اتحدوا يا نساء مترو الانفاق

السلام عليكم

يمكن تكون دي اول مرة اكتب عن شئ حصل ليا دايما بكتب شعر وكلام وخلاص ما هو اي حاجة بقي

لكن غاظني اوي يوم حصلي قلت لازم اقوله

كان يوم اتنين وهو يوم باين من اوله

صحيت مقريفة ومش عارفة السبب وكمان متأخرة علي شغلي

يا نهار كحلي كمان مش لاقية هدومي

اديها ترنج واقلب

وبالفعل لبست الترنج ونازلة بتدحرج علي السلاالم وبجري في الشارع

وجاءت اللحظة الحاسمة الا وهي ركوب عاشقتي الاولي والاخيرة مترو الانفاق

لاني زي ما قلت قبل كدة اعتبر من كبار زواره

قرفانه بقي

اقوم اعمل ايه رحت مطلعة نوتة كدة وبهبل فيها وعملانة اقرا اي كلام اي حاجة بقي

تقوم ست كبيرة كدة و عسولة يعني بترمي السلام علينا رحنا رادين السلام

الست كانت ماسكة ورق وبتقول علي حياء المرأة اللي مش بقي موجود دلوقتي

وبتقول احاديث صحيحة كلامها من الاخر كان حلو اوي شدني انا شخصيا

سبت اللي بعمله وسمعتلها

ولقيت بنات وقفوا ادامها بيسمعهوها ومن ضمنهم بنات من الاخوة المسيحيات

لان كلامها كان بصفه عامة علي اي بنت

قوم ايه بقي

تجيلك واحدة تقول: انتي يا مدام قبل ما تكملي حديثك انا ليا استفسار

انا بقي بيني وبين نفسي: اللهم صلي علي النبي كلام الست هيبقي ايه اوعي والناس هتستفسر وتسال

فالست الطيبة ردت : اتفضلي يا مدام

تقوم الهانم قايلة ايه بقي: (بحدة كدة شوية) : انتي شايفة ان المكان دة مكان مناسب لتلقي الامور الدينية اسمحيلي اقولك ان انتي مش بتفهمي

الله الله الست دي بتخبط ليه الله يخربيتك

دة اللي هو انا طبعا اللي بقول كدة

قالتلها :انا مش بدي دروس دينية انا بتكلم بصفة عامة وبستند علي كلامي باحاديث نبوية والقران الكريم

وفجأة ايها السادة" جماهير من الشعب لاول مرة يتحدوا في محطات مترو الانفاق ويتفقوا علي ان يهاجموا هذا المرأة الشريرة

وهي هتسكت لا طبعا صوتها علي اوي وبدئت تذم في كل واحدة وصاحبتكم بقي قاعدة متفرجة وساكتة

ال ايه حجتها انها مش عارفة اللي بتتكلم دي مواصفاتها ايه ولا معاها ايه عشان تتكلم عن الدين

جت واحدة من المحاربين: يا مدام عيب احنا معانا اخوة مسيحيات يقولوا ايه علينا

قالتها وقد اعلنت الحرب علي نفسها :ما هما عارفين احنا ايه دة هما افضل منا مبيكلموش في المترو عن دينهم ومش بيعملوا دعوي وفتنه

لحد هنا بقي وفرمل يا عم الحاج

سبوني عليها لاموتها

واتنرفزت ورحت قايله بصوت عالي : ايه الست دي انا رايحالها

لقيت بنتين مسكوني من دراعي ولا يا انسة خليكي انتي الكبيرة كبري دماغك الناس بترد عليها

قلتلهم لا يا انا يا هي في المترو دة

يا انسة ارجعي

لا سبوني انا مش هعملها حاجة انا هعرفها غلطها بس

رحتلها بقي وانا لابسة الترنج وقفشة القفشة التمام

:طبطبت علي دراعها وكل اللي قلته كالاتي

يا مدام الرسول صلي الله عليه وسلم قال " من راي منكم منكرا فليغيره" اي كانت وسيلة تغيره للمنكر دة الرسول مش حط شروط ولا مواصفات اللي يغير المنكر الست مشكورة لقت كل واحدة فينا في موال اللي بتقرا حاجة مالهاش لزمة اللي هوانا طبعا واللي حاطة ام بي 3 في ودنها واللي بتتكلم في الموبيل والي الي

هي شافت ان دة نكر فحبيت تغيره

غلطت انا كدة بقي

مسلمتش

قالتلي واللي بتذااكر مش ذكريتها ليه واللي بتكلم جوزها واللي بتكلم امها مش ذكريتهم ليه استغفر الله العظيم منك يا ناااااااااس

قلتلها: انتي فيه ايه اهدي كدة واستهدي

راحت مصطداني من ضمن الجماهير الغفيرةوسالتني سؤال بنت اللذينا

قالتلي وبمنتهي الدهاء :علي كدة بقي لو واحدة مسيحية قالت الكلام دة كله هتاكليها

لو انتو مكاني هتعملوا ايه

ااااااااااااااه هاكلها

ودة كان ردي ايها السادة عليها حسيت اني دراكولا

زي ما هي هتاكلني لو جيت وقلت ان دينها في حاجة غلط في وسط المترو لكن انتي انسانة مش بتفهمي بتغلطي في ايه ومين انتي انسانة مش فهمة حاجة

وحانت لحظة اقلاعي من متعه الخناقه التي افرغت فيها ربع شحنة القرف

واخر حاجة سمعتها عليا

حسبي الله ونعم الوكيل

اي نعم قرفي كمل لما رحت شغلي لاني اتأخرت علي المحاضرة اللي بديها

واي نعم كان منظري وحش ادام الدكتورة بتاعت محاضرة الدراسات العليا لاني ضيعت اجندة الغياب بتاعتها

واي نعم لقيت ان عليا 8 ابحاث لازم يخلصوا قبل شهر 1

يعني كان يوم فله

واهي اي حاجة بقي