنونه..
تهون أيامي دي بحالها
وانت
عينيكي ما يهونوا
بحبك حبي بيلاقي
ف برك
دنيته..
وكونه..
ومهماً كان في ناس بتخون
عيونك
ناس ما بيخونوا
بحبك
قلبي مش خايف
لا من أحزان
ولا دنيا
وأنا معاكي
مافيش أحزان
هتكسرني
مافيش دنيا
هتقدرني
ماليش غيرك
دروب تانية

عيونك هي
أوطاني..
وعنواني..
أنا ف قلبك
هنا قاعد
ومتربع
بادوق الشهد من روحك
ولم أشبع
وأسافر جوه أحلامك
ولم أرجع
مانا الدم
اللي فـ عروقك
وأنا حلمك..
وأنا شوقك..
وأنا عنيكي..
ساعة حتى..
مابتدمع
فـ دمعاتك
وأناتك
وفـ زعيقك..
وفـ سكاتك
بكون كلمة..
ولم تطلع
مانا أول حكاياتك
وأنا آخر نهاياتك
وأنا قلبي
ماهوش ممكن
يسيبك يوم
ولا يودع.
فـ أوراقك..
هتلقيني
أنا حروفك
وأنا خطك
أنا الهامش
وشخبطتك
وأنا خوفك
ولخبطتك
ساعة ما عنيكي
بتشوفني
وتعمل قال
ماتعرفني
بكون برضه
فـ سعبطتك
و فـ مرايتك
ومكياجك
ومحفظتك
وشنطة ايد على كتفك
وأكون حرفين على صدرك
وأكون توكة على شعرك
وأكون حسناية..
فـ خدودك
وأكون آخر مدى حدودك
اشبك ايدي..
في ايديكي
واعديكي
أشوف أحلامي
فـ عنيكي
بتتحقق
أآمن بيكي
وأصدق
بإنك
بنت مش ممكن
فـ يوم تاني
هتتكرر
وإنك
قلب بيزقزق
وضحكة فـ ليلي
بتنور
ومهما الشعر
بيصور
وبيسافر في كل مكان
بلاقي الشعر قدامك
ولد خيبان

Wed Dec 27, 12:34:00 AM GMT+2  
Anonymous Anonymous said...

ana msh me7tag a2ollek ana meen
ana wa7ed geh ye2ool kelmeteen
yemken yedawy elqalb el 7azeen

ana

Wed Dec 27, 12:38:00 AM GMT+2  
Anonymous Anonymous said...

te2dary tenadeeeny (walad khayban)

Wed Dec 27, 12:39:00 AM GMT+2  
Blogger elkamhawi said...

اية ده يا بنتى انا جيت قريت البوست ده كذا مرة وكنت شوية اقراه وامشى ومش عارف ارد اقول اية ..بس تصدقى انى كمان مش حافظ جدول الضرب
ردى على ميلى بعد العيد بس هيكونو على اسطوانات ى فى دى يعنى السى دى رووم عندك لازم يكون دى فى دى

Wed Dec 27, 07:29:00 AM GMT+2  
Blogger el2ahwagi said...

kolena gowana tefl...webnekbar wensheekh lama neseeb eltefl da yetkhene2...

law makansh leeki forsa te3eeshi tofooltik ( w da 7aal naas keteer ) matebkhaleesh 3ala nafsik ennik te3eesheeha delwa2ti beroo7ik...

wade7 en iradtik qaweya w 2odamik 3omr taweel 3ashan tedammadi feeh geraa7 el madi...!

Wed Dec 27, 08:28:00 AM GMT+2  
Blogger bagabigo said...

سمراء بجد احساسك وهمى و بجد احيكى لأنى بجد بحب البنات القوية و انتى قوية حتى لو كنتى بتستمدى القوة دى من ضعف او من خوف ساعات خوفنا هو بيبقى مصدر قوتنا

Wed Dec 27, 11:44:00 AM GMT+2  
Blogger karim adel said...

happy new year

Wed Dec 27, 02:37:00 PM GMT+2  
Anonymous Anonymous said...

