قوية قوية

كل واحد فينا بتجيلو نقطه ضعف بحس فيها انه ممكن يموت وانه لوحده

بس تعالوا نسترجع حياتنا كدة واللي فات

هنكتشف حاجة مهمة ممكن نكون غايبين عنها ومش واخدين بالنا منها او نسينها

البوست اللي فات انا حسيت فيه اني بقع

لحد ما قريت التعليقات

كل واحد منكم بجد وقف جنبي واللي كلمني وساعدني اخرج من الي انا فيه

بس برضه كان ناقصني احس ان اد ايه انا قوية

لحد ما قريت تعليق جيرينمو البنت دي انا يمكن مش شفتها كتير

بس هي من ضمن الناس اللي سافرت الاردن للاشتراك في السابلة

بغض النظر بقي ايه هي السابلة

بس في الاخر بتاخد لقب مغامر يعني انا مغامرة

جيرينمو فكرتني اد ايه انا قوية واد ايه انا قادرة اني اتخطي صعاب كتيرة اوي

يمكن مش في حد يقدر يعملها غيري

اد ايه مرت عليا اوقات كتيرة اوي رسمت فيها ابتسامة علي وش طفل صغير او ريحت حد كبير وساعدته وكسبت دعوة

الحاجات دي برغم بساطتها بتريحك وبتحسك انك ليك لزمة في الحياة

لازم بجد كل واحد فينا برغم مشاكله يفتكر الحاجات البسيطة دي

جيرينمو خلتني ارجع لصوري وانا في الاردن وافتكر البلاوي اللي كنت بعملها هناك

اد ايه كانا صابرين برغم تعبنا علي حاجات كتير واهما الجوع اللي كان ازمة بلنسبة ليا اكيد

بعد يوم طويل بيبتدي الساعه 5 ونص الصبح والغدا بيكون الساعه 2 او 3

اد ايه كنا بنرسم ابتسامة برغم تعبنا طول اليوم ومع ذلك بنضحك ونلعب

علي فكرة انا اللي ورا البنوتة دي

اد ايه كنا بنعمل خدمات ونساعد العواجيز اوي علي العلاج المجاني

بجد حسيت بقيمتي اوي لما كان يجيني رجل عجوز او ست كبيرة وامسك ايديهم واخش بيهم عند الدكتور واقعدهم ونصيبي يبقي ابتسامة رضا ودعوة تمام

بنسي بيها هموم الدنيا وتعب الايام الي عشتها

لازم نساعد غيرنا حتي لو مش طلب

الحاجات دي هتفرق معاكم اوي نمد ادينا لغيرنا عشان اكيد هتبقي سبب علامة رضا علي وشك في يوم من الايام

عمر ما هنسي اهم يوم صعب مر عليا وهو تسلق اعلي جبل في الاردن هو جبل ام الدامي

اد ايه كان صعب وخطير بس اد ايه قويت في نفسي عشان نطلعه اد ايه كان عندي ارادة قوية اوي

اني اتخطي اصعب حاجة

لازم كل واحد فينا بجد اي كان عنده شئ صعب هو عمله ومر بيه وعداه

لازم بقي نفتكر الموقف دة عشان نقول دة يجي ايه جنب اللي حصلي دلوقتي

دة كان بيبقي منظرنا بعد كل تمرين وبعد كل يوم شغل

ومجبرين انا نقعد لغاية بليل نقدم تقارير اليوم وتقييم القائد علينا

يمكن يمتد لحد الساعه واحدة ونص بليل

اي نعم كلنا بنبقي قاعدين نايمين والقائد بيخلينا نقوم نزحف زي الجيش تمام بس كان حلو

اد ايه كنت ببقي تعبانة اوي بس بقاوم في نفسي وبئاوح

اكيد انتو كمان كدة

لازم اكيد كان في شئ مخليكو تعبانين بس بتئوحوا

هي دي بتبقي نقطة الارادة بتاعتنا ان في شئ تاعبنا بس مجبرين علي الاستمرار فيه

اد ايه سعادتي لما كنت ارسم لابتسامة للعيال دي واديلهم لبس واكل ونلعب مع بعض

ناس فقيرة بجد

بس ياااااااااااه ببقي طايرة جدا لما الاقي البنت او الولد خد الحاجة ني وهو بيضحك ويجري علي زمايله ويقوله الحق هادي المرة معها ملابس سرع مشان تاخد منها

ويجيلي وهو مكسوف واقوله هات بوسة الاول وانا اديك حاجة حلوة

انا كنت دايما بخاف من الادور العاليا

بس هتفضل خايف لامتي

الخوف جزء لا يتجزء من حياة اي حد فينا بس لازم نغامر عشان نتغلب

اكيد لازم تتغلب علي خوفك انا عملت كدة يوم ما عملت انزال جبلي من فوق 60 متر تقريبا

يا لهوووووووووي كنت مرعوبة

بس اد ايه حسيت اني جامدة بعد ما نزلت والناس كلها سقفتلي

كنت حاسة بالفخر قبل ما انزل وانا بصرخ باعلي صوتي وبقول

انا المغامرة انجي من سابلة الحسن 2004

من جمهورية مصر العربية

وطبعا مش نسيت اني اتشاهد واقول للظابط اللي ادامي وصيتك امي والنبي يا كابتن

مش هنسي ان الظباط هناك علموني اني ازاي اتعب وافتخر اني اتخطيت الصعاب واني يوم ما وقعت في مشكلة هناك مش في حد ساعدني بس كانت النتيجة انه خلاني اقعد في وضع 6 استعد وغرقني بمايا ساقعه وخلاني اعمل دحرجات علي الطين لحد ما بقيت انيل من الي في الصورة اللي فوق دي

وقالي تعبتي ولو كنت قلت اه كان هيزود في العقاب

النتيجة اللي طلعت منها كالاتي

ان اي كانت المشاكل اللي بمر بيها ممكن الاقي اصعب منها واكيد هترهقني

عشان كدة كان لازم اشوف الاصعب عشان تهون مشكلتي الاولانية

عشان كدة عقابي كان بيبقي اكبر من الي بمر بيه

كل دة انا كنت ناسياه

وانتو كمان مش لازم تنسوا ابدا ان في حاجات اقوي مننا كلنا

مش هنسي الهتاف بتاع الصاعقة الاردنية وانا بقوله باعلي صوتي

صاعقة صاعقة صاعقة شعاار

صاعقة صاعقة صاعقة الله

تضحية فداء مجد

قوة فتوة حارقة نار

نار لهيب حارقة همة

همة عزيمة جارفة اسود

اسود حمر كاسرة الله

جيرنيمو بجد انا مديونة ليكي جدا بانك فكرتيني اني انا قوية

انتي فعلا مغامرة السابلة عن حق

انا كنت ناسية

بس فكرتيني اني مغامرة وقوية كمان

بجد شكرا ليكي

وشكرا للي وقف جنبي واتصل بيا