Saturday, December 16, 2006

لو سالتك انت مصري ؟؟؟؟؟؟؟؟؟؟؟؟


لو سالتك انت مصري تقولي ايييييييييييه
تقولي مصري ابن مصري وابن مصر
الله عليه
انا مصري وابويا مصري
بسماري ولوني مصري
الي اخر الاغنية
يعني لما حد منا يسالك كدة انت مين يلا؟؟؟
ولا انتي منين يا بت ؟؟؟؟
بتفرد طولك كدة وتشب علي طراطيف صوابعك وتقوم قايل من غير تفكير
وبكل فخر كدة وانت متشندق ومحدش يسالني الكلمة دي يعني ايه
وحوجبك بقت تمانية مقفولة وبعصبية كدةتقول: ؟
انا مصري يا جدعان واللي له شوق في حاجة يجي يوريني اخره ايه
اتعلمت في مصر واكلت من ترابها
وهموت فيها
دة انا مصري يا ولاد ........؟
دة احنا ملوك الجدعنه واحنا للي الفراعنة والحضارة
واحنا احنا
وايييييييييييييييييييييه
حلو اوي الكلام دة
شعارات يابا
وكلنا بنغني ونقول مصر هي امي
نيلها هو دمي
الي اخره

ومصر ام الدنيا
ومش في زيها وفي وفي
تعالوا بقي نشوف مصر ام الدنيا دي ايه ولينا كلام تاني

البنك الدولي:
مصر في المرتبة 165 بين 175 دولة
من حيث جذب الاستثمارات من حيث الفقر في المنطقة


تقرير التنافسية الدولية:
مصر في المركز 62 وتونس في المركز ال 30
والامارات في المركز 32

فريدوم هاوس: مصر في ذيل قائمة الحريات والسياسيه والمدنية

منظمة الشفافية الدولية:
مصر رقم 70 بين 146دولة من حيث الشفافية
والفساد يمثل 69% من جملة المعاملات الاقتصادية في البلاد


مجلة الايكونوميست: مصر حصلت علي 4,3 من 10 في الديموقراطيه

جامعه شتغهاي : لا توجد اي جامعه مصرية بين افضل 500 جامعه في العالم

دراسة جامعية امريكية: مصر تنتج نحو 375 كتابا سنويا واسرائيل تنتج 4000

الفيفا:
جنوب افريقيا حصلت علي 15 صوتا لتنظيم كاس العالم 2010
والمغرب 10 اصوات ومصر صفر

مراسلون بلا حدود:
مصر في المركز 133بين 168 دولة في حرية الصحافة
وتسبقها افغانستان وموريتانيا


الامم المتحدة: الفقر في مصر ارتفع بنسبة 7% بعد موجة الغلاء الاخيرة

و23 % من الاطفال الفقراء توقفوا عن التعليم (يا عيني علي مجانية التعليم).؟

الجمعية الافريقية لامراض الكبد : 12مليون مريض بالالتهاب الكبدي في مصر

المشروع القومي لمكافحة السرطان :100 الف مريض بالسرطان سنويا


التقرير الاستراتيجي العربي:
مصر رقم 75 بين 87 دولة في اوضاع المرأة

الامم المتحدة:100 الف طفل شوارع في مصر

ها قلته ايه يا شعب
اذا كان التحرش الجماعي حصل ادام الشرطة
واذا كانت الشرطة هي نفسها من تمارس التحرش وانتهاك اعراض الرجال قبل النساء
مش هي برضه في خدمة الشعب
اهي بتخدمه اخر راحة
وتحسسه بكل ما لذ وطاب من الحرية في ابداء الصراخ من الالم
واذا كان وزير ثقافتنا اللي قعد 19 سنة في وزارته قال ان الحجاب يدل علي التخلف
مش ثقافة يا ناس
الراجل خايف علي ثقافتنا المتحضرة
واذا كان رئيس وزراء حكوتنا النجيبة العجيبة قال علينا يا شعب
اننا غير ناضجين سياسا واننا غير مؤهلين للحياة لتحمل الحياة الديموقراطية
واذا كان العلاج علي نفقة الدولة محصور علي الممثلين المشهورين ورجال الاعمال الي مش محتاجين اصلا علاج علي نفقة الدولة
والتعليم علي اللي بيتعلموه
كان ليا مدرس زميلي قبل ما اتعين بيشتغل ب 165 جنية وكان متجوز ومراته حامل
ومش ليه دخل تاني
يا عيني
اااااااااااااااااااااااااااه يا بلد
نفسي اقول كلمة مش كويسة اعتقد ان في منكم ناس عارفين
انا عايزة اقول ايه
جتكوا القرف مليتوا البلد
طبعا مش انتو
انا قصدي علي الحمرة اللي فوق
جمع حمار يعني
نفسيي ابن الكلب دة يحس علي دمه

قولي بقي يا سيدي

لو سالتك انت مصري تقولي ايييييييييييييييي
ه

Labels:

65 Comments:

Blogger IBN BAHYA said...

إيه المدونة المغرضه دي؟
إيه الكلام ده بس يا جدعان ؟؟؟
حرام عليكم دي مصر حليوه وعال االعاااال

قطع لسان اللي يقول غير كده

بس على فكره يا أساتذه .. كل الأرقام الوارده في هذه التدوينة لازم تنضرب في عشرين

يعني مثلا أطفال الشوارع بعد التوربيني قالوا إنهم 3 مليون في مصر مش مية ألف

مرضى الكبد عشرين مليون مش 12

وكثير الأرقام اللي لازم تنضرب في عشرين

وقليلة جدا الأرقام اللي ممكن تضربها في اتنين ولا تلاته

شكرا على التدوينة
وسامحونا على الدخله الشمال دي
أصله من غلبي
تحياتي للجميع

Sun Dec 17, 12:07:00 AM GMT+2  
Blogger smraa alnil said...

