Saturday, December 02, 2006

اتحدوا يا نساء مترو الانفاق

السلام عليكم
يمكن تكون دي اول مرة اكتب عن شئ حصل ليا دايما بكتب شعر وكلام وخلاص ما هو اي حاجة بقي
لكن غاظني اوي يوم حصلي قلت لازم اقوله
كان يوم اتنين وهو يوم باين من اوله
صحيت مقريفة ومش عارفة السبب وكمان متأخرة علي شغلي
يا نهار كحلي كمان مش لاقية هدومي
اديها ترنج واقلب
وبالفعل لبست الترنج ونازلة بتدحرج علي السلاالم وبجري في الشارع
وجاءت اللحظة الحاسمة الا وهي ركوب عاشقتي الاولي والاخيرة مترو الانفاق
لاني زي ما قلت قبل كدة اعتبر من كبار زواره
قرفانه بقي
اقوم اعمل ايه رحت مطلعة نوتة كدة وبهبل فيها وعملانة اقرا اي كلام اي حاجة بقي
تقوم ست كبيرة كدة و عسولة يعني بترمي السلام علينا رحنا رادين السلام
الست كانت ماسكة ورق وبتقول علي حياء المرأة اللي مش بقي موجود دلوقتي
وبتقول احاديث صحيحة كلامها من الاخر كان حلو اوي شدني انا شخصيا
سبت اللي بعمله وسمعتلها
ولقيت بنات وقفوا ادامها بيسمعهوها ومن ضمنهم بنات من الاخوة المسيحيات
لان كلامها كان بصفه عامة علي اي بنت
قوم ايه بقي
تجيلك واحدة تقول: انتي يا مدام قبل ما تكملي حديثك انا ليا استفسار
انا بقي بيني وبين نفسي: اللهم صلي علي النبي كلام الست هيبقي ايه اوعي والناس هتستفسر وتسال
فالست الطيبة ردت : اتفضلي يا مدام
تقوم الهانم قايلة ايه بقي: (بحدة كدة شوية) : انتي شايفة ان المكان دة مكان مناسب لتلقي الامور الدينية اسمحيلي اقولك ان انتي مش بتفهمي
الله الله الست دي بتخبط ليه الله يخربيتك
دة اللي هو انا طبعا اللي بقول كدة
قالتلها :انا مش بدي دروس دينية انا بتكلم بصفة عامة وبستند علي كلامي باحاديث نبوية والقران الكريم
وفجأة ايها السادة" جماهير من الشعب لاول مرة يتحدوا في محطات مترو الانفاق ويتفقوا علي ان يهاجموا هذا المرأة الشريرة
وهي هتسكت لا طبعا صوتها علي اوي وبدئت تذم في كل واحدة وصاحبتكم بقي قاعدة متفرجة وساكتة
ال ايه حجتها انها مش عارفة اللي بتتكلم دي مواصفاتها ايه ولا معاها ايه عشان تتكلم عن الدين
جت واحدة من المحاربين: يا مدام عيب احنا معانا اخوة مسيحيات يقولوا ايه علينا
قالتها وقد اعلنت الحرب علي نفسها :ما هما عارفين احنا ايه دة هما افضل منا مبيكلموش في المترو عن دينهم ومش بيعملوا دعوي وفتنه
لحد هنا بقي وفرمل يا عم الحاج
سبوني عليها لاموتها
واتنرفزت ورحت قايله بصوت عالي : ايه الست دي انا رايحالها
لقيت بنتين مسكوني من دراعي ولا يا انسة خليكي انتي الكبيرة كبري دماغك الناس بترد عليها
قلتلهم لا يا انا يا هي في المترو دة
يا انسة ارجعي
لا سبوني انا مش هعملها حاجة انا هعرفها غلطها بس
رحتلها بقي وانا لابسة الترنج وقفشة القفشة التمام
:طبطبت علي دراعها وكل اللي قلته كالاتي
يا مدام الرسول صلي الله عليه وسلم قال " من راي منكم منكرا فليغيره" اي كانت وسيلة تغيره للمنكر دة الرسول مش حط شروط ولا مواصفات اللي يغير المنكر الست مشكورة لقت كل واحدة فينا في موال اللي بتقرا حاجة مالهاش لزمة اللي هوانا طبعا واللي حاطة ام بي 3 في ودنها واللي بتتكلم في الموبيل والي الي
هي شافت ان دة نكر فحبيت تغيره
غلطت انا كدة بقي
مسلمتش
قالتلي واللي بتذااكر مش ذكريتها ليه واللي بتكلم جوزها واللي بتكلم امها مش ذكريتهم ليه استغفر الله العظيم منك يا ناااااااااس
قلتلها: انتي فيه ايه اهدي كدة واستهدي
راحت مصطداني من ضمن الجماهير الغفيرةوسالتني سؤال بنت اللذينا
قالتلي وبمنتهي الدهاء :علي كدة بقي لو واحدة مسيحية قالت الكلام دة كله هتاكليها
لو انتو مكاني هتعملوا ايه
ااااااااااااااه هاكلها
ودة كان ردي ايها السادة عليها حسيت اني دراكولا
زي ما هي هتاكلني لو جيت وقلت ان دينها في حاجة غلط في وسط المترو لكن انتي انسانة مش بتفهمي بتغلطي في ايه ومين انتي انسانة مش فهمة حاجة
وحانت لحظة اقلاعي من متعه الخناقه التي افرغت فيها ربع شحنة القرف
واخر حاجة سمعتها عليا
حسبي الله ونعم الوكيل
اي نعم قرفي كمل لما رحت شغلي لاني اتأخرت علي المحاضرة اللي بديها
واي نعم كان منظري وحش ادام الدكتورة بتاعت محاضرة الدراسات العليا لاني ضيعت اجندة الغياب بتاعتها
واي نعم لقيت ان عليا 8 ابحاث لازم يخلصوا قبل شهر 1
يعني كان يوم فله
واهي اي حاجة بقي

