Sunday, January 28, 2007

تاج ليا يا ولاد

طب نخليها جد شوية بقي
لقيت اكتر من حد عاملي تاج
ال يعني خلاص هلبس تاج الجزيرة
لقيت utopian
وليندا ولميا محمود
عاملين ليا تاج والله اعلم بقي مين غيرهم
المهم اني هجاوب علي التاج دة وربنا يستر
اية اللي حيحصل لايميلك لما تموت ؟
بعد الشر عليا
يعني اعتبر انكم بتفولوا في وشي
ولا حاجة مش في حد اصلا هيهتم انه يدخله او يبقي عايز يعرفوا
هما مش هيبقوا فاضين هيكونوا بيوزعوا ميراثي ههههههههههه
يعني من الاخر هيموت معايا
عااااااااااااااااااااااا
اديت الباس وورد لحد قبل كده؟
امممممممم
مش فاكرة صراحة بس لا اعتقد ذلك
بس ممكن اكون عملتها مرة انا بقول ممكن ومش اكيد لان الزهايمر بقي وحش اوي معايا
لو اه كانت طبيعة علاقتك بيه اية؟
ايه الغتاتة دي بقول مش فاكرة بجد لازم تحرجونا يعني
يا لهوي هو الزهايمر انتشر معايا كدة
اسمك؟
ههههه هنمثل بقي ايه التحقيق دة دول مش عملوها معايا علي بوست الريس
عامة انا اسمي انجي
اسم الدلع المشهور في وسط اصحابك؟
يووووووووو والله كتير
anoj بس اكتر اسم مشهورة بيه هو
ولكن في ناس بتسميني نوجا
ونوجي
انوجي
ولولا ومش في حد يسالني ايه اسم الدلع الغبي دة
بس مش بحب احرم حد من حاجة
اما زمايلي الاردنينين بس فهما اللي بيدلعوني يقوليولي يا سمرا وبعضن منكم
عمرك؟
في حد يسال انسة زي القمر زي لا حصلت ولا هتحصل في تاريخ البشرية السؤال دة
اتعلموها بقي
عامة انا عندي 25 سنة وشهرين وتقريبا عشرين يوم لزوم الدقة بقي
برجك؟
العقرب بعيد عنك
يعني خلي بالك بقي قرصتي والقبر
مجالك او مجال دراستك ؟
باحثة بكلية تربية رياضية بنات
معيدة يعني بقسم العاب القوي
انا بديهم العملي
بالاضافة اني في تانية ماجيستير تخصص تدريب رياضي
ولسة مش اخترت موضوع لرسالتي
بالاضافة اني مدربة سباحة ولاعبة ريشة طايرة ومساعد مدرب ريشة طايرة
ومش عايزين تريقة انا بقولكم اهو
طبعا في حاجات كتير في شغلي مش قلتها اصل الواحد بيخاف من الحسد والقر
شخصيتك نوعها اية؟
سودا وبرباط
هو انتوا بتسالوا علي جزمة ؟هو ايه اللي نوعها ايه؟؟؟؟؟؟
عامة يعني بجد انا مش عارفة
بس نص الشعب بيقول عليا اني عسولة ودة طبعا اساسي
يعني علي طول بضحك وبهزر
والنص التاني بيقول عليا نكدية
بس انا من النوع الكتوم زي مانتوا شايفين في بوستاتي يعني
صبورة جدا جدا
وعصبية في نفس الوقت اووووووي
بيقولوا عليا طيبة لدرجة العبط
اهم حاجة عندي اني مش الاقي حد زعلان او حزين حتي لو دة علي حسابي
بحب اساعد الناس اوي ودة بيوقعني في مشاكل كتيرة اوي
اه نسيت اقول اني عنيدة جدا جدا جدا
وبحب امشي بعقلي ولو انا مقتنعه اني صح لو جبتولي مين عشان يغير فكرتي او وجه نظري في موضوع عمري ما هغيرها بالاضافة اني تلقائية جدا جدا ودي مصيبة في حد ذاتها
عامة الي يعاملني هو اللي يقدر يحدد شخصيتي ايه
السفر بالنسبة لك؟
لالالالالالالا
السفر دة حياة
بالنسبة ليا هروب من عالم انا مفروضة عليه وبختار العالم بتاعي بطريقتي
بحب في السفر عيشة الحرية زي عيشة الفلاح كدة هههه
بحس اني تحررت من قيود القبيلة
اي نعم انا لما سافرت مش لقيت السبع فوايد الي بيقولوا عليهم واللي لحد النهاردة انا مش عارفة هما ايه
بس اول مرة حسيت اني بتنفس لما سافرت
المود بتاعك؟
ايه الاسئلة اللي مش مفهومة دي
ولا انا الي استغبيت
عامة انا متغيرة دايما
مرة ابقي عايزة دة ومرة مش عايزاه
احيانا بحس اني هوائية برغم ان كتير بيقولولي اني مش كدة
بحب اضحك علي طول حتي والدموع في عيني
مش من السهل ان حد يستفزني
بس اسهل حاجة ان حد يستفزني ههههههه
التغير اللي بيحصلي اعتقد اني مش عشان انا هوائية لا
بس ممكن اقعد اضحك وتلاقيني افتكرت حاجة زعلتني فاقلب بقي 180 درجة والعكس صحيح
ها وصلت ولا لسة
وقت فراغك بتعمل فيه اية؟
عامة مش بلاقي وقت فراغ كتير لاني ببقي في شغلي وبليل في التمرين او بخلص ابحاثي الجملي
بس دلوقتي السبيل الوحيد اللي بقضي فيه وقت فراغي اذا كان موجود هو النت
الاكلة المفضلة؟
ايه يا جدعان انتو مش عرفتوا اني طفسة
عامة انا بعشق المكرونة بالباشميل ومحشي ورق عنب و السمك المقلي
لصفات اللي خدتها من بابا؟
ههههههههه من بابا؟؟؟؟؟؟
عامة انا اخدت العصبية واحيانا القسوة بس للاسف علي نفسي
الصفات اللي خدتها من ماما؟
مش عارفة يمكن عشان مش قعدت معاها كتير فمش قادرة احدد بس بيقولولي اني طالعة طيبة وعبيطة زي ماما
هههههههههههه
لا بجد اخدت القلب الطيب من امي
ربنا يخليهالي يارب
اكتر 6 حاجات بتكرهها؟
الدبان
والكدب
والغدر
واولهم كلهم عدم الاهتمام بيا حاجة ممكن تموتني لو مش لقيت ان حد مهتم بيا
الغباء بكره اوي اني الاقي حد بيستغبي ولو اني بعيش الدور دة كتير
وبكره نفسي لما بحس اني هفشل او فشلت في شئ يعني بكره الفشل عموما
اكتر 6 حاجات بتحبها؟
القطط
والحب والرومانسية
اللعبة بتاعتي اللي هي الريشة الطايرة ومش عايزين تريقة قلت
اصحابي اللي هو انتو وصحابي الاخرين
البحر
والكتابة
الشغل بالنسبة لك؟
الشغل بالنسبة ليا استقلال
لان هو دة اللي اداني شخصيتي واني اقدر اتحرر من قيود الجنية والخمسة جنيه اللي كنت باخدهم من بابا هههههههه
يعني هو اداني استقلال مادي وفي نفس الوقت هوكان من ضمن المكونات الرئيسية اللي كونت شخصيتي
اية الكومبيوتر والانترنت بالنسبة لك؟
لا حياة تانية خالص
بحبها جدا كفاية اني عرفتكم من خلالها لان انتم بجد فرقتوا معايا اوي في حياتي كلها
بحس اني من غيره مش هتمشي حياتي
كفاية انه بيخليني اعرفكم واتقرب منكم
يمكن في ناس هتحس اني ببالغ بس والله بحس ان انتم عيلتي
بلاقي اللي يسمعني ويحس بيا ويطبطب عليا كل دة من خلال النت
كفاية انكم بتقروا ليا لان مش في حد من اصحابي بيحب يقرا او يكتب مش في حد منهم ليه ميول من ميولي
لكن معاكم لقيتني ولقيتكم
امرره لمييييييييين؟؟؟
امممممممم
جينا بقي للصعب
اصل انا لو اخترت حد ولقيته مش عمله هتنرفز وانا نرفزتي وحشة اوي
بس انا نفسي كل اللي بيزورني يعملوا
يعني من الاخر اللي يحط تعليق يعمله
ههههههه ولا اقولكم
هختار شوية
sky lightياسمين
zordeak
بيجاسوس المصري بما نه خلص ضحك
اودي عادي بقي
dyin_soul
انسانة
ابراهيم معايا
واللي عايز يعملوه ياريت يعملوا
كفاية كدة بقي

Labels:

65 Comments:

Anonymous Anonymous said...

هاي عليكم

Sun Jan 28, 04:18:00 PM GMT+2  
Anonymous Anonymous said...

