Wednesday, June 20, 2007

اول جريمة كانت علي الارض


كان ياما كان
في سالف العصر والاوان
كان في راجل عجوز ... اسمه الراوي
بيحكي حكاوي مليانة غناوي
وقبل الحكي والقول
نصلي علي الرسول
ونسمع قصايد ومواويل
مليانة اه بين ليل وويل
...:كان بيحكي ويقول


اول جريمة كانت علي الارض
مش قتل قابيل لهابيل
ولا اول جريمة كات لهابيل في هتك العرض
مش اول جريمة ان الدم يجري سيل

..أأأأ....بس يا راوي

شششششششش
سيبني يا ابني اكمل سرد
الحكاية مش حكاية قتل غيره
ولا غراب علم الانسان دفن طيره
ولا عاشق سهران طالت تنهيدته
ولا قلب خالي غني للحب وسيرته
مهياش جريمة ان الاخ يقتل اخوه
ولا في مبارك اللي ما بارك في بركة امه وابوه
ميغا يابا وهيصة ومولد ومراجيح
والواد يتولد من غير حلم ولا تفاريح
حزين يا كبدي .. بيلملم حلم صبية تونس فرشته
ولا سنه ضحك ولا الفرحة فرحت لفرحته
شايل علي ضهره هم وغم وكم مليون ولد
ينادي باعلي صوت ويصرخ علي مكانه في البلد
تايه يا ولداه .. داير في ساقية
حمار رخيص ما يساوي نكلة لا فانية ولا باقية
اول جريمة مش في نزولنا الارض
ولا حوا غوت ادم وعرت جسمه للبرد
دة مقدر ومكتوب في اللوح المحفوظ
ولا نقول لو ما خرج ادم م الجنة هيكون محظوظ
سيبك .. لا نوح غلط في صبر دعاه
ولا غيره خطا لما اشتري الحياة

الله .. طب فين الجريمة .. فين العصاه

بس ما تقاطعني يا حافي .. يا معدوم شبابك

حافي ؟؟؟
ازاي دي الجزمة جديدة قولي مبارك
دة انا ملمعها وبحافظ عليها

بس ما تجيبلي سيرته لاجيبلك عليها واطيها
اول جريمة مش شيطان رفض يسجد
ولا هو عاصي ولا كافر وعلي فكرة...بيعبد
ولا حوت غلبان والكل ببلع سيده ظلمه
ولا عنكبوت فرش حريره وبخيوطه سجنه
ولا شاب واقف طالت نظرته لصبيه
ولا صبيه طال ليلها تحلم بفارس وحنية
ولا سيف عربي اتحني بدم العروبة وانكسر
ولا صرخة ارض قالت آه يا ويلي دة السلام كفر
ولا عيلة في رقبة ازازة محشورة من سنين
حاضنة الحياة وقافلة بابها والشكوي فين؟؟
ولا اول جريمة كات في فيضان ولا بركان دمار
ولا زلزال يهز كيانك وليل يدبح شق النهار
ولا جريمة في نار أيدة ولا حرب نووية
ولا بيت اتخرب بسبب ست ابوها او حسنية

ودي يا كرام يا سادة
حكاوي الراوي لا بناقص ولا بزيادة
اومال فين الحقايق..؟؟
فين الجريمة ؟؟؟
دة لسة بايق
عاوزين نعرف ايه هي اول جريمة ؟؟
وليه الحزن في كهف قلوبنا وطاويط عقيمة ؟؟
ليه الكره سما وليه شمس الحقيقة مطفية ؟؟
وليه شبح الخوف ساكنا والضحكة من الضحك معفية ؟؟
نعرف باقي الحكاية من الراوي العجوز
نعرف الحقيقة ونبطل ضحك ومشي دة الاراجواز

!!!الراوي
..:الراوي قال

ان اول جريمة
كون ان الانسان فكر انه من حقه يكون انسان
مولود في عصر مجاش ولا له اوان
اول جريمة
هي اهانة بقايا كرامة لمخلوق جبان
باح لنفسه اخطائه .. خلق لكبايره اعذار
وفضل لحقيقته عريان بردان ولزيفه دايما سجان
... اول جريمة كانت

فهمتوا حاجة؟؟



Labels:

103 Comments:

Anonymous Anonymous said...

أنا فهمت.
أولاً و بادئ ذي بدء ألف ألف مبروك على الخطوبة و عقبال الزفاف ثم البكاري أنشاء اللة سبتلك تعليق على بوستك الأولاني اللي قلتي فية أنك هتتخطبي با هنيكِ فية و غبت شوية رجعت لقيتك عاملة فرح و هيصة و معازيم و بعدين بوست تاني بعدية عن الوالد.
عموماً مبروك أولى كما ذكرت سابقاً و مبروك ثانية للنجاح في الأمتحانات و عقبال الشهادة الكبيرة كدة أنشاء اللة.

Wed Jun 20, 06:54:00 PM GMT+3  
Blogger هيما said...

بجد انا فهمت قصدك ايه
كلام في منتهي الروعة
كلام في احساس بكل حاجة
ممكن تكون موجودة دلوقتي في بلدنا
تحياتي علي هذا الموضوع

Wed Jun 20, 06:59:00 PM GMT+3  
Blogger Ana keda said...

هيييييه
كنت عاوزة ابقى اول كومنت بس وراكى يا انجى لحد ما ابقى الاول
بجد والله حاجة وهمية يعنى
عارفة عاجبنى حاجتين او تلاتة بالظبط
1 انك حللتى الموضوع بطريقة تحفة بجديعنى انك تاخدى الموضوع من كزا جانب وتمشى على مر عصور احنا ممكن بنعتبرها فى دماغنا بس مبنتعلمش الدرس الى وراها

2 الاحساس العالى الى فى الكلام حلو اوى والصور الى انتى حاطاها كتير وجميلة وبتعبر عن حجات احنا بنتكلم فيها ونقول ونعيدونشوف مية طريقة وسايبين اكبر مشاكل لينا ونقول واحنا مالنا خلينى جنب الحيط

3 انى فهمت اوى والله اصل زماننا بقى الى الى متفهموش تفيهمه والى يقولك مفهوم متفهموش اصل احنا فى زمن محدش فاهم الى بيفموه للناس
فاهمة انتى حاجة
ههههههههههههه
تحياتى يا انوج

Wed Jun 20, 08:45:00 PM GMT+3  
Anonymous Anonymous said...