Labels:

28 Comments:

Blogger islamz said...

ههههههههههههههههه... مخبيه الهدوم بتاعتك ولا ايه .. ولا اتسرقتى فى بيتكو :]

انا اكره ما عليا مترو الانفاق ده بس يلا مش موضوعنا ..

بالنسبة للموقف ده بيتكرر كتير .. فى ناس من اللى بيتكلموا دول بعضهم بيفتى ويالف فى الدين .. وبعضهم كلامه صح .. وبما ان اللى بيفتوا اكتر من اللى بيتكلموا صح .. فالناس بقي بينهم وبين اى حد حد يتكلم فى الدين فى غير اماكنه عداوة .. واللى يقولك ده من الاخوان واللى يقول ده ارهابي وعامل خلية .. خلية مييين يا بنى ادم جاتك خلية مليانة نحل تقرصك فى نافوخك ...

فعشان كده الواحد زهق من الناس اللى ما بيصدقوا يتخانقوا دول ..

بس انتى شكلك اكلتى الست اللى كانت معترضة دى ..
:] بس جدعة

وابقي دورى على الهدوم كويس المرة الجاية ومتتأخريش على شغلك ...

:]

تحيااااتى ... والسلام ختام لصديقتنا الجدعة اوى

:]

Sat Dec 02, 05:53:00 PM GMT+2  
Blogger smraa alnil said...

هههههه لا يافالح مش مخبية هدومي بس لما تكون صاحي بضرب الجزم وصاحي مقريف لو ادامك ديناصور مش هتشوفه
وبعدين لو سمحت مش تغلط في وطن مترو الانفاق دة عالم لوحده
ولو قعدت اكتب اللي بيحصل فيه من هنا لحد ما ما يفتتحوا الخط الرابع مش هخلص
اللي انا بتكلم فيه قمع الحرية للطرفين
يعني واحدة بصراحة مقلتش حاجة غلط وبهداوةتخلي قلبك كد يتشرح تروح الست دي واكلاها يا عيني
الطرف التاني المفروض تتكلم باحسن من كدة
الفكرة هي قمع اي وسيلة للنصح والرشد للصح اي كانت وسيلته
اكلتها؟؟؟؟ دة انا خليتها تدعي عليا بس سيبك انت ولا همني
متاخرش علي شغلي دي بقي فدي عادة موروثة فيا منذ عهد الفراعنه
وطبعا جدعه

Sat Dec 02, 06:55:00 PM GMT+2  
Blogger ادم المصري said...