بت يا انجي
الله يخربيتك
واحشاني يا جزمة
طبعا عرفتيني انا امل بتاع التوت وميكروباص 26
انا مكونتش عارفة انك لسة فاكرة الذكريات دي كلها
والله ضحكتيني
وفرحتيني انك لسة فاكرة
معلش يا انجي انا عارفة اني كنت مقصرة معاكي اوي
وعارفة كمان ان انتي كنتي عارفة اني مصحباكي مصلحة عشان الكلية ومع ذلك مكنتيش بتكرهيني

عارفة بجد انتي انسانة عظيمة اوي وكلنا بجد كنا بنحبك كفاية ان انتي كنتي بتساعدينا في الكلية علي مدار الاربع سنين
فاكرة يا انجي لما كنت بقعد اغيب من المحاضرات العملي عشان معسكراتي وكنتي تحلفي اغلظ الايمان انك ما هتمرنيني وان الي شايل قربة مخرومة وكنت اول ما اقف ادامك وابتسملك تضحكيلي وتقولي انك خايفة عليا
وكنتي دايما بتتصدري للدكاترة عشان تدافعي عننا

وبعدين تعالي هنا

انتي ليه مقلتيش علي الترنج اللي بقي كله توت واتبقع وبدلتيه مع ترنج واحدة تانية من الشعبة

ههههه
طب مقلتيش ليه علي اليوم اللي انتي كنتي جايه فيه بترنج بس ورحتي مهبودة في الطين وروحتي والترنج كله طين كانك جاية من طنطا

وليه مقلتيش لما دادة الحضانه اللي في مركز شباب الجزيرة مرضيتش تدخلنا عشان نجيب توت من الشجرة الي في الحضانه وقعدنا نحفر من تحت السور ساعتين بحالهم
وحفرنا نفق وبقينا نزحف لحد ما دخلنا جبنا توت
مقلتيش ليه اننا غسلنا التوت في حمام العميدة
فاكرة يا بت لما الشعبة كلها سقطت في كرة اليد والدفعه كلها بتشاور علينا وتقول الشعبة كلها ساقطة وانتي اللي هونتي علينا وضحكتينا وذاكرتلنا النظري لحد ما كلنا نجحنا فيها

انا عمري ما هنسي اليوم الي كنا في حمام السباحة وانتي كنتي تعبانة ومنزلتيش المايا
وواحدة كانت بتغرق والدكاترة مش عايزين حد ينقذها عشان تتعلم رحتي انتي ناطة بهدومك وجبتيها
والدكتورة سقطتك في اعمال السنة واخدتي نص درجة العملي

وقعدنا نواسيكي لقيناكي بتضحكي وتقولي سيبك منها دي بنت كلب ديتها اشد في النظري وانجح غصب عن عين ابوها
وفي داهية التقدير
ههههههههه
انتي عظيمة اوي يا انجي
وبحس جنبك اد ايه انا صغيرة اوي
كنتي دايما بتشيلي همك جواكي
وتعبك فاكرة لما اغمي عليكي في الكلية وكلنا كنا ملمومين حواليكي
واول ما فقتي وفتحتي عينك لقيتي عيونا كلها مخضوضة وعشان متقلقيناش ابتسمتي وقلتلنا انتوا كلكم عليا ولا ايه
انتو فاكريني ايه يا جزم
ههههههه
علي اد مانتي بتحبيني علي اد مانا كنت واخداكي مصلحة
مكنتش اعرف اني واطية اوي كدة

كفاية انك مثلتي مصر في الاردن ورفعتي اسمها فوق
كل سنة بيطلع مصريين كتير وفي السنة الي انتي طلعتي فيها كنتي البنت الوحيدة المصرية وعملتي اللي معملوش غيرك
دة انتي كل سنة بيتكتب فيكي تقارير للوزارة مقولكيش بقي
انا حبيت اكتبلك تعليق في الموضوع الجديد عشان خفت لمتشوفنيش لو علقتلك علي ذكرياتنا
انا عرفت البتاعه اللي انتي بتكتبي فيها دي بالصدفة عن طريق استاذ محمد ضفدع
طبعا عارفاه
ماهو كان بيحبك
برغم من صورك البشعه وانتي في لاردن وانا كنت متخيلاكي وانتي قاعدة اسبوعين مبتسحميش عشان كنتم في الصحرا بس الناس حبيتك هناك اوي
دة كفاية ان شادي ومحمد ضفدع وجواد وبلال كانوا عايزين يتجوزوكي
بت انتي هشوف امي عايزة ايه واجيلك
تاني
بس انتي طول عمرك فقرية
والله بحبك والمرة دي من غير مصلحة ها

Sun Jan 28, 04:41:00 PM GMT+2  
Blogger The Eagles said...

بصى انا فرحان عشان يعتبر اول واحد بعد صحبتك امل اللى فضحتك اكتر بكل حاجة حلوة فيكى وانتى مش قولتيها(الا بقى و كنتى انتى اللى كتبتى دة وكتبتى اسمها عليهاهههههههههههه)

لا بجد انا بطلب منك طلب بس مش عارف يا ترى هيكون فعلا من حقى انى اطلبه ولا لا
انا نفسى فعلا اشوفك واتعرف عليكى بجد ومتخليش دماغك تروح لبعيد انتى اكبر منى بخمس سنين هههههههههههه
بقى تحفروا الارضية بتعت السور لمدة ساعتين عشان تدخولوا الحضانة وتجيبوا توت دى مش طفاسة دة فجع هههههههههههه
وبجد انا قعدت اتخيل واتصور انك مش عايزة تنزلى الحمام وتنطى وبهدمك كمان عشان تلحقى البنت وتقوللهم سيبكوا من بنت الكلب (على الدكتورة)دى ديتها اشد فى النظرى وانجح غظب عن عين ابوها ومش مشكلة التقدير ههههههه فى الوقت اللى الواحد بيقول فيه يالا نفسى

وبجد احترام شديد لصحبتك امل انها تعترف بانها كانت عرفاكى عشان مصلحة وهيا مش واطية ولا حاجة بالعكس يكفى انها عرفتك واكيد اتعلمت منكى الكثر

بجد انا اتمنى ان تلبى طلبى انا على فكرة كنت هطلب منكى الطلب دة منذ البوست اللى انتى نشرتيه وحكيتى فيه ماساتك واللى ماقولكيش قد ايه كان عجبنى جدا ووالله انا قولت لاصحابى كتييير على البلوج بتاعم وعلى الموضوع بالاخص عشان يقراؤه بس للاسف انتى تقريبا حذفتيه
بجد اتمنى ان تلبى طلبى والا تقتصر على النت يارييييييييييييت تقبلى طلبى

على فكرة انا فى السنة الاخيرة فى جامعة حلوان يعنى زومل فى جامعة واحدة مع اختلاف السن وانك ان شاء الله تكونى دكتور وانا كمان اشمعنة يعنى ههههههه

ما تنسيش طلبى للمرة العشرة (هما بقوا كام مش مشكلة لحسن تقولى عليا مش بعرف اعد ههههه)

والسلام.........

Sun Jan 28, 06:37:00 PM GMT+2  
Blogger abderrahman said...

مراحب

ما شاء الله الأستاذة امل عواد، حكت قصص لزيزة

:)

اول مرة اعرف انك باحثة اكاديمية، ربنا يوفقك يا انجي

تحياتي

Sun Jan 28, 06:45:00 PM GMT+2  
Blogger Malk Almasria said...

تحياتى انجى

الان فقط استطيع ان اجزم ان هناك زكريات صادقة لا نخجل من سردها

اعظم تحيه
لالطف بت مصرية


ملك المصرية

Sun Jan 28, 06:58:00 PM GMT+2  
Blogger islamz said...

مش عارف اقول ولا كلمة واحدة بعد اللى قريته ده .. غير .. ربنا يكرمك يا انجى ويحبب فيكى الناس اكتر واكتر .. دنا من غير ما اشوفك وبجد مرتاحلك مووت وحاسس انك اختى بجد .. اومال بقي اللى عاشوا معاكى .. ربنا يخليكى لكل اللى بيحبوكى يا انجى .. على فكرة انا مش من عادتى ارد بالجدية دي .. عشان انا بحب الاسلوب الساخر عشان الحكاية مش ناقصة جد .. بس بجد بقي انتى حاجة كبيرة يا انجى ..

خللى بالك من نفسك يا سمووورة ... :]

Sun Jan 28, 08:04:00 PM GMT+2  
Blogger قلب يحترق said...

من أول ما دخلت المدونة دي وانا بقولها والله كلمة ومش ممكن أرجع عنها عثل والنبي عثل
والله يا بت يا انجي
بت بت ايه بقي
يا دكتور انجي يا عثل انتي انا بحبك اوي و يارب نفضل اصدقاء علي طول

Sun Jan 28, 10:35:00 PM GMT+2  
Blogger Mony The Angel said...

eh da hwa enty kaman 3a2rab :D
da boirg al3ozamaa2 yabenty lol

Sun Jan 28, 11:18:00 PM GMT+2  
Blogger Yasmine Adel Fouad said...

ايه الانسيابيه دى
عجبتنى اوى ردودك
خصوصا جزمة و برباط

هههههههههههههههه

Sun Jan 28, 11:27:00 PM GMT+2  
Blogger albida said...

انوجى النوجى كونوجى

هو ايه حكاية المكرونة بالبشاميل دى.. أنا و انتى وياسمين كاتبين نفس الأكلة!!... ماتيجى نفتح رابطة المكرونة بالبشاميل؟
ههههههههههه

manal

Mon Jan 29, 12:30:00 AM GMT+2  
Blogger Unknown said...