احساس حلو وانت بتكتب تعليق لنفسك
انا بس حبيت احط تعليق عشان اي حد هيشتمني من اولها يبقي عارف انا قلت كدة ليه
وابلغ رد لاي حد مقدما
قصيدة عمنا صلاح

على اسم مصر التاريخ يقدر يقول ما شاء
أنا مصر عندي أحب وأجمل الأشياء
باحبها وهي مالكه الأرض شرق وغرب
وباحبها وهي مرميه جريحة حرب
باحبها بعنف وبرقة وعلى استحياء
واكرهها وألعن أبوها بعشق زي الداء
واسيبها واطفش في درب وتبقى هي ف درب
وتلتفت تلقيني جنبها في الكرب
والنبض ينفض عروقي بألف نغمة وضرب

يعني من الاخر

بحب ليل مصر ونهارها
بحب بساطتها وكبرائيها
بحب البسمة اللي مرسومة علي فجرها
وهدؤها لما نسمة ريح ومطر تنزل
بحب جنونها
انا عشان بحبها مش هقول الكلام دة

دة بس توضيح مني

Sun Dec 17, 12:10:00 AM GMT+2  
Blogger IBN BAHYA said...

نسيت ملاحظه .. صورة التدوينة دي صعبه أوي .. بس يا ترى المسكينه دي لقيت أي برشامه في مشوار المستشفى الفظيع ده ولا رموها بره ؟؟؟ يا ترى جايين من فين وحصلهم إيه دلوقتي الغلابه دول ؟؟؟

صوره صارخه بجد
أحيي من صورها ومن وضعها هنا

Sun Dec 17, 12:11:00 AM GMT+2  
Blogger smraa alnil said...

ههههههههه ابن بهية
دخلت وانا بكتب كومنت لنفسي
والله انا بحبها جدا
بس للاسف مش انا اللي قلت كدة
عامة الارقام دي انا جايباها من جريدة الدستور

Sun Dec 17, 12:11:00 AM GMT+2  
Blogger IBN BAHYA said...

على فكره دي صدفه عجيبه مش بتتكرر كتير .. مدونة محترمه جدا ومازلت عند رأيي بأن هذه الأرقام متفائله جدا

يا ريت نراجع الدستور فيها .. معلوماتهم قديمه باين عليها من أيام فترة الرئاسة الثانية لمبارك مش الخامسه
أرق تحياتي

Sun Dec 17, 12:15:00 AM GMT+2  
Blogger smraa alnil said...

جايز بس نقدر نقول انها موجودة حاليا يمكن مش هتتغر حتي ولو بعد عشرين سنة بس يبقي لينا ان الارقام دي كفيلة باننا نصرخ ونقول كفايا حرام

Sun Dec 17, 12:16:00 AM GMT+2  
Blogger Ma-3lina said...

انا مصرية و هفضل مصرية

مش ذنب مصر الارقام اللنتى كتباها مش ذنبها اللى بيحصل

مش ذنبها ان الناس بقيت خاضعة للبيحصل مفيش اى استجابة
مهم برده تعبو و زهقوا

انا عارفة انك محبطة

و انا كمان بس كفاية احباط كفاية ضرب تحت الحزام

لو ان احسنلنا اننا ننام فى العسل و نريح بالنا يبقى احسن

بس للاسف مينفعش

طيب نعمل اييييييه

Sun Dec 17, 01:12:00 AM GMT+2  
Blogger كلمه said...

looooool .... ha2ool tanzany :D

ya benty el3eeb mesh fel balad ..elbalad de gamda elteneeen ..el3eeb feha e7na wlahy .... 3shan shayfeen elkalam da w sakteen

Sun Dec 17, 01:15:00 AM GMT+2  
Blogger Ma-3lina said...

انا مصرية و هفضل مصرية

مش ذنب مصر الارقام اللنتى كتباها مش ذنبها اللى بيحصل

مش ذنبها ان الناس بقيت خاضعة للبيحصل مفيش اى استجابة
مهم برده تعبو و زهقوا

انا عارفة انك محبطة

و انا كمان بس كفاية احباط كفاية ضرب تحت الحزام

لو ان احسنلنا اننا ننام فى العسل و نريح بالنا يبقى احسن

بس للاسف مينفعش

طيب نعمل اييييييه

Sun Dec 17, 01:17:00 AM GMT+2  
Blogger dead man said...

هقولك برضه أنا مصري.. وأبويا مصري.. وكل مصري الله عليه

الغلط مش غلط مصر.. لاغلط النيل ولا غلط شط اسكندربة

الغلط غلط اللي قاعد علي البحر ومطنش.. واللى ماشي علي الكورنيش عامل مش واخد باله

خليك إيمانك بالأرض مش بالى بيحكم هترعفي ان أنا مصري واوبيا مصري وكل مصري الله عليه

هم مش كلهم طبعا بس يلا

Sun Dec 17, 03:01:00 AM GMT+2  
Blogger albida said...

والله يا بنتى أنا كنت لسه بسمع الأغنية دى قريب مع صحبتى.. وفطست على روحى من الضحك أول ما ركزت فى الكلام بتاعها

بس الواحد والله يفتخر بالاحصائيات اللى أنتى جايباها دى!! عارفة؟ يصورها ويلزقها على قفاه
:) :)

manal

Sun Dec 17, 05:23:00 AM GMT+2  
Blogger LAMIA MAHMOUD said...

بصي يل ستي

من زمااااااان من وانا عيلة صغيرة كنت بسمع اغنية لو ما كنت مصري لاتمنيت ابقى مصري ومكنتش فاهمة اية الفكرة


ولما كبرت بقيت بقول
لو لم اكن مصريا لوددت ان اكون مواطنا امريكيا من الدرجة الاولى

بس اهي بلدنا ولا حنشتريها محدش بينقي بلده

بنطلع نحبها كده زي ما احنا

Sun Dec 17, 10:46:00 AM GMT+2  
Blogger Hapy said...

معلمي
وحشني يا باشا
من اول الاسكم عرفتك يا قمر

سمراء كليل السهران
وكطلة بنت السلطان

Sun Dec 17, 11:07:00 AM GMT+2  
Blogger karim adel said...

هقولك مصرى
بس العيب مش فى مصر فى اللى حكمنها
الله يخرب بيوتهم

Sun Dec 17, 12:30:00 PM GMT+2  
Blogger tota said...

سمراء النيل
بعد اللى قولتيه ده متوقعة نقف بكل فخر ونقول ايوه احنا من البلد دى
ايوه احنا رضينا نكون كل ده
ايوه احنا معدش لينا قيمة ولا انسانية ولا اى ثقل دولي ؟
هقولك ايوه انا مصرية ومش عايزة الحال يفضل كده ومش عايزة استسلم للوضع ده
عايزة افكر مش لوحدى نعمل ايه علشان نخرج بره ده

نعمل ايه فى التردى ده
مش عارفة بس حاسة ان فى حلول

اكيد فى حل

Sun Dec 17, 02:37:00 PM GMT+2  
Blogger مـحـمـد مـفـيـد said...

