3×1 هيد اندشولدرز

يا جدعان هو مش في غيري في ام البلد اللي مش بلدنا دي
بصوا بقي
البوست دة هيكون طويل اوي واللي بيحبنا هيقرا ويعلق
اصله 3 تاجات في بعض
صبرني يارب
نعمل فيها امير الانتقام ونخش علي الللللللللاول
التاج دة لذيذ جالي من مبرمج حر

هل كنت طالب شاطر فى المدرسة ؟
ههههههههههههه دة انا كنت في الطراوة ايام المدرسة زي ما يكون مش ليا دعوي بالعملية التعليمية خالص
كنت اروح المدرسة اقعد العب اكس اوه واتوبيس كومبليت مع اصحابي واقعد اسمع في اغاني علي الوكمان
بس كنت اجدعها بنت فيكي يا مدرستي تهز راسها علي كلام المدرسين ولا مانع من استراق السمع لاجابات العيال واقوم اجاوبها انا
بس في الثانوي في الدروس كنت شاطرة

ايه كانت احب مادة و اكره مادة ليك فى المدرسة و الكلية؟
هي كل مرحلة في الدراسة حبيت فيها مادة يعني حبيت الاحياء اوي وانا في الثانوية العامة
بس المادة اللي مش حبيتها خالص وكل ما بفتكر اسمها بتعصب هقولها

بمنتهي الهدوء والرزينة عشان مش افقد اعصابي الفيزيااااااااااااااااااااااااااااا
في الكلية بقي كنت بحب المواد الفسيولوجي والتشريح والمواد الصحية وكنت بكره مادة التربية اللي بيدرسوها بتوع كليات تربيه
بكرهااااااااااااااااااااااااااااا

كنت عايز تتطلع ايه وأنت صغير ؟
هههههههههههههههههه ممرضة
وانا صغيرة اوي كان نفسي اطلع ممرضة اصل كنت بشوفهم في الافلام العربي زمان بيتجوزوا الدكاترة اللي شغالين معاهم
لكن بمرور الوقت اقنعوني في البيت اني اطلع دكتورة وانا ابدا اطلاقا مطلقا ابزولوتلي رافضة رفضا تاما باتا
لكن لما بقيت في تانية ثانوي كان نفسي اخش صيدلة اوي بس يلا بقي الله يسامح اللي كان سبب
العجيب بقي ان تربية رياضية دي مش كانت في دماغي خالص ولا كنت حتي كتبتها في الرغبات

هييييييييييييييييه التاج الاول خلص
نخش بقي علي امير الانتقام الثاني
التاج دة جايلي من عند ليندا حبيبتي
تاج غريب شوية بس انا هتكلم فيه من وجهه نظري انا السخصية

دائما ما تطالب المرأة بالحصول على حريتها . فما مفهوم الحرية في قاموس المرأة؟
امممممممم
مفهوم الحرية عندي يعني التعبد والتقيد التام بمكارم الاخلاق
دة مفهوم الحرية عندي اني اعرف ماهي حدودي وامارس حريتي في نطاق الحدود اللي انا حاطاها لنفسي
طبعا في ناس بتقول ان الحدود دي هتختلف من واحدة للتانية عشان كدة ذكرت مكارم الاخلاق التي لا يختلف عليها اتنين

والي المفروض انها معروفة في عالمنا

متى احسست بنفسك "خائنة"؟
دة يرجع لمفهوم الخيانة عند كل واحدة فينا
انا مثلا بعتبر نفسي خاينة اذا مش قدرت اسال علي حد قريب مني
او بحس اني خاينة لما اكون قادرة اقدم مساعدة لحد وبطنش او مش ببقي فاضية
لكن الصراحة يعني انا مثلت قبل كدة دور الخاينة
كان في حد بيحبني جدا ووقتها كان عندي مشاكل كتير وكان قربي من اي حد يعني دماره وعدم تقدمه في حياته
وعشان اهرب منه وابعده عني مثلت اني خاينة باني اعرف اكتر من شخص عشان يبعد عني وقد كان
بس بعد فترة ضربت نفسي بالجزمة لان اكيد كان في حل اسلم واحلي من تشويه صورتي

هل يمكن ان تحب المرأة رجلين في نفس الوقت؟ نقول الحب و ليس الاعجاب.؟

المرأة عامة ضعيفة ومرهفة المشاعر
من السهل انه يضحك عليها هي اي نعم بتطنش بمزاجها وبتقنع نفسها ان الكلام اللي بيتقال حقيقي
بس يوم ما بتحب اوي بتخلص اوي
واستحاله تلاقي حد بيحب اتنين في وقت واحد
لكن ممكن تكون حبت حد وموضوعها انتهي وقابلت حب تاني هتحس ان هو دة الحب الحقيقي وساعتها هتنسي حبها القديم

إذا خذلك لعديد من المرات، هل ستستمرين معه في علاقة مستقرة؟؟

ههههههههه انا بطبعي عبيطة شوية
بمعني اني لو علي علاقة مستقرة اي رسمية وخذلني اكتر من مرة وبحبه بسامح بدل المرة عشرين
بس انا برضه بشر وببقي عاملة زي جبل عالي ولو جت عليه رملايه هيقع
او هينفجر انا اكيد هيبقي ليا طاقة وساعتها هيبقي عليا وعلي اعدائي

ماذا ترتدين فى أول لقاء لكِ مع حبيبكِ بالوصف التفصيلى؟

زمااااااان كانوابيوقوا ان بابا وماما مخلفين ولدين مش ولد وبنت
كنت دايما بعيش دور الولد فاكيد مش هصدم الشاب واروحله وانا عاملة فيها الشاب الروش
بس هحاول ابان اني بنوتة هلبس جيبة واي بدي وعليه جاكيت من فوق واعمل الطرحة اسبانش بنوتة بقي يا جدعان

ما هى أول فكرة ترد الى ذهنك فى اللحظات الأولى بعد دخولك "المحظور"...لا توجد خيارات للإجابة؟

برضه دة هيرجع لمفهوم المحظور عند كل واحد فينا
بس بما اني بتتبع مفهوم الحرية وماشية عليه اللي هو التقيد بمكارم الاخلاق اكيد بعون الله

مش هقع في المحظور بس عامة اي شئ جايز ساعتها مش هعرف افكر لان زي ما ليندا قالت الافكار وليدة اللحظة
بس دة برضه هيرجع للحدود اللي حطيتها للشخص الي ادامي
بس عامة اي بني ادم حاطط ربنا قصاد عينه ان شاء الله ربنا هيحميه

سؤال بالعربية الفصحى الى العربية الفصحى، أيعقل أن تكون هيفا وهبي المرأة العربية

من المحيط إلى الخليج، ماذا يمكن أن تفعلن لتغيير هذه الصورة، و كيف بامكاننا أن نساعدكن؟

لا طبعا هي اكمنها حمت الواد ومسكته تبقي هي مثال للمراة لعربية
بصوا بقي ماذا يمكن ان نفعل لتغيير الصورة دي دة بيرجع لكل واحدة فينا في الاول والاخر
انها تبقي عارفة انها داخلة حرب خسرانه
والخاسر الوحيد الي فيها هتبقي هي البنت نفسها واقل شئ نعمله عشان نغير صورتنا دي
هو اننا نبقي عارفين ربنا اولا واخيرا ونتمسك باخلاق الشرق القديم اصل الشرق الجديد بقي مفتوح علي البحري دلوقتي
اما بقي كيف تساعدونننا فدي بكذا طريقة

الاول : الوازع الديني ومعرفة حدود الله وشرعه وسنة نبيه الكريم صلي الله عليه وسلم
الثاني: الاهل يكونوا واخدين بالهم من بناتهم اوي ومش يشددوا عليهم يسبولهم الحرية في ابداء الراي والنقاش

لان اي عند مع اي بنت والتشدد بان دة عيب وحرام من غير دلائل او اقناع هتقلب بعند

وبنتيجة عكسية فلازم البيت يربي بناته صح علي اساس الاقناع
الثالث : عدم التزمت في اي شئ او اي قرار بمعني اني اذا اجبرت البنت علي شئ زي ما قلت هتقلب بنتيجة عكسية
يعني مش اروح اقول للبنت بلاش تكلمي ولاد عشان حرام او البسي الحجاب عشان ربنا قال كدة
ممكن البنت مش تبقي فاهمة ابعاد الموضوع يبقي لازم يكون في مائدة للحوار بالدلائل وباسلوب هادي

عشان ادي مجال للبنت تفكر وتقتنع ويبقي التصرف اللي هي عاملاه نابع من جواها برضا تام
رابعا: الشباب الي بيرتبطوا بالبنات بيطلبوا منهن انهن يكونوا علي سنجة عشرة وان البت تبقي مزة ماشية في الشارع

والبنات عشان هايفة بتستجيب لدة
او ان الشاب يبقي حابب البنت الاستايل اللي الشعر اللي علي الخدود يهفهف ويرجع يطير يطير
فلازم كمان نظرة الشاب للبنت تتغير عشان علي الاقل يساعد البنات علي انها تكون ام وزوجة محترمة

إذا عجبك شاب، بتجربي تلفتيلو انتباهو، كيف؟

ههههههههههههه وهي فين الشباب دول ياختي مش هما برضه ماتوا في الحرب
بصراحة يعني عمري ما مريت بالمرحلة دي اصل انا من النوع الي مش بيملا عينه حد ههههههه
بس ممكن اذا حسيت ان الشاب بيبادلني نفس الشعور بس خايف من رد فعلي ممكن المح له بشوية اهتمامات مني زيادة
ولو اني بعمل كدة مع كل الناس وبكلمهم كتير وبخاف عليهم بس مش عارفة ايه هي الطريقة اللي هلفت بيها انتباهه

غير اني اقوله انت مش عايز تقولي انك بتحبني؟؟

إذا عجبك شاب وما بادلك الاعجاب، شو بتعملي؟

ابزولوتلي عمرها ما حصلت واتمني انها مش تحصل
بس انا مش من طبعي ان حد يعجبني ولو اعجبت بيه يبقي ممكن عشان طريقة تفكير او خفة دم او شخصية
بس كاعجاب قد يؤدي الي حب لا اعتقد لاني مش بعجب بحد الا اذا ابدي اعجابه هو الاول هههههههه
بس ساعتها يعني اكيد هروح ادورلي علي اي قبر صغنتت علي ادي كدة وادفن نفسي فيه
لا طبعا هي مش هتبقي نهاية الدنيا عادي يعني هتعايش واقول لنفسي انتي مش مارلين منرو يعني

في مرشد بيقول انو البنت بترغب الشاب طالما انو بشكّل تحدي لها، شو رأيك؟

دة صحيح المرأة عامة بتحب الغموض واي رجل غامض معاها بيمثل ليها تحدي لفك هذا الغموض
بس يمكن الوضع مختلف معايا شوية لاني فعلا مش بشوف حد غامض بحس ان ربنا سبحانه وتعالي مديني احساس عالي

عشان اقدر اشوف الانسان اللي قدامي من جوة واقدر افهمه بسرعه وكانه زجاج شفاف ادامي فمش بحس بتحدي خالص

هيفاء وهبي، شادية، وفاتن حمامة: مع من تتماهين أكثر؟ (بصراحة ومن دون مثاليات.

اولا انا مش عارفة يعني ايه تتماهين بس لو كان المقصود احب اكون مين فيهم هقول ولا واحدة طبعا

بس بجد نفسي اكون زي السيدة عائشة والسيدة فاطمة ومرم العذراء

ولو المقصود اني احب امثل مع مين دة علي اساس اني جوليا روبرتس مثلا يبقي برضه ولا واحدة منهم رغم حبي واحترامي

لفن فاتن حمامة بس عشان انا اللي ناوية اخرج وامثل وامنتج واعمل السيناريو والحوار عشان اموت الجماهير كلهم او اجيب ليهم شلل

انتقي شخصية رجالية معروفة تتمتع بالكاريزما (برأيك) وتكلمي عنها ؟

هي مش الكاريزما دي برضه مرض جلدي
بصراحة ثقافتي عن عالم الرجال ضئيلة شوية ومش في حد معين بيجذبني لا بغناه ولا بتمثيله ولا بشخصيته
بس طبعا الشخصيةالوحيدة المتكاملة من وجهه نظري هو سيدنا محمد صلي الله عليه وسلم
وطبعا كلامي عنه هيبقي كتير جدا جدا جدا جدا

ونصيحةأو تعليق أرجو نشره: لما تبلشي تحكي لصاحبك عن أسماء ولادك المفترضة

(لأنن بعد ما إجو وأصلاً بعد ما انفتحت سيرة زواج، إلا إذا حاطة براسك الأمومة العازبة)

تأكدي إنو صادر قدامك إيام صعبة قريبة جايي

ههههههههههههههههه
تصدقوا اني فعلا بقوم بالدور دة من دلوقتي انا فعلا بحس اني ام بجد واي حد لما بعرف انه تعبان او مضايق

او محتاج حد جنبه بيبقي هاين عليا اجري عليه واخده في حضني واقوله كل شئ هيبقي كويس
بمارس امومتي علي اي حد هههههه فاتحاها سبيل اصلي
بس بالنسبة لاختيار اسماء ولادي بحب اخليها مع شريك حياتي نتقاسمها مع بعض ونختارها مع بعض

اصلي ديموقراطية بس انا بحب اسم عبد الرحمن ويوسف وفاطمة ومريم
هههههههههههه شافين الديموقراطية

لماذا تنفخ المرأة في كل الزبادي كلما لسعتها الشوربة؟

لان المراة لا تتعلم غالبا من اخطأها
واي تجربة قاسية هي بتمر بيها بتخاف لتكون التجربة المقبلة اشد قسوة من الي قبلها بتكون حذرة جدا في المعاملة

واحيانا تكون زيي حالاتي كدة وتجرح الي قاممها من غير اي ذنب لمجرد انها مش واثقة لا في نفسها ولا في اللي ادامها

هل صحيح أن المرأة تختار الشخص غير المناسب في فترة المراهقة والشباب ثم تندب حظها بعد ذلك؟

هههههههههههههه المراة دائما ما تندب حظها سواء بقي مراهقة او شيخوخة
وبعد فترة قد تشعر ان الشخص المناسب فجاة وبقدرة قادر كدة بقي غير مناسب

ما هو أسوأ موعد غرامي مر بك؟ وما هو أكثر جزء ضايقك في هذا الموعد؟
لالالالالالالالالالالالالالالالالا محدش يفكرني
كنت في تالتة كلية و كان ليا صاحبتي مخطوبة لمهندس المهم قرروا هما الاتنين يجبلوا صاحب خطيبها دة عشان يتقدملي عريس يعني
واتفقنا نروح نادي نقابة المهندسين المهم احنا رحنا واول ما شفته كان نفسي امارس هوايتي المفضلة

الا وهي الجري نص الجدعنة بس امينة بقي منها لله قفشت فيا
قعدنا وكل شوية الاقي الواد اترعش كدة واتفزع من مكانه وقعد يهرش في مراخيرة جامد اوي كانه هيخلعها من مكانها
وكل شوية انا بدوري اتفزع معاه لحد ما سالته هو انت عيان
قالي بمنتهي الثقة اللي خلقها ربنا فيه ليه شايفاني بكح ادامك عجيبة اوي
وكل شوية علي الحال دة لحد ما جابلي صرع رحت ماسكة موبيلي واتصلت بالبت جهاد صاحبتي
قلتلها ايوة يا بابا ايه بتقول ايه البيت ولع وفي حريقة انا جاية جري

لماذا تدعي اغلب النساء انهن لا يجدن الطبخ؟

دي عمري ما شفتها كل واحدة منا ما شاء الله عليها لسان اطول من نهر النيل وبعرف اعمل واعمل

ونفسي في الاكل ولا اجدعها ابله نظيرة وفي الاخر كبيرها سلق بيض
بس في بنات فعلا بتدعي كدة كنوع من الدلال علي ازواجهن عشان يجيبوا ليهم طباخة جتنا نيلة في حظنا الهباب

ذكرى وظروف اول قبلة؟
اني اعترض لم ولن وكل ادوات النفي عمرها ما حصلت بس كل مرة زمان اخويا كنت ببوسه غصب عنه اصل المعفن كان بيقرف مني هههههههههههه

هل تقبلين بأستمرار العلاقة التي تربطك بشخص (زوج أو عشيق) في حال مات الحب بينكما؟؟

ان الحب يموت دي اكيد بتبقي نابعه من طرف فينا
يعني انا عن نفسي مش بحب الروتين بحب اكون امرأة جديدة كل يوم وعشان كدة بستعمل صابون كامي
بس اذا مات الحب بينا اكيد راح يكون في احترام لان علاقتنا هتكون مبنية علي الاحترام قبل الحب
وطول ما في احترام ممكن العلاقة تستمر عشان خاطر الاولاد
اما اذا مش كان في احترام فاستحالة اكمل معاه وساعتها هاخد ولادي واحاجي عليهم

هل يستحق الرجل التضحية بكل شيء من اجله والبدء معه بحياة جديدة تبدأين فيها من الصفر؟؟

اذا كان حب حقيقي مني له فاكيد بيستاهل مني تضحية لاني اكيد مش راح احب رجل عادي يكفي انه هيستحملني
واكيد هيكون هدفي معاه اني ارفعه لفوق واخليه احسن واعظم رجل في الدنيا

يا لهوووووووووووووووووووي ادعي عليكي بايه يا ليندا
كل دة تاج

نخش علي امير الانقام التالت
التاج دة جاي من عند لميا

هل تسعد عندما يمرر لك احدهم تاج؟

لالالالالالالالالالالالالالالالا بكرهه بكرهه بكرهه
كرهت التاج والملكية كلها دة انا حاسة اني هرجع تاجات كنت في الاول بيبقي يا سعدي يا هنايا بس دلوقتي بقي بققول يا قهري

هل مقدار سعادتك أو شعورك ايا كان- عند تمرير التاج لك يختلف حسب المدون الذي يمرر لك التاج؟

كلهم حبايبي واخواتي واي حد منهم بيعتلي تاج ببقي عارفة اني جيت في باله وانه بيحبني وانه عايز ينتقم مني


هل تستمتع عند إجابتك عن أسئلة التاج
عاااااااااااااااااااااااااااااااااااااا
اكيد طبعا عاااااااااااااااااااا
مش شايفين السعادة اللي في وشي عااااااااااااااااااااااااااااا


هل ترى للتاج أهمية حقيقية؟

اممممممممممم بيبقي علي حسب يعني احيانا بيكون لذيذ بيخلي الواحد يفتكر حاجات لذيذة زي تاج مبرمج حر
واحيانا بيحاول يبين وجهه نظر معينة في قضايا معينة زي تاج ليندا واحيانا بيبقي مش ليه لزمة كدة زي تاج لميا ( وش واحدة بتطلع لسانها)

هل فكرت في عمل تاج خاص لك من قبل؟

كنت ناوية اكون شريرة واعمل تاج األفه انا وابعته للناس بس لالالالالالالالالالالا حرمت

هل تفضل قراءة اجوبة التج عند المدونين الاخرين؟ أم لا تهتم سوى بالتدوينات الأخرى فقط؟

اكيد لاني طالما دخلت مدونة حد يبقي انا بهتم بيه وبحب اقراله

عندما ترد على التاج ما الذي تراعيه اكثر؟
طبعا الصراحة واول شئ اراعيه بعد الصراحة اني ابين مدي غضبي ونرفزتي علي اللي بعتلي ام التاااااااااجات دييييييييييييييييييييي

هل تحرص على قراءة اجابات من تمرر لهم التاج ؟ و هل تغير إجابتهم للتاج شيئا في ادراكك لهم ؟

اكيد طبعا عشان اشوف في عنيهم القهر والحسرة اللي عليا دلوقتي واتلذذ بعذابهم
وانا عارفة كويس اوي ان المدون هو مش ملاك دة بشر فاي كانت اجاباته بتبقي نابعه من كينونته البشرية مش التدوينية

هل تلتزم حرفيا بأسئلة التاج ؟

يس سير ايوووووووون طبعنننننننن

ما هي نوعية التاجات التي تفضلها؟
هقول نفس اجابة لميا اهي كلها اسئلة حضرتك

إلى من تحرص على تمرير التاج؟
كنت في الاول اعرف حبة علي ادي كدة كنت ببعت اي تاج ليهم بس دلوقتي لااااااااا
لا يا ماما لا الموضوع خرج من ايدي
تمرر التاج ده لمين؟

لالالالالالالالالالالالالالالالالا
انا مش شريرة زيكم
بس اول ما تخش من باب المدونة علي ايدك المين هتلاقي 138 لينك
كله هيعمل التلات تاجات دول
انا بقولكم بجد اهو