قلدوا رابطة مشجعى مابعد العشرين بقا يامنولة .. بطلوا الحركات دى إتفقستم خلاص
ههههههههه

سموووووووورة
طبعا انتى عارفة انا مرفضلكيش طلب وحققتلك طلبك حتى من قبل ما تطلبيه وعلمت التاج من يوم الاربع اللى فات واللينك اهوه

http://2insana.blogspot.com/2007/01/blog-post_24.html

بزمتك فى اكتر من كدة دلع؟
لاعبتشيك كل الالعاب
تيكا عالعالى وتيكا عالواطى
لاعبتك استغماية

استنى تعالى هنا
ساعتين تحفروا عشان توصلوا لشجرة التوت؟
يالهوى
ايه ياناس ده
ده انتوا من آكلي أغصان الشجر
يا ساتر يارب
انا هبطل رغى بقا لاتكلونى

والمصيبة ان مش باين عليكوا
ده انا لما بشم ريحة الاكل بتخن ياناااااس

سلام يا عسولة

Mon Jan 29, 12:46:00 AM GMT+2  
Anonymous Anonymous said...

نفسي ابقي اول واحد يقول كومنت علي البوست
ممكن تحققي ليا حلمي
بوست حلو وردود طبيعيه
متوقعه منك يا انجي

وكالعاده انتظري افتتاح البلوج في الساعات القليله القادمه

اسامه

Mon Jan 29, 01:25:00 AM GMT+2  
Blogger orthos said...

هى هى هى هى

يخرب عقلك و الله انتى طلعتى مسخره ... سورى يعنى لو كنتى تسمحى ..... هى هى هى

بغض النظر عن البوست اللى فات بس ده انتى طلعتى حكايه


حفره من تحت السور .... ده ولا توم و جيرى ... ده كله عشان توت ... ده انا مستبعدش اللى هتجوزيه ... تطلبى منه المهر قد عشرتاشر كيلو توت ... ايه يا عم الاجرام ده؟؟

هههههههههههههه

امل سيحتلك
:p

ههههههههههههههههه


لا بس بجد حكايه..راجل يعنى(متفهمينيش غلط) .... ماشاء الله عليكى ... مش سهله انك تجازفى بالماده علشان خاطر زميلتك ... انا مظنش انهم كانوا هيسيبوها تغرق ... بس حركه تنم عن اخلاق عاليه ... بجد والله ما مجامله


زى ما بيقولو (و الكلمه دى بتخنقنى أوى بس حاسس انها لايقه على الموقف) انتى حد حلو أوى


عايز أقول فيكى شعر و الله بس الكلام مش مطاوعنى ... وبعدين مين انا عشان أقول فيكى شعر

ياللا ياعم ظبطتك أهه ... :)
ههههههههههه

بطلوا طفاسه بقى ... هههههههه

بس خلاص عشان متكرهينيش

باى يا قمر .... وابقى اسال متقطعش الجوابات


اه حاجه كمان

قالولكو جاوبو عالتاج ... جاوبو من غير لماضه ... هو ايه اللى سودا و برباط ( عجبتنى أوى على فكره ) وبعدين سورى يعنى


ازاى يعنى واحده اسمها انجى يدلعوها لولا

نظام عبعال و بيدلعوه يا تامر

ههههههههههههه

والله انتى سكره
:D

ياللا باى

Mon Jan 29, 03:58:00 AM GMT+2  
Blogger orthos said...

اه نسيت الريشه الطايره

هههههههههههههههه

لاتعليق

كفايه انك عارفه غلطتك

ههههههههههههههه

كرهتينى صح
:)

بس خلاص
باى بقى

Mon Jan 29, 04:02:00 AM GMT+2  
Blogger أميرة said...

مش عارفة ارد تعليق امل لخبطنى

انا فرحانة اوى انها بترد عليكى ولسة فاكراكى كدة خصوصا انى زعلت انكوا اتفرقتوا عن بعض من موضوع الاتوبيس

اللى استغربتله ان ذكرياتك اللى بتحكى عنها دايما مع ناس بعدوا عنك

ودلوقتى امل بتقول انها كانت عارفاكى مصلحة بس مش باين ياامل انها كانت مصلحة واضح ان شخصية سمرا بتجبرك تحبيها حتى لو عارفاها بنية مصلحة

بس ايه الحركات الجامدة دى ههههههه انتوا غسلتوا التوت عند العميدة ازاى

وبعدين ياامل ينفع كدة تحرقى على سمرا بقية البوستات اللى كانت هتعملها بعد كدة :D

Mon Jan 29, 05:42:00 AM GMT+2  
Blogger Music Gates said...

هيع هيع هيع هيع

ايه ده يا انوج و الله صدقيني انا من ساعة ما عرفتيك و انا اخش مدونتي و بعد كدا اخش مدونتيك و مدونة البيدا و علي و اسلام الاربعه واجب عليا كل يوم اصل الناس دي الي انا بستريح معاهم جدا و في كلامهم و بجد زي العسل و ربنا يخليكي يا انوج و يبقي الايميل مفتوح علي حسيك كدا دايما و متحرميناش منيك خالص

Mon Jan 29, 06:21:00 AM GMT+2  
Blogger أخف دم said...

أنا بصراحة استمتعت جدا بكلام صاحبتك أمل بتاع التوت فى التعليق يمكن أكتر من البوست ذاته ..
على فكرة فعلا البنت دى بتحتك جدا وده باين من كمية الحب فى كلمة واحشانى يا جزمة..
أما بالنسبة للبوست فمفيش جديد يعنى.زلأننا كلنا عارفين انك زى العسل مش جديدة يعنى..
افتكرى الجمايل دى

Mon Jan 29, 06:36:00 AM GMT+2  
Blogger el2ahwagi said...

samra .. ya toota ..

ana geet akteb ta3lee2 ..
bas kfaya ha2ool enni 2areeet ta3lee2 amal ... w mafeesh 7aga tenfa3 tetketeb ba3d keda ...

bas hageeblokom eltoot elsokhn ento eletneen ..

beta3m eh..?
ana 3aref ya3ni?.. ana akhri 3aseer 2asab .. lol

Mon Jan 29, 09:05:00 AM GMT+2  
Blogger zordeak said...

انوووجتى


أخيرا صفحتك فتحت


اتيه يا بنتى كان فيه ايه

معرفش كل ما افتح صفحتك يقولى
error

والصفحة تقفل تانى

لما جالى شلل رباعى


المهم الحمد لله انها فتحت

والاقى تاج فى وشى كده


مش عارف حاسس انها سلطانية ليه

هههههههههههه

:D


ومالك بقى بتكرهى الدبان ليه

:P

المهم يا ستى

متشكرين جدا على أول تاج يتمررلى فى مدونتى الجمييلة


تشكرات أفندم وهعمله ان شاء الله أول ما القصة بتاعتى اللى نزلتها بس تتشاف


وحشتييييينى مووت مبقيتيش تظهرى لييه


يللا باى باى بقى


:)

Mon Jan 29, 03:38:00 PM GMT+2  
Blogger zordeak said...

هههههههههههههههه


ههههههههههههههه


لسه واخد بالى من تعليق أمل


جتلك لحد عندك يا حلو


يا عسسسسل



انتى حلوة اوى كده


نادر ان يكون فى بنى ادم بطيبتك اللى جوه دى

ايه ده يا بنتى


بجد والله عسسسسسسسل


وتحفرى نفق علشان تووت


ده انتى محصلتيش


وعلى فكرة انا كمان بحب المكرونة بالبشاميل وهعملها فى التاج ان شاء الله


هههههههههههه

مفيش حد احسن من حد



عارفة يا انجى

انا بفكر اعمل بانر واسميه

كلنا بنحبك يا انجى


بس المشكلة الوحيدة


انى مبعرفش اعمل بانرات


:D


وحشانى كمان مرة

Mon Jan 29, 03:46:00 PM GMT+2  
Blogger Utopian said...

انا كلام امل عجبني أكتر من التاج

مشكله لما الواحد يصاحب ناس فضحيه كده
هههههههههه

بس حب الناس ده نعمه كبيره اوي يا انجي
ربنا يديمها عليكي يارب

تحياتي دائما

Mon Jan 29, 03:47:00 PM GMT+2  
Blogger حدوته مصرية said...

لا جميل جميل و فضيحة امل اجمل

بس كان عندى سؤال

ايه الريشة الطايرة دى؟؟؟

Mon Jan 29, 05:10:00 PM GMT+2  
Blogger smraa alnil said...