أنت حاطة صور كتير و جميلة ، يانهار أسود دة أنا أطرشت مابقتش أشوف أدي أخرة الشغل على الكمبيوتر و القعدة قصادة من 7 الصبح ل7 بالليل أنا كل اللي شفتة صورة واحدة بتاعة الواد الغلبان السفيف ياعيني اللي متكوم جنب سور الكورنيش و شلة الحيطان اللي عاملين فيها دكورة و كل واحد في أيدة شومة ونازل طحن في الواد.
حسبي اللة هو نعم الوكيل دة لو فار أتزنق في ركن المطبخ ماكانوش عاملة فية كدة.
أة نسبت اقولك تالت حاجة فرحتلك عشانها في تعليكي الولاني ، ربنا فك كربك و بقيتي تعرفي تقولي ماعرفتش و ماكلتش ....ألخ. :-)

Wed Jun 20, 08:53:00 PM GMT+3  
Blogger smraa alnil said...

سمسم

كويس انك فهمت بجد كنت هفقد الامل اني الاقي حد فهمها اصلي مش فهمتها وانا بكتبها

علي فكرة انا قريت كل التعليقات بس التعليقات كترت في البوست اللي انت كتبتلي فيه والموضوع خرج من ايدي
فقلت مش هرد بقي
بس انا بتابع الكومنتات بجد
والله يبارك يك
عقبال اللي عندك بقي اي كان
ههههههههههههه
___________________________________

ابراهيم عز الدين

بجد ربنا يخليك علي زيارتك ليا ودايما منورني علي طول
ومعلش علي تقصيري في اني ازورك دة عشان بس النت بيهنجلي الجهاز
بجد كلامي عجبك
طب الحمد لله
تحياتي ليك انت

Wed Jun 20, 09:04:00 PM GMT+3  
Blogger smraa alnil said...

انا كدة

هههههههههههههه
طب شدي حيلك بقي واجتهدي عشان تبقي الاولي بعد كدة هههههه

بجد عجبتك اصل مش كنت مقتنعه بيها وقلت انشرها واجري علي الله

هههههههههههههه
تصدقي اني فهمت انك فاهمتي ان الزمن دة مش يتفهم دة لو حد قالك انك فاهمة وبعدين تكتشفي اصلا ان الفهم اللي انتي فهمتي انك فهمتيه يطلع في الاخر مش مفهوم
فمتي انتي حاجة بقي

علي فكرة انا قريت بوستينك الاخرينينن ومش عرفت اعلق عندك
الله يخربيت النت وحنفي
عاااااااااااااااااااا
___________________________________

سمسم

سلامة ودنك يا سمسم
ادعكها كويس عشان تشوف
هههههههههههههههههههههه

هتصدقني لو قلتلك ان مش انا اللي كاتبها
انا بكتب مش الاول واخلي اي حد يكتبهالي
ويدمجهالي في الكلمة اللي عايزة اقولها
بس هي لزوم الشعر بقي
او العصيدة اللي بالدمعه اللي كاتبها دي
ياااااه
انت ازيك كدة وازاي المودام
علي فكرة شهر 11 قرب خلاص
مستعد لهدية عيد ميلادي

علي فكرة
هتبقي هدية عيد ميلادي وخطوبتي في ذات الوقت
طمع بعيد عنك

Wed Jun 20, 09:10:00 PM GMT+3  
Anonymous Anonymous said...

اللة يسلمك ياستي و المودام بتسلم عليكي و تقولك مبروك و أول ماشفت صور خطوبتك قولتلها الحقي مش سمرا أتخطبت تعالي لما نحضر خطوبتها و رحنا جبنا بأة التورتة و الحاجة الساقعة و قعدنا قصاد الكمبيوتر نتفرج و ناكل و نشرب و كل مانعمل سكرول دون ونشوف صورة جديدة المدام تظغرط و أنا أضرب نار في الهوا مش أمريكا بأة و كاوبويز وكدة. :-)
نوفمبر اية ياستي اللي انت لسة عايشة فية مش أحنا قلنا أن نوفمبر دة أتأجل لنوفمبر بتاع السنة الجاية ، وبعدين رجعت قلت أني جايز أنزل أول عشر تيام في سبتمبر في رحلة عمل بس من غير المدام ، أخر خبر بأة أني غالباً مش هنزل في سبتمبر بس في مؤتمر في الجامعة الأمريكية في نص يناير جايز الشغل يبعتني علية ، يالا معلهش ماهو من لاقى أحبابة نسي أصحابة.
و بعدين أنتَ عايزة هدية واحدة للجواز و عيد الميلاد!!!!؟؟؟؟ و بتسمي دة طمع؟؟؟؟!!! دة أنت كدة قنوعة أوي .
ياستي ليكي عليا هدية خطوبة/جواز و هدية تانية لعيد الميلاد بس أما أنزل بأذن اللة.

Wed Jun 20, 09:19:00 PM GMT+3  
Blogger The Alien said...

جريمة
هي فعلا جريمة
وجودي ومحاولتي إني أكون انسان بقت هي الجريمة
واللطيف لما تلاقي حد بيعاقبك عليها

تحياتي

Wed Jun 20, 10:20:00 PM GMT+3  
Blogger مـحـمـد مـفـيـد said...

بصراحه واضح ان الخطوبه تزيدك ابداعا علي ابداعك
رسمتي صوره مبدعه لمصر و لنا

برافو يا انجي

Thu Jun 21, 01:04:00 AM GMT+3  
Blogger basma saghir said...

الانسان هو الي هان نفسه بنفسه..محدش بيجبر حد يبيع نفسه وهو راضي وساكت
جرح كبير والناس ماشية وفاكرة بس بتحاول تنسى..و.لقمة العيش عايزالها الف حصان يجري وراها
وهيصة وميغا على رايك

Thu Jun 21, 01:39:00 AM GMT+3  
Blogger šσяšαяαα said...

هو البنى آدم كدا

مش بيفرقه عن باقى المخلوقات غير كتلة الخلايا اللى اسمها مخ او العقل الموجود جوا صندوق من العظام
(واللى اوقفناها عن اداء وظيفته توقف دائم وليس مؤقتا)

وقال بفذلكته وافق انه يحمل الامانة ويشيل مسئولية كوكب بحاله

كوكب بيحكمه قانون الغاب

ونسى او تناسى قيمته الحقيقية

انه مجرد كتلة من الطين هيمر عليها الزمن وتاكلها كائنات بنقرف لما بنشوفها وننسى ان نهايتنا على اديها

جريمتنا اننا بننكر قيمتنا الحقيقة
والكل بيستقوى على معدومى الحيلة

دى بداية الجريمة اللى هى سلسلة من الحلقات والمشاهد الحية والمستمرة من اول مارجلنا جت عالارض

تحياتى ليكى ولابداعك الرائع

Thu Jun 21, 03:40:00 AM GMT+3  
Blogger فوكيره said...

hotسمرا

انا عايزه احييكى على الصياغه بتاعت البوست قبل اى حااجه
بجد رووووووووووووووعه من غير ادنى مجاامله

انا بعشق اسلوب الحكى ده

ثانيا:

ليا الشرف انى اتهم بالجريمه دي

انا انساان وعايز اعيش كـ انسان
وحفضل اعامل نفسي كـ انسان
وحعيش كـ انسان
رغم عن انف اى انساان
لانى انساان
وده حقي الي منحه ليا ربي
وحقي الى انا منحته لنفسي
وحقي الى حعامل بيه البشر حتى لو هما معاملوش نفسهم كده


ملحوظه صغننه : ادخلى عندى حتلاقي حاجه ليكى في بوست اليكم انتم

تحياتى يا سمرااا

Thu Jun 21, 04:20:00 AM GMT+3  
Blogger khaled said...

