Sunday, December 10, 2006

رجل البنطلون فردة وفردة


الرجل الشمال يمكن طويلة ولا اليمين قصيرة حبة
ماله البنطلون كاشش ولا الجيوب قبة
ست عيال وامهم وحماتي لوحدها سبة
يا صبر ايووووووووب
يقولك يا بخت من نام مغلوب
طب انام مرة غالب ولا الطريق مكتوب
والغلب بقي غالب
والحياة خد وهات
طبلة ونايات
ضحك واهات
تصدق بالله
الحياة فردة وفردة
هي الرجل الشمال طويلة ولا اليمين قصيرة حبه
اهو قدر مكتوب ومحدش بيستخبي
اهم حاجة تعيش مرتاح
كان ليا واحد صاحبي اسمه عبد الفتاح
عاش اربعين سنة نايم ولما صحي مات
والناس تقولك بص لادام
وكل ما بص لادام الاقي ادام ورا
ههه والله البنطلون دة مسخرة
تصدق الرجل الشمال طويلة واليمين قصيرة
علي كل احسن حاجة تعيش حياتك زي الحمار
مربوط في ساقية وسايبها للاقدار
ولا تتعب نفسك ولا تحتار
كان ليا واحد صاحبي اسمه عبد الستار
باع قيراطين الارض واشتري دار
حبة وباع الدار واشتري ارض
ولا مشيت معاه لا بطول ولا بعرض
مسكين يا عبد الستار
يالله اهو باع الدار والارض وغار
ههههههههه
يا راجل اضحك بلا هم
بلا خوتة وحرقة دم
طب وديني الضحك اهم
لا بجد الشمال طويلة واليمين قصيرة
ياللا مش فارقة ماهي حياتنا كلها متغيرة
يا سيدي انسي ماتفتكرش
دا كيلو اللحمة كان بخمسين قرش
وكان يملا العين قبل الكرش
والحياة كدة كان فيها بركة
والدنيا كات هيصة وحركة
يا خويا هو ايه اللي حصل
زرعنا قمح طلع بصل
هيا الحياة طالعه بينا ولا نازلة
جد معانا ولا هازلة
دة الواد صبحي النقاش
كان ضاربها بوية وعايش ببلاش
وكان يقولك ساعه الحظ ما تستناش
اروح ازوره من يومين الاقيه في الانعاش
صحيح الدنيا صغيرة
والدليل علي كدة
ان الرجل الشمال طويلة واليمين قصيرة
تعرف اهم لحظة في حياتك
هيا لحظة وفاتك
ساعتها طظ في اللي فاتك
وطظ في حماتك
وطظ حتي في ذكرياتك
وساعتها الكل هيفتكرك بالخير
ويقولوا كان طيب ...كان امير
لأ وهتاخد لقب مرحوم
ساعة موتك بس بقيت مرحوم
يعني ضهر حياتك هو وشها
وغروب حياتك هو فجرها
دنيا غريبة
العاقل فيها هو الوحيد اللي مجنون
زي رجل البنطلون
فردة وفردة
يوم دافية ويوم باردة
دايما متغيرة
تصدق ان اليمين هي اللي طويلة والشمال قصيرة
جميع حقوقو الطبع والكتابة للنشر للمؤلف اللي هي انا طبعا

Labels:

60 Comments:

Anonymous ALiaa said...

الله يرحمك يا عبد الفتاح..... الرجل اللي بتمشي عليها أكتر هي اللي أقصر .... قصدي أطول.....
:(
و الله مانا عارفة بقي
البوست متميز يا سمراء
الي الأمام

www.salkher.blogspot.com

Sun Dec 10, 09:08:00 PM GMT+2  
Blogger Ma-3lina said...

mash alah to7fa ya samra2

el mawdo3 3'reeb awii bs gamil we el rabt been el a7das 7elw awii

ur talented bgd

Sun Dec 10, 09:58:00 PM GMT+2  
Blogger بين الأمل و اليأس said...

هو انا لحقت اخلص من البوست اللي فات لقيتك نزلتي بابو فرده وفرده بس بجد انا حسيت اننا عايز اضحك وانا بنقراه جامد جدا
بس ياترى لمين دا اصلي اول مره اقراه
وبجد تحفه ومتنوع
ههههههههه
يا راجل اضحك بلا هم
بلا خوتة وحرقة دم
طب وديني الضحك اهم
لا بجد الشمال طويلة واليمين قصيرة
ياللا مش فارقة ماهي حياتنا كلها متغيرة
يا سيدي انسي ماتفتكرش
بجد كلام انا حفظته وبعته لاصحابي على النت اول مره اعملها واوزعها على الكل
وربنا يسترها

Sun Dec 10, 10:00:00 PM GMT+2  
Blogger smraa alnil said...

ههههههههاولا
بين الامل والياس
انا مش بحب اكتب حاجة في مدونتي لناس تانية يعني تفهم من كدة ان انا اللي كاتبة الكلام دة
ويكون في علمك حقوق الطبع والنشر محفوظة ليا انا
عامة انا عدلت في البوست عشان خاطر سيادتك
___________________________________

ما علينا
مش عرفة اقولك ايه بس ربنا يخليكي ليا يارب يارافعة من معنوايتي
انتي عارفة بقي مش عايزة اقولك دي اقل حاجة عندي هههههههههههههههه

__________________________________

علياء
ربنا يخليكي ومعلش طلعت عينك شوية بس ايه لزمتها الصداقة بقي اللي لسة بنبتديها
فرحت بيكي والله وبتعليقك
ميرسي يا قمر

Sun Dec 10, 10:15:00 PM GMT+2  
Blogger elkamhawi said...

على فكرة لذيذ

حياتى اجمل ما فيها إنى ..بعيش

بعيش مبفكرش فى حاجة..متهمنيش

يلا مش فارقة

Sun Dec 10, 10:37:00 PM GMT+2  
Blogger Epitaph said...

هههههههه

علي فكرة جميلة جدا جدا ماشاء الله
متميزة و مختلفة

حلوة بجد

عجبتني جدا

الي الاماااااام
:)

Sun Dec 10, 11:38:00 PM GMT+2  
Blogger المزاجنجي said...

حفوة موت بس انا عن نفسي بالبس جلاليب فمش هاتنفع معايه هههههههههههههههههههههههه رخامة صح ؟
بجد جميلة لا وليها معنى كمان وليها ملمس لان واضح ان القماشة اللي منها اليمين غير الشمال وهشان كده مفصرة هههههههههههه

Mon Dec 11, 12:11:00 AM GMT+2  
Blogger المزاجنجي said...

معلش الكيبورد دي من النوع الصغير وجديدة على وبتكتب مع نفسها

Mon Dec 11, 12:13:00 AM GMT+2  
Blogger شمعى أسعد said...

شمعى:
ازاى تنزلى بفردة وفردة
انجى:
هههههههههه اقرا موضوعي الجديد وانت تعرف
انجى:
http://anooojy.blogspot.com/
شمعى (بعد ما قريت):
بت انتى . . انتى اللى كاتبة الشعر ده
شمعى:
قووووولى بسرعة
شمعى:
انتى ولا احمد فؤاد نجم
انجى:
اه
انجى:
هيكون مين يعني
شمعى:
طب انتى ولا فؤاد حداد
انجى:
يا جدعان انتو مش مصدقين ليه
انجى:
يا سيدي انا
شمعى:
طب انتى ولا احمد امين
شمعى:
طب انتى ولا صلاح جاهين
شمعى:
يوووووووووه بقى
انجى:
للدرجة دي عجبك
شمعى:
تحفة لبكرة
شمعى:
تحفة للصبح
انجى:
ميرسيخ

Mon Dec 11, 01:45:00 AM GMT+2  
Blogger albida said...

أنا حسيت أنى بقرأ موال... بس بجد معناه فى الجون

أنتى فعلا جبتى من الاخر.. هى الدنيا كده!! قفاها فى وشها وفرحها فى حزنها

يالا.. سبيها على الله

بجد كتاباتك جميلة ومتنوعة يا انجى
:)

manal

Mon Dec 11, 02:30:00 AM GMT+2  
Blogger raspoutine said...

بصى بقى فرده وفرده اهم حاجه اننا مستورين

وكان عندى تعليق صغير او رد على بلوجلر مش عارف ولد ولا بنت لما قالتلك حطى كل شىء فى شنطه وارميها من فوق الكبرى
اولا الظاهر انها معرفتش انتتى بتتكلمى عن ايه او انا اللى مش فاهم ببس بمعرفتى بيكى القصيره وكلامى معاكى انا شايف انك انسانه قويه وصاحبه خيال خصب اوى
بس حبيت اعرف ايه حكايه الشنطه والكوبرى اللى هيترمى من عليه الشنطه واتاكدت من شىء واحد ان صاحبتك دى مبتحفظ علبى مياه النيل ويا يت تغير افكارها شويه العمليه مش محتاجه اننا نعذب نفسنا فى شيل شنط واكياس سودا ونروح على الكوبرى ونرميهم طيب افرضى حد شافها وافتكر انها بترمى جثه مقطعاها او ممنوعات هيبقى موقفها ايه المهم نصيحه ليها بلاش تلوثى نهر النيل كمان بشويه افكار ملهاش اى اهميه
يا سمرا الدنيا عباره قسم ونصيب وقضاء وقدر وارواح بتختلف وارواح تانيه بتأتلف مش كيس زباله مرمى من على كوبرى فى نهر النيل بس وانا اسف يا سمراء انا رديت عليها لانى كنت حاسس انى عايز ارد عشان الافكار دى قديمه وبتاعت انسان ضيق الافق مش المفروض انه مثقف وبيكتب على العموم اشوفك على خير


اه فكرى فى اللى اتفقنا عليه

Mon Dec 11, 03:04:00 AM GMT+2  
Blogger smraa alnil said...

القمحاوي

شكرا علي زيارتك ليا
بس ليا سؤال هو ايه وضع اصاله في الموضوع يعني دورها ايه تحديدا
ولا يلا ماهياش فارقة
محياتنا متغيرة زي رجل البنطلون فردة طويلة وفردة قصيرة
_________________________________

epitaph

انا برضه ليا استفسار
مين اللي متنوعه ومختلفة انا ولا القصيدة
اصل انا علي خلاف معاها الايام دي
ومحبش حد يقارني بيها

هههههههه
شكرا يا قمر
_________________________________

المزاجنجي
ههههه
بتلبس جلااليب برضه ميضرش
ممكن اعمل قصيدة علي كم الجلابية برضه كم طويل وكم قصير
يا سيدي بلا هم هو في حاجة بتتغير
يعني مش هتسلم مني برضه
وبعدين كيجبلكم كيبورد جديد بقي انتوا فقرا
ههههههههههه
__________________________________

شمعي

ههههههههههههههههه
الله يفضحك يا بعيد
ايه التعليق الجديد دة
طب والله عجبني موووت
بس مش فاهمة انت عايز توصل لايه
انك تشردلي يعني ولا ايه بالظبط
ههههههههههههههههههه
بجد انا اتصدمت لما قريت التعليق دة مكنتش متوقعاه منك
بس خت بالك انت من كلمة ميرسيخ اللي قلتها في اخر الحوار
عشان تعرف اني لغات بس
ههههههههههههه طب تصدق بقي اني مش هتكلم معاك تاني عشان انت فضحي
________________________________

Mon Dec 11, 09:51:00 AM GMT+2  
Blogger smraa alnil said...

elbieda

موال مرة واحدة
بس عارفة حسيت بقهر اوي وانا بكتبه حسيت انه موال حزين وانا بحس بيه وبعبر عنه بقلمي
ساعتها فعلا مش عرفت هيا الحياة طالعه بينا ولا نازلة
جد معانا ولا هازلة
بس يلا قلت ما هي زي البنطلون فردة طويلة وفرد قصيرة
ههههه شكرا ليكي ا قمري

تحياتي
________________________________

راسبوتين

ايه يا عم براحة علي البت البنت مش غلطت في حاجة
بصوا هو انتو الاتنين ليكم وجهه نظر في الموضوع
بصوا انا هوريكم كلام البنت اللي بيتكلم عليها راسبوتين
هي اتكلمت في البوست اللي فات بتع فتاه في عصر الممنوع
ودة جزء من تعلقيها

صدقينى لوهو بيحب
اكيد راجع
لو مش بيحب بقى
يبقى اقفلى على اللى فات فى شنطه بلاستيك
وروحى عند اقرب كوبرى على النيل
وارميه
وصدقينى صدقينى هاتنسيه

تعلقيها دة كانت فارة ان القصة حقيقية او اني مريت بتجربة زي دي
هو انا فعلا مريت بتجربة زي دي بس دي مش كانت عامل مؤثر اني اكتب عنها
لان الفراق مختلف والحبيب برضه مختلف
المهم مش موضعنا
راسبوتين انت معترض انها تقولي اني ارمي ذكريات اليمة في نهر النيل
بغض النظر عن التلوث اللي هي هتعملوا بس هي برضه عندها حق
لنفترض اني مريت بتجربة زي دي
وان هو فعلا مش راجع زي ارتباطي الاولاني كدة
كنت عارفة انه مش هيرجع
اكيد مش كنت هقعد اقول اصل دة قسمة ونصيب وانا مدبوحة من جوايا
مكنش ينفع غير اني فعلا اي كانت وسيلتي اني ارمي كل اللي حصل دة ورايا عشان اقدر اقف علي رجلي من تاني بعد ما حسيت اني ممكن اتكسر
انت عرضت الموضوع وانتقضت شيكولاتاية بس مقلتش ايه الحل
علي الاقل هي حاولت تساعدني بوضع حل
هيضر بالبيئة ويمكن تتحبس بسببه
بس اهي حاولت
وبعدين اعتقد ان المدونة اتعملت عشان كلنا نشارك برأينا ويبقي في حوار متبادل يعني مش تعتذر انك رديت علي البنت اللي انت بتوقل عليها


نيجي بقي للاهم
اولا يا باشا انا مش اتكلمت معاك ولا انت اتكلمت معايا
غير انك دخلت قريت مواضيعي وعلقت عليها
وانا نفس الشئ
يعين لا فترة قصيرة ولا قليلة
يعني التعبير اللي قلته انك من خلال معرفتك بيا القصيرة
لا اساس له من الصحة لاني مش اتكلمت معاك اصلا

نيجي بقي لاهم نقطة غايظاني اوي
هههههههههه
احنا اتفقنا علي ايه اصلا

متزعلش مني يا راسبوتين
بس كل واحد ياخد حقه
ويا سيدي
اضحك
وديني الضحك اهم
وبلا خوتة وحرقة دم
سلاحف يا شباب

Mon Dec 11, 10:23:00 AM GMT+2  
Blogger 3rby said...

لا فنانة بجد
شعرك دمه خفيف جدا
انتي بقه فكرتي فيه وانتي بتلبسي ولا ايه؟
هه

Mon Dec 11, 12:01:00 PM GMT+2  
Blogger مُزمُز said...

لأ بجد جميييييييييلة جدا جدا جدا

تعرفي فكرة الرجل بتاعت البنطلون فكرة مفتكسة ولذيييييذة

كمان أنا بحب الصدمات
يعني عبفتاح اللي نام أربعين سنة وصحي مات
وكمان النهاية كانت جميلة أوي

بجد بجد بجد
انبسطت من البوست جدا
تحياتي لك

Mon Dec 11, 03:16:00 PM GMT+2  
Blogger smraa alnil said...

اوووووووووووووووووف
محطوطة في موقف وحششششششششششش
وشكلي عكيت الدنيا
ليه بقي
لان راسبوتين طلع ايمن فاروق خطيب شهد
اللي اتكلم عليها قبل كدة في مدونة بكرة اكيد احلي
وانا مش اعرف ان راسبوتين هو ايمن
يبقي موقف بايخ ولا ايه
ايمن انا اسفة في الجزء الاخير من تعليقي
ليك بس بجد انت مش كنت اديتني لينك المدونة بتاعتك دي
واوعي يا شهد انتي كمان تزعلي مني
ايمن دة زي اخويا بس لو كان قالي ان دي مدونته كان ردي اختلف
متزعلش بقي يا ايمن
اديني بعتذرلك اهو ادام الشعب في اسبقة لم تحدث لا في العصر الحديث ولا القديم وحياتك

Mon Dec 11, 03:20:00 PM GMT+2  
Blogger smraa alnil said...

مزمز
اهم حاجة انك تكون انبسط ويكون كلامي عجبك
يعني حاجة كدة علي ادي
______________________________
ايمن (راسبوتين) ...؟؟؟
لا تقلق يا اخي انا مش ناسية اللي احنا اتفقنا عليه
هههههههههههههه

Mon Dec 11, 03:23:00 PM GMT+2  
Blogger المٌهَــــاجِر المَصْـــــــرى said...

سمـــرا
معلش انا جيت متأخر..انت عارفه بقه من نيويورك للقاهره مشوار..

والله كلام جميل..اوى فشر صلاح جاهين والناس الحلوه دول

اول مره اشوف وزيره امن دوله عندها احساس