اختي الكريمة
كان الله في عونك وأظنه ابتلاء منه وسيثيبك الله عليه فعليك حمده وشكره
واشكرك علي كلماتك وان كنتي تبحثي عن حضن فابحثي عنه
عمن يحبك
انه الله
وهو يعلم حالك
وجزاكي الله خيرا

Wed Dec 27, 06:18:00 PM GMT+2  
Blogger smraa alnil said...

ايه التعليقات دي
طب بصوا بقي عشان ننجز


ايمن فاروق
انا عارفة انك مش عارف تتكلم وترد علي البوست
القطة كلت لسانك ولا ايه
وصدقني دة شرف ليا انا اني اكون عرفاك انت وشهد
وبعدين ما انا بتكلم اهو

_________________________________

كللوزة النوزة كونوزة

معلش بقي انا عارفة ان البوست طويل بس عادي بقي
وانا فعلا بتمني انك تخديني في حضنك
واكيد برضه هكون جنبك وقت ما تحتاجيني
انتي بس قولي جزر وهتلقيني بقولك شبيك لبيك
ربنا يخليكي ليا يا كلبوزتي

Thu Dec 28, 01:16:00 AM GMT+2  
Blogger smraa alnil said...

eagles

اكلنا عندنا مشاكل ما يعلم بيها الا الله
بس الشاطر اللي يتعلم مت تجاربه ويفيد بيها غيره
وصدقني انت لو قريت التعليقات دي كلها هتلاقينا لنا بنعاني من نفس المشكلة تقريبا
اتاكد اني مش لوحدي
وصدقني دايما بقول الحمد لله
شكرا
___________________________________

بين الامل والياس


يا عم انت غاوي نكد
كل شوية تخش تقراه وتطلع تاني
وربنا يتقبل منك الدعاء بس تكون متوضي لو سمحت
روح بقي اقراه تاني
___________________________________

dead man

عندك حق اصل الواحد شبع من حرام وممعلش
عملت لينا ايه حرام دي ومعلش
لاهي ريحتنا ولا داوت جروحنا

ايه رايك بقي اني انا كمان عايزة اجي اوزع معاك ورد
دة احنا هنكسب كتير خصوصا في اشارات المرور

دول 3 وردات
خلاص اول ما هعمل كدة هصفرلك علي طول

Thu Dec 28, 01:17:00 AM GMT+2  
Blogger smraa alnil said...

لميا محمود

شكرا ليكي علي زيارتك
ودي اهم حاجة انك تحسي بيا

___________________________________

صابرينا

ربنا يجبر بخاطرك يا رافعه من معنواياتي
ويارب يتقبل دعوتك قادر يا كريم
اللهم امين
شكرا ليكي يا عسولة

___________________________________

نيرفانا

تفتكري اني هكون زي ما انتي قلتلي عليا كدة
انا فعلا بتمني اني مش اخلي اي حد مهما كانت صفته انه يتجرح او يم بظروف زي اللي انا مريت بيها
وربنا يخليكي يارب
كلكم بجد فعلا اخواتي
وصدقيني مش هندم ابدا
شكرا يا نيرفانا

___________________________________


ليندا


بقالك فترة مش بشوفك
وانا فعلا اللي بفتخر انك جيتي زورتيني وقريتي البوست دة وعلقتي كمان
انا بس نفسي انك تنزلي مصر عشان اشوفك وبس
وانا بعرف نك فعلا ونعم الصديقة
شايلاكي للتقيلة

هههههههه

Thu Dec 28, 01:18:00 AM GMT+2  
Blogger smraa alnil said...