امل عواد باشا

طب اقول ايه بالذمة انتي اللي وحشاني يا قلة
والله يا بت انتي وحشاني جدا

الله يحرقك يا نيلة
ايه الفضايح اللي انتي عاملاهالي دي
كان يوم اسود يوم ما عرفتك
ههههههه
ا بنتي انا مش اعرف غير عواد واحد بس اللي هو ابوكي
فاكرة لما كنت بقعد اغنيلك عواد باع ارضه
ههههههههه
انتي اكيد بتهرجي يا امل انا عمري ما اقدر اسناكي انتي عارفة انا بحبك اد ايه وتخيلي انا مش نسيت ولا واحدة من الشعبة
فاكرة انتي امينة اللي كانت مش بتستحمي خالص وريحتها قبر
ههههههههههه
بس كنا بنحبها
ولا امل محمود للي لسانها عامل زي المبرد وعايز قطعه
ولا اميرة الفرعه الي كانت بتقعدنا بطولها ومع ذلك مش كانت بتعرف تلعب باسكت
هههههههههه
طبعا انا فاكرة كل حاجة بس لازم تسيحيلي يعني الناس فاهمين اني رقية دلوقتي خدوا فكرة عني اني متشردة منك لله بقي
اولا اياكي تقولي انك كنتي مصحباني مصلحة
انا كنت ببقي مبسوطة وانا بساعد الشعبة ومش تنسي اني كنت مرغمة مش انا كنت رئيسة الزفتة
هههههههه
لو كانت مصلحة مش كان هيبقي بينا الذكريات دي كلها
انتي كنتي اخف دم في الدفعة كلها
ههههههههههه
فاكرة انتي بقي لما كنا قاعدين في محاضرة وانتي بتتاوبي ولقيت راخيرك نفشت اوي
ورقعتلك حتة ضحكة مش قدرت امسي نفسي ساعتها والدكتورة كانت هتطردني
ولما حكيتلها هي اللي قعدت تضحك
هههههههههه ساعتها قعدت اصالح فيكي يومين
اديني بشردلك برضه اهو

دي الناس بقول عليا حرامية اني سرقت صينية عايزاهم يقولا ايه لما يعرفوا اني بدلت ترنج واحدة من دولابها اللي فتحته ولا اجدعها شيخ منصر
هههههههههه فضحتيني يا بعيدة

ههههههههههههههه فاكرة حمام السباحة دة يا لهوي يا امل دة كان حتة يوم
الولية تسقطني بس شفتي اديني نجحت ازاي
وبعدين يا مولة والله انتي كبيرة اوي
يا جماعه البت امل دي والله اطيب بت تشوفها وجدعه اوي اوي اوي
وليه مش قلتي ان انتي الي كنتي السبب في سفرية الاردن

يبت اي نعم انتي واطية بس صدقيني انا عارفة انك كتي بتحبيني
يعني اهاللي كان بيجبرك تستني معايا في الكلية
او نروح مع بعض او نخرج مع بعض
طبعا مش كان في مصلحة
اوعي تقولي كدة تاني

وبعدين تعالي هنا ايه اللي عرف استاذ محمد بالمدونة بتاعتي

اانا لازم اعرف هو عرفها منين

وبعدين لازم تقولي اني مش كنت بستحمي يا فضحية
دة انا كان منظري عار دة انا كل ما ابص لصوري اقول دة انا كنت فحمة النيل مش سمراء النيل
والله انا اللي بحبك

بت انتي
روحي يلا انا هتصل بيكي

Mon Jan 29, 05:17:00 PM GMT+2  
Blogger smraa alnil said...

the eagles

يا ريتك ما علقت يا اخويا
اخس عليك هو انا عيلة اوي كدة عشان اعمل حركات العيال دي
طب والله زعلتني

عامة مش مشكلة
وبالنسبة للفضايح اللي المفضوحة دي قالتها
فهي والله ذكريات حلوة
بص يا سيدي
بالنسبة لطلبك دة
فانا عندي اقتراح حلو
انا احنا كل شهر بنعمل لقاء شهري للمدونين
واللقاء الجاي هيبقي يوم 2 فبراير موافق يوم جمعه
احنا لسة مش حددنا هنتقابل فين
بس في ناس كتيرة اوي هتيجي
ياريت تبقي معاهم واهو تشوف طلعتي البهية
ايه رايك يبقي

وبالنسبة لقصة حياتي فانا مش حذفته هو بس في ارشيف الشهر اللي فات تقريبا
لو حبيت تقراه خش في الارشيف

وصدقني بجد دة هيبقي شرف ليا اني اشوفك
___________________________

عبده باشا

الاستاذة امب عواد دي انا هموتها قريب
الله يخربعقلك يا امل
بجد انا مبسوطة بزيارتك دي
وياريت تكررها يارب
منورني

Mon Jan 29, 05:18:00 PM GMT+2  
Blogger smraa alnil said...

ملك مصرية

انتي اول مرة تزوريني وبجد انا مبسوطة موووت
لانك زورتيني
اشكرك علي كلامك الرقيق دة
انتي الي فعلا ملكة
نورتيني بجد
___________________________

اسلام

انا الي مش واخدة عليك وانت بالجد دة
بس شكلك غريب وانت بتتكلم جد ههههههههه
ربنا يخليك ليا يارب
والله انت كمان اخويا وكنت قلقانة عليك وانت في الامتحانات
سيبها علي الله يا ابني
ربنا ينجحك ان شاء الله وتتعين في الكلية وتبقي دكتور كبير يارب

Mon Jan 29, 05:18:00 PM GMT+2  
Blogger smraa alnil said...

dyin_soul

وانا من اول ما شفتك وانا قلت انك فقرية والله
هههههههههههه
ان شاء الله هنفضل اصدقاء علي طول
ربنا يخليكي ليا يارب
__________________________

mony the angel

tab3n borg el 3a2rab borg el 3ozma2
bas msh fi 7ad m2drna ya benty
happy to see in my blog

Mon Jan 29, 05:18:00 PM GMT+2  
Blogger smraa alnil said...

انا حرة

وحشاني يا ياسمين
بس ايه رايك؟؟؟
___________________________

منولتي النولتي كونولتي

يا بنتي انا اكتشفت ان تلات اربع الشعب بياكل مكرونة بالباشميل
وبعدين هي دي اللي فلتت نظرك يعني
ههههههههههه
دة انتي طلعتي طفسة زي
عامة انا هعمل معاكو رابطة مكرونة بالباشميل واشوف غيركم اعمل معاه رابطة ورق العنب

Mon Jan 29, 05:19:00 PM GMT+2  
Blogger smraa alnil said...

انسانة

قصدك ايه يا انسانة انتي
انتي جاية تحبطينا
وبعدين منولتي عندها 19 لسة مش عدت العشرين
اطلعي انتي منها بقي لانك انتي اللي عديتها
هههههههه
يا سلام اد ايه بتحسي بيا
قبل ما اقول جزر كنتي ملبيالي طلبي
ربنا يخليكي ليا يرب

بس انا لما بلعب معاكي بعد كدة بتلاقيني
هههههههه

منك لله يا امل
فضحكتيني ارد اقول ايه للناس دلوقتي
هههههههههه
وحياتك انتي احنا بناكل اكل يسد عين الشمس بس تقولي ايه بقي
سلام يا قمري
__________________________

اسامة

ان شاء الله تبقي اول واحد
ومش تزعل نفسك اوي كدة
تصدق اني مش كنت متوقعه مني
بس انت عارف بقي التواضع الل فيا
عامة انا بجد مستينة مدونتك جدا
ابقي قولي انا اول واحدة عشان اكون اول واحدة ادخلها برجلي اليمين

Mon Jan 29, 05:19:00 PM GMT+2  
Blogger smraa alnil said...

soul

يا سول انت تقول اللي عايز تقوله انت يا ابني اخويا
وحياتك بعدنا عن الدادة واحنا بنلعن ونسب فيها عشان مش رضيت تدخلنا
واحنا بقي ادمنا التوت بعد الليلة دي
فبصيت لامل وقلتلها احنا هنسنتلم كدة تعالي ورحنا عند سور كدة وقعدنا نحفر تحتيه لحد ما عملنا نفق تحتيه ورحنا زحفنا ودخلنا جمعنا التوت اللي عايزنه وخرجنا
المكلة بقي لما حبينا نرجع الكلية لقنا باب الكلية قفلوه ودة الباب اللي بيطلع علي المركز
طب نعمل ايه
طبعا كان ولا بد اننا ننطمن فوق البوابة ومش عايز اقولك ان البوابة من فوق كلها اسياخ
لحد ما نطينة وكانت رجلي هتتجزع في اليوم دة
بس عدت علي خير
ههههههههههههه
امل دي انا هموتها

انت اصل مش تعف دكاترتنا جبابرة والله
تصدق الكلمة دي برضه كانت بتخنفقني ومش كنت فاهمة معناها
ههههههه
شعر ايه يا عم
والله انت لو مكاني هتعمل كدة
انا مش بعمل حاجة زيادة ولا حاجة
انتو بس اللي مكبرين الموضوع زيادة عن اللزوم
وبطلوا تنفخوا فيا بقي
ههههههههه

دة انت ظبطتني وظبطتني كمان ربنا يخليك ليا ياسول

مش في حد قال جاوبوا من غير لماضة
هما قالولي جاوبي وخلاص
هيقفرونا بقي
ههههههههه
مانا قلتلك انا مش بحب احرم حد من حلجة
يعني هي جت علي لولا يعني
هما شايفني لولا اقولهم لا يعني

دة حتي كسر الخاطر حرام
باي يا قمر
___________________________

soul

انا بحسب انك عايز تتريق
فوتهالي بقي عشان مش امسكلك علي الواحدة
لا والله انا بحبك وببقي مبسوطة انك بتجيلي
وبشوف تعليقاتك
ربنا يكرمك يارب وينجحك في دراستك

Mon Jan 29, 05:19:00 PM GMT+2  
Blogger smraa alnil said...

اميرة ويلز

ما لو مش بعدوا عني مش كنت هتبقي ذكريات يا اميرة
هي دي بقي المفارقات
لازم تجربي البعد عشان تفتكري وتشوفي الحاجة من بعيد
اومال تبقي ذكريات ازاي
هي فعلا حرقت اللي كنت هقوله بس مش مشكلة
انا في حاجات مش كنت هقولها اصلا
ههههههههه
لا كله الا موضوع الغسيل دة مش تفكريني يا ميرو
___________________________

كوبا

استناني بقي
ازاي تدخل مدونتك الاول
المفروض انا الاول
انت كدة بتهرج بقي
المهم انك تذاكر عشان تخلص من السنة دي بقي
ويارب اشوفك تبقي من الاوائل يا كوبا وافرح بيك

Mon Jan 29, 05:20:00 PM GMT+2  
Blogger smraa alnil said...

