تعالوا نحسبها صح

الزمن: الايام دي

المكان: مركز التنمية الاقليمي بالقاهرة اللي مقره في استاد القاهرة

السبب: ندوة ومعسكر تدريب المسابقات الجديدة للسيدات لالعاب القوي

السبب برضه: والله ما عارفة

ايه هي المسابقات الجديدة: المفروض ان هي الوثب الطويل - الوثب الثلاثي- القفز بالزانة- الموانع ( ال يعني هي دي المسابقات الجديدة)؟

عدد الدول المشاركة: مصر هي امي - اليمن - السودان- الاردن - سوريا - تونس

عدد المشاركين: 2 فقط من كل دولة المفروض ان اتحاد الدول دي بيرشح لاعبة ومدرب بما فيهم مصر بالاضافة الي هيئة اعضاء تدريس قسم العاب القوي بكلية تربية رياضية الجزيرة اللي المفروض عددهم 20 فرد بالكتير جدا

تعليمات الدراسة علي حسب اللي مكتوب في الورقة اللي اتوزعت علي المشاركين ( ونظرا لعدم وجود سكانر عندي فانا هنقلها زي ما هي بالظبط) .؟

تعليمات الدراسه

________

نظرا لحدود ميزانية الدراسة فسوف يتحمل المركز الاقامة شاملة ثلاث وجبات فقط (بوفيه مفتوح) + مشروب واحد فقط وذلك وفقا للاتفاق مع فندق " موفنبيك".؟

بينما سيتم محاسبة الفندق بمعرفة الدارس لكل ما يلي:؟

المكالمات المحلية والدولية*

الغسيل والكي *

الميني بار *

المشروبات الضافية *

تغيير نوع الاقامة من زوجي الي فردي *

تغيير مدة الحجز الذي تم بمعرفة المركز *

كما يرجي من الدارسين الاتي - :؟

الالتزام بالمواعيد وتحركات الاتوبيس الخاصة بنقل الدارسين

مع تحيات

ادارة مركز التنمية الاقليمي - بالقاهرة

واخدين بالكم من موضوع حدود ميزانية الدراسة دي

كان هذا اعزائي الموستميعوون الموجز واليكم الانباء بالتفصيل:؟

انا بقي عايزة اقولكم ميزانية المركز دة بتسمح بايه بقي

اولا

جايبين مدرب روسي من روسيا عايش في داكار لانه هو مدرب البت اللي طلعت التالتة علي العالم في الوثب الثلاثي

عشان هو اللي هايدي الدورة دي

بما ان المدرب روسي فسبحان الله الراجل بيتكلم روسي لبلب وفرنساوي طلقة بحكم عيشته في داكار

وبما ان ثقافة الراجل دة في الانجليزي زي ثقافتي في الروسي بالظبط لكن الراجل كان بيحاول

المركز نظرا لميزانيته المحدودة مش هان عليه يجيب مترجم متخصص عشان نفهم وجايبين واحدة بترجم ترجمة حرفية للانجليزي اللي هي اصلا مش فاهماه

واحنا يا ولداه فاغرين الافواه وبنحاول نجيب كلمة من الشرق وكلمة من الغرب عشان نفهم الراجل دة

لحد ما كلنا كشفا راسنا ودعينا عليهم يقوم ينزلنا واحد من السما في المركز برضه تشاء الاقدار انه بيعرف روسي ويتولي هو احيانا الترجمة

وكل دة ليه ؟؟؟؟

لا فتحوا مخكم معايا عشان ميزانية المركز مالها؟؟؟

ايوووون كدة

ثانيا

طب والضيوف اللي جاية دي بقي هتاكل ايه

هتاكل زي بقية الشعب كدة دة حتي يبقي حرام عليهم

وطبعا زي ما قريتوا ان هما حاجزين في فندق موفنبيك اللي تصل تمن الوجبة فيه في الغدا الي 200 جنية وشوية بس بما ان المركز ميزانيته محدودة فالفندق صعب عليه وخلاه خمسين جنيه للوجبة بس

ملاحظة دة اوبن بويفيه يا عم الحاج يعني لهلط براحتك يابا؟

دي حاجة بقي ليكم

الفندق طبعا معاه العدد وبيطلع الوجبات حسب العدد اللي جايله واللي طبعا مش هيزيد بس اللي ممكن يقل