انا حرة

اخويا في ليلة الكريسماس هيتم ال 24


ها ينفع

ههههههههههههه
__________________________________

ironcopra

بص انت بقي من غير مقدمات كدة

انت كنت فين يا بيه الفترة اللي فاتت دي كلها
اي كانت الكلمة اللي انت هتقولها اكيد هيبقي ليها اثر في نفسي
انا مش اقصد خطأ في حاجة مش كويسة
انا اقصد تصرفات بتحصل وكلام بيدب مني مش ببقي عارفة دة صح ولا غلط
شغلي في حاجا كتير اوي مش ببقي عارفة هي صح ولا غلط
بس انت صح
لازم فعلا اجرب الغلط عشان اعرف الصح بنفسي
بس ادعيلي اني مش ابقي حمارة واكرر الغلط تاني
هههههههههههههههه
بالنسبة للعنف المنزلي فحدث ولا حرج
وانت اتكلمت فيه فمش هرد
المشكلة اللي عندك دي المشكلة الاغلب في البيوت وصدقني مش المصرية بس لا دة دي كمان في البيوت العربية
انا برغم مشاكلي بس بيوصلني من الغريب ان بابا فخور بيا جدا
بتمني حلمك دة يحصلي بس كله بامر الله
وبعدين مش تتاخر تاني
فاهم ولا

Thu Dec 28, 01:19:00 AM GMT+2  
Blogger smraa alnil said...

ايبي


صدقيني في كتير انوا هينجحوا ويبقوا احسن مني كمان
وبالنسبة للدرس انا عشان كدة كتبت الوست دة
كاراتيه ايه يا بنتي فال الله ولا فالك
احنا برضه بتوع الحاجات العنيفة دي
لالالالالالالالالالالالا

انا بلعب سومو ياباني
هههههههههههههه

تسلملي زيارتك يا ايبي
__________________________________

مصعب

اكيد جوانا حاجات مهما وصلت صراحتنا وقوتنا مش هنقدر نقولها
صح لسانك
اما بالنسبة للغربة فكلنا هذا الرجل
وبعدين مش تتاسف انا عارفة اان انت كنت مشغول
التمس لاخيك عذرا
وصدقني انا عارف احساسك ايه وحاسة باللي انت عايز تقوله

Thu Dec 28, 01:19:00 AM GMT+2  
Blogger smraa alnil said...

مزمز

يا لهوووووووووووووووووووي

ايه الحقد الطبقي دة
بس انا بقي عايز الكلمتين المهمين دول عشان مش بتوعنا وعايزين نرجعهم
وبعدين يا مزمز يا خويا دي ضريبة الشهرة
بس احنا لازم نتواضع
واتعامل مع عامة الشعب
وبعدين انت اللي جيت متاخر عشان كدة لقيتهم كتير
انما لو جيت بدري هتلاقيهم يا دوب عشرين كدة ولا حاجة
وبعدين اللي يشرب من المدونلات لازم يرجعلها تاني
وبعدين نضفوا نفسكم من جوة بقي بلاش السواد المهبب اللي جواكم دة
هههههههههههههههههه
غير مني وابقي فكرني اسلفك شوية تعليقات
انا حسة ان دي اخر مرة هتجيني تعليقات بالشكل دة اصلا
ماليش دعوي انا بقي اللي هعيط

يا ساتر علي الحقدد

Thu Dec 28, 01:20:00 AM GMT+2  
Blogger smraa alnil said...

همس اليل

بصي انا قريت البوست اللي انتي بعتيه
واتالمت جدا جدا وحسيت بيكي اوي
علي فكرة انا قعدت فترة زيك كدة
بتلذذ بفشلي عشان عارفة ان دة ممكن يخليهم يفوقوا
بس صدقيني اكتشفت في الاخر ان الخاسر الوحيد هو انا مش حد تاني
اتي لسة مش تايهة جايز الدنيا تاخد وتهبدك ميت الف هبدة وهبدة
بس في الاخر هتقفي وتثبتي نفسك
هتنجحي ليكي وهتفشلي برضه ليكي
ربنا سبحانه وتعالي مش هيرضي باللي انتي فيه برغم انه هو الوحيد اللي لينا
لازم يا همس تقومي وتفوقي وتنفضي عن نفسك كل الفشل اللي انتي قد تكوني تعمدتييه او بيبقي غصب عنك
يمكن انا مش عارفة ايه هي ابعاد الموضوع بس اي كان لازم تقولي انا هنا
وصدقيني مش في حد هيكون معاكي غير ربنا
يعني مش تاخديها حجة وتقولي اصلي لوحدي
انتي معاكي الاقوي
واكيد ان شاء الله هيبقي لينا كلام تاني

Thu Dec 28, 01:20:00 AM GMT+2  
Blogger smraa alnil said...