هههههههههههههههههههه

ياعيني معلشي ياجميل تعيشي وتاخدي غيرها

كويس انها ما ضربتكيش بحاجة


بس بالنسبة للناس اللي فعلا بتقول وعظ في المترو بقيت ظاهرة


لن اتكلم عن رايي او راي حد المهم اني صادفت كتير من هؤلاء

يبدا بصوت منخفض جا موجها الحديث بلغة الخطاب الجماعي الي احد اصدقاءه المرافقين

ثم ما يلبس ان يعلوا صوته ويوجة خطابة لكافة الركاب

وعلي اثر ذلك علي جميع الركاب السكوت وعدم الهمس حتي يتسني للباقي الاستماع


ولو تصادف وجود مسيحين غير راغبين في السماع فان الحل الوحيد هو النزول من القطار

Sun Dec 03, 12:41:00 PM GMT+2  
Blogger 3rby said...

الست اللي كانت بتتخانق غلطانة في طريقة الكلام لانها قليلة الادب
بس انا مش شايف ان الام بي سري فيه عدم حياء
ولا القرائة
يعني اللي بتسمع ام بي سري ديه مش بتتفرج علي فيلم اباحي

وبتقوليلي ماليش في الكلام ده؟

ههه
عالعموم الاختلاف في الراي لا يفسد للود قضية

Sun Dec 03, 02:23:00 PM GMT+2  
Blogger elkamhawi said...

انا بركي المترو بس مش كتير واحسن حل فى الحالات اللى زى دى ابدى بالضرب اهى قلمين فى شلوطين والناس هتحوش وتبقى انتى المنتصرة عشان الكلام بيجيب صداع وانتى مكنتيش ناقصه

Tue Dec 05, 04:03:00 AM GMT+2  
Blogger الزعيـمة said...

موضوع الفتوي دا سلاح ذو حدين

يعني ممكن الست تكون فعلا عارفة بعض الاحاديث الصحيحة وتقف تقولهم وتدعو الى الله بهدوء وبالموعظة الحسنة وهنا مش يبقي فية مشكلة

بس ممكن برضة واحدة تعد تفتي وتقول كلام غلط وتلخبط فى الدين وهنا المشكلة

يعني مش الصح برضة ان اى حد واقف فى اشارة ولا طابور جمعية ولا اى مصلحة حكومية ولا مترو يلاقي القايم عامل فيها مرشد ديني ومفتي الاعده

فية ناس غير مؤهلة فعلا ولا اعتقد ان اى حد ممكن يعد يتكلم فى الطب او القانون لكن الناس كلها باه تتكلم فى الدين على هواها

فية بعضهم بيصيب والاكثر بيبوظ الدنيا

Tue Dec 05, 11:40:00 AM GMT+2  
Blogger Amr Ahmed said...

هاااااااي سمراء

بصي صح هما الاتنين معاهم حق


الاولي بتحاول تدعي لربنا بهدوء وسهولة

وتاخد ثواب

و الثانية برضو صح لان لكل مقام مقال

يعني المترو وسيلة مواصلات وليس دار عبادة


وبعدين كده يعتبر فيه اجبار ان الناس تسمعها


افرضي حد مش عاوز يسمع لاي سبب وبغض النظر عن الاتفاق معاه او الاختلاف


فده حقه ,افرضي مثلا حد بيذاكر هي بتجبره انه يحتر كلام ربنا فايسمعلها


المهم بقي ايه حكاية التريننج سوت اللي انتي رحتي بيه الجامعة ده


يا سلام الواحد يلاقي معيدة داخلة عليه بتريننج


يللا يا شباب المحاضرة النهاردة في الملعب


وتحية لرواد مترو الانفاق


باااااااااي

Wed Dec 06, 06:10:00 PM GMT+2  
Blogger المٌهَــــاجِر المَصْـــــــرى said...

جدعـــــه يا سمــراء
عمــر الشقى بقى
هى موته ولا اكثر

Wed Dec 06, 09:55:00 PM GMT+2  
Blogger IBN BAHYA said...

تدوينه جلوه وموقف عجيب شويه مش عارف لو كنت مكانك كنت أعمل إيه .. بس فيه ناس كده غاويين مرازيه وبيلقحوا جتتهم على العالم .. مالها هي ومال اللي بيدعو ولا يوعظ حد قالها نزلي الشياطين اللي راكبين راسك ؟؟ ولا شياطينها زعلوا ؟؟؟ بصراحه بقت موضه دلوقت إنك تلاقي ناس شياطينها طالعين بره وبيصرخوا في وشك .. ناس مش مستحمله تسمع كلمه من أي حد .. عموما ربنا يجزي كل واحد وواحده قاصدين خير ويبعد عنهم الشياطين .. أرق أمنياتي

Wed Dec 06, 10:14:00 PM GMT+2  
Blogger شجره الدر said...

