صور الخطوبة

انه يوم الجمعه الموافق 8/6/2007 يوم تاريخ يا ولاد

في اليوم دة اتخطبت لابوكم

انا بعمل البوست دة عشان ان شاء الله لما ربنا يجمعنا في الخير وتيجوا تعرفوا اد ايه انا بحب ابوكم

والكلام دة برضه للكل

صدقوني الحلم مش مستحيل

ان كنت فاكرة اني بدور علي وهم وخيال

واللقاء الشهري مش كان عبارة عن فرصة لاصطياد عريس وخلاص

زي ما في حد معلق عندي في البوست اللي فات

دي قصة حب بجد

طارق كان مدون زي اي مدون جه

الفرق ان طارق اصلا كان بيحبني من قبل ما يشوفني

وعارفني من قبل ما يشوفني

وبعدها اتكلمت معاه ولاول مرة بشوف ملاك علي الارض

وحنية منحوتة علي جبينه

وابتسامة صافية

زي لون بحر صافي في ساعه شروق

بحبك يا طارق

وربنا يخليك ليا يارب

دي بقي بعد ما لبسته الدبلة واخويا مش لحق يصور فقالي مثلي انك بتلبسيهاله تاني

دي التورتة اللي جابتهالي خطيبة اخويا اللي عليها صورتي

والي طارق رفض ياكل منها عشان قلبه مش مطاوعه ياكل منها وهي حتة مني

دي وانا مش متخيلة ان هما عايزني اشربه البتاع دة وجاتلي تقريبا هيستريا ضحك

وورايا دي جهاد اختي وصاحبتي وحبيبتي

ههههههههههههههههههههههههه بابا العبقري

اموت واعرف بيبص علي ايه

احلي حاجة بقي انه جه عليا وميل عليا انا قلت الراجل هيلفحني حضن وبوسة

ويحسسني بقي بابوته

لقيته بيهمسلي ويقولي

no dance ha

دة اللي قدر عليه

مش عارفة رغم اني احلي منه بكتييييييييييييييييييييييييييييييييييير

واللي هيقول غير كدة هفجر نفسي فيه بس في الصور حاسة اني شبه اوي

هههههههههههههههه البروفيل بتاع محمد مصر هي امي وعمرو اريدك انثي

منورين يا ولاد

اديني جبت سيرتكو اهو

وطبعا عشان محمد مش يزعل محمد هو اللي خلي طارق يجي اللقاء

وعمرو علي مدار كل القاءات هو المسئول الاول

انه يوصلني لحد ما يسلمني لبابا

اخيرا جه اللي يرحمك يا عمرو

نسيت اقول ان عمرو مسميني رويتر

بحبك
مش في حد يسالني الصورة دي عاملة كدة ليه

ههههههههههههههههههه

انا بقي ضحكت عليهم وكلتها بسرعه

بالهنا والشفا بس ليه بقك مفتوح كدة ؟؟؟؟؟؟؟

ههههههههههههههه

نفس القعدة ونفس الابتسامة

اخويا بيقولي نفس البصة هو انتو بتبصوا علي ايه

والنبي يا ابني مش عارفة

قبل ما يلبسني الدبل قعد يقولي العبي في صباعك اللي هلبسك فيه الدبلة عشان مش عارف هلبسهالك فين

يارب تكون ايدي في ايدك علي طول

بشكر كل اللي علق عندي

وخصوصا هبة اللي عملت حركة جدعنه وكانت معايا في غرفة العمليات

واللي رفضت اني اشكرها عشان احنا اخوات والاخوات مش بيشكروا بعض

ورفقة عمر اللي عملتي بوست مخصوص برضه واول من نشر

صورة للخطوبة حصريا علي مدونتها

وسفاح كرموز اللي عملي بوست مخصوص

وطبعا ياسمين سكاي لايت اللي لولاها مش كنت هظهر في يوم زي دة

ربنا يخليكوا ليا

وطبعا جهاد صاحبتي واختي اللي ربنا يخليها ليا يارب

ويخليكم ليا بجد

حسستوني ان ليا عزوة

احلي حاجة بقي في الخطوبة ان رجالة العيلة سواء عندي او عند طارق

سابوا الخطوبة وقعدوا يتفرجوا علي ماتش الاهلي

واللي مش كان عارف يتفرج نزل علي القهوة يتفرج وبقي يطلع بين الشوطين

ودي كانت احلي حاجة لاني مش بحب حد يتفرج عليا

نسيت اقولكم ان الحمد لله ربنا فرجها عليا وسجلت الاطار بتاعي

ووافقوا علي عنوان الرساله اخيرا

ونجحت كمان في الماجيستير

وشك حلو عليا يا عمري

الحمد لله الخير جاي معاك

ربنا يجعلني خير ليك انت كان يارب

ربنا يتمم لينا علي خير ونبقي في بيت واحد
شايفين يا ولاد امكم فرحانة اد ايه وهي بتتخطب لابوكم

عقبال ما اشوف ولادنا مدونين صغننين

بحبك يا خطيبي