المسحراتي

belive me i`m living my life as it is
and i`m so happy
thx for ur sweet comment
hope to visit me again

___________________________________


Anonymous

طب مش تعرفني بجد مين صاحب الكلام الحلو دة
والله يا ابني اديتني امل وكلامك حلو اوي


مانا أول حكاياتك
وأنا آخر نهاياتك


مانا أول حكاياتك
وأنا آخر نهاياتك
وأنا قلبي
ماهوش ممكن
يسيبك يوم
ولا يودع.
فـ أوراقك..
هتلقيني
أنا حروفك
وأنا خطك
أنا الهامش
وشخبطتك
وأنا خوفك
ولخبطتك

وبعدين انا مش اعرف اي ولد خيبان
كل الي اعرفهم شطار

عامة انا بجد مش عارفاك
بس مبسوطة بكلامك اوي كفاية انه رسم ابتسامة عيل وشي
شكرا ليك جدا

Thu Dec 28, 01:20:00 AM GMT+2  
Blogger smraa alnil said...

القمحاوي

يا فقري السي دي روم مش دي في دي
قريت فيها
حتي انت كمان مش حافظ جدول الضرب
وبعدين هو انت كمان غاوي نكد
اقرا يا عم براحتك تاني
___________________________________

القهوجيي

انت كدة جبت المفيد
انا فعلا عايشة طفولتي بكل معاني الكلمة في المرحلة دي
لكن مسالة العمر الطوييييييييل دي
فدي بقي في علم الغيب
شكرا علي زيارتك ليه
بس هات معاك اتنين شاي خمسينة وصلحوه

________________________________

bagabigo

انتي اللي وهمية
ربنا يخليكي يارب
بس الناس كدة هتفهمك غلط وتقول عليااني قوية وعندي عضلات وهتطفشي مننا الزباين
صح لسانك ان ضعفنا بيبقي قوتنا
بس الخوف برضه جوانا
تحياتي
___________________________________

empire

وانت من اهله؟؟؟؟؟
قصدي هابي نيو يير فور يو تو
ههههههه

___________________________________

نوهيل

الحمد لله علي كل شئ
وانا عارفة ان انا مش ليا غير ربنا سبحانه وتعالي
بس دعواتك ليا
شكرا علي الزيارة

Thu Dec 28, 01:21:00 AM GMT+2  
Blogger Tamer Nabil Moussa said...

الظروف هيا الظروف فى كل وقت وفى مكان لكن الاحداث والاشخاص تخلف من قصة الى اخرى

اهم حاجة اننا نعرف ونتعلم ونعيش حياتنا ولا نترك الظروف تحكم فينا

وانا مبسوط بيكى لانك كنت اقوى من الظروف

تحياتى

Thu Dec 28, 09:57:00 AM GMT+2  
Blogger وجع دماغ said...

لا حقولك معلش ولا حاجة
حقولك انا أتوجعت أوى
منك لله
انا فعلا مش عارف أكتبلك أيه
أنتى قلتى كل حاجة

Thu Dec 28, 03:48:00 PM GMT+2  
Blogger smraa alnil said...

تامر

اولا وقبل اي حاجة انت كنت فين الفترة اليل فاتت دي كلها
انا عارفة ان الظروف بتتشابه مع الكتير بس بتختلف الشخصيات والاماكن والزمن
بس يلا اهو كل بيعدي واهو اي حاجة بقي


كنت فين سيادتك بقي

__________________________________-

وجع دماغ

ازيك يا احمد
مش تستغرب انا عرفت اسمك ازاي مش تنسي اننا كنا اسبيسين في الاول
المهم
انت بتدعي عليا ليه بقي
ههههههههههه
وانا اسفة بجد ان كنت وجعتك
انا مش كنت اقصد
ويا سيدي وقت ما تعرف عايز تكتب ايه ابقي تعالي اكتب
انا مستنية
تحياتي

Thu Dec 28, 04:43:00 PM GMT+2  
Blogger Adel said...