هاى ياسمارا
على فكره المترو ده بقى حكايه وبما انك من رودان وطن المترو على رايك فأكيد انتى عارفه البلاوى اللى تحت-الانفاق يعنى-والخناقه دى حاجه بسيييييطه بالنسبه للى بنشوفه كل يوم
بس ولا يهمنا -لكن على العموم انا شايفه ان الموضوع مكانش مستاهل خناقه يعنى كل واحد له رايه فى اللى يحب يسمع وفى اللى مش عايز هانغصبهم يعنى هما مش عايزين المعروف يبقى صراحه مايستحقوهوش
احييكى على شجاعتك واسلوبك الجميل الوقت مااسعفنيش اقرا الا البوست ده واللى قبله هابقى اجى هنا كتير

Wed Dec 06, 10:52:00 PM GMT+2  
Blogger smraa alnil said...

ادم تضرب مين دي
دة انا كنت فعصتها صباعي الصغير نزلتها اطفال انابيب
المبدأاللي انا بتكلم عليه هو ان الست مش اجبرت حد انه يسمع ليها بس الطريقة اللي اتكلمت بيها الست التانية كانت فظيعه
اهو يوم وعدي والعاقبة لكم في المسرات

Thu Dec 07, 12:16:00 AM GMT+2  
Blogger smraa alnil said...

3rby
انا مش قلت ان الام بي سري فيه حياء
انا قلت جايز ان الست كانت شايفاه منكر وحبيت تغيره
ولا القرايا كمان
يعني مثلا بدل ما واحدة زي كانت بتقرا في حاجة مالهاش لزمة
وفي غيري اللي بيقرا في قصص ميكي او عبير يعني كنا ممكن نقرا اذكار الصباح ونستغفر ربنا علي اللي احنا بنهببه في حياتنا
فهمت

Thu Dec 07, 12:21:00 AM GMT+2  
Blogger smraa alnil said...

el khamhawi

تصدق فعلا انا مش كنت ناقصة
بس ساعتها مش هبقي منتصرة بس دة انا بالقرف الي كنت فيه
كنت هموتها
سعدني تعليقك واتمني تكرار الزيارة


.................................

الزعيمة


انا مش بقول ان واحدة منهم صح
بس لما تكوني شايفة ان واحدة منهم صح والتانية شريرة جدا
يبقي ليكي حق تتخانقي
انا معاكي ان مش اي حد يقف في اي حتة ويتكلم عن الدين
بس تفتكري احنا لو مش اتكلمنا خالص هيبقي حالنا عملان ازاي
وهتسمعي الحاجات دي فين

Thu Dec 07, 12:26:00 AM GMT+2  
Blogger smraa alnil said...

amr ahmed

اهو انت كدة قربت تفهم
هههههههههه
انا معاك ان المترو مش وسيلة عبادة
بس يمكن الموضوع مختلف بالنسبة للبنت عن الولد
يعني انت بتروح تصلي الجمعه بتصلي في المساجد تقريبا بيبقي عندك مجال انك تعرف دينك كويس
لكن البنات بصفة عامة في امور كتيرة اوي مفتقدينها اكيد مش هجبرها تروح مسجد مثلا
عشان تعرف
عشان كدة الناس الكبيرة عارفة دة وبتحاول توصل اي حاجة
والرسول قال بلغوا عني ولو ايه

Thu Dec 07, 12:29:00 AM GMT+2  
Blogger smraa alnil said...

المهاجر المصري
انا بجد مبسوطة لزيارتك دي اللي بتمني انها تتكرر

وعلي رايك هي موتة ولا اكتر


..............................

ibn bahya


هي فعلا زي مانت قلت ان عندها شياطين اعوذ بالله
شكلها فعلا كان غريب وهي بتتكلم ودة اللي حفزني اني اتخانق
ربنا يحمينا منهم يارب
ياريت تكرر زيارتك ليا تاني

Thu Dec 07, 12:31:00 AM GMT+2  
Blogger smraa alnil said...

شيكولاتياية

يا سيتي انتي تشرفي في اي وقت
دة انا والله كنت مبسوطة بيكي لما قريت تعلقيك
انا عارفة ان دي حاجة بسيطة مقارنة باللي بيحصل في المترو
بس تداخلات الشعب وقفت لها كالبنيان المرصوص
ههههههههههه
يعني الناس هما اللي كبروا الموضوع
الضغط وحش اوي يا اختي

ومستنياكي تقري باقي البوستات وتقوليلي رايك ايه
مستنايكي ها

Thu Dec 07, 12:34:00 AM GMT+2  
Blogger albida said...