اعتقد ان انتي مش سايبه حاجه نقولها في التعليق
:)))

Sun Dec 17, 03:16:00 PM GMT+2  
Blogger smraa alnil said...

ما علينا

انتي برضه قلتي كفاية احباط
وقلتي ان الناس مش فيها منها استجابة
وقلتي ان اننا احسنلنا اننا نسكت
وفي نفس الوقت قلتي مش ينفع
طب انتي قلوليلي الحل من عندك
انا لما كتبت الكلام دة عشان انا مصرية
ومش ينفع اناقض نفسي واقول ان انا مصرية وخلاص بالاسم
لازم اخد خطوة
واول خطوة اقول ان البلد دي يا جماعه ضايعه مش بسببها بسبب اللي سارقينها ونهبينها
انا مصرية جدا واجدا
بس كان لازم نواجه نفسنا عشان نقول لالالالالالالالالالالالالالالالالالالالالالالالا
ونقول كفاية ومش نبقي نايمين علي ودانا

تحياتي
___________________________________

كلمة

انا مش هكيلك غير علي موقف واحد
كان في مرة مظاهرة في وسط البلد لحركة كفاية
وعساكر امن الدولة محوطاهم بدايرة لا يخرجوا منها ولا يدخلوا منها
كان معيا واحدة صاحبتي
قلت ما تيجي نخش في الماهرة ونطلع الغل والكره اللي جوانا
قالتلي تعالي
وقلت احاول اخش
لقيت ظابط واقف كان هيجيبني من قفاايا
قالي رايحة فين قلتله عايزة اعرف هما بيوزعوا ايه جوة
قالي انتي هتهزري
قلتله يعني انت مش شتيف اني داخلة المظاهرة
قالي بقولك ايه انتي شكلك بنت ناس وبنت خافي علي نفسك احسنلك
قلتله طب ممكن اهتف واقول كلمة واحدة بس
قالي هتقولي ايه
سعد سعد يحيا سعد
ومش عايزة اقولك عمل فيا ايه
تفتكر العيب في مين

Sun Dec 17, 05:13:00 PM GMT+2  
Blogger smraa alnil said...

dead man

ولما انت ميت اتكلمت ازاي
ما علينا بس عايزة اقولك حاجة
كانوا زمان بيغنوا ويقولا مصريتنا عربيتنا قوميتنا
العيب مشفينا برضه العيب في ابن الكلاب اللي فوق اللي ممشي شوية حمير معاه
وحسبي الله ونعم الوكيل
__________________________________

منال

طب حتي قفاكي يرفض انك تلزقيها
دة يقرف
تصدقي برضه ان انا ضحكت لما سمعت الاغنية دي
بس هنعمل ايه منضطرين نسمعها ونحفظها
__________________________________

لميا محمود

علي رايك احنا اتولدنا لقينا نفسنا بنحب البلد دي زي ما هي كدة وزي ما احنا كدة ولو كنتي اتولدتي في مصر وعشتي في بلد تانية تخيلي كدة انتمائك هيكون فين .........؟

__________________________________

hapy

حبيبة قلبي
والله واحشاني الله يخرب عقلك
عايزة اشوفك
شفتي احنا عرفنا بعض ازاي :))

___________________________________

empire
الله يخربيبتهم بس
نفس ادعيلهم بدعوة الهي تكون من نصيبهم واحد واحد
الهي يارب
يجيلهم اسهال لحد ما يتصفوا خالص ويجيلهم جفاف ويموتوا
لا بلاش الدعوة دي
الهي يا رب يتزنقوا زنقة الكلاب ومش يلاقوا حمام ولا حتة حيطة يتصرفوا عليها
المهم ان يحصلهم حاجة مقرفة وخلاص
وعلي فكرة انا برضه مصرية
___________________________________

tota
انا لما فكرت في البوست دة مش لقيت اي حل
عشان كدة قلت اعلنه يمكن نلاقي كلنا الحل
انا برضه مش عايزة دة
ولا عايزة التردد والوضع اللي احنا فيه
بس ايدي علي ايدك نعمل ايه
نعمل مظاهرة
ولا نعمل انقلاب
ولا نفجر رئاسة الجمهورية
ولا ايه بالظبط
حد يقولي يا جدعان فعلا ايه الحل
___________________________________

محمد مفيد

اصل الواحد يخويا مش يسلم فقلت اعلق علي نفسي قبل ما حد يتهمني اني مش مصرية ولا جاسوسة
اصل الواحد ايه غير كرامة :>)
وبرضه هرجع واقول
لسة الطيور بتطير

ولاخر مرة هقول

على اسم مصر التاريخ يقدر يقول ما شاء
أنا مصر عندي أحب وأجمل الأشياء
باحبها وهي مالكه الأرض شرق وغرب
وباحبها وهي مرميه جريحة حرب
باحبها بعنف وبرقة وعلى استحياء
واكرهها وألعن أبوها بعشق زي الداء
واسيبها واطفش في درب وتبقى هي ف درب
وتلتفت تلقيني جنبها في الكرب
والنبض ينفض عروقي بألف نغمة وضرب

يعني مهما قلت وقت ما مصر تقع بجد
كلنا هندافع
بس احنا متكفين

Sun Dec 17, 05:27:00 PM GMT+2  
Blogger mano said...

ليه بس الاحباط دة؟
للأسف انا قريت الأرقام قبل كدة
هنعمل اية احنا آخرنا كلمتين و اغنية

Sun Dec 17, 06:38:00 PM GMT+2  
Blogger smraa alnil said...

mano

والله مش احباط
بس تقدر تقول كدة دة نوع من انواع الاحباط اللي حسة بيه
:)))
احنا اخرتنا كلمتين واغنية زي مانت قلت
وكلمة تجمعنا وعصايا تفرقنا او خد فين يوجعك

Sun Dec 17, 06:45:00 PM GMT+2  
Blogger المٌهَــــاجِر المَصْـــــــرى said...