انجى يا ويكا منك لله انا ما قدرتش اكمل قراية بس حبيت اعلق واطمنك على ولنا لقاء وابقى ابعتى لي ايميلات من فضلك

Thu Dec 28, 06:13:00 PM GMT+2  
Blogger smraa alnil said...

ابيه عادل
هو ليه كل اللي يخش يدعي عليا
ههههههه
انا ذنبي ايه بس
وبعدين لا من فضلك كمل قراية
هو انت لسة شفت حاجة
دة لسة النكد جاي
هههههههه
الحمد لله انك طمنتني عليك بجد كنت قلقلانة عليك اوي
واكيد طبعا ههريك ايميلات
سلامي وخلي بالك من نفسك
ومن اللي بالي بالك

Thu Dec 28, 06:38:00 PM GMT+2  
Anonymous Anonymous said...

أنا فهمت أنتي قصدك أية يا سمرا , مافهمتش حاجة وحشة لا سمح اللة و هو دة اللي قصدت بة أننا بنتعلم من أخطاءنا بس برضة حتى في الكبائر ان اللة غفور رحيم و باب التوبة دائما مفتوح ( دة بفرض حدوث الكبائر يعني ) .
و بعدين من متابعتي لكتاباتك واضح أنك عرفة الصح من الغلط و عندك ضمير صاحي و أوضح دليل على كدة حيرتك و تساؤلاتك اللي انا باعملة دة صح ولا خطأ ما يسالش السؤال دة الا شخص عندة ضمير و بيقيم وزن للصح و الخطأ و الحلال و الحرام , كابيش ؟؟
طبعا العنف المنزلي و أفتقاد الحنان في بيت الأهل أو على الأقل عدم قدرة الأهل على تغبيرهم عن حبهم لأطفالهم أو أعتبارهم أن دة رفاهية زايدة عن الحد أو هتطلع العيال فرافير أو مايصيين , دة موجود في كل بيت بدرجات متفاوتة .
بالنسبة للتأخير و اللة أنا شرحت ظروفي قبل كدة في تعليق سابق في مكان ما بس ومالة أشرحها تاني مانا مدرس و المدرسين غاويين يتكلموا كتير .
هي بس كل الحكاية أن دة موسم الأعياد هنا و دة مناسبة مهمة بيمتد الأحتفال بها من اليوم التالي لعيد الشكر غالبا بيكون 25 نوفمبر حتى اليوم الأول من السنة الجديدة و طبعا بأة شوبنج و ما شوبنج , انا و زوجتي عن نفسنا مابنعملش شوبنج لنفسنا في الموسم دة لأن الأسعار زي مابيعملوا في مصر بتيقى غالية نار , ثانيا أحنا مابنحتفلش بالكريسماس , بس عائلة زوجتي و أصدقائها و أصدقائي و زمايلها في الشغل و زمايلي بيحتفلوا بة فبنخرج نشتريلهم هدايا , ثالثا حيث أننا مفتقدين الجو الأحتفالي المصاحب لأعيادنا الموجود غالبا في مصر و الدول العربية و الأسلامية فبنعوضة بالأحساس بالجو الأحتفالي خلال موسم الأعياد هنا . بس خلاص .

Thu Dec 28, 07:29:00 PM GMT+2  
Anonymous Anonymous said...

هاهاهاهاهاه
التعليق بتاعي كان رقم 99 من غير شرطة ميدان لبنان - تحرير بشرطة ميدان لبنان - عتبة .
طب خليني أقفل المية بأة .

Thu Dec 28, 07:31:00 PM GMT+2  
Blogger الحصان الأسود said...