مكدبش عليكى انا مش فاهم حاجه
ممكن تشرحى تانى


وبعدين الف مبروووك على الخطوبه

Thu Jun 21, 04:24:00 AM GMT+3  
Blogger Masry said...

و يارتني ما مفهمت
جامد جدا يا انجي

Thu Jun 21, 09:12:00 AM GMT+3  
Blogger Ma 3lina said...

اه طيب ماشى

انا قريتها مرتين علشان افهم

براحة على الشعب احنا على قدنا برده

عجبتنى جدااااااا و الفكرة رائعة

Thu Jun 21, 09:54:00 AM GMT+3  
Blogger ~ Bato0ot ~ said...

tab3an msh ghareb 3aliki ya engy el kalam el gamil da .. w tare2et el sard lel a7das w fekret el rawy el 3agooz ..
w alf alf mabrook 3al khetoba :) w 3al naga7

Thu Jun 21, 12:58:00 PM GMT+3  
Blogger Unknown said...

اية دة يا سمراء

معقول مش فاهمة

لا بتهزرى

يابنتى انتى لازم تغيرى اسم البلوج

يبقى واحدة مش فاهمة حاجة

بهزر طبعا

بالنسبة للبوست
انا شايف ان اللى انت بتقولى علية جريمة دة
هو الحاجة الوحيدة اللى الانسان فكر فيها صح

بس مقدرش يوصل لمعنها الحقيقى

اصل عشان اعيش انسان
لازم ابقى عارف ان ليا رب خلقنى انسان
وعشان خلقنى انسان لازم اعظمة واعبدة
واشكرة
وطول ما احنا بنفش فى الاطار دة
احنا بنى ادمين

انما احنا ارتكبنا الجريمة فى حق نفسنا لما خرجنا عن الاطار دة

Thu Jun 21, 02:07:00 PM GMT+3  
Blogger micheal said...

كلام جامد جدا يا سمرا بس خلي بالك أنتي مخطوبه دلوقتي ةو عاوزيين الموضوع يكمل علي ير
تحياتي

Thu Jun 21, 02:35:00 PM GMT+3  
Blogger sherif gharib said...

انتى مش محتاجه راى طبعا على الحاله اللى مكتوب بيها البوست ده
انتى عندك اسلوب رائع فعلا فى اسقاط الفكره اللى انتى عايزه توصليها
بس انا عايز اقوبك حاجه
اذا كانت الجريمه فعلا هى كون الانسان انسان يبقى الانسان عايش ابد الدهر شايل عقوبه الجريمه ديه لانه ببساطه متهم بوجوده و تخليه عن كل معانى مسؤليته فى الجريمه ديه
بس المشكله انه حاسس انها جريمه من غير عقاب فمن حقه انه يتمادى فيها
زى الحرامى اللى سرق مره و ماحدش مسكه
بيتمهادى مره ورا التانيه
لغايه مل بتبقى عاده
تحياتى على الاسلوب و المعنى و كل سطر

Thu Jun 21, 03:32:00 PM GMT+3  
Blogger ذكريات said...

الجريمة مش قتل برصاصة فى الراس
الجريمة فى كرامة انسان كل يوم بتتهان
انسان عملوا لية منظمة للحفاظ على حقوقة
زى ماعملوا منظمة لحقوق الحيوان
لكن منظمتنا نسيتنا ومابيفتكروا غير الحيوان
بالأمس اهتزوا لجثث الكلاب المرمية عندنا فى الحارات
ولم يهتزوا ابدا لمئات الجثث فى فلسطين والعراق


الله عليكى يا سمرا وكلامك فى الصميم بجد
وخاصة كلامك الى بين السطور

Thu Jun 21, 05:28:00 PM GMT+3  
Anonymous Anonymous said...

ألف مبروك على الخطوبة وعقبال البناء
إن شاء الله


كلمات هادية وجميلة

وإحساس رائع

دمتم بخير

Thu Jun 21, 05:45:00 PM GMT+3  
Blogger أمــانــى said...

كل دى جرائم
وانتى لسه بتسالى
مممممممممممممممممممممم
ربنا يرحمنا من عنده وبلاش نفتح فى الجرائم اصله كتير اوووووووى

Thu Jun 21, 07:19:00 PM GMT+3  
Blogger •«ρяoιd»•™ said...

و مين مش فاهم يا سمراء

حسبنا الله و نعم الوكيل

تحياتي

Thu Jun 21, 09:17:00 PM GMT+3  
Blogger Anima said...

?

Thu Jun 21, 11:24:00 PM GMT+3  
Blogger محض روح said...

يا إسقاطتك
يانوج
مبارك صحيح على


الفرح
:)

بس تعارفي جريمته مش بإيده
لو كان قادر مكنش سكت
ولو اتكلم هيفهم

عشلان كده عمره ماهيفهم حاجه

فاهماني

Thu Jun 21, 11:54:00 PM GMT+3  
Blogger خمسة فضفضة said...

السلام عليكم ورحمة الله وبركاته

احنا فهمنا بس ادعي ربنا ان اخونا البعدا مايفهموش ،احسن نحضرلك العيش والحلاوه
ما انتي عارفه الدستور الجديد مافيهوش ياما ارحميني

تحياتي

Fri Jun 22, 01:24:00 AM GMT+3  
Blogger ساعه الغروب said...

ايه دا كله بس يا انووووووج

بجد رائع جدا اسلوبك فى البوست دا

وما تقلقيش الحمد لله فهمنا

:)

بجد كان واحشنى اوى اسلوبك وطريقه تعبيرك

واحشاااااااااااانى جدا جدا

ابقى طمنينى عليكى

:)

Fri Jun 22, 03:10:00 AM GMT+3  
Blogger elkamhawi said...