مصـرى ابن مصرى
وشكرا اوى ع العكننه اللى بالارقام دى

Sun Dec 17, 07:26:00 PM GMT+2  
Blogger ادم المصري said...

ايه دا .. انتي قلبتي وجع ؟


ليه كدا .. انا كنت باجي اخفف عندك شوية


بس تعرفي كدا احسن

كل ما الشعب دا يبتدي يحس بالوجع

هيبتدي يقول
احه


واول ما يبتدي يقولها .. هتتفتح طاقة القدر انشاء الله


خدي بالك انتي علي الطريق



ههههههههههه




ادم المصري
اول دكتور احه

Sun Dec 17, 07:32:00 PM GMT+2  
Blogger smraa alnil said...

المهاجر المصري

والله مش كنت عايزة اعكنن عليك
بس هب جت ظروفك كدة
عامة مش تخاف المرة الجاية هعكنن عليك من ناحية تانية بعيد عن مصر

:)
___________________________________

ادم

صديقي المفضل صاحب اول كلمة اعتراض
هههههههه
انت اخدت بالك اني علي الطريق
هههههههههه
والله كان نفسي اقولهابس انا مش بحب اقولها
يلا
ما علينا
تفتكر ان الناس هتحس بوجع كدة زي مانت حسيت

Sun Dec 17, 07:42:00 PM GMT+2  
Blogger محمد ياسر said...

http://www.6rbtop.com/library/resources/3ali_Al-7ajjar/Collection/listen/19342_hi.ram


لا مش مصرى فى كل اللى قلتيه و مصرى فى اى فعل ايجابى ولو بسيط جدا احس ان لسه فى مصر وفيه مصريين
ادعوكى لسماع اغنية يا مصرى لعلى الحجار هتعرفى المصرى بجد

تحياتى

Sun Dec 17, 07:58:00 PM GMT+2  
Blogger الجحيم هو الحقيقه said...

سمر ا النيل

الحمد لله انا من طنطا
انتى جيت ع الجرح
الانتماء لمصر لماذا؟
اشمعنه يعنى
بدوناستعمال الحنا جر
ولغة الاغبياء
ما هو الذى يدعو للفخر فى مصر ايها الساده

سمر ا قالك على اللى فيها
احيكى يا سمر ا يا بنتى

Sun Dec 17, 08:45:00 PM GMT+2  
Blogger smraa alnil said...

اولا دي اول مرة تزورني فيها
وشكرا
ثانيا شكرا جدا علي الاغنية الجامدة دي
انا فعلا اول مرة اسمعها
كلماتها جامدة وبتحسرني اكتر
الاغنية اسمها يا مصري وبيغنيها علي الحار
كلماتها بقي بتقول ايه

يا مصري ليه دنياك لخابيط
والغلب محيط
والعنكبوت عشش عالحيط
وسرح علي الغيط
يا مصري قوم هش الوطاويط
كفاياك تغليط
صعبة الحياة والحل بسيط
حبة تخطيط
فتحت باب استيرادك
وصرفت فوق ضعف ايرادك
حلي للخواجة استكرادك
سابك بتقرا في اورادك
ودة قشاطك ونزل تشفيط
ومهوناتي تحب تظيط
ساعة الفرح زغاريط تنطيط
وفي المياتم هات يا صويت
وفي المظاهرة سخن تشد
وبليل تخاف تنسي التصويت
وليه بترشي و تتساهل
وتبيع حقوقك بالساهل
تستاهل النار تستاهل يا غويط
ويحسبك الجاهل
ساهل وساهي وغبي وعبيط
يا مصري يالي الغلا عاصرك
والنهج في عصرك حاصرك
كن للحياة واسبق عصرك
ولا حاجة هترجع مصرك
الا ان تكون شغال ونشيط

مش عارفة بقي انا سمعت الكلام صح ولا لا
بس شكرا ليك مرة تانية
___________________________________

الجحيم


بيقولك ايه بقي
انتمئي لمن يعطيني كسرة خبز
وانتمائي لمن يشعرني بالامان
وانتمائي لمن يعطيني كرامتي علي طبق من عاج ومرمر
وانتمائي لمن يحميني
وانتمائي لمن يريدني حية
وانتمائي لمن يعطيني حرية صراخي بالرفض
وانتمائي لمن يسقيني حريتي

يعني باختصار روح دور انت تنتمي لفين
انا برغم حبي لمصر
لكن لما دورت انتمي لفين
لقتني للاسف



بلا وطن

Sun Dec 17, 10:06:00 PM GMT+2  
Blogger الجحيم هو الحقيقه said...

متفق معاكى
الغنى فى الغربه وطن
والفقر فى الوطن غربه
وتربه
كما قا ل
الاما م الطاهر سليل بيت العلم والنبوه ابو الانو ار ابو الشهداء سيدا شباب اهل الجنه الحسن والحسين
على بن ابى طالب
كر م الله وجهه

وتربه من عندى انا
تحيا تى يا سمرا

Sun Dec 17, 10:52:00 PM GMT+2  
Blogger smraa alnil said...

الجحيم

حلوة اوي التربة دي
انت شغال ايه بعد الضهر مش كفاية دخلتنا في جحيمك

Sun Dec 17, 10:59:00 PM GMT+2  
Blogger الجحيم هو الحقيقه said...

هههههههههههههه
يا بنتى دا فخر ليكى انك تدخلى عندى
عشا ن تحلفى للناس
انك دخلتى الجحيم
ههههههههه
تحياتى

Sun Dec 17, 11:07:00 PM GMT+2  
Blogger smraa alnil said...

الجحيم

هههههههههههههههه
والله حلفت
ربنا يجازيك بقي

Sun Dec 17, 11:26:00 PM GMT+2  
Blogger sherif gharib said...

لو سالتى انا مصرى اقولك بجد انا مصرى
و انا فخور بكده و مش شعارات
يا بنتى انا لما اقول ان انا مصرى يعنى انا حابب ان انا اكون مصرى
اكيد مختلف تماما مع كل السياسات المتبعه و مع كل الساده المنفذين للسياسات ديه
بس انا بتكلم على الشعب ده اللى بجد مستنى اى حاجه تفرحه مستنى اى حاجه يتلم عليها تحت رايه واحده
مثال بسيط افتكرى اللى حصل ايام دوره الامم فى الكوره
افتكرى فرحه الشعب كله
هو ده الشعب اللى انا اقصده و اللى انا فخور ان انا انتمى ليه
العيب فينا مش فى البلد
تحياتى و ياريت بدل ما نهد اى حاجه نحاول نعيدها
تحياتى

Sun Dec 17, 11:57:00 PM GMT+2  
Blogger smraa alnil said...