كل سنة وانتي طيبة

المناسبة مناسبتين

عيد ورأس سنة

هيصي بقى شوية

إنشاء الله تكون سنة سعيدة عليكي وتحققي فيها كل احلامك

Thu Dec 28, 07:36:00 PM GMT+2  
Blogger بيجاسوس المصرى said...

اولا احيكى على شجاعتك القوية وانك اتكلمتى من غير اى تردد و فتحتى قلبك

ثانيا
دعينى اخلص الحكاية كلها فى تعبير بسيط
و انك كنتى تبحثبين عن النور حتى وجدتيه اعلى جبل عالى جدا
فلم تترددى و اخذتى تصعدين الجبال و تحاربين الصعاب ففى كل قدم تضعيه تتذكرينى معه اسم الله العلى العظيم

ياتى الصعب ليحاول ان يرمى بك من الجبل ولكن تقتليه
حتى وصلتى الى اعلى الجبل فكنتى مثل الفارس الذى وصل القمة و راى النور و الحياة بعينيه و اخذ ينظر من اعلى الجبل الى اسفل ليرى كيف كان صابرا و بطلا حتى وصل الى القمة

تحياتى و كل سنة وانتى طيبة

بيجاسوس المصرى

Thu Dec 28, 08:00:00 PM GMT+2  
Blogger Yasmine Adel Fouad said...

هو برج الدلو
مش مشكلة هضحى

سنه مناسب
و هنبقى مع بعض بقى و كده
ههههههههه
اجى اتقدم امتى ؟

كل سنة و انتى دايما جميلة

Thu Dec 28, 08:23:00 PM GMT+2  
Blogger الأميره أوسه said...

جايز دى تانى مره أشوف كمية الصدق دى
أول مره كان عند كات أيز(همس الليل) ؟

طبعآ بحييكى على شجاعتك
وليه طلب عندك بسيط
أنك لما تتجوزى ياريت تكونى حسنة الأختيار ومتندفعيش بقلبك أوى
وأنك ترفضى أى أهانه من زوجك
لأن الزوجه اللى بتتهان مره وتقبل ده
الزوج بيعتبر ده موافقه مبدأيه منها
فالموضوع يتطور لضرب
وأى زوج بيهين زوجته بيكون بدأها
بأهانه بسيطه
لازم تصرى أن الطرف الآخر يحترمك
ومعظم الرجاله لما بيقابلوا زوجه
بترفض الأهانه بيحترموها ويقدروها
أرفضى الأهانه مهما كانت العواقب
======================
بس شوفتى أنت حبايبك كتير أزاى
كل سنه وأنت طيبه

Thu Dec 28, 09:54:00 PM GMT+2  
Blogger Lion king said...

كل سنه وانت طيبه
:)

Thu Dec 28, 10:19:00 PM GMT+2  
Blogger محمود said...

كنت اتجول بين مدونات اصدقائي ...و كن هذا عند مدونت الجحيم صديقي العزيز...فرأيت تعليقك ..و زرت مدونتك ..و قرأت هذه التدوينة...لا ادري لقد احسستني انك انت.و لست اي شيء اخر ..يبدو تشبيها غريبا و لكن هذا ما شعرته ان هناك شخصية قوية ..و عقل جميل هو الذي تكلم و كتب ...و بكل صدق يشرفني دائما ان تكون مدونتك من افضل ما زرت و قرأت

Fri Dec 29, 02:19:00 AM GMT+2  
Blogger smraa alnil said...

ironcopra

يا سيدي انا فهمت بس حبيت اوضح كلامي عشان انت عارف الناس بقي ودماغها
بالنسبة لظروف اختفائك انا كنت عارفاها اصلا بس بغلس عليك
هههههههههه وكويس انك انت اللي تميت المية كنت هزعل اوي لو حنستني ب ال 99 تعليق

__________________________________

الحصان الاسود

واانت طيب وبصحة وسلامة يارب
والله هايصة ومولعه الشموع وماسكة البلالين
ما هي هيصة بقي
اللهم امين يسمع منك ربنا
وكل سنة وانت طيب يارب