بس بما ان الفندق عامل حساب اعضاء التدريس اللي هو احنا واللي مش بنيجي كلنا لان في منا الي كان صايم وانا شخصيا قعدت يومين مش بروح

طب اللي مش جه دة برضه فلوسه بتروح فين بقي يا حلووووووووو.............!!!!!!!!!!؟؟؟؟؟؟؟؟

ونظرا اعزائي المستمعين والمشاهدين لحدود ميزانية المركز فالمركز تبرع مشكورا لتحمل كافة تكاليف السفر من تذاكر واقامة للدول المشاركة

وما كان علي المشاركين غير ان هما يلموا هدومهم في شنط ويركبوا الطيارة ويهبطوا ان شاء الله سالمين علي ارضك يا مصر

متشالين علي كفوف الراحة ياريس

زورونا تجدوا ما يسركم

طب شايفة احد المشاهدين بيسالني هي الدورة دي ببلاش؟؟؟

وارد بمنتهي البساطة ايوووووون الدورة دي ببلاش

سؤال اخر اتفضل يا بيه

ولما هي مسموح بيها لفردين من كل بلد ايه اللي مخلي اعضاء هيئة التدريس تخش فيها؟؟

احم احم

سؤال وجية ونبيه في نفس الوقت بس احب اقول سيادتك ان مصرفيها كتير يا ابني ومش كنا احنا بس دي معمورة بولادها بس هقولك

فجأة ضربت في دماغ مجلس الكلية ان هما يطبقوا التخصص في الكلية ودة بقي موضوع تاني وكبير بيدل علي مدي تخلف تعليمنا هبقي اقولكم عليه بعدين

وبما ان معظم اللي متعينين في قسمنا لا يمت بتخصص العاب القوي بصلة واولهم وعلي راسهم العبدة لله

فحبوا ان هما يمرنونا علي الالعاب الجديدة اللي المفروض هتنزل تخصص في القسم عندنا اللي هي المطرقة والوثب الثلاثي والقفز بالزانة والموانع

وهنا ياريس تلعب الواسطة دورها ونبقي احنا كمان من ضمن المشاركين في الدورة دي كمشاهدين ومتعلمين وكمالئين البطون في فندق موفنبيك

مدة الدورة من 27 الي 31 يناير

يعني محاسبة الفندق للدارس دي طلعت اوت ومش واقعية وسعت منهم اوي

لان مش في حد بيعملها كلهم يابا معاهم تلفونات دولية والعيال قاعدة خمس ايام

دة انا لما سافرت وقعدت شهر غسلت مرة واحدة بس هدومي

لالالالالا مش تفهموني غلط مش عفانة دة عشان كنت واخدة الدولاب كله معايا

طب الفلوس دي كلها جايبينها منين طالما بتقولي ببلاش

انت مش شفت بعينك ان ميزانية المركز محدودة

الفلوس دي بقي من ميزانية الدولة يا معلم

ودي تطلعلها حزبة اد ايه كدة يا سموووور

جمد قلبك كدة واشرب ديو واستعد للانطلاق

اتنين مليون وربع يا بيه

ايىىىى

******************************************************

نشرة الاخبار المسلحة

تم تغطية ملعب بنادي الجيش المصري لا تحتاج الالعاب المقامة عليه الي تغطية هذا الملعب ولكن تكلفت تغطية الملعب 4 مليون جنية

******************************************************

فقرة اعلانية

اتبرع ولو بجنية

اكفل طفل يتيم عشان مش لاقينله غير شوية جرانين يتلف بيهم في صعيد مصر

اتبرع عشان نبني مدارس لولادنا

اتبرع لصالح مستشفي السرطان

اتبرع لصالح مستشفي الكلي والكبد والطحال والفشة والممبار

شارك عزيزي المواطن بدفع الضرايب لتكون مواطنا صالحا

يعلن اتحاد النهابانين العرب علي انه سيتم نهب كل مواطن في دفع فلوس النضافة بجانب الكهربا

تبرع لصالح اخوانا في فلسطين والعرقا وافغانستان

تبرع لدار الايتام

والعنب العنب العنب

احمر اخضر اصفر

احمر ودمه خفيف ينفع في شتا او صيف

وعماااااااااااااااااااااااااااااااااااااااااااااااااااااااااااااااااااااااااااااااااااااه يا مصر