كلمة حق

كلمة حق تتقال من قلم حر

جايز يكون دلوقتي حر

ماهو اي كلمة في اي حاجة بقت كلمة حق

كلمة تطلع من زهق

تطلع من قرف

كلمة من برد .. كلمة من حر

واهو اي كلمة

وكلمة حق مني ان نصر اكتوبر مهواش نصر

ولا كان انتصارنا شعوذة ولا سحر

ولا اول طلعه جوية فتحت باب الحرية

ولا كر ولا فر

متستغربش مهواش لغز ولا سر

بالك .. انبارح كنت ع القهوة مع صاحبي عبيد

قالي يا فندي الحكمة انك متعش فقيد

اصل اللي صار كان قهر وظلم وجواري وعبيد

فخرجت الحرب صرخة الله اكبر تكسر الحديد

يعني من الاخر كانت نتيجة حتمية

يا ابني محدش جاب ديل الديب

مهواش يعني اختراع طيارة طارت ولا صاروخ سعيد

لااااااااااااااااااااا..... الحكاية كبيرة يا صاحبي

وانت عارفني

زي اي مصري ساقط قيد

ويسكت عبيد عارف اللي فيها ..

بس مخبي كلمة حق

ولا من قيمة اسبوع كنت ع الكورنيش

مع مثقف من اياهم مانت عارفه .. صاحبي درويش

قالي بالك يا ابو سمرا .الحكمة انك تكون زي الواد الحلاق عليش

مانت عارفني بمشي جنب الحيط

واكح بشويش

ليقولو واد لمض ولا يقولولي عملت انقلاب في الجيش

مانيش خايف .. بس الدنيا يا صاحبي مبترحمنيش

والله يا راجل كدبت الست لما قالت

قولي يا زين ولا تخبيش

ويكون زي غيره .. رامي في الباكابورت كلمة حق

ولا الواد صبحي النقاش

فاكرينه بتاع رجل البنطلون فردة وفردة

يوم ما خرج من الانعاش

ندم انه في يوم لغي الإن وعاش

لا لاقي حق الدوا

اصله تمنه في البلد دي ما يسواش

والنقاشين يا عيني ملهمش معاش

دة حتي وش البوية مش طايله

يلون وشه بلون تناحة ويضربها طناش

واهو لاقي العضم في الكرشة

ودلوقتي لاهو محصل ميت ولا حتي عاش

يلا اهو غار في الدنيا زي غيره وضاع ببلاش

يبقي يا شقيقي فين كلمة الحق ؟؟

ولا ام محمود بياعه الخضار علي اول الشارع

اتلموا عليها البلجية يوم ما قالت كلمة حق لواد صايع

وبيني وبينك يا صاحبي الولية ام محمود عليها حتة كوارع

تفرش فرشتها الصبحية وتبص للواد حنيدة وتقول

يا فتاح يا عليم اصطبحنا اكفينا يارب شر البلاوي والساقع

اخره

البلطجية ما خلوا حتة فيكي يا ام الحق ضايع

والناس ساكتة وانا منهم وحياتك

هوانا لدنيتي بايع

واهو كلنا كتمنا كلمة حق زي اي حد خارع

ولا استاذ سلطان

مدرس العربي بتاع ابني ياسين

نازل واكل طالع سافف

والواد ما عارف المضاف اضاف لمين

اصله مدرس فصله .. ليسقط الواد ويبقي وابقي حزين

اربعين ملطوش في الساعه وحياتك يشَفوا الطخين

ولا قادر تشكي وتقول لا .. مانت عارف اخرتها فين

وتيجي تقوله

جري ايه يا ريس مش كفاية عليك كادر المعلمين

يبص عليك بحسرة ويقولك

يا بيه صلي علي اللي هيشفعلك كفاية عليا مطوحة السنين

واسكت انا

وادفع يا ابو سمرا وابقي زي غيري

خانق كلمة حق

اسكت مش رحت من يومين ازور صاحبنا عبد اللطيف

راجل تبت وبتاع مشاكل وفاكر نفسه ظريف

ديتها رصفوا شارعهم بعد طول انتظار

والناس خرجت تهلل منهم حتي الكفيف

وفي اخر اليوم كان كله فوق بعض عشان سبب سخيف

ال ايه ما ينفع يرصفوا الا ما يبيضوا الرصيف

وصاحبنا تيفا الجعجعي ساكت اصله خايف ع الرغيف

اكتشف انه يعيش جبان عشان يبقي ادام الحكومة عفيف

واهو كلمة الحق تحت الاسفلت

تاهت وسط طوب الحفر

سكت ليه يا ابو سمرا كمل كلامك

ومال عنيك كدة مبلمة

ولا عشان مشاريب القهوة علقة فيك متعلمة

يا سيدي .. اصل اللي مشغول بكلمة حق

احواله دايما معتمة

وعينك في راسك يقسمها فاسك

واصواتك متكتمة

وحياتك لا هي رمادي ولا ابيض ولا اسود

واهو شوية خدع تبقي ملونة

واحلامك دايما متاجلة

واهو اي حاجة بقي زي ما بتقول المدونة

*************

علي فكرة يا شباب

انا اعلنت عندي زي ما هي طلبت عشان عايزة تكون مشهورة

شيماء الجيزي عملت معايا حوار المدونون يتكلمون

وبعتذر عن التاخير لاني بجد مشغولة جدا

ادعولي