___________________________________

بيجاسوس المصري

اولا انا اللي بحب اني اشكرك علي زيارة مدونتي
واللتعليق الجامد دة
وبعدين انا في حياتي مش في حاجة الواحد ممكن يخبيها
انا مؤمنة ان تجارب الانسان ما هي الا درس يتعلمه الاخر
عامة تحياتي ليك انت
وكل سنة وانت طيب

__________________________________
انا حرة

معلش بقي تعلي علي نفسك شوية
يا ستي تعالي في اي وقت هتلاقينا قاعدين ومستينين
بس انتي هتقدري علي مهره
هههههههههه
وانتي طيبة يا اجمل حرة
___________________________________

اوووسا

لا مش تخافي من موضوع الاهانة دي
انا اصلا عندي عقدة من الموضوع دة
وبعدين انتي نسيتي اني تربية رياضية يعين مش هيقدر يبم معايا
صدقني انا برفض الاهانة باي صورة وباي شكل

انا حبايبي كتير عشان هم زيك انقياء وفيهم جمال
مش جمال مبارك ها
وانتي طيبة يا قمر

___________________________________

lion king

وانتي طيب يا احمدوكل سنة وانت طيب

________________________________

محمود

اولا انا بشكر الجحيم لانك عرفتي مدونته من مدونته هو
وانا يشرفني اني اعرف مدونتك واقرا افكارك وكتاباتك
وشكرا ليك وكل سنة وانت طيب يارب

Fri Dec 29, 05:10:00 AM GMT+2  
Blogger Mody Rap said...

اه طبعا بكل سرور يا سمراء

ده رابط اغنيه راب من البومي اللي فات

http://zebox.com/cgi-bin/artists/dl.cgi?gondymody3_-_TAree2y_w_Fanny.mp3+q+d4

شكرا

Sat Dec 30, 12:40:00 AM GMT+2  
Blogger baby me said...

enty bgd ra23a
kalamk hzny awy w 7set kol klma feh
atmnalk els3ada

Mon Jan 01, 03:48:00 AM GMT+2  
Blogger frozen love said...

el72e2a msh 3arf a2lk eh...gher eny dm3t fe 7eta m3yna wna b2ra..lmstny awy...bgd enty btla..we msh b2lha mn mntlk "ya 7ram we elhabal da"

bgd a7eyky

Tue Jan 02, 02:44:00 AM GMT+2  
Blogger smraa alnil said...

مودي راب
انا بحاول اشغل الرابط عندي بس مش شغال
بس مش تقلق انا وراك والزمن طويل

واكيد ان شاء الله هسمعها

__________________________________

سجينة نفسي

انتي اللي رائعه بجد
وسلامتك من الحزن ويارب يبعدك عنه ويملا حياتك كلها فرح وحب يارب
وانا اتمنالك ان تخري من سجن نفسك وتشوفي الدنيا بجد

___________________________________

frozen love

مش تقول حاجة
يكفي انك تتم وتتعلم وتستفاد
بس انا عايزة اعرف ايه هي الحتة المعينة الي انت دمعت فيها دي
ولا بطلة ولا حاجة
انا انسانة عادية جدا بحاول اعيش حياتي
ربنا يخليك يارب
ان اللي بحيك انك قدرت تقرا كل البوست دة
دة انت اللي بطل يا اخي
ههههههههههه
تحياتي

Tue Jan 02, 02:38:00 PM GMT+2  
Anonymous Anonymous said...

engyy

enty 3emlakaaa
bas 2esma7eely wenaby a2oul ahhhhhhhhhhhhhhhhhhh

Tue Jan 02, 06:24:00 PM GMT+2  
Blogger frozen love said...

kan lazm a2raha lelakhr..msh bmzagy..lol

heya de el7etta ely dm3t feha lw kant htfr2 m3aky enk t3rfeha y3yny...fheya de...t7yaty

مش غريبة اني احن لطفولة وبالونة ماسكاها ومصاصة في بقي وبجري ورا العيال

مش غريب اني وانا بضحك الاقي غصب عني دمعه نازلة من عيني مش من الضحك لا من قهري

مش غريب اني اكون لوحدي محدش يعرف عني شئ ولا عن مشاكلي

مش غريب ان يحصل فتور بيني وبين امي واخد علي بعادها بالشهور

مش غريب اني مش اسال علي اهلي اللي مش في حد منهم سال عليا ولا دافع عن حقي

Wed Jan 03, 02:41:00 AM GMT+2  
Blogger smraa alnil said...