شريف غريب

البوست دة اكبر دليل علي اني مش بهد
انا بحاول ابني
بحاول علي الاقل افوق نفسي
واني اعرف الغلط فين ومين الغلط
الارقام دي مش هقولك انها بسبب الحكومة بس لا اكيد احنا كمان مشاركين فيها

انا مش بكره الشعب ولا البلد
انا بكره الغش والغدر والمحسوبية والخانة
بكره السرقات حتي بينا وبين بعضينا
بكره النفاق والرشاوي
انا مكن انتقض البلد دي بس يوم ما حد يجيب سيرتها باكله
انا مصرية زي ما قلت
بس السلبيات بقت كتير اوي يا شريف
مش بقيت استحملها
كتبت من غلبي

Mon Dec 18, 12:17:00 AM GMT+2  
Blogger aymen.farouk said...

انا يا سماره هنزل موضوع قنبله عن انتهاك حقوق المواطن المصرى
ابقى اقريه
وانا اسف لانى مش بكلمك اليومين دول انا مشغول لشوشتى ادعيلى

Mon Dec 18, 02:37:00 AM GMT+2  
Blogger ana ga3an said...

كل ماسمع الاغنية دي احس انها شتيمة

Mon Dec 18, 09:18:00 AM GMT+2  
Blogger nor said...

أضم صوتي لصوت ابن بهية..دي أصوات مغرضه دسيسة....
الهدف منها إقلاق مضجع ذلك الشعب الذي ينعم بكل وسائل الرفاهية....
وعلى رأي عادل إمام ... المواصلات فاضية والرغيف كبييييير وكل شويه يقولولنا فكوا الحزام....... و"تموت " الأمة العربية!!؟

Mon Dec 18, 01:09:00 PM GMT+2  
Blogger elkamhawi said...

مصر دى امى بس امى اتبهدلت خالص نفسى المها واستتها وارجع لها احترامها بس باين كدة انه مفيش فايدة

Mon Dec 18, 04:49:00 PM GMT+2  
Blogger smraa alnil said...

ايمن فاروق

انتهاك حقوق المصري مرة واحدة
يا ايمن دي بقت حاجة اساسية في حياتنا
طب دة حتي نبقي مدايقين لو محدش انتهك حريتنا وحرماتنا تحس كدة ان انت ناقصك حاجة ومش تبقي دي مصر يا عبلة
عامة ربنا معاك ويوفقك
تنشغل عني انا اه ومسمحاك لكن اللي مش هسامحاك فيه انك تنشغل كمان عن شهد ابقي سلملي عليها كتير
__________________________________

انا جعان

طب والله انا كنت خايفة اقولك كدة لا تقوليوا عليا مش بفهم في الفن الرفيع
او تتهموني اني ضد نانوستي عجرم
بس كويس انك قريت الليله

___________________________________

nor

وانا كمان اضم صوتي لصوتي
صحيح ايه المدونة المغرضة دي التي تشوه اسمي واعرق البلاد
"مش موافقة"
وعلي راي محمد صبحي بقي
ايه في حياتنا يحرق الدم يا حورية
المواصلات تحرق الدم
العيش والعيشة واللي عايشنها يحرقوا الدم يا حورية
وتموت الامة العربية هي لسة مش كانت ماتت
تحياتي
___________________________________

القمحاوي

والله يا ابني في فايدة بس امتي الله اعلم
يا قمحاوي يا ابني امك بقت في الارض
ومش هتقدر عليها لوحدك اصلها تقيلة اوي
لازم تجمع اخواتك وتقولوا هيله هوووووب يمكن تقدروا تشلوها
علي فكرة انا اقصد مصر ها
:)

Mon Dec 18, 08:15:00 PM GMT+2  
Blogger Ironcobra said...

سمراء حاططلك رد توضيحي في البوست اللي فات أبقي اقرية , وحاولت أتبلك رد عللى البوست دة أمبارح و لما جيت أعملة Publich the computer restarted and I lost all of this long comment I wrote .

Mon Dec 18, 09:50:00 PM GMT+2  
Blogger ياسمين said...

بجد سعيدة جدا وأنا أتابع التعليقات على المقال بتاعك .. الحماس .. كلنا عندنا حماس .. طول عمرى بقول ان الحماس هو اللى ناقص الشعب دة .. بس لما بأتابع المدونات المصرية بأتفائل وأحس بنبرة الحماس .. قولى كمان وصحصحى الكل وخلى الحماس شعلة .. الحماس معدى على فكرة .. وأنتى الدليل على كدة.

Mon Dec 18, 10:45:00 PM GMT+2  
Blogger ahmEd_H said...

لا توجد اي جامعه مصرية بين افضل 500 جامعه في العالم

لو الكلام دا صح يبقى كل الى احنا عاييشن فيه منطقى

لا حول و لاقوة الا بالله

Tue Dec 19, 12:26:00 AM GMT+2  
Blogger ALiaa said...

هقول اتفووووووو

عذرا للوقاحة

Tue Dec 19, 12:59:00 AM GMT+2  
Blogger 3rby said...

قلتها قبل كده وهاقولها تاني
لو لم اكن مصري لحمدت الله اني لست بمصري
البوست ده قريته بعد بوست دماغ ماك
قلتله ناقص الكبد
واديكي جيبتي


اجمد حاجة اننا بعد افغانستان

Tue Dec 19, 01:52:00 AM GMT+2  
Anonymous كبير المتشردين said...

عارفة مصر وحشة ليه ..... مش علشان الحكومة ولا علشان ديون علشان اتعودنا نرمي التهم علي بعض من غير ما نعمل الي علينا كل الصيع الي علي القهاوي بيشتموا في الحكومة وكل الحرمية بيشتموا في المجتمع والناس وكل المرتشين بيتدعوا الشرف حتي تجار المخدرات بيشتموا برضه بس لو كل واحد عمل الي عليه هيكون الوضع احسن بكتير لان الحكومة اقل من مليون نفر واقصد بالحكومة كل القطاع العام من اصل تمنين مليون احسبيها انتي عموما انا مصري وراضي اني مصري

Tue Dec 19, 07:59:00 AM GMT+2  
Blogger Amr Ahmed said...