ايه ده يا ستى؟!! يعنى أنا أول مرة أجى عندك.. ألاقى خناقة كده
:)

أنتى هتقوليلى على المترو وعاميله السودا!! ده ذنب عليا يا ماما كل يوم رايح جاى

الجميل فى المترو أنه تحسيه فسحة متكاملة.. يعنى يعوضك عن كل حاجة
شوية تسمعى أتنين قاعدين ينموا فى الناس وبعد كده واحدة قاعدة تشتكى من القوطة وسعرها اللى نط فى السما... تروح بعد كده واحدة قايمة تتكلم فى الدين, بعديها بشوية تلاقى واحدة ماشية تبيع شربات وأقلام كحل..... والله عجب فعلا!!

وبالنسبة لموضوع الخناقة فالست اللى كانت بتتكلم فى الدين طبعا مش غلطانة.. وطنط التانية دى لو فى كلمتين محشورين فى زورها كان المفروض تستنى لحد لما الست تخلص وبعد كده تقولها وجهة نظرها بينهم وبين بعض

المفروض لو بنحاول نعترض على حاجة أو نصلح حاجة يبقى بالحسنة علشان الناس تتقبل منا النصيحة

بس خلاص.. كفاية رغى بقى علشان مصدعكوش
:)

manal

Thu Dec 07, 06:50:00 AM GMT+2  
Blogger Barracuda said...

هو الترننج ! اليوم اللي يبدأ بترننج لازم ينتهي بخناقة !!

على كل حال موقفك سليم كان لازم حد يتدخل وصادفت انه انتي في مود جاهز علشان تلغوصي في مصارينها

الست اللي اتكلمت بالفعل قليلة الأدب !! كان ممكن تبدي اعتراضها على الست الكبيرة بأدب على شكل نقاش حضاري وساعتها كان ممكن انها تكسب أتباع لصفها خاصة وان مش كل الناس يعجبها الكلام ده

الأسلوب هو أهم حاجة .. نقدر نقول كل اللي عايزينه بس أهم حاجة الأسلوب الذكي الحضاري في الحوار

تحياتي

Thu Dec 07, 07:40:00 AM GMT+2  
Blogger tota said...

سمراء

تصورى ان ممكن الحدث لانه متكرر يعدى على ناس كتير بدون الخوض فى تفاصيله
الموقف سواء فى المترو او اى وسيلة مواصلات اخرى وخاصة فى القطار اثناء السفر او حتى اثناء قضاء مصلحة حكومية ووقوف البعض لاوقات طويلة انتظارا للفرج

يمكن لاحدهم ان يعرض وجهة نظره الدينية او الموعظة بشرط ان يكون واضعا فى الاعتبار ان الكلمات تخترق الاذان بدون ارادة المستمع فهو لن يقف ليصم اذنه
وهنا فقد الشخص المستمع حريته واصبح مجبرا على الاستماع حتى لو لم يكن فى مود الاستماع

العارض للموضوع يجب ان يكون مستعد نفسيا لرد فعل المستمع لاختراق اذانه والسيدة الفاضلة تعلم ذلك جيدا فكانت اقلكم فى رد الفعل

السيدة الاخرى اقل خبرة فبدى رد فعلها اكثر شراسة كان بامكانها ان توضح وجهة نظرها بهدوء اكثر ومن منطلق نقاط عديدة منها المكان والتوقيت وانواع المستمعين وحالتهم النفسية ورغبتهم فى الاستماع فهى فى الوضع الاقوى لكن اساءت استخدام الاسلوب ففشلت فى استخدام وضعية القوة
الطرفين جانبهم الصواب والخطـأ

واحمدى ربنا ان الست الشرسة مكانتش ملغمة وفرقعت فيكى

وانت مكنتيش مستعدة للانفجار ده بالتريننج
جبتى الجبروت ده منين ؟ تروحى الجامعة بالتريننج يا مفترية

تحياتى يا جميلة

Thu Dec 07, 12:13:00 PM GMT+2  
Blogger أنـــا حـــــــــرة said...