اخف دم

انا برضه والله قلت كدة يا اشرف انا عارفة انامل بتحبني وانا والله بموت فيها
هههههههه يعني هي كلمة جزمة دي للي بينت اد ايه هي بتحبني صح
لالالالالا كدة جمايلك غرقتني ومش هعرف اردهالك بجد
___________________________

القهوجي

هههههههههههههههههههههههههههههه

طب كوبيتين عصير قصب
والله بحبه كدة لما تكون في عز الحر وريقك ناشف ومش طايق نفسك وعرقك نازل وانت ماشي بتسب وتلعن
تقوم تلاقي واحد بتاع عصر
تقوله كوباية عصير قصب
اااه
بطري علي الواحد جامد مووووت

Mon Jan 29, 05:20:00 PM GMT+2  
Blogger smraa alnil said...

zordeak

انا مش كنت اعرف ان صفحتي مش بتفتح معاك بس اهو الفرج جه من عند ربنا
يا لهووووي بعد الشر عليك من اي حاجة وحشة

ههههههههه حسيت انت بالاحساس اللي انا حسيته لما لقيت التاج بقي في وشي

انا بكره الدبان عشان لا يمكن اسمح بافعال اررذيلة في بيتي وادامي
مش زيك
هههههههههههههههه

انا بقي هروح اشوف ايه القصة اللي انت عاملها دي

معلش بقي كلها يومين وهتلاقيني منتشرة علي طول
باي
___________________________

zordeak

ههههههههههه طب اقول عليكي ايه يا امل يا بنت عواد
اما بيعتك الي ادامك واللي وراكي

يا ابني دي مش طيبة دة عبط صدقني

لا انت كدة هتبقي بتقلدني شوفلكاكلة تانية بقي غير المكرونة بالباشميل مش ليا دعوي

ههههههههههه
هو لامؤاخذة يعني
يعني ايه بانر؟؟؟؟؟؟؟؟
ههههههههه

ربنا يخليك ليا يارب

Mon Jan 29, 05:20:00 PM GMT+2  
Blogger smraa alnil said...

utopian

انت عاجبك الفضايح بقي مش كلامها

عشان كدة البعد عن البت دي غنيمة والله
ههههههههه
ربنا يخليك انت يا عمووور
ويارب تبقي منورني كدة علي طول

فكرتني بقي هروح اتصل بامل

__________________________

محمد ياسر

ههههههه
تموت انت في الفضايح صح

عامة يا سيدي الريشة الطايرة دي لعبة زي التنس كدة بتتلعب في صالة مغطاه لان حجم لريشة خفيف جدا وبيتأثر بالتيارات الهوائية
الملعب بتاع الريشة تقريبا زي ملعب التنس
بتتكون من تلات اشواط اكسب منهم 2 من 3
والشوط من 21 نقطة
بيتلعب فيها فردي سيدات وفردي رجال وزوجي سيدات وزوجي رجال وزوجي مختلط
المضرب بتاعها قريب من الاسكواش لكنه خفيف عنه بكتير
والكورة عبارة عن نص داير من الفلين كدة ومزروع فيها ريش
تحس انها عاملة زي الباسكت كدة
دي الريشة ها
وصلت ولا لسة

Mon Jan 29, 05:24:00 PM GMT+2  
Blogger orthos said...

لا مش ممكن .. معلش مقدرتش اقرا الكومنت ده و اسكت ....
مش ممكن ... أقوللك اعملى كتاب اكتبى فيه مغامراتك ... بجد مش ممكن

تنطى من على سور و عليه اسياخ يا ظالمه ... لأ لأ... مش معامله ... حرام عليكى نفسك يا بنتى


أنا عارف انك سمعتيها من بشر ...بس انا بحبك فى الله

سكتى يعنى

سمعتيها من مين قبلى ... ( إهلكى يا فاجره حتى لا تخونى رجالا آخرين ).. هههههههههههههههههههههههههههههههه
:p
ههههههههههه

عجبتنى أوى دى

ههههههههههههههههههههههه

ربنا معاكى يا جميل يارب ... ويرزقك باللى يقدرك ... تحبيه ويحبك ... ويحطك فعنيه .... عشان لو معملش كده هآجى أخزقهاله


خدى بالك من نفسك يا جميل

Mon Jan 29, 07:57:00 PM GMT+2  
Anonymous Anonymous said...

تعرفي اول ماشفت انك عملة التاج زعلت بس عرفت انو التاج تبعي

المهم انا لحظت انك دايمة بتلفظي في كلمة عامة

شو ياانجي شو الحكاية مع هالكلمة؟

المهم او عامة الأجوبة نموذجية ههه

بتعرفي ياانجي انا غيرانة من امل مشان يلي كتبته عنك

ههه
ديري بالك على حالك وبلاش حكاية التوت

Mon Jan 29, 08:05:00 PM GMT+2  
Blogger Tamer Nabil Moussa said...

شوفى بقى انا من كل دة جايب ليكى بقى هدية تمام

غمضى عنيكى الاول كمان

فتحى بقى

معومات عن البرج بتاعك وخدى بالك بقى من السلبى اهم حاجة هههههههه اة مفيش من تكتيم ولا تجميل انا بقولك اهو



----------

الكوكب -المريخ
ارقام الحظ - 17- 26- 35- 44-53
الاحجار- الياقوت-العقيق
مائي
يتوافق مع : الحوت - السرطان-الثور
Oct. 24 - Nov. 21


الاعمال الملائمة
: أطباء- محققين- علماء بيئة- مهندسين- عملاء سريين.
اايجابيات
: صاحب عزيمة- قوي- عاطفي- ذو حدس- ذو طاقة - مثير - شخصيته جذابة- كتوم للأسرار
سلبيات: كثير الرفض- يحب السيطرة - محب للتملك- غيور -عنيد.
يحب أن يعرف كل شيء الحدس والفضول الكبيران لدى العقرب يجعلانه من أفضل الشخصيات التي تصلح كمحقق من بين الأبراج كلها. هو عن كل شخص. وعند الحاجة إلى إجابة ما فإن العقرب سوف يجد هذه الإجابة لك. ولكن لسوء الحظ العقرب يرى فقط الأشياء بالأبيض والأسود. دائماً يوجد لدى مولود العقرب جدول أعمال وغالباً ما ينجح في تحقيقه. يتحكم العقرب بمصيره وله طريق واحدة فقط في الحياة: وهي العيش على طريقته الخاصة. مواليد العقرب لا يعيشون الحياة ولكن يهاجمون هذه الحياة هجوماً. عندما يخسرون خسارة في هذه الحياة فلن يقوموا بإضاعة الوقت في الجلوس والعبوس ولكنهم يستمرون بالسير على دربهم وفي النهاية من المؤكدأنهم سوف ينجحون. غالباً ما ينجرف مواليد العقرب وراء عواطفهم ورغباتهم الشديدة. غالباً ما يراهم الآخرون كمستبدين. مواليد العقرب هم ممن يكتمون الأسرار ولا يعرف أولئك المحيطون بهم أعماق عواطفهم وفي حال حاول أحدهم سبر أعماق شخصيتهم فسيواجه بالحذر وسوف يبتعدون فوراً. يحب العقرب أن يتمم الأمر سواء كان هذا الأمر من صلب العمل أو من أمور التسلية واللعب. وفي الواقع لكي ينجز مولود العقرب الإنجاز الجيد لا بد من وجود منافس مضاد وهو عادة لا يقوم بالإهمال. من المؤكدأنه عند اعتراض العقرب أو الوقوف في وجهه سوف تكون ردة فعله شديدةً وبالحد الأقصى. إنه لا يترك أمراً أو يستسلم ومن الطبيعي في حال شاهدنا شخصا ًقد أخذ أمراً صعباً على عاتقه فهذا الشخص هو العقرب.
العقرب والحب
مظلم وغامض وهو بما أنه ممزوج بجاذبية شخصية لا تقاوم فسيولد سحراً لدى الجنس الآخر. هو مثير للرغبة الجسدية ويحتاج إلى شخص يتلاءم مع قدرته الرائعة في إيصال كل الأمور إلى أقصى حدودها وإلى أبعد الحدود. بالنسبة للعقرب المشاعر لديه عميقة وصفة الحدس لديه ستكون دقيقة بشكل ملحوظ لذا فأجهزة الاستقبال لديه ستلتقط الشريك المنتظر من النظرة الأولى. إلا أنه غالباً ما يرغب بالاحتفاظ بجزء من شخصيته في الزاوية الشخصية الخاصة لديه. سوف تكون ردة الفعل قوية عندما يحاول الحبيب الغوص في ذاته الخاصة. يمكن أن يكون العقرب مهيمناً ومتسلطاً بشكل غير عادي في علاقاته الشخصية وخاصة عندما يدرك العقرب بأن الشريك أضعف منه. المشكلة الكبيرة لديه هو إيجاد شخص قوي بما فيه الكفاية وفي الوقت نفسه يستطيع هذا الشريك العيش بأسلوب عاصف في الحياة حتى يظل كتحد ويظل محط اهتمام بالنسبة للعقرب ولكن عندما يجد العقرب الشخص المناسب فهو سيكون الشريك مدى الحياة.
المشاهير
مارتن لوثر- بيل جيتس- بيكاسو-كريستوفر كولومبوس- الأمير تشارلز-جولدي هاون-وفولتير.