اييييييييييييييييه

انت بتقول ايه

طب ماحنا عارفين اننا في ذيل الامم

احنا عدينا الدول النامية

هايعملولنا دول اقل منها


بس هانعمل ايه

حسبي الله ونعم الوكيل

كله من الفساد وانعدام الضمير

Tue Dec 19, 08:33:00 PM GMT+2  
Blogger مُزمُز said...

الللللللا
إنتي ليه حولتي عالسكة دي بس
ماكنا كويسين وبنكتب كلام جميل ليه النكد المنكد المتنكد النكيد المنكود النكدي ده ها؟
الواحد عنده حالة طهقاااااااان من كل حاجة حتى من المعارضة والكلام عن مآسينا
الشلل قرييييييب جدا إن شاء الله


أحة
عاشت الأحة حرة مستقلة

Tue Dec 19, 09:29:00 PM GMT+2  
Blogger بين الأمل و اليأس said...

والله اناهاعيط انا كنت سايب البارح تعليق وكنت كاتب كتير واللله حرام البلوج البيتا ده طلع عيني كل ماجي اكتب يقطع ومبقتش عارف انا كتبت لمين ومكتبتش لمين ومبقتش عارف اعمل ايه اشد شعري ولا اقطع هدومي يارب ارحمني والله كنت كاتب هنا وحتى فاكر كويس اننا قلت اننا لسه كاتب نفس الكلام عند محمد مفيد انا خلاص هاعيط
وربنا يسترها

Tue Dec 19, 10:40:00 PM GMT+2  
Blogger smraa alnil said...

ironcopra

اولا مش في داعي انك توضح كلامك انا فاهمة كلامك كويس
وبعدين ماليش دعوي انا عايز التعليق بتاعي هنا اتصرف وجيبهولي

___________________________________

ياسمين

ياسمين الجريئة
اسمحيلي اسميكي بالاسم دة لاني فعلا معجبة بجراءتك
وبعدين شكرا يا قمر علي وصفك ليا باني دليل المتحمسين
الشعب كله كدة يا بنتي
تحياتي

__________________________________

ahmed_h

اشمعني دي يعني اللي جيت عليها
ما كل اللي بيصحلنا برضه منطقي بسبب الارقام دي
هههههههههه عامة سعدت بتعليقك

___________________________________

علياء
يا حبيبتي قولي اللي عايزة تقوليه
محدش يقدر يقولك لا
ومش تعتذري عن اللي اللي انيت قلتيه لانه ابلغ رد

__________________________________

3rby

اديني بعلق علي كلامك اهو عشان مش تقول اني منفضالك اهو
وبعدين انا جبتلك الكبدة فين حقها بقي
ولا هي انا اسفأناكم
انا عايزة فلوسي
___________________________________

كبير المتشردين

صدقني برضه العيب في الكل فينا وفي الحكومة
فينا احنا اللي مش بقينا نعرف نمشي امورنا غير بريزة من تحت التاربيزة
ودايما بنكره غيرنا
ومش بنمشي امورنا غير بالرشاوي والمحسوبية
اسمحلي اقولك ان انت تعيش في وطن لا يعرف وطنيتنا
___________________________________

amr ahmed

اديك جبت المفيد يا عم عمرو
مش هقولك اكتر من كدة :)
___________________________________

مزمز
عشان خاطرك انت كتبت بوست جديد اي خدعه يا باشا عشان مش ابقي حولت
بس انا قول يا رب
وعاشت عاشت
:))
___________________________________

بين الامل والياس

ههههههههههههههههههههههههههه
والنبي ما تعيط لحسن هاجي اعيط جنبك
معلش بقي اكنك كتبته
انا مسمحاك في التعليق اللي مش اتكتب
هعديهالك المرة دي
بس المرة الجاية مش هعديهالك ابدا

Tue Dec 19, 11:07:00 PM GMT+2  
Blogger Ironcobra said...

أولا يا ماعلينا مسخرة ليست سخرية مما كتبتية أو أستهزاء بالعكس دة مدح , حيث أن كلمة مسخرة في اللغة العربية هي الكوميديا السوداء الساخرة .
حتى في أيام يوسف بك وهبي لما كانوا يحبوا يوصفوا مسرحية كوميدية هادفة و ساخرة كانوا يصفونها بالمسخرة


ولا تزعلي يا ستي هو فية أسهل من الكوبي و البيست .
والحمد للة أنك طلعت بنت بلد مطأطأة أنا قلت و قعت في واحدة فرفورة و عايزة تعيش في دور الصايعة و لما الواحد قالها كلمتين مجاملة مافهمتهمش ولا فهمتهم غلط .

Tue Dec 19, 11:20:00 PM GMT+2  
Blogger smraa alnil said...

ما علينا تاني
هههههههههههههههه
يا ابني انت بتحلم بيها
طب تصدق بقي ان كدة عيب
ههههههههههههههههههههه
عامة انا لا فرورة
هههههههههههههههههه
طب والله تعليقك بيضحكني
قول اللي انت عايزه الحمد لله دماغي كبيرة

Tue Dec 19, 11:27:00 PM GMT+2  
Blogger بين الأمل و اليأس said...