لسه زى ما انتى مش بتحبى تختصرى يا بنتى اختصرى شوية فى بوستاتك

بس حلو على فكرة وبالنسبة لبوستاتك اللى قبل كدة يعتبر قصير

Fri Jun 22, 04:24:00 AM GMT+3  
Blogger abderrahman said...

This comment has been removed by the author.

Fri Jun 22, 03:05:00 PM GMT+3  
Blogger abderrahman said...

ألف مبروك
قصدي
ألف مبارك
:D

Fri Jun 22, 03:08:00 PM GMT+3  
Blogger شيماء الجيزى said...

انجى

عارفه انك حسه بيا
بس انا مش قادرة اتكلم خالص
قريت مقتطفات من موضوعك
بس لسه ليا معاه قاعده

خلى بالك من نفسك

سلام

Fri Jun 22, 04:35:00 PM GMT+3  
Blogger Hadota ... حدوتة said...

فكرة البوست هايلة
واسلوبك اكتر من رائع
انا فهمت حاجات مش حاجة
تسلم ايدكى على الموضوع دا
بس السؤال بقى
ان كل جريمة ليها عقاب

فين العقاب بقى اللى هنعاقب بيه الانسان مرتكب الجريمة
؟

Fri Jun 22, 05:20:00 PM GMT+3  
Blogger Noony said...

ان اول جريمة
كون ان الانسان فكر انه من حقه يكون انسان

أعترض وأشجب وأندد بشدة وضراوة وعنف كمان
لية كدة يا بنتي؟
طيب بذمتك مش آدميتك دي هي اللي خليتك تكتبي وتبدعير وتحسي بالجرائم اللي بتحصل دي كلها!؟

الجريمة هي السكوت..احنا اللي ظلمنا نفسنا لما سيبنا الظالم يظلمنا وعتى في ظلمه ومحدش عارف يتصرف

بس أرجع وأقول...بجد انتي تحفة
لخبطتي الحقايق والجارئم في بعض مع إن الهدف كان واضح من أول الموضوع...عملتيها إزاي دي!؟

وانتي ازيك بقى؟
:)
نوني

Fri Jun 22, 08:26:00 PM GMT+3  
Anonymous Anonymous said...

الجريمه سكوتنا وخوفنا وده بيخلى الجريمه تكبر وتكبر .... بس انتى عارفه يمكن نكون ظالمين الراجل ياانوج هو بس بيعذبنا علشان لما نموت مانتعذبش وندخل الجنه على طول ههههههه يعنى بيعمل فينا خير يعنى المفروض نشكره ونقوله بهدلنا كمان ههههه .... اخبارك ايه ياجميله ربنا يسعدك .... سلمى

Sat Jun 23, 12:49:00 AM GMT+3  
Blogger سندباد said...

الجنون هو الشئ الذي ياتي بعد ان نفهم الحقيقة
ياتري كام واحد اتجنن في مصر

Sat Jun 23, 02:23:00 AM GMT+3  
Blogger Eric Matt said...


ما شاء الله بجد

لا تعليق ربنا يباركلك يا رب ويتمملك على خير

تحياتي لك من ماناساس البلد

Sat Jun 23, 10:47:00 AM GMT+3  
Blogger بحاول اكون said...

ازيك يا انجي انا اسفة اني جاية متأخرة اوي كده
عاوزة بجد ابدي اعجابي بكلامك ووصفك الدقيق انا في اول البوست قولت اكيد اول جريمة على وجه الارض اننا جينا الدنيا ده لكن فعلا اول جريمة اننا مش عارفين نعيش زي البني ادمين ولما الواحد يفكر بس انه يكون بني ادم ويعيش بكرامته ده في حد ذاتها جريمة ربنا يرحمنا برحمته والواحد يعرف يعيش انسان بكرامته
مبروك على نجاح في الامتحانات
بحبك يا انووج

Sat Jun 23, 01:57:00 PM GMT+3  
Blogger ody911 said...

قوول يا راوى وعيد كمان
قول وأبدأها بكان يامكان

قول سمعنا أحلى كلام

قول ندمنا قول حزنا

ماهى نقصاك إنته كمان



قول فكرنا قول خلينا

تملى دمعنا ألف مكان


قول لجمنا بألف لجام

قول وأبدأها بكان يامكان




إيه رأيك ؟؟؟؟

أنفع


وحشانى موووووووووووت ومعلش النت فصل ما نكت بكلمك


وعادى بقة
أودى


آه الكلمتين دوول عجبونى هكتبهم عندى بقة بما انى مش لاقى حاجة اكتبها

Sat Jun 23, 03:32:00 PM GMT+3  
Blogger YHYيــوســف الـمصـرى said...

ادينا بنحاول نفهم !!!!
تحياتى

Sun Jun 24, 05:50:00 AM GMT+3  
Blogger The Eagles said...

ايه يا عم الزعل الجامد دة
قصدى الزجل الجامدة دة
مش بردوا بيسموه زجل
ههههههههههه
لابجد جميلة وفيها معانى لازم كل واحد يفهمها


والسلام.........

Sun Jun 24, 11:13:00 AM GMT+3  
Anonymous Anonymous said...

عزيزتى انجى
احييييك بشدة على هذا البوست الرائع
و شكرا لزيارتك مدونتى و الف مبروك
حوريه

nadiataha.maktoobblog.com

Sun Jun 24, 11:23:00 AM GMT+3  
Blogger بيجاسوس المصرى said...

انا رجعت
انا رجعت
قلبى قلبى
اه اه

الف الف مبروك يا سمراء مع انى اخر من يعلم بس على كل شئ الف مبروك مرة تانية
و عايزك تبقى تجيبلنا بأذن الله قبلة من المدونين الصغرين علشان يشلوا مجتمع التدوين لانك عارف السن يا بنتى
و اعى تسمى حد معتز لانه بجد هيبقى مشكلة
اللهم بلغت اللهم فأشهد

Sun Jun 24, 03:59:00 PM GMT+3  
Blogger sakayar said...

إيه آه ... بتقولي إيه؟؟؟ انتي بتزوري التاريخ ؟؟؟ بس اسلوب وكلام جامد جامد جدا

الكلام اللي اتقال ده مع الخلفية السودا دي يعني حاجة كدهو كدهو خااااالص

تحياتي

Sun Jun 24, 05:14:00 PM GMT+3  
Blogger linda said...

انجي

مش عارفة لو فهمت او لا بس الموضوع بالمجمل فيه حكم كتيرة

Sun Jun 24, 06:47:00 PM GMT+3  
Blogger اسكندراني في الغربة said...