طفل العقرب

يولد الطفل في برج العقرب مكتمل الصورة أكثر منه في الأبراج الأخرى , ويبدو أقوى عزماً وأهدأ نفـــساً من الأطفال الذين في مثل سنـّه . إن أول ما يلفت إليه الانتباه عيناه المتسلطتان على الرغم من ضعف الطفولة فيه وبراءتها . إذا لم تدرك والدته – على الأقل – صلابته ولم تعالجها من البداية بما هو أصلب أصبح أقرب إلى العقرب السام منه إلى الابن البار , وإذا لم تمنحه بالإضافة إلى صلابة المعاملة الحب الكافي تحوّل إلى ضب خائف مقهور . وهكذا نجد أن أمام الطفل المنتمي إلى برج العقرب طريقين أحدهما علوي والآخر سفلي – إذا جاز التعبير – وإن اختيار أحد الطريقين يتوقف إلى حد بعيد على نوع التربية التي يتلقاها منذ البداية .

يحتاج تـقويم هذا الطفل إلى يد من حديد وقلب ملآن بالحب والصبر . من الصفات التي يجب أن يعتادها منذ الصغر مراعاة الضعيف , واحترام القانون , وغفران الإساءة , وقبول الخسارة بروح رياضية بناءة . أما الصفات الأخرى التي تولد معه ولا تحتاج إلى الرعاية فهي الجرأة والصراحة والاستـقامة والجاذبية .

على الرغم من صراحته يرفض هذا الطفل الكشف عن جميع خصوصياته محتـفظاً ببعضها لنفسه , كما يرفض التخـّلي عن حاجاته وممتلكاته الخاصة مفضلا ً حفظها في مكان أو زاوية ما تخصه وحده دون أفراد العائلة . أما شجاعته التي لا تـُنكر فتجعله قادراً على احتمال الألم الجسماني الشديد دون أدنى خوف أو بكاء . أمر آخر لا يُنكر وهو إخلاصه لأهله وأصدقائه من جهة وتصلبه مع الآخرين وقسوته عليهم من جهة ثانية .

طفل برج العقرب أيضاً حاد الفكر والذاكرة يستوعب دروسه بسهولة عجيبة وخصوصاً متى وجد المعلم الجيد . بقليل من الإشراف والمساعدة يصل إلى القمة بين أترابه وزملائه . عيبه الوحيد ميله إلى التمرد على القانون في بعض الأحيان . يجب أن يتلهى عن ذلك بالرياضة والمطالعة وخصوصاً مطالعة كتب الكيمياء والفيزياء وقصص الأشباح والجن والسحرة وغير ذلك . من أحب الهدايا إلى نفس هذا الطفل مجهر يكتشف بواسطته حقيقة الأشياء .

تحت ستار الهدوء والبرود يخفي الطفل – العقرب شعور القلق الذي يساوره باستمرار . وبما أنه سريع الانفعال دون أن يُدرك الآخرون ذلك يتألم إلى درجة المرض إذا طرأ ما يُعكر صفو بيته وعائلته . ومع ذلك يُفضل أفلام الرعب وقصص الجن والسحرة كما ذكرنا قبلا ً . هذا وينجذب بشدة نحو مختلف العقاقير والأدوية , ولهذا السبب يجب أن تـُحفظ في مكان بعيد عن متناول يده .

يحلم طفل برج العقرب بأن يكون في المستقبل بحاراً أو إطفائياً أو مهندساً فضائياً أو رجل دين أو حاكماً أو حتى رئيساً للبلد . وعلى كل حال , مهما كانت أحلامه تلك , لا يجوز أبداً مقابلتها بالهزء والسخرية لأن في وسعه تحقيقها دون ريب . لكن يجب أن تقوم حدة اكتفائه بذاته وإهماله للآخرين كي يعلم قبل فوات الأوان أن أساس السعادة هو المشاركة في الرأي والمبادلة في العاطفة

انثى العقرب

ثـقتها واعتـــزازها بنفسها كبيران إلى درجة الشعور بالأسف لكونها امرأة , لا لأنها تكره أنوثـتها بل لأن الرجل عادة أكثر تحرراً وأوفر فرصاً . على الرغم من جاذبيتها المفرطة ترفض الاكتـفاء بدور الأنثى ليقينها أنها تستطيع أكثر من ذلك كثيراً . مهما يبدر منها من غرابة أو إهمال أو لا مبالاة , سواء في هندامها أو حديثها أو تصرفها , تبقى في نظر الجميع أصدق نموذج للمرأة الخطرة ذات العينين الآسرتين والمظهر الخفي . لقبها باللغة الفرنسية المرأة الخطرة " لافام فاتال " الذي يُعيد دائماً إلى الأذهان صورة الجاسوسة الحسناء ماتا هاري التي دوّخت فيما مضى جيوشاً وحكومات .
تجيد امرأة برج العقرب أدواراً مختلفة وتنجح في الوصول إلى أهدافها على الرغم من كل العقبات الصغيرة والكبيرة التي قد تعترض سبيلها . سلاحها الأقوى هو تلك الحاسة السادسة التي تملكها النساء بوجه عام وتتمتع هي بها بوجه خاص , الأمر الذي يُتيح لها أن تقرأ الأفكار وتستبق الحوادث وتحل ّ الألغاز كما لو كانت ساحرة حقيقية . ليس صعباًَ على مثلها الإيقاع بالرجل , أي رجل , ومع ذلك أكثر ما تكرهه في الرجال عامة الضعف . تـنجذب بالمقابل نحو الوسيم الطموح الشجاع الذكي المتعمق صاحب الإرادة الحديدية . وبكلام آخر ترفض أن تمنح قلبها إلا للرجل المتـفوق المدعو " سوبر مان " .
تــُـفضل هذه المرأة الزواج ممن تحب , فإذا لم تستطع ذلك لسبب أو لآخر اكتـفت بدور الصديقة أو الخليلة غير آبهة للرأي العام . وهي بمقاومتها ذلك الرياء الاجتماعي المعروف تثبت أنها أكثر فضيلة من العديد من الزوجات الشرعيات . من حسناتها العظيمة كزوجة عدم تمسكها بالقيادة على الرغم من كل المقومات التي تؤهلها لهذا الدور , وعدم ترددها في مساندة زوجها على طريق النجاح والشهرة . هذا من جهة , ومن جهة أخرى تغار على حبيبها بشدة ولكنها تتظاهر بالعكس . حب التكتم هذا يجعلها تحتـفظ بجزء من قلبها ومن تفكيرها لنفسها مع أنها في الحب وفية مخلصة إلى أبعد الحدود . من الصعب أن تجاريها أية امرأة أخرى في حدة العاطفة وعمقها . وهي كما تعشق بحدة تغار أيضاً بحدة وتكره بحدة دون أن يظهر عليها أدنى تغيير , لكنـّها عندما لا تعود تحتمل تنفجر كالقنبلة وتأخذ في تكسير كل ما يقع تحت يدها وتمزيقه وخلعه . ثم تستعيد بسرعة مذهلة رباطة جأشها وبرود مظهرها فلا يعود أحد يصدق أن تلك الأعمال تصدر عنها .
فضول المرأة التي تنتمي إلى برج العقرب يضعها في التجربة حيث تغوص أحياناً إلى أذنيها دون أن ينتابها شعور بالتردد أو الخوف . إن هدفها في الواقع الحصول على المعرفة التامة ولو نجم عن ذلك هلاكها . من الغريب أن تخرج في كل مرة أكثر قوة وصلابة . والأغرب من ذلك أن تصرفاتها لا تـُثير شكوك أحد كما لا تـُفقدها اعتزازها بنفسها . إذا أضفنا إلى هذه الصفات حب التملك المعروف عنها ندرك الأسباب التي تـقف وراء فشل الرجل في التحرر من سطوتها مهما حاول .
تنجح هذه المرأة في دور زوجة بحار أو جندي أو سياسي كما تنجح في إدارة بيتها الذي ينم في مجمله عن ذوق رفيع ونظام أكيد ورفاهية تامة . إنها أيضاً أم حنون على الرغم من برود مظهرها , تسهر على راحة أولادها وتـُنمـّي فيهم المواهب والميول , وتبث فيهم روح الشجاعة والإقدام والاتكال على النفس .
إنها بكلام آخر إنسانة مثيرة وخطرة في آن واحد , ترد على الإساءة بأضعافها وتأبى التخلي عمن تحب . إذا نجح الرجل في التحرر منها فعلا ً لا يُستبعد أن يجدها في أحلامه الليلة تلو الليلة . كيف ؟ لا نعلم . كل ما نعلمه أنها تشبه الجنيات والساحرات اللواتي نقرأ عنهن في الروايات أو نسمع بهن في القصص الشعبية

Mon Jan 29, 11:06:00 PM GMT+2  
Blogger عبدالله said...

من اجمل الحاجات ان اول بوست اتعرف عليه بيكي يكون بالجمال ده اول مره اقراك يا انجي بس اسلوبك جميل جدا بحس فيه انه منساب بسهوله من روح جميله رودود جميله و اسلوب ساخر
شكرا ليكي انك امتعنيا بالردود الجمليه و رسمتي بسمه صغيره في بدايه يوم واجمل رد طبعا بتاع امل عواد اهي دي مشكلة ان الناس تعرفك بقي كل الفضايح هتطلع
:))))))
تحياتي

Tue Jan 30, 08:35:00 AM GMT+2  
Blogger إنسان || Human said...