معلش والله المرادي بقه نسيت اسيب تعليقي من خنقتي بس هاحاول اقرا واكتب اهه تاني
اولا انا هارد واقول ايوه انا مصري وبن مصر الله عليه
بجد يعني زي منا كنت بقول عند محمد الوطن عباره عن ارض وشعب وفي النهايه القياده او الحكومه
وطبعا الحكومه جايه من الشعب وبما اننا الشعب فاكيد الحكومه احنا الي عملناها واحنا اللي وصلناها لكدا وهي اللي وصلت البلد لانها تكون الوطن من ارض وحكومه والشعب في الطراوة على الجزمه
وبعدين انا عارف صحيح ان الارقام اللي انتي كاتباها دي قسمتيها على 70 مليون عشان تطلع كدا ومتصدميش اللي بيقرا بس محدش قال ان ممكن يكون موضوع اننا من الدول الناميه واننا على هذا لفقر او الجهل عشان نكون بالفطره محدش قال لنفسه ياترى احنا لو عايشين بره مصر ممكن نبقه محرومين من ايه كل واحد بيقول نا نفسي اسافر طب جربو كدا تسافرو تعيشوا في بلد عربي لمدة 19 سنه بس حتى وطبعا الاجازات بتجوها عادي ومش عارف ايه تخيلوا كدا لما ترجعوا هنا هاتعيشي ازاي عارفه اول حاجه هاتقليها ايه اقلك انا
ياه معقول الناس هنا بتخرج وبتقابل بعض طول اليوم معقول هنا الجار يعرف جاره معقول الباب مابيبطلش رن ( طبعا من الشحاتين ههههههههه) كل ده مابيحصلش هناك كل واحد رايح عشان يشتغل يرجع يوعد في بيته وحيد ولا حد بيسال عليه ولا هو بيسال على حد
عارفه اهم حاجه هنا بقه ايه ان هنا اهلك يوم ماتتعبي هاتلاقيهم جنبك هنا هاتلاقي اصدقاء بكل ماتحمل الكلمه من معنى لكن هناك اتكوني صدقات مفتكرش قولي زماله قولي اي حاجه لكن صداقه لا والف لا
عارفه هاتلاقي ايه هنا كمان طيبه في وشوش الناس ضحكه مرسومه على وش كل واحد ختى وهو تعبان
لكن بره كل واحد عايز يعيش ولو على حساب اللي حوليه اه منكرش ان ده هنالكن مش بالشكل بتاع بره
يكفي اوي انك في النهايه هاترجعي كدا كدا لارضك تخيلي اقصى حاجه وهي انك هنا ماشيه في الشارع كل شويه سلامه عليكم يافلان وياعلان انت عامل ايه
لكن هناك محدش ي\عرف حد وكمان يوم ماتبقي راجه بعد 19 سنه من الغربه تلاقي الكل حوليكي بيسلم على بعضه وبيضحكوا مع بعض وانتي في الوسط مجهوله وقاعده في زاويه يكفي اوي ان نص اهلك متعرفهمش غير بالعافيه اقارب الدرجه الاولى وتبصي تلاقي واحد يقلك ده ابن خالة عمة ابوكي وتلاقيهم اصحاب اوي
عايزين نتحرم من ده كله ياعالم دي بلدنا جميله بس الي يقدرها
انا هه مسافر كمان شهر ونص وهاموت ومسافرش لاني كدا هارجع شريط عمره 19 سنه غربه
اناعشت هنا اهه 5 سنين والله كانهم عمري كله وحبيت تراب البلد دي ومش شعارات لكن عشان اهلها اللي همه الشعب عشان كدا انا بقول كويس اننا من الدول الناميه وافقر الدول على مستوى لعالم عشان نكون طيبين وبالفطره
معلش بس انا يمكن ذكرت سبب خنقتي وسبب وصدقيني انا مقدر مجهودك في البحث وان اللي احنا بنعمله ده كله سواء انتي سواء محمد مفيد سواء غيظي عشان بلدنا ونكافح اي فساد ونصلح اللي نقدر عليه
وعلى فكره انا مابفهمش في السياسه ولا مين وزير ايه ولا عمل ايه بس بيتهيألي الصح مايختلفش عليه اتنين
وهافضبل اقول انا مصري وابن مصر الله عليه
واستمري لعل وعسى نقدر نصحي شعب نام وعجبته النومه
وربنا يسترها

Wed Dec 20, 12:58:00 AM GMT+2  
Blogger أنـــا حـــــــــرة said...

لو سألتينى انتى مصرية ؟
هقولك صلى ع النبى

_____________________

اهو انا بقى ما بينرفزنيش غير اغنيه
ماتقولش ايه اديتنا مصر قول هندى ايه لمصر

بس الحق يتقال مصر و رجالتها ادونا كتير
تلوث و سحابة سوداء و نيل متعكر و لحوم فيها حمى و سمك فيه امونيا زيادة و طيور عندها انفلونزا و خضار متسرطن و قانون الطوارئ و افضال تانية كتير

يعنى بجد احنا مديونيين للبلد

وجعتينى يا سمراء

Wed Dec 20, 09:34:00 AM GMT+2  
Blogger أنـــا حـــــــــرة said...

بس عارفة يا سمراء
ده يرجع لمفهوم الفرد للوطن

مصر هى مصر المكان الاستراتيجى
و للا مصر هى الحكومة و اللى ماسكينها

للأسف كتير واخدين ذنب مصر بذنب حكامها
بس الشعب غلبان و جاب اخره يعمل ايه يعنى

Wed Dec 20, 09:37:00 AM GMT+2  
Blogger 3rby said...

لا وانتي الصادقة
ابو بلاش كتر منوا

Wed Dec 20, 01:34:00 PM GMT+2  
Blogger متغيرة شوية said...

هقول أنا ابن ستين في سبعين لكن لسا مصري...مش أحسن من حد لكن عايزة ابقى أحسن وده حقي..
هقول اني بحلم ولادي يقدروا يفخروا بانهم مصريين..وهشتغل علشان ده يحصل

Thu Dec 21, 07:17:00 AM GMT+2  
Blogger islamz said...

بصى يا سمووورة لو سألتينى انت مصري هقولك اه طبعا حتى اسألى نانسي عجرم هي عارفة كل حاجة ... :]

اللى انتى كاتباه ده حاجة بسيطة جدا من البلاوى اللى موجودة فى مصر ام الدنيا ..

ليه مقولتيش ان فى 12000 مريض بالفشل الكلوى مش لاقيين مكان لغسيل الكلى بالطريقة الصحيحة الامنة فى ام الدنيا مصر

ليه مقولتيش ان في 9000 مخبز عيش اصحابهم بيبيعوا الدقيق ويعملوا العيش من الدرة واى حبوب تانية واهى الناس بتاكل الزلط .. فى ام الدنيا مصر

ليه مقولتيش ان فى 35 عسكرى مصرى ماتوا على الحدود مع اسرائيل او اتقتلوا بمعنى اصح خلال عامى 2005/2006وتم الاعلان عن 13 فقط وقالوا انهم هما اللى غلطانين علشان عدوا الحدود بدون قصد .. فى ام الدنيا مصر

ليه مقولتيش ان محرك البحث جوجل عمل احصائية لاكثر بلاد لعالم بحثا عن كلمة سكس ولقاها مصر .. بنسبة تدخل كلية الطب 93% من بحث الشباب على الانترنت هو بحث عن المواقع الاباحية .. فى ام الدنيا مصر ..