الله عليكى

مترو الانفاق ده يتكتب عنه مجلدات

بس جامعة ايه دى اللى بتروحيها بترننج عادى كده هى مصر اتقدمت و للا ايه ؟

و انا برضه مع الناس اللى بتقول ان كل واحده عندها حق
بس انتى شكلك جامدة علشان الستات بتوع المترو بيحسسونى ان المترو بتاعهم و سيبك انتى فى عربيات السيدات كل واحدة بتبقى على راحتها اوى و فى عربيات الرجالة بيبقوا زى الالف

Thu Dec 07, 09:21:00 PM GMT+2  
Blogger قلم جاف said...

وعاظ المترو.. زي عشاق المترو ! :)

شر البلية ما يضحك ..

دي تاني مرة أسمع فيها الموضوع دة .. المرة الأولانية كانت من زميلتنا إيمان اللي حاطط اللينك بتاعها في الدين والديناميت ..

وكل صاحب "بضاعة" دينية وله المترو بتاعه اللي بيبيع فيه ..

بتوع التبليغ آخرهم المترو ، الإخوان أماكنهم ما تتعدش .. الصوفيين ماسكين بعض شركات الحج والعمرة وقناة المحور ، أما السلفيين فعندهم قناة الناس والشرايط اللي على قفا مِن يشيل..

وما الدنيا إلا مترو كبير!

Thu Dec 07, 11:16:00 PM GMT+2  
Blogger 3rby said...

كده يعني
اكتبلك تعليق اد البوس يتمسح
وبعدين اسمه القمحاوي مش الخماوي
انتي كده شلفطي عيلتنا خالص

Fri Dec 08, 01:10:00 AM GMT+2  
Blogger Lion king™ said...

حلوة اوي الكلام الجامد دا
ماشاء الله عليكي عداكي العيب وقزح

Sun Dec 10, 10:24:00 PM GMT+2  
Blogger Lion king™ said...

حلوة اوي الكلام الجامد دا
ماشاء الله عليكي عداكي العيب وقزح

Sun Dec 10, 10:25:00 PM GMT+2  
Blogger ahmEd_H said...

كويس انك عملتى حاجه
انا مش فاهم ايه داخل المسييحين فى الموضوعذ لا حول ولا قوة الا بالله

Mon Dec 11, 05:02:00 PM GMT+2  
Blogger ALiaa said...

مممم
أنا بقي كنت بركب 26 برضو بس بشرطة

Fri Dec 29, 02:42:00 AM GMT+2  
Blogger الحصان الأسود said...

قصتك دي بتفكرني بموقف

رمضان قبل اللي فات في صلاة الجمعه الخطيب كان بيقول اغرب خطبة سمعتها في حياتي

سيدنا الشيخ كان بينتقد ان الواحد يقف في مواصلة عامه و في ايدة مصحف بيقرأ فية بصوت مسموع

و بيقول ان دة حرام من منطلق انة اذا قٌرأ القرآن فاستمعوا له

بس هوة كان منفعل جدا و دخل في حرمانية قرأة القرآن في المواصلات

وبيقول هيه خلاص حبكت واحد واقفلي في مترو الانفاق وللا ترام وماسك مصحف و عمال يقرأ بصوت مرتفع و كل ما الضوضاء تزيد من حوله يرفع صوتة زيادة

يأخي ابقى اقرأ في بيتكم ولا في المسجد للقرآن آداب للقرأة

واخد يعدد ويصور مظاهر الناس التي تستغل وقتها في المواصلات في قراءة القرآن ومدى حرمانية ذلك

ويكرر كلمة "حبكت" كذا مرة
ويتعصب ويثور و يهدد بعظائم الأمور

بصراحة انا لولا انة حرام وعيب كنت يا خرجت من الجامع
ولو كان ينفع الجدل كنت قمت وضحت لة خطأة
مش عارف الشيوخ اللي ماعندهمش اي وعي ديني دول في الاوقاف ومعلوماتهم الدينية لا تخرج عن معلومات طالب في ابتدائي بس متركبة على شيوخ متعصبة وكارهه دنيتها و الدين عندها ماهو الا ترهيب و تهديد و عصبية مقرونة تعصب اعمى

يعني اللي قاعد يقرأ قرآن في المواصلات دة مش احسن لة ما يقعد يبص عالبنات وياخد سيئات
مش يكسب ثواب اي شخص مجاور لة الستمع الي القرآن واستفاد او خد عظة اةو حتى استفاد بوقتة بما يفيد بعيدا عن حرمانية او معصية قد يرتكبها