صدقيني ..حاجه حلوة أوس لما تلاقي حد تتقاسمي معه الذكريات ....التاج قد ايه جميل والعفويه هي أجمل حاجه فيه

Tue Jan 30, 10:36:00 AM GMT+2  
Blogger الزعيـمة said...

اية الردود العسولة دي يا سمورتي
بجد انتى زي السكر وضميني لنص الشعب البيقول عليكي عسولة

ويا سلام على المكرونة البشاميل
الانا بموت فيها ولقيت منال كمان وانتى وعاشقة الوطن وباين كتير اوي بيحبوها

بس خلى بالك مش تكترى من اكلها اوي انتى رياضية يا بنتي

لحسن لو كترتي منها بعد كدا حتدربي مصارعه وزن تقيل ههههههههههه


ارق تحياتي لاجمل سمورة فى مصر

Tue Jan 30, 10:57:00 AM GMT+2  
Blogger كلبوزة لكن سمباتيك said...

برج العقرب

اههه
علشان كده


قبلاتشي

Tue Jan 30, 01:18:00 PM GMT+2  
Blogger الدبور said...

سمراء النيل

طا طا طاااان
"موسيقي تصويرية من نوعيه اوبرا عايده "
كاميرا 1 : خش كلوز علي وش البطل
كاميرا2 : منظر جانبي للمعركه
-------
ثري تو وان اكشن
------

سمراء يا بنتي انت معزومه عند في المدونه و اللي الحمد لله افتتحتها ابقي شرفيني هناك !

"اصوات خيل في الخلفيه " دررجن دررجن دررجن

www.dabbor.blogspot.com

osama "dabbor"


ستووووب

فركش

Tue Jan 30, 04:48:00 PM GMT+2  
Blogger  بسمه عبدالباسط said...

بجد كلام جميل قوى وعرفنى بيكى أكتر
تقبلى تحياتى

Tue Jan 30, 11:47:00 PM GMT+2  
Blogger mariam said...

سمراء الجميله
انتى سكر
بجد دمك خفيف موت
الحمد لله ان لسه فى صحاب زيك انتى و امل
تحياتى

Wed Jan 31, 01:37:00 AM GMT+2  
Blogger شمعى أسعد said...

انجى

رائعة كالعادة

وحلوة قوى مفاجأة امل دى

البوست ده كان عايز بث مباشر :)

Wed Jan 31, 02:51:00 AM GMT+2  
Blogger بيجاسوس المصرى said...

ايه ده هو فيه ايه بالظبط

من ساعت ما دخلت البلد و ضرب النار شغال
و اسأل اية الحكاية يقولوا انجى قالت اسمك فى المدونة
و العيلة عملت حفلة و دبحنا الدبايح و كل ما اسأل يقولوا انجى قالت اسمك
و ان شاء الله هعمل التاج بس ما ينفعش دلوقتى لانى فى اجازة قصيرة فى القاهرة و اول ما ارجع اعمل التاج
تحياتى ليكى يا انجى
بجد و بدون نفاق انا سعيد بمعرفتك الطيبة و خاصة من اول بوست قرأته حسيت انك عندك قوة ارادة لا يستهان بها

و خلوا بالكم يا جماعة برج العقرب ده بيتنرفز بسرعة و اسألونى انا اعز الناس اللى اعرفهم برج العقرب
اللدغغغغة بالقبر ربنا يجعل كلمنا خفيف عليهم

و شكرا لامل عواد لاننا عرفنا المستخبى
ههههههههههههههههههة

بالحق يا انجى انا كنت عايز اضيف الاميل بتاعك بس بصراحة انا ما بحبش الرذالة على حد و يبقى مجبر
لو ينفع ابقى مشكروا جدا جدا و لو ماينفعش عادى جدا جدا برضه

تحياتى و شكرا

Wed Jan 31, 01:02:00 PM GMT+2  
Blogger micheal mohsen said...

أناعملت موضوع التاج دة عندي في البلوج بتاعي..يا ريت تنوريني يا انجي بالزيارة لان رأيك يهمني و انا علي فكرة حقرا اجاباتك بالتفصيل بس شوية كدة و أعلقك عليهم..تحياتي لكي

Wed Jan 31, 05:07:00 PM GMT+2  
Blogger The Eagles said...

لا خالص يا دكتورة
طبعا مش اقصد كدة خااااااااااااااااااالص بالتاكيد انتى عارفة انى كنت بهزر عادى خالص مش اقصد حاجة بجد
وعلى العموم ياستى حقك عليا لو كنت زعلتى وانا مش اقصد حاجة وحشة خالص خاااااااااااالص انا قصدى اهزر زى ما قلت والدليل على كدة انى كتبت بعدها هههههههههههههههههههههههه يعنى بهزر بجد واكيد كل اللى هيقراها هيقول كدة انى بهزر
يا جماعة احضرونا والنبى مش انا بهزر بردوا
انا مش عايزك تزعلى خااااااااالص منى يا ريت بجد

ثانيا:
انتى مش قولتى المكان فين لحد دلقوتى والميعاد فاضل عليه يوميم

ثالثا :
انتى ممكن تنورى المدونة بتاعتى
انا مستنى تعليقك على الليل الدافىء عندى


انا مش اقصد خاااااااااااااالص هاه مش تزعلى بقى




والسلام.........

Wed Jan 31, 06:34:00 PM GMT+2  
Blogger الملاح التائه said...

اجاباتك جميله
وبتبين شخصيتك المنطلقه المرحه
واللى بتميل للهزار والسخريه احيانا
الأسلوب الساخر
بس بتحبى تتكلمى كتييير
وبرضه كلامك زي العسل
لأنى واحد من نص سكان مصر
الى شايفينك عسوله
بااااااااااي

Wed Jan 31, 07:45:00 PM GMT+2  
Blogger smraa alnil said...

soul

ههههههههههه عجبك اوي
والله وانا كمان بحبك يا سول
برغم اني مش كلمتك بس انا بتعجبني كتاباتك اوي
بتدل علي انك بجد انسان
اخويا الصغير يعني ها
هههههههه
يوووووووو
سمعتها كتيييييييييييييييير ههههه

يارب يتقبل منك
ولك مثل ما دعوت به لي ويزيد
___________________________

ليندا

انا قلتلك اني هعمل التاج لما ظروفي تسمح
صح
وبعدين غيرانة من امل ليه بقي
دي فضحتني انتي غيرانه انها فضحتني يا ليندا
خلاص التوت خلص ومش بقيت اكله من ساعه ما خلصت كلية

Wed Jan 31, 11:10:00 PM GMT+2  
Blogger smraa alnil said...

تامر

اديني غمضت اهو
هيييييييييييييييييييه
طب والله حلوة اوي
بس انا بحب رقم 15 والرقم دة مش موجود في اللي اللي مكتوب
وبعدين يا تامر انت عارف اني علي طول مهمة يعني كل الاعمل دي تلائمني واكتر كمان ههههههههه
عشان تعرف بس اني متواضعه
عامة بجد انا فرحت اوي لاني مش اعرف حاجة عن موضوع الابراج دة غير اني برج العقرب
ربنا يخليك يارب ويكرمك
__________________________

عبد الله

لا سيبك انت من اجمل الحاجات زيارتك ليا بجد
ودي اول مرة تزورني فيها
شكرا ليك انت لانك بجد زورتني ونورتني
ههههههههههه انت فرحان انها فضحتني يا عبد الله ولا ايه
عامة ياريت تشرفني تاني انا حطيتلك لينك لمدونتك عندي

Wed Jan 31, 11:11:00 PM GMT+2  
Blogger smraa alnil said...

human

صدقني حاجة حلوة انك تشرفني
شكرا ليك اوي علي الزيارة وعلي كلامك دة بجد
ياريت تكررها تاني
___________________________

الزعيمة

ربنا يكرمك يا زعيمة يارب
ايوة ما احنا ناوين نعمل رابطة محبي المكرونة بالباشميل
ههههه
انتي عارفة ان مش بتفرق معانا الحاجات دي
يعني ناكل زي ما احنا عايزين
ههههههههههههههههههه حلوة موضوع مصارعة وزن ثقيل دي
هههههههههههههههه
ربنا يجبر بخاطرك يا رافعه من معنوياتي علي طول

Wed Jan 31, 11:13:00 PM GMT+2  
Blogger smraa alnil said...

سمباتيك

عشان كدة ايه بقي
انتي جاية تهدديني وتشمي يا سمباتيك ولا ايه
هههههههههه
اه عشان كدة
__________________________

الدبور

هههههههههههههههههههههههههههههههه
مبروك يا اسامة علي المدونة الجديدة وزرتها ويارتني ما زرتها لقيتني رقم 15 في التعليقات
ههههههههههه

Wed Jan 31, 11:14:00 PM GMT+2  
Blogger smraa alnil said...

bos bos

ربنا يكرمك يا قمر وشكرا علي متباعتك للمدونة
يارب تشرفيني وتنوريني دايما كدة
___________________________

مانو

انتي اللي عسولة والله
ربنا يكرمك يا مانو
بقالك فترة مختفية ليه

Wed Jan 31, 11:15:00 PM GMT+2  
Blogger smraa alnil said...

