اول مظاهرة مشيت فيها

بما اني وطنية اوي زي مانتو عارفين فانا هحكيلكم علي اول مظاهرة مشيت فيها وبقدرة قادر الاقي نفسي انا القيادية فيها

مش فاكرة ساعتها كنت في سنة كام بالظبط بس تقريبا كنت في اولي ثانوي

عمري في حياتي ما حضرت طابور الصبح بتاع المدرسة بتاعتي اللي كانت لغات تجريبي

وكنت مقضياها فعلا

: ملحوظة واحد

كان دايما معايا شنطتين للمدرسة شنطة حاطة فيها كتبي وكشاكيلي ودي طبعا كنت بسيبها في الفصل في درج الديسك بتاعي

والتانية اللي كنت بروح وباجي فيها وكان محطوط فيها المجلات والشرايط اللي هنسمعها في الوكمان

ودة لاني مش بحب امشي وايدي فاضية في الشارع

وفي سابقة لم تحدث في التاريخ الا نادرا لقيت نفسي مرة صحيت بدري ونزلت رحت المدرسة وسبحان الله الاقيلك طابور الصبح

وقفت وكل واحدة من البنات بئها مفتوح اد كدة من هول الصدمة ان سمرا حضرت الطابور

لقيت البت اللي جنبي بتقولي وهي بتوشوشني كدة وزي ما تكون خايفة

سمرا انتي معانا مش كدة

رفعت حاجب وقلتلها معاكو فين

قالتالي مش وقته هزار انتي معانا ولا لا

قلتلها طبعا معاكو انتي هتهزري بقي انا اسيب فرصة زي دي برضه

وانا بقي طور وسابوه في غيط برسيم لا فاهمة حاجة ولا عارفة اي حاجة

لقيت كل البنات اللي حواليا بيبصولي وهما فرحانين انهم شافوني وقالولي ادا طب كويس مش انتي معانا برضه

اووووووووووووف استغفر الله العظيم طبعا يا بنتي معاكي اومال انا جاية بدري ليه

اصيلة يا سمرا والله

الله يخليكم

يا جدعان حد يفمني الليلة انا مش فاهمة حاجة

المهم الولية بتاعت مدرسة الالعاب قالت اللي نفسها فيه من تمرينات اللي مش في حد بينفذها

وفي الاخر قالت اطلعوا الفصول

اختكم وطت جابت الشنطة وعماله بزق في العيال واقولهم يلا اتحركوا

قالولي ايه مش انتي قلتي ان انتي معانا

قلتلعم ايوة بس يلا نطلع واقفين كدة ليه

انتي يا بنتي انتي هتنسحبي ولا ايه

لالالالالالا مش سمرا اللي تنسحب بس نطلع الفصل ونتفاهم

ماحنا لو طلعنا الفصل يا غبية مش هنعرف نعمل اللي احنا عايزينه

غبية ؟؟؟؟؟؟؟؟؟؟ بيحترموني اوي البنات دول

فجأة لقيت ميس امال بتاعت الالعاب قعدت تزعق وتقول انا بحذركم كلكم من اي خطوة هتعملوها واتفضلوا اطلعوا علي الفصول

وانا بقي مش عايزة اقولكم واقفة متنحة ومش في حد عارفني بقي لما تنح

والعيال لسة واقفين تقولش جبال واقفة ولا هاممهم

اسود يا ولاد

لقيت بنات المدرسة رافعين اديهم وبيقولوا بصوت عالي

مش طالعين مش طالعين

مش طالعين مش طالعين

لالالالالالالالالالالا

الموضوع كدة كبر

رحت باصة للبت اللي جنبي

قلتلها بصي بقي هتفهميني هو في ايه ولا اروح فيكي في داهية

قالتلي ايه يا سمرا انتي بتستهبلي انتي معانا ولا لا

قلتلها يا ستي متزفتة معاكو بس فهميني اصل بعيد عنك لما بصحي بدري بيجيلي فقدان ذاكرة مؤقت

وطبعا اصلا انا مش فاهمة في ايه ولا ايه اللي بيحصل

قالتلي مش وزير الزفت بتاع التربية والتعليم لغي يوم السبت للمدارس التجريبية

قلتلها صادقة يا اختي

قالتلي بس فاحنا عاملين مظاهرة عشان يرجعوا لينا يوم السبت احنا رافضين ان هم يساونا بالمدارس الحكومية

قلتلها ااااااااااااااااااااااااه

مش تقولي

وخدتني الجلاله في وسط المعمعة دي

وال يلغي يوم السبت ال وكمان نتساوي بالمدارس الحكومية

دة تسيب

وفي وسط العيال اللي بيقولوا مش طالعين وبقيت هرجلة ومش بقي طابور

قلت مبدهاش بقي

رحت طالعه علي مصطبة عالية شوية كدة

وقلت بصوت عالي

يوم السبت يا اما بلاش

المدرسة منروحهاش

يوم السب يا اما بلااااش المدرسة منروحهاش

وعليها بقي

العيال راحو باصين ليا وقعدوا يهتفوا بالنشيد الوطني اللي انا الفته

وبقيت هيصة يابا

طبعا المديرة بقي والمدرسين كانوا ماسكين الميكروفونات ونازلين تحذير

واحنا ولا هنا

خادتني الجلاله رحت قايله بصوت عالي

لازم الولاد يشاركونا في المظاهراااااااااااااااة

وكاني مثلا قلت لقيت حتة لحمة لناس عمرهم ما سمعوا عنها

: ملحوظة 2

احنا مدرستنا كبيرة لينا مدرسة للبنات ومدرسة للولاد ومدرسة للمرحلة الابتدائية ومدرسة للحضانة وكل دول بيفصل بينهم جنينة كبيرة

لقيت العيال ايوة عايزين الولاد

عاييييييييييزييييييين ولااااااااااااااااد

طبعا لقيت نفسي بقدرة قادرة قائدة المظاهرة القومية

رحت ماشية ناحية بوابة الجنينة

وطبعا البنات كلها ورايا

وقلت

عايزييييين رجاله عايزيييييين رجاله

راحو الولاد طبعا خارجين من الشبابيك بتاعت الفصول

وعاملين يشاوروا ويزعقوا واحنا في وسط معمعة المعركة مش سامعين الولاد بيقولا ايه

طبعا زعيمة الامة اللي هي انا قلت للبنات احنا لازم نكسر الباب دة

والباب طبعا مقفول بقفل وجنزير

وتصادف زي كل مرة مصادفة اخش فيها في مصيبة اني اكون واقفة ادام نص الباب بالظبط وادامي الجنزير والقفل

والبنات ماسكين الباب ورايح جاي يزقوا فيه

قلتلهم باااااااااااااااااااااااااااااااااااااس

استنوا

ورحت ماسكة الجنزير من حتة معينة وبكل ما اوتي فيا من قوة مثبتاه من ناحية

وقلتلهم زقوا بقي

وفضلنا علي الحال دة لحد ما كسرنا الباب

ومجموعه من الجماهير الغفيرة خرجت للجنينة

لقيت المدرسين راحو جايين ورانا وقالولنا اعقلوا بقي المديرة طلبت البوليس ليكو

رحت لقيت مستر صلاح مدرس الفيزيا بيقولنا ولا يهمكم يا بنات استمروا في اللي بتعملوا

خلي صوتكم يوصل

طبعا جرعتين الحماسة اللي قالهم مستر صلاح اشعللت البقية الباقية من اللي الحماس المدفون

وعمالين نشاور للولاد بقي ونزعق ونقولهم انزلوا

وطبعا كناية عن غباء البنات وغبائي انا كمان

قلتلهم العيال مش سامعين احنا نكتبلهم يفط

يفط ايه انتي كمان

قلتلهم ايوة نكتب يفطة بكشاكيل المدرسة

وكل واحدة من البنات اصلا بقت منقادة بصورة عمياء لزعيمة الامة وناصرة الغلابة اللي هي انا

وهوباااااا

مطلعين الورق وكاتبين عليها بالحبر الجاف مجموعه من الكلمات المشجعه

اللي لو انا وقفة علي بعد خمسين سنتي منها اصلا مش هشوفها

وابص من بعيد المح ظباط وعساكر داخلين من البوابة الرئيسية للمدرسة

وصاحبك اعزل

وفجاة انا اختفيت

وهنا تبدا الحلقة المفقودة بتاعت ادهم صبري الله يخربيته واكل دماغ المدونين

قفزة للمستقبل بقي

كل فصل من الفصول طلع ليها ظابط بصحبة البنات الموجودين في كل فصل

لحد ما طلعوا الفصل بتاعي

آآآآآآآن أأأن، تششششششششششششششش

العيال لاقوني جوة الفصل مطلعه كشكول العربي وقاعدة بنقل اللي علي السبورة في حصة العربي

وكل اللي عليهم ازااااااااااااااااااااااااااااي

دي كانت معاااااااانا

اه يا واطييييييييييييييييييييييييييين

عودة بقي للحلقة المفقودة

لما اختكم لقت ظباط وعساكر رحت متسرسبة كدة واخدتها جري للفصل من غير ما حد يشوفني

واول ما طلعت الفصل لقيت مستر محسن مدرس العربي اللي خد اوامر باستكمال اليوم الدراسي للبنات

اللي مش شاركوا في المعمة الكبري هو وباقي المدرسين في كل فصل

المهم طلعت الفصل واول ما شافني

المنظر كالاتي

القميص طالع من الجيبة

والجيبة اتعوجت ضهرها بقي وشها

والحجاب حادف يمين خالص وزرار الكم اليمين كان مقطوع

يعني كان منظري نيلة خالص

وطبعا طالعه بنهج

اول ما شافني وقبل ما ينطق من هول الصدمة الي شافها

قلتله وانا كلي لهفة وبراءة الاطفال في عيني زي كل مرة

يا مستر هه هه هه ( طبعا انا بنهج) مش في حد شاف الشنطة هه هه بتاعتي

قالي نعم؟؟

قلتله الشنطة بتاعتي مش لاقياها وكنت كل دة بدور عليها

قالي وايه اللي لعبكك كدة

قلتله يا مستر انا واقفة في الطابور وعماله اقولهم يلا نطلع الفصل لقيت العيال جريوا ووقوعوني علي الارض

ومش لقيت الشنطة

اضطريت اخش وسطهم عشان ادور علي الشنطة رحت واقعة وداسوا عليا واخر ما زهقت قلت اخش ادور عليها هنا

لقيت صاحبتي امل عبد السلام الله يمسيها بالخير بقيت صيدلانية دلوقتي

بتبتسم وهي عارفة اللي فيها وتقولي شنطتك هنا يا سمرا في الديسك

رحت مبرألها وقلت بسرعه الحمد لله اكيد واحدة بنت حلال لقيتها وجابتها

رحت باصة لمستر محسن بمنتهي المسكنة والرعب في نفس الوقت

وقلتله انا خايفة اوي يا مستر اصلي لمحت عساكر تحت وخايفة يفتكروني اني كنت في المظاهرة

خصوصا ان البنات كانوا متغاظين مني عشان مش رضيت اشارك

فتقريبا والله اعلم صعبت عليه اوي

وقالي مش تخافي خشي يا ماما وانا هتصرف

وبمجرد اني عدلت هدومي وقعدت وظبط الاناني زي ما بيقولوا

لقيت الناس داخلين عليا وكان معاهم طبعا مديرة المدرسة

طبعا البنات كان كل اللي عليهم ازاااااااااااااي

دي كانت معانا

لقيت الظابط بيقوللي قومي اقفي

رحت واقفة وانا نظرات الرعب والغيظ ملياني

قالي انتي كتي معاهم

قلتله وانا بريئة براءة الذئب من دم ابن يعقوب

ابدا با باشا

قالي اومال بيقولوا انتي كنتي معاهم ليه

قلتله مش عارفة حضرتك جايز عشان رفضت اشترك معاهم

وبعدين حضرتك انا هنا من بدري

حتي اسال مستر محسن صح يا مستر

لقيت المستر برء اوي كدة وادام نظرات الاستجداء قاله فعلا حضرتك دي موجودة من بدري

والبنات بقي كانوا هيتجننوا

المديرة والظابط في نفس واحد

ايه اللي حصل اصلا

قلتلها حضرتك انا مش عارفة اصلا ايه الي حصل غير ان البنات دي قعدوا يهتفوا فجاة

ومش كانوا عايزيني اطلع الفصل

وشوفتهم وهما بيكسروا باب الجنينة

ومستر صلاح بتاع الفيزيا قعد يشجعهم

دة كل الي اعرفه حضرتك

البنات بقي

منك لله يا شيخة منك لله

وطبعا النتيجة

ان مستر صلاح بتاع الفيزيا جاله قرار انتقال لاسيوط

بس بعدها بشهر رجع تاني

و16 بنت من فصلي جالهم رفد اسبوع

وطبعا بعد ما كلموني

قالولي بقي كدة يا سمرا

قلتلهم مانتو استندلتوا وعمالين تقولوا دي معانا دي معانا

عليا وعلي اعدائي بقي

قالولي يعني ناخد رفد اسبوع

قلتلهم طب يا بختكم ياريتني اترفدت معاكم دة انا كان طالع عيني هنا في الشرح

مش في غير 10 بنات بس والمدرسين مستفردين بينا طب بالذمة مش استمتعم في الاجازة

قالولي بصراحة اه بعد البهدلة اللي خدناها من بابا وماما بس استمتعنا بعدها وقضيناها

قلتلهم طييييييييييييييييييييييييييب

يبقي عملت فيكوا خير وجميلة تشكروني عليها لا انما انتو طلعتوا واطين ودعيتوا عليا

يلا الله يسامحكم بقي

ولحد النهاردة اعزائي المواطنين مش عارفة مصير الشنطة الي كان فيها مجلات وشرايط فين

واللي عرفتوا من اخويا بعد كدة لانه كان في نفس مدرستي بس مع الولاد طبعا

ان الولاد حاولوا يخرجولنا من باب المدرسة بس كان مصيرهم الجنازير

كانوا بينضربوا جامد

لكن احنا الجنس ناعم ناعم والجنس الخشن خشن

مش في حد يقدر يلمسنا

شفتوا بقي الوطنية بتاعتي

راحة المدرسة لا بيا ولا عليا وفجاة بقيت قائدة لمظاهرة عنيفة

هييييييييييييييييييييييييييييييه ايام