مش ممكن واحد راكب في المترو او الاوتوبيس كان في طريقة لارتكاب معصية(يسرق - يتربح من عملة- يرتشي-يزني- يشرب مخدرات او خمر) وعندما سمع القرآن خاف الله و تجنب تلك المعصية وأفاء الي نفسة

طيب بلاش

مش يمكن المترو او الاوتوبيس دة ممكن يعمل حادثة اصطدام او ينقلب ولكن ربنا يحمية و لأن من فية يقرأ القرآن فيحفظة ويحفظ من معه من هلاك او سوء

انا من حوالي سنتين كنت في ماليزيا و صليت صلاة الجمعه هناك في "المسجد الكبير" في كوالا لومبور العاصمة
أولا: الخطبة التي القاها الشيخ كانت فعلا رائعه وتبعث على هدوء النفس والسكينة و كلام هاديء منظم مرتب يحببك الي الاستماع اية والانصات في استحسان مع العلم ان الشيخ يقول الخطبة بطريقة صعبة جدا
اولا يقول الجملة بالعربية ثم يعيد نفس الجملة بلغه الملايو (الماليزية) وبهدوء و تأني شديد كي يتمكن كل الموجودين من الاستماع والانصات ومن المؤكد ان ذلك الشيخ قد تلقى تعليمة هنا في الازهر او ربما بدولة عربية اخري

ثانيا: بصراحة وأقسم بالله العلى العظيم انني انبهرت من مستوي النظافه والنظام في المسجد
ومستوي نظافة مكان الوضوء كأنة فندق 5 نجوم وانا ممن لا يتوضأون في المساجد و تعاف نفسي ذلك تماما واتوضأ في منزلي واذهب للمسجد فقط لكن هناك لايمكن ان اصف لكم ما رأيت

وليس فقط المسجد ولكن بصراحه مطلقة البلد كلها رائعة في النظافة والنظام ولا أوروبا

انا لما باشوف الماليزيين اللي في مصر كنت فاكر انهم كدة شايفين الأملة اللي احنا فيها انهم جايين من بلاد فقيرة متخلفة
لكن لما شفت بلدهم انبهرت تماما وقلت دول كتر خيرهم اللي مستحملين القرف والسبهلله اللي احنا عايشين فيها لا نظام ولا دياولو

Fri Dec 29, 10:21:00 PM GMT+2  
Anonymous Anonymous said...

A片,A片,成人網站,成人影片,色情,情色網,情色,AV,AV女優,成人影城,成人,色情A片,日本AV,免費成人影片,成人影片,SEX,免費A片,A片下載,免費A片下載,做愛,情色A片,色情影片,H漫,A漫,18成人

a片,色情影片,情色電影,a片,色情,情色網,情色,av,av女優,成人影城,成人,色情a片,日本av,免費成人影片,成人影片,情色a片,sex,免費a片,a片下載,免費a片下載,成人網站,做愛,自拍

情趣用品,情趣用品,情趣,情趣,情趣用品,情趣用品,情趣,情趣,情趣用品,情趣用品,情趣,情趣,情趣用品

A片,A片,A片下載,做愛,成人電影,.18成人,日本A片,情色小說,情色電影,成人影城,自拍,情色論壇,成人論壇,情色貼圖,情色,免費A片,成人,成人網站,成人圖片,AV女優,成人光碟,色情,色情影片,免費A片下載,SEX,AV,色情網站,本土自拍,性愛,成人影片,情色文學,成人文章,成人圖片區,成人貼圖

情色,AV女優,UT聊天室,聊天室,A片,視訊聊天室


UT聊天室,視訊聊天室,辣妹視訊,視訊辣妹,情色視訊,視訊,080視訊聊天室,視訊交友90739,美女視訊,視訊美女,免費視訊聊天室,免費視訊聊天,免費視訊,視訊聊天室,視訊聊天,視訊交友網,視訊交友,情人視訊網,成人視訊,哈啦聊天室,UT聊天室,豆豆聊天室,
聊天室,聊天,色情聊天室,色情,尋夢園聊天室,聊天室尋夢園,080聊天室,080苗栗人聊天室,柔情聊天網,小高聊天室,上班族聊天室,080中部人聊天室,中部人聊天室,成人聊天室,成人

Tue Feb 17, 11:34:00 AM GMT+2  

Post a Comment

Links to this post:

Create a Link

<< Home