هييييييييييييية فهمت
و مستنيين عمو الراوي يكمل الي بدأوا

Sun Jun 24, 10:24:00 PM GMT+3  
Blogger momo said...

hi samraa ingy
u have a civilized sense in ur writing
hope c u with wenky in the party in sakia el sawy 5\7
bye bye

Sun Jun 24, 10:39:00 PM GMT+3  
Blogger أنا حر said...

ممتازة...بيعجبني الاسلوب بتاع النية ده بس نيتك كانت وضحة قوي جوة السطور
تحياتي

Sun Jun 24, 11:35:00 PM GMT+3  
Blogger عاشقة الوطن said...

ازيك ياسمراء ايه اخبارك ياقمر

ايه البوست الجميل ده
اول جريمة على الارض

بجد البوست جمييييييييل

وانتى أجمل

Mon Jun 25, 03:43:00 AM GMT+3  
Blogger زئطوط said...

انا مفهمتش حاجه ياانجى
ياريت تشرفينا وتنورى مدونتنا الجديده ويارب تعجبك
http://zaatataa.blogspot.com/

Mon Jun 25, 12:34:00 PM GMT+3  
Blogger Unknown said...

نقــــــــــــــــــول كمــــــــــــان


الراوى الحقيقه مسابش حاجه بس فعلاً الجريمه انك متكونش انسان دى البدايه و دى الجريمه و ما زالت

ده الى انا فهمته لو كان صح

تحياتى يا سمرااااااااااا
و سلميلى على الراوى

Mon Jun 25, 03:57:00 PM GMT+3  
Blogger smraa alnil said...

iron copra

ههههههههههههههههههههههههه
المهم ان انتو احتفلتوا بخطوبتي وخلاص ودة المهم
عارف انت خليت الشهور كلها تخش في بعض
المهم وباختصار وقت ما تنوي قولي بقي عشان اجهز للهدية
يا سيدي تخيل هدية واحدة لعيد الميلاد وللخطوبة تبقي اد ايه
المهم انك تنزل ان شاء الله
المرة دي بقي بوسلي المودام
______________________________

بيشوي

عندك حق
لما تحس انك انسان وتبقي عايز تعيش كبني ادم وتلاقي اللي بيسلب منك ادميتك دي
وعندك حق ان اللطيف ان في حد بيجي ويعاقبك عليها

Mon Jun 25, 09:49:00 PM GMT+3  
Blogger smraa alnil said...

محمد مفيد

ههههههههههههههههههه
جري ايه يا محمد انا طول عمري مبدعه
هههههههههه
بهزر طبعا
بس عادي والله لا ابداع ولا حاجة
ربنا يخليك رفعت من معنوايتي
______________________________

بيسوو

بالظبط يا بيسو ودةاللي انا كنت بتكلم عليه
ان كون الانسان بيعتبر نفسه انسان باح لنفسه اخطائه لانه انسان
هان نفسه وباع نفسه عشان هو انسان
الف حصان بس دة ولا مليون حصان عشان تاخديها كلها

Mon Jun 25, 09:49:00 PM GMT+3  
Blogger smraa alnil said...

صرصارة

بس التوقف دة نابع من رغبتنا احنا
اهو انه يسني قيمته الحقيقية دي في حد ذاتها جريمة
ولو كل واحد ماسك حكم او شئ ويعرف انه فاني واخره شوية تراب هيبقي حالنا احسن
لكن كلنا بنجري ورا بعض بنهبشفي بعض
دورنا هو اننا ازاي نقتل بعض بالبطئ واحيانا بالسريع
ربنا يخليكي يا جميلة
______________________________

فوكيرة

ربنا يخليكي المهم عندي انه عجبك وخلاص
كل انسان بقي خلاص متهم بجريمة ادميته
بس انتي هتستغلي نفسك كانسانه صح
في غيرك بيغلط ويبيع ويشتري وتيجي تكلميه يقولك اصل احنا بشر ومش في حد معصوم من الغلط
يعني بنبيح لنفسنا اخطائنا واحنا قادرين اننا نتجنبها
عامة انا قريت البوست اللي انتي بتتكلمي عنه وبجد فرحت بيه اوي
بس المشكلة اني مش بعرف اعلق عاااااااااااااااااااااااااااا

Mon Jun 25, 09:50:00 PM GMT+3  
Blogger smraa alnil said...

خالد

ههههههههههههههه يا ابني مش لما افهم انا الاول ابقي اشرح
الله يبارك فيك وعقبالك يارب
______________________________

اخر من الاخرين

ههههههههههههههههه ليه بس يا محمد
دةالفهم دة يودي في داهية

ربنا يخليك يارب

Mon Jun 25, 09:51:00 PM GMT+3  
Blogger smraa alnil said...

ما علينا

ههههههههههههههههههههه
المهم انك فهمتيها ولاايه نظامك
______________________________

بطوووط

الله يبارك فيكي يارب
وعقبالك بقي يا انوج
المهم ان كلامي عجبك
اخبار النتيجة ايه ؟؟؟
طمنيني

Mon Jun 25, 09:51:00 PM GMT+3  
Blogger smraa alnil said...

مش فاهم حاجة

ههههههههههههههههههه
يا ابني مش انا اللي كاتباها
يبقي طبعا لازم اكون مش فاهمة
انا قلت اقولها ها جايز تكون مفهومة وحد يفهمني
هههههههههههههههههه
كل واحد فينا عارف انه ليه رب خلقه كانسان
بس الجريمة اللي اقصدها مش كون ان الانسان انسان
لا
كون ان الانسان بينسي ربنا وينسي انه انسان
ويغلط ويبقي جشع هي دي تبقي الجريمة
انه يجرد نفسه من الحقايق
ويفضل بحقيقته القذرة عريان
فهمتني ولا ايه لسة مش فاهم
______________________________

مايكل

ههههههههههههههههههههه
يا سيدي قول يا باسط

دة احنا ناس جامدة من الاخر

Mon Jun 25, 09:51:00 PM GMT+3  
Blogger smraa alnil said...

شريف غريب

ياااااااااااه منور ابلوج من تاني يا شريف

يعني انت جبت من الاخر
المهم ان الحرامي اللي تمادي ي السرقة لحد ما تبقي عادة في الاخر اسمها جريمة
فهمت؟
ربنا يخليك يا شريف ومش تقطع بيا تاني
______________________________


ذكريات

ربنا يخليك بجد
وكلامك برضه وجعني
وعندك حق
منظمة الحيوان بتراعي الحيوانات اكتر من البني ادمين
دنيا شمالها يساوي يمين

Mon Jun 25, 09:52:00 PM GMT+3  
Blogger smraa alnil said...