شمعي اسعد

انت اللي رائع بجد يا شمعي
شكرا لوقوفك جنبي كتير
هههههههههه اهو انا بقلق من بثك المباشر دة
ربنا يخليك ليا يارب وسلامي لفدويتي والمودام
___________________________

بيجاسوس المصري

ههههههههههه
انت جاي تخوف الناس عندي ولا ايه يا بيجو
بس انا فعلا بتنرفز بسرعه
شكرا لامل دة انا هموتها وافضحها

وطبعا يشرفني اني اعرفك يا بيجو دة عشان هاخدك مصلحة بس بما ان انت في بيطري عشان خاطر القط بتاعي
ههههههههه

هستني التاج بقي بتاعك لما تروح بلدكم
___________________________

مايكل محسن

بص بقي
عشان نبقي علي نور من اولها انا بتوه في مدونتك دي
والنبي تكتبلي لينك لمدونة ثابتة عندك عشان انا احترت
انت مين فيهم يا ابني
واكيد طبعا هكون عندك واقولك راي بجد
__________________________

the eagles

يا ابني خلاص حصل الخير
انا عرفت انك كنت بتهزر ومش في زعل ولا حاجة
انا مش زعلانة بجد
والله يا ابني مانا عارفة انا لحد النهاردة مش عارفة حاجة بس هي احتمال تتأجل ليوم الجمعه الجاية
مش دي اللي بعدها يعني
بس اكيد هكتب واقول
___________________________

حبيبها انا

انا عرفت انك مش بتحب الكلام الكتير بس معلش بقي هي جت كدة معاك
ربنا يخليك وياريت تبقي تنورني علي طول كدة
شكرا ليك بجد وتحياتي

Wed Jan 31, 11:16:00 PM GMT+2  
Blogger micheal mohsen said...

أنوج
اجاباتك لذيذة أوي زيك...بخصوص مدونتي..أنا عندي اتنين...نعمل اية بقي..فاضي..ههههههعشان أسهلها عليكي لما تلاقي اسم اللي بيعلق عندك مايكل تبقي دة مدونة
http://strugglingmichealitoo.blogspot.com/
و لما تلاقيني معلق باسم مايكل محسن تبقي دة مدونتي التانية
http://michealito.blogspot.com/
يا رب متكوني اتلخبطي زيادة
تحياتي

Thu Feb 01, 02:10:00 PM GMT+2  
Blogger مصطفى حسان said...

عثل والله عثل
إيه العثل ده كله
لكن أنا كان ليا سؤال ملح جدا مع علمي انه سؤال غبي خالص ومش وقته خالص بس استحمليني بقي
انا قريت عندك مصطلح غريب خالص anojعليا ودايما بقرأة وانا مش فاهم يعني ايه ؟؟
اعذريني اصل انا علاقتي اتقطعت بكل ما هو رياضي من وانا في تالته اعدادي واتقطعت برضه بكل حاجه مدورة

المصطلح ده هو الريشة الطايرة يعني إييييييييييييييييييه ؟
ومن قدم شيء بيداه التقاه وهنيا لك يا فاعل الخير والأجر والثواب عند الله
ثثثثثثثث

Thu Feb 01, 05:17:00 PM GMT+2  
Blogger ody911 said...

ههههههههههههه

أنا مش بتريق

بس بجد إيه الريشة الطايرة دى

عموما آسف يا جميل على التأخير دة

بس واللهى مش بأيدى

إنتى عارفة لما بسافر بقعد حوالى يومين نايم
دة فى الحالات الطبيعية
أما بقة المرة دى

فواحد صاحبى الله يكرمة بقة

خلانى أسافر من غير حجز
تخيلوا بقة واحد مسافر لمدة 13 ساعة واقف

ممكن ينزل شكلوا عامل إزاى

عموما منوا لله بقة

هبقى أحكيلكوا عنوا بعدين لما أروق كدة

متزعليش يا عسل

ماشى

يالة عادى بقة
أودى

Thu Feb 01, 06:42:00 PM GMT+2  
Blogger Ahmad Hegab said...

انا بحب سمرا اوى

و برضه نوجى لذيذ

انا بحب كرة الريشة على فكرة

25 سنة وانا 23 سنة يادوبك

Have Nice Day

و البوست جامد اخر حاجة

Fri Feb 02, 01:42:00 PM GMT+2  
Blogger smraa alnil said...

مايكل محسن

ربنا يكرمك يارب
ادعي عليك باه يا مايكل يابن ام مايكل
انت فعلا لخبطني زيادة
ارسي علي واحدة بس اكتب فيها بدل مانت ملخبطني كدة
عامة انا برضه وراك وراك
___________________________

darsh

لالالالالالالالا
انت اكيد بتهزر
مش عارف يعني ايه anoj

دة اسمي الدلع بتاعي انوووج
لا يمت باي رياضة بصلة
هههههههه
انت اكيد بتهزر
مصطلح الريشة الطايرة انا شارحاه في تعليق لمحمد ياسر
ابقي اقراه مش هقعد اششرح كل شوية

افتكر الجمايل دي بقي

Fri Feb 02, 03:23:00 PM GMT+2  
Blogger smraa alnil said...

اودي

حتي انت يا اودي
بقولك اه اقرا ردي علي تعليق محمد ياسر وانت تعرف ايه هي الريشة الطايرة دي
بلنسبة للتأخير ولا يهمك انا عارفة ان انت كنت مشغول
هههههههه عشان تجرب احساس الحصنا
وبعدين عشان تحرم تعتمد علي صحبك تاني
هههههه
عامة متخيلة شكلك عامل ازاي
انا لو منك اول حاجة اعملها لما ازل ادور علي صاحبك واقتله
ان شاء الله كله هيبقي كويس
انا والله مش زعلانة
___________________________

ahmed_h

وانا كمان حبيت اسم سمرا اوي والله
بس الاسم المقرب لقلبي انوج
وبعدين هو احنا بتفرق معانا اعمار
مش بعيد 25 من 23 ههههههه
ربنا يخليك بجد

Fri Feb 02, 03:23:00 PM GMT+2  
Blogger ody911 said...

أيوة يا أنجى وصلت خلاص

عرفتها يعنى

وبعدين ممكن ألعب اللعبة دى

بس بشرط

تكون مختلط

اموت أنا فى المختلط

هههههههههه

وعلى فكرة أنا معتمدش على صاحبى دة

دة هوة بس عرف غنى هسافر أسوان بعد العشاء إللى إتعشيتوا عندوا فى بيتوا الجديد هوة وزوجته العزيزة

وعرف بس إنتى التسكرة 90 ج

فقالى ياه تدفع تسعين جنية علشان تقعد 12 ساعة

ومين سمعك بقة

روحت ملقتش حجز خالص فى أى قطر

وطبعا علشان تحكمات الست ماما

إطريت أسافر واقف فى القطر

ويالة كلوا سلف ودين

أنا بس أرجع على خيير

وأنا هروح أفطر وأتغدى وأتعشى عندوا

أدبا لية


وشكرا على أول تعليق يا جميل

مش هنتقابل بقة

عموما لما أرجع من أسوان إن شاء الله نتقابل

ونشوف حكاية المختلط دى

ماشى

وعادى بقة
أودى

Fri Feb 02, 09:07:00 PM GMT+2  
Blogger frozen love said...

المرة دي اللي خلاني امضي متاخر اني كنت مسافر ولسة جاي..بس كويس اديني لحقت برضه

لسة عامله على مدونتي..التاج ده
انتشر انتشار رهيب..حتى اجابتك جامدة يا بنتي..طب اقولك اي..تحياتي

Sat Feb 03, 06:38:00 AM GMT+2  
Blogger smraa alnil said...

اودي

ههههههههههه
خلاص تعالي العب معايا انا مختلط ارميك علي الشبكة وامسك ان الملعب اللي ورا
ههههههههه

هههههههههههه كان العشاء الاخير دة ولا ايه

وهو بيقر عليك دة ولا ايه
ربنا يكون في عونك في تحكمات الست الوالدة
معلش يا ابني هانت

تفطر وتتغدا وتتعشا بس
دة انت تبات عنده وتخليه يصرف عليك لمدة 12 يوم
انا بهدي النفوس يعني يا اودي
ان شاء الله هتقابل واشوفك في اجتماع الدونين
تقريبا الناس كلها هتلعب مختلط
هههههههههههه
سلام يا قمر
___________________________

frozen love

(وش واحدة بتجز علي سنانها)
طب اقولك ايه
المرة الجاية هرفدك لو اتاخرت تاني

مش تقول حاجة كفاية زيارتك ليا
انا حاسة ان المدونين كلهم عملوا التاج دة

يا ابني والله انت اللي جامد

Sat Feb 03, 05:35:00 PM GMT+2  
Anonymous Anonymous said...

men elklam elly sma3to 3ank
wemn rdoodk 3la alas2la
enty to7faa bgad
welmafrod ykon galek 3la al2al 100 3areees
bass seebk enty lazmk amir mish insan 3ady
beltawfee2 ya benty
insha2 allah tla2eeh kareeban

Thu Feb 22, 01:47:00 PM GMT+2  
Blogger smraa alnil said...

ahmed

msh 3arfa 2a2olk eh
bas 100 3arees kter 3alia awi
msh hal72 2an2y menhom
rabna ykrmk ya rab
shokran 3la klamk el gameel

Mon Mar 05, 05:19:00 PM GMT+2  

Post a Comment

<< Home