Anonymous

thx for u
ana msh 3mlaka wala 7aga
da ana 7ata toly 167
looooooool
any way thx for ur visist but u didnt say ur name

__________________________________

frozen love

قول كدة بقي
كنت مرغم يعني
عامة انا برضه الحتة دي وانا بكتبها كنت بموت من العياط مش دمعت بس
شفت بقي الفرق
هههههههههه

معلش نكدت عليك اوي
يلا حصل الخير ربنا يبعد عنك الحزن والشر يارب
تحياتي

Wed Jan 03, 05:56:00 PM GMT+2  
Anonymous Anonymous said...

من اكثر الكلمات تعبيرا اللى قولتيها فى المدونه (انا بس بنت وخايفه) .....سبحان الله اخر وصايا سيدنا محمد صلى الله عليه وسلم (اتقوا الله فى النساء) صدق رسول لله صلى الله عليه وسلم فاين هم المتقون

Tue Feb 06, 07:57:00 PM GMT+2  
Blogger smraa alnil said...

بجد بشكرك جدا
فعلا لو الناس اتعلمت كيف يتعاملون مع البنات والنساء كما ذكر رسولنا الكريم مش كان دة بحالنا ربنا يهدينا يارب

Fri Mar 16, 02:07:00 PM GMT+2  
Blogger شــــمـس الديـن said...

ازيك يا سمراء
يمكن مش تشوفي تليقي دا لان البوست قديم اوي

بس انت عارفة
الحمد لله قبل كل شئ

انت حظك حلو ... اغلب الناس اللي بتمر بظروف زي ظروفك دي بتنحرف و بيكون طريقهم فعلا اسود... و اثارتني جدا و شعرت بك كثيرا عندما حكيتي عن ادق معاناه الفتاه التي تواجهها كل شهر ... تعلمت دون ان يعلمك احد و لولا ستر الله فقط لكانت محملة بعقد كثيرة جدا ...

لم اتصور عزيزتي انك واجهتي كل هذه المعاناه في حياتك ... و رغم انك سردتيها في اسطر قليله الا ان هذه الاسطر هي عصارة سنوات مرة .... و اعلم انه مهما حكيتي فلن يشعر القارئ بما عانيتي لانه كما يقال دائما الاحساس لا يترجمة الكلمات ... و ليس هذا حكرا علي الاحساسات و المشاعر الجميلة و لكن ايضا تنطبق علي المعاناه ....

حفظك الله دائما و اري ان الله سوف يرسل لك جوائز السماء قريبا ...

و سعيدة حقا ان جمعنا القدر دون اي تخطيط سامق مننا ... و يسعدني ان انضم لبطاقك العائلية

دمتِ بكل الخير

Sat Aug 11, 03:31:00 AM GMT+3  
Blogger بلوجاتي said...

بجد كلام يدل على شخصية قوية لا تقهرها الظروف

ياريت تشرفيني بالزيارة

تحياتي

Sat Feb 14, 05:47:00 AM GMT+2  
Blogger كلمات من نور said...

ربي يخليك بنوتك الحلوة ويخليكي لها

داه كده اخر الأحزان إن شاء الحنان المنان علشان انتي قلبك من ذهب تصقله النار ولا تحرقه

Tue Nov 23, 03:08:00 AM GMT+2  
Anonymous Anonymous said...

bapesta
jordan 11
supreme
a bathing ape
jordan retro
palm angels outlet
supreme hoodie
supreme clothing
bape clothing
goyard

Sun Feb 19, 06:47:00 PM GMT+2  

Post a Comment

<< Home