صاحب المضيفة

ربنا يخليك بجد اسعدني تشريفك ليا
والله يبارك فيك
منورني ويارت تكرر الزيارة من تاني
تحياتي
______________________________

اماني

هههههههههه
شفتي بقي
علي رايك خليك كدة ساكتين
بس لحد امتي؟

Mon Jun 25, 09:53:00 PM GMT+3  
Blogger smraa alnil said...

رامي

ودة الي احنا نقدر عليه
حسبي الله ونعم الوكيل
تحياتي
______________________________

انيما

قوليلي بقي ان مش فاهمة؟

Mon Jun 25, 09:53:00 PM GMT+3  
Blogger smraa alnil said...

ساعه غروب

طب كويس انك فهمتوا
حد يفهمني بقي عشان انا مش فاهمة
انتي كمان وحاني اوي
انا الحمد لله
انتي ايه اخبارك
______________________________

القمحاوي

كل دة ومش بتختصر
يا ابني دي حكاية
طب شفت بقي
واحشني يا واد

Mon Jun 25, 09:54:00 PM GMT+3  
Blogger smraa alnil said...

عبده باشا

ههههههههههههههه
ودينا في داهية بقي
______________________________

شيماء الجيزي

اكيد حاسة بيكي
وخليكي متاكدة من كدة
بس عايزة اعرف مالك بس في ايه
انتي اللي خلي بالك من نفسك
ومستنيه العودة مرة تانية

Mon Jun 25, 09:55:00 PM GMT+3  
Blogger smraa alnil said...

حدوتة

طب كويس اكفهمتي حاجات
ممكن تفهمهالي بقي :)
انتي بقي مش عارفة ايه العقاب
بصي حوالكي وانتي تشوفي العقاب بيتنفذ في الثانية الف مرة
______________________________

نوني

ههههههههههههههههههه
دايما كدة متصدرالي يا نهاد
طب كملي الحكاية كدة
باح لنفسه اخطائه وخلق لكبايره اعذار
يعني ان الانسان كون انه انسان بيغلط كتير
الغلط بيبقي واضح
والجشع واضح والحرام واضح
لكن الانسان بيختار طريق الشر يمشي فيه
بصي حوالكيوشوفي الناس الاكابر
كون ان هما موجودين في وسطنا
يالوا من لحمنا
ويشربوا من دمنا
ولا بيالوا فينا
دي في حد ذاتها جريمة
وا ايه
لكن كون ان الاسنان انسان دي مش اعتبرها جريمة
لان دي افضل نعمة ربنا ادهالنا

احنا سكتنا ليه
عشان احنا بني ادمين
والسكون جريمة

ههههههههههههههههه
عملتها بالملوخية
انا الحمد لله انتي ازيك انتي بقي

Mon Jun 25, 09:56:00 PM GMT+3  
Blogger smraa alnil said...

سلمي

هههههههههههههههههه
تفتكر
دة علي كدة بقي الراجل دة كويس واحنا فعلا اللي ظالميناه
انا عن نفسي يا اختي مش ناقصة بهدلة
انا تمام الحمد لله
______________________________

سندباد

تقدر تعتبرني واحدة منهم

Mon Jun 25, 09:57:00 PM GMT+3  
Blogger smraa alnil said...

the groom

ربنا يخليك بجد
هتنزل من مانساس البلد امتيبقي
______________________________

بحاول اكون

ازيك انتي يا قمرة
ولا يهمك يا سيتي لا متاخر ولا حاجة
انتي كدة تقريبا فهمتي الموضوع
تعالي فمني انا بقي ههههههههههه
الله يبارك فيكي يا قمر
ويارب تقابلي النجاح عي طول
وانا كمان بحبك والله

Mon Jun 25, 09:58:00 PM GMT+3  
Blogger smraa alnil said...

اودي

دة انت تنفع اوي كمان
ايه يا واد الشعر دة
ههههههههههههههههههههههه
الله يخربيتك يا اودي
يا واد انت ناسي اني مخطوبة
تقولي وحشاني موووووووت
بص قبل ما يشوفنا بقي
انت كمان والله واحشي اوي
وانا بقي اللي بقولك معلش ان النت عندي هو اللي فصل
اخبارك ايه يا منيل
انا قريت عندك يا شاعر يا جامد يا جهبذ
______________________________

يوسف المصري

ياريت اول ما تفهم تقولي

Mon Jun 25, 09:59:00 PM GMT+3  
Blogger smraa alnil said...

the eagles

والنبي ياخويا ما عارفة اسمه ايه
انا بكتب وانتو صنفوها زي مانتو عايزين

المهم انتبقي فهمتها ولا لسة
______________________________

حورية

انا اللي بحييكي بجد
دة انا اللي اشترفت بيارة مدونتك يا قمرة
ربنا يخليكي ليا يارب

Mon Jun 25, 10:00:00 PM GMT+3  
Blogger smraa alnil said...

بيجاسوس المصري

هههههههههههههههههههه
حمدالله بالسلامة يا سداحمد
معلش بقي مانت مش كت فاضيلنا
ويشلوا ليه بقي
انا ولادي يا واد هيطلعوا عباقرة زي امهم هههههههه
لا طبعا انا عندي اسميه معزة ولا اسميه معتز
ههههههههههههه
الرساله وصلت يا سيدي
______________________________

ساكيار

تزوير تاريخ ايه
ودينا في داهية بقي
فين تزوير التاريخ دة
هاتلقي كلمة مش صح
ههههههههههههههههههههههههههه
ايه بقي اللي كدة اهو كدهو خالص

Mon Jun 25, 10:01:00 PM GMT+3  
Blogger smraa alnil said...

ليندا

طالما استشفيتي منه الحكم دي
يبقي فهمتي مش تقلقي علي نفسك بقي
:)
______________________________

اسكندراني في لغربة

هههههههههههههههههه
الف مبروك
الراوي قال اليل قالوا وهي الكلام باعترافه ان اول جريمة كون ان الانسان
فكر انه من حقه يكون انسان
منورني اوي علي فكرة

Mon Jun 25, 10:02:00 PM GMT+3  
Blogger smraa alnil said...

momo

hi momo
thx for ur comment
isa iwill come with winky to th party
to see u again
and to see all my friends
thx for ur visit
hope u repeat it
______________________________

انا حر

هههههههههههههههههه
انما الاعمال بالنيات
عشان تعرف ان نيتي واضحة
اصلي مش بعرف اتلائم
هي جايز تكون واضحة للي فهم
بس في ناش بجد مش فهمت

Mon Jun 25, 10:02:00 PM GMT+3  
Blogger Sally said...

جاااااااااااااامد
اوووووووووووووي



اه فهمت

Mon Jun 25, 11:11:00 PM GMT+3  
Blogger كراكيب عادل said...

مليش دعوة

Mon Jun 25, 11:18:00 PM GMT+3  
Blogger Van Gogh said...

الجريمة
هى ان الأنسان انانى اكثر مما نتخيل

نعشق ذاتنا
ونرفض الأخر

اى كان هذا الاخر

فأنا حاكم
والأخر محكوم

فأنا على دين
والأخر ذو دين أخر

فأنا انا
وانتِ الأخر

Tue Jun 26, 12:03:00 AM GMT+3  
Blogger Rosa said...

اول جريمة
كون ان الانسان فكر انه من حقه يكون انسان
مولود في عصر مجاش ولا له اوان
اول جريمة
هي اهانة بقايا كرامة لمخلوق جبان
باح لنفسه اخطائه .. خلق لكبايره اعذار
وفضل لحقيقته عريان بردان ولزيفه دايما سجان
...

انجي بجد هوا في كدا؟؟
بجد مافيش تعليق يكفي ماكتبتيه
اي كلام بعده مش ممكن يكون ليه معنى
بس الي اقدر اقوله انك حقيقي ابدعتي
تحياتي و الف مبروك للخطوبه
:)

Tue Jun 26, 03:37:00 AM GMT+3  
Blogger Halawa said...

مبرووووك الخطوبة
مش محتاجة رأي ياعروسة النيل
ربنا يحميكي ويخليكي
وصل الكلاااااااااااام

ليا بوست عايزك تشوفيه شعر

تحياتي

Tue Jun 26, 05:11:00 AM GMT+3  
Blogger Diyaa' said...

أول جريمة هي الاستسلام للشيطان..وبناء عليها اترتبت باقي الجرايم
وتتواصل سلسلة الغباء البشري بكل حلقاتها
وجميل أوي يا أنوج البوست
تحياتي
سلام عليكم

Tue Jun 26, 12:38:00 PM GMT+3  
Blogger remaliza said...

This comment has been removed by the author.

Tue Jun 26, 03:53:00 PM GMT+3  
Blogger الوردة السوداء said...

تصفيققققققققق حاد

هو سؤال واحدة

العمل ده بتاعك؟

لو بتاعك بجد تبقى عبقرية

ولو مش بتاعك برده تبقى قوية اوى فى اختيراتك

Tue Jun 26, 04:07:00 PM GMT+3  
Blogger gohayna said...

ما شاء الله

الناس لما بتتخطب بتبدع اكتر ولا ايه؟

تسلم ايدك يا جميل

وبجد انا فهمت فعلا

كلامك عالي قوي وكله واقع وبيحصل لما خلاص اتهرينا

ربنا يعينا يارب

تسلم ايدك يا قمر

Tue Jun 26, 05:00:00 PM GMT+3  
Blogger الدبور said...

منشورات مضاده لنظام الحكم ومحاوله قلب نظام الحكم
الماده 87 من قانون العقوبات المصري
خدي بالك الحيطان ليها ودان
وبكرة تعرفي ليه ؟!
المهم انت اخبارك ايه و اخبار الكليه ايه شدي حيلك و خلصتي الماستر و لا لسه
ربنا يوفقك
تحياتي بعد غياب

Tue Jun 26, 08:48:00 PM GMT+3  
Anonymous Anonymous said...

لأ ما فهمتش

بس مبروك :)

Tue Jun 26, 11:33:00 PM GMT+3  
Blogger ody911 said...

طيب أمال قافلة الموبايل لية ؟؟


أنا عاوز اطمن عليكى بس واللهى


أحنا أخوااااااااااااااااات


علشان يطمن يعنى


عموما ياريت تطمنينى حتى هنا يعنى

وبعدين أنا ولا شاعر ولا حاجة


دة بس من ألهامك


ومش هسألك إلهام مين ؟

هههههههههه



وعادى بقة
أودى

Wed Jun 27, 12:43:00 AM GMT+3  
Blogger طاهر خشاب / Taher Khachab said...

أوّل جريمة؟؟
أو ربما "ألجريمة" بأي حال الفرق لا يغيّر المشـكلة. لازمنا صبر أيّوب!!!
على كل حال أعلن للملأ بأني مذنب كوني لا أفقه تعريف كوني إلاّ "إنسـان" وضيع ربما لكني إنسـان.
تحيّاتي

Wed Jun 27, 11:45:00 AM GMT+3  
Blogger smraa alnil said...

عاشقة الوطن

ازيك انتي يا قمر
عملتي ايه في الامتحانات
انتي اللي جميلة يارب
دمتي عاشقة يا جميلة انتي

______________________________

زئطوط

ههههههههههههههههههه يبقي تعالي جنبي اصل انا كمان مش فاهمة

وبعدين ليه انا حاسة ان الكلام سهل
عامة انا هاجي بس ياريت النت مش يقطع عندي او يهنجلي الجهاز
منورني وياريت مش تبقي اخر زيارة

Wed Jun 27, 02:14:00 PM GMT+3  
Blogger smraa alnil said...

ايلاري

اكيد صح
انت فهمت تقريبا ربع اللي انا كاتباه
الراوي بسلم عليك وبيوبس ايدك
______________________________

بالله المستعان

بجد
ربنا يخليك ويكرمك
كويس اك فهمت تعالي فهمني انا بقي ههههههههههههه
منورني وياريت تكرر الزيارة تاني

Wed Jun 27, 02:15:00 PM GMT+3  
Blogger smraa alnil said...

كراكيب عادل

ههههههههههههههههه مش تخاف
انا بس اللي هروح ورا الشمس
جمد قلبك ومال واشرب ديوو
______________________________

van gogh

يبقي نستخلص من كدة ان الانسان بيزيف حقيقته ودي اعتبرتها جريمة

اعتقد ان كلامك لا يختلف مع كلامي
منورني يا فنان

Wed Jun 27, 02:16:00 PM GMT+3  
Blogger smraa alnil said...

روزا

صدقيني في كدة واكتر
ربنا يخليكي يارب

لا ابداع ولا حاجة
الله يبارك فيكي يارب وعقبالك ويرزقك بالزوج الصالح
______________________________

حلاوة

ربنا يخليك انت يارب يا حلاوة
اكيد محتاجة راي
هو انا اجي ايه جنبك
اكيد هشوف البوست

Wed Jun 27, 02:16:00 PM GMT+3  
Blogger smraa alnil said...

ضياء

صدقني استسلمنا للشيطان في الباداية من اول ادم وحوا مقدر ونكتوب
الجريمة في تهاونا احنا
انت ازيك يا قمر
النتيجة ايه نظامها
______________________________

الوردة السوداء

هههههههههه ربنا يخليكي بس خلي بالي من ايديكي وانيت بتصقفي
طبعا يا وردة المل دة باعي
انا مش بكتب حاجة في البلوج من عمل اي حد تاني غيري
ولو تصادف اني نقلت حاجة هقول انه منقول واقول المصدر
المهم ايه اخبار النتيجة

Wed Jun 27, 02:17:00 PM GMT+3  
Blogger smraa alnil said...

جهينة

هههههههههههههههههه
يا جدعان ايه دخل الخطوبة في الموضوع
تسلميلي انتي يا جوهينتي
محسسني اني اللي كنت بكتبه هرتلة قبل كدة ههههههههههه
يارب
______________________________

الدبور

اسامة الاول حمالله علي السلامة

هههههههههههههههه
مانا كول مري ضد الحكم
يعني ايه الجيديد خليهم يعتقلني بقي ونخلص
نت غير ما اعرف ليه انا كدة دة عارفة ان ليها ودان ولسان كمان
انا تمام الحمد لله الكلية خلاص خلصتها من تلات سنين حضرتك ونجحت في الماستر وناقشت اطار الرساله
واتخطبت كمان
المهم انت ايه اخبارك

Wed Jun 27, 02:19:00 PM GMT+3  
Blogger smraa alnil said...

عمر

ههههههههههههههه ليه دة الكلام سهل خالص
الله يبارك فيك
اخبار النتحانات ايه
______________________________

اودي

ههههههههههههههههه اصلي بزهق بسرعه من الموبيلات
انت عارف بقي المعجبين كتير ومش عايزة ازعله
هههههههه
يا واد مانا عارفة ان احنا اخوات
انا كنت بهزر معاك
لا شاعر ولا حاجة ايه
س حلو الهامي دي
هي مين الهام دي يا اودي
عامة اول ما اشحن اوعك اني هكلمك

Wed Jun 27, 02:20:00 PM GMT+3  
Blogger smraa alnil said...

straniero

كلنا نعترف بجريمتنا دي انا انسان
بغض النظر عن الكلمة التي تأتي بعد انسان
المهم اننا كلنا مذنبون بتلك الجريمة
مورني ويارت تكرر الزيارة تاني

Wed Jun 27, 02:21:00 PM GMT+3  
Blogger شيماء الجيزى said...

انجى
من كاتب هذا الكلام؟

بجد بجد يعنى
ده ابداع

مش عارفه اقولك ايه
بس حسه انه فعلا شغل عالى اوى
على كبير يعنى

بجد
عملت دماغ عاليه اوى
:d
..................

هى دى الجريمه
الاولى
والاخيرة

تحياتى وسلاماتى وقبلاتى
:d

Wed Jun 27, 03:03:00 PM GMT+3  
Blogger -_- said...

انا جاي من عند اودي و بقول الراوي ده شكله بلوة مسيحة

و قد كان

Wed Jun 27, 04:51:00 PM GMT+3  
Blogger زى الهوا said...

اسلوبك وطريقتك رووووووووووووعة ، بجد عجبتنى اوى مدونتك ، ورغم إن اللون الاسود كان هيعمشنى ويحولنى إلا إن اسلوبك جذبنى إنى اكمل ، مدونة جميلة ومبروك على الخطوبة , وعوقبالى هههههه

Wed Jun 27, 06:25:00 PM GMT+3  
Blogger Ehab said...

جريمة ايه بس يا ست الكل انا حاسس اني هاتحبس بسببك ماعلينا
انا عايز اسمع منك اشعار مش تقوليلي جريمه ده انتي لسه قايل عندي انه ساحر
مبروك
سلاااااااااااااااااااااام

Wed Jun 27, 06:27:00 PM GMT+3  
Blogger أميرة said...

ايه يابنتى الجمال دة

ابدعتى ياانوج

هى الخطوبة بتعمل صفاء ذهن عالى كدة :)

اعذريلى غيابى والف مبروك ياقمر

Wed Jun 27, 08:42:00 PM GMT+3  
Blogger Unknown said...

حلوة و محسوسة
و الف مبروك

Thu Jun 28, 10:56:00 AM GMT+3  
Blogger Radwa said...


جمييييييييييييييييييييييييييييييييييييييله جدا جدا جدا

وفكره هايله وجذابه بجد روعه

Thu Jun 28, 07:11:00 PM GMT+3  
Blogger Radwa said...


اه نسيت اقولك الف مليون مبروك وعقبال الفرح ويكون قريب جدا
ربنا يتمملك بخير

Thu Jun 28, 07:17:00 PM GMT+3  
Blogger zoz said...

اسلوبك رائع وكمان جريئه اوى اوى

Thu Aug 16, 03:28:00 AM GMT+3  
Blogger smraa alnil said...

شيماء

يعني ايه من كاتب هذا الكلام
انتي هتهرجي

هو في غيري يا هانم الي بيكتب

ربنا يخليكي يا شيمو

طبعا يا بت شغل عالي
دة انا طولي 167

اهي طلعت جرينة وخلاص
ههههههههه
_________________________________

شارم

ربنا يخليك يا شارم

المهم انها عجبتك

Fri Aug 17, 11:58:00 AM GMT+3  
Blogger smraa alnil said...

زي الهوا

ههههههههههههههههه الف سلامة علي عيونك
وعقبالك يارب
ومبسوطة اوي ان مدونتي عجبتك
منوراني يا قمر
المرة الجاية هعملك نضارة علي حسابي
_____________________________

الشنكوتي الكبير

ههههههههههههههه
هو مين فينا اللي هيتحبس يا شنكت
والله ساحر وبعدين انا كتبت اشعار بس انت بقي اللي مش متابع
الله يبارك فيك

Fri Aug 17, 11:58:00 AM GMT+3  
Blogger smraa alnil said...

اميرة وليز

الله يحليكي يا اميرة
هههههههههههههه مش عارفة هو انا يا بت كنت بكتب اي كلام قبل الخطوبة
ولا يهمك يا قمر المهم انك موجودة
____________________________________

muse

الله يبارك فيك
منورني

Fri Aug 17, 11:58:00 AM GMT+3  
Blogger smraa alnil said...

سندرلا

مبسوطة اوي بتعلقيك وفرحانه انها عجبتك
منوراني يا قمرة

يااااااااااااارب
يسمع منبقك ربنا
وعقبالك

________________________________

zoz

انا مبسوطة اوي انك قريتلي حاجات كتير وعلقت علي اللي عجبك
بجد مش قادرة اوصفلك انت اسعدتني اد ايه بتعليقاتك
شكرا ليك بجد

Fri Aug 17, 11:59:00 AM GMT+3  

Post a Comment

<< Home