وليه ، وليه ، وليه ...

فى ام الدنيا مصر متستغربش متسعبطش متستهبلش .. كلنا عارفين كل حاجة ومطنشين .. من اكبر كبير لاصغر عيل من بتوع التوربينى ...

وسلميلى على ام الدنيا .. وسلميلي على نانسي كمان ...

معلش يا سمووورة طولت عليكى ..
بس بجد الموضوع ده نرفزنى وخلانى ادور انا كمان .. وكل ما حد هيدور هيلاقي بلاوى وبلاوى

وكل ما تدور اكتر فرصتك فى البلاوى هتكتر .. متنسيش نانسي بقي .. ماشي :]

Thu Dec 21, 04:13:00 PM GMT+2  
Blogger smraa alnil said...

بين الامل والياس
ايوة كدة هو دة الكلام
حلو التعليق دة انا كدة بقي عشت مع التعليق دة
بس انا ليا استفسار واحد من كل اللي انت قلته
تفتكر فعلا هنصحي من نومنا
___________________________________

انا حرة

انيت ايه بقي مفهومك عن الوطن
انا اتسالت قبل كة عن المفهوم دة
وبرغم اني دايما بتكلم وبرغي كتير
لكن بلمت
وتنحت وسنتحت
لاني مش عرفت اجاوب
هو صحيح يعني ايه كلمة وطن
اللي يعرف يقولي

Thu Dec 21, 05:11:00 PM GMT+2  
Blogger smraa alnil said...

عربي

دة انت داخل علي طمع بقي
___________________________________

متغيرة شوية

اشتغلي عشان دة يحصل وساعتها انتي اللي هتشوفي ايه اللي هيحصل
ربنا يسترها معاكي
___________________________________

اسلام

قبل اي حاجة انت كنت فين الفترة الي فاتت دي كلها
صح لسانك يا معلم
ومقدرش اقولك حاجة عليه
تعالي بقي انضم ليا في عصبيتي و نرفزتي
ومش تغيب كدة تاني

Thu Dec 21, 05:17:00 PM GMT+2  
Blogger Moog Alb7ar said...

اقولك
انا بنت مصرية وامى مصرية وابويا مصرى وبحب مصر وبعيش فى مصر وليا الشرف انى من مصر

مصر مالهاش ذنب فى كل اللى بيحصل هى زيها زينا اتظلمت من اللى حكمنها
تحياااااااااااااااتى

Fri Dec 22, 09:39:00 PM GMT+2  
Blogger smraa alnil said...

موج البحر

انا طبعا مش هتعرض علي كلامك لاني موافقاكي جدا
بس لما تخرجي لشغلك وتندمجي مع الناس مشش هتعرفي العيب في مين
ولو عرفتي هتعملي ايه
ولا حاجة

Sat Dec 23, 09:56:00 AM GMT+2  
Blogger aleron said...

أظن أن أفضل رد بعد كل الأرقام الموجودة

كلمة حمدي قنديل الشهيرة

تحيا إيران حرة مستقلة

Sat Dec 23, 02:16:00 PM GMT+2  
Blogger smraa alnil said...

alren

هو البيه جه غلط
ايه دخل ايران في الموضوع
وايران مين المستقلة
انت مش شايف اننا بنتكلم عن اهم بلد في لعالم

اخس عليك
مش واخد بالك اننا بنتكلم عن قمعستان

Sat Dec 23, 07:33:00 PM GMT+2  
Blogger شمعى أسعد said...

للمرة الثانية بث حى مباشر من الماسنجر لصفحة التعليقات علطــــــــول


شمعى:
منك لله
انجى:
هههههه ليه بس
شمعى:
اولا
انجى:
ها
شمعى:
هاعيط اهو
شمعى:
ثانيا بعيط اهو
شمعى:
ثالثا انا زيك بقالى فترة نفسى اقول الكلمة اللى مش كويسة بس عفة لسانى مانعانى
شمعى:
رابعا انا من فترة برده عايز اجمع الاحصائيات دى وانت جبتهالى ع الطبطاب
شمعى:
خامسا انتى جبتى اكتر من اللى انا عايزه فوجعتبنى اكتر
شمعى:
سادسا منك لله

بس خلاص
انجى:
بس ايه رايك
شمعى:
بالنسبالك احسنت
شمعى:
بالنسبة للبلد
شمعى:
رايحة فى داهية مفيش كلام
انجى:
ههههههههههه شمعي اوعي تسيبني ابقي هاتلي عيش وحلاوة
انجى:
بس ياريت تبقي بالشيكولاته
شمعى:
حاضر
على فكرة الكلام ده اتكتب متفرق كتير بس انت الميزة ان جمعتيه
شمعى:
بس مين يسمع
شمعى:
بجد بجد اليومين دول بحسد اللى بيعرفوا يقول كلام مش كويس لما يكونوا مخنوقين
انجى:
ههههههههههههههه

Wed Dec 27, 08:33:00 PM GMT+2  
Blogger smraa alnil said...

هههههههههههههههه
الله يفضحك لتاني مرة
انت علي طول فضجني كدة
انا قلت قبل كدة مش هتكلم معاك تاني
ماشي يا شمعي
مسيري اردهالك
بس شفتني وانا بتأمر عليك وبقولك هاتلي عيش وحلاوة بالشيكولاته
ههههههههههه

Thu Dec 28, 02:23:00 PM GMT+2  
Blogger الأباصيرى said...

مش عارف لية فجأة الدنيا ضلمت فى وشى وانا بقرا الموضوع بتاعك دة


احنا بقينا فى الحضيض
والبركة فى الرئيس وشلة الحرامية اللى ماسكين البلد

Thu Feb 08, 11:23:00 AM GMT+2  
Blogger smraa alnil said...

اهلا يا اباصيري
هي لسة مضلمة عندك
ماهي طول عمرها مضلمة هي جت علي دي يعني
ههههههههههههه
المهم النور جه عندك ولا لا

Fri Mar 16, 01:19:00 PM GMT+2  

Post a Comment

Links to this post:

Create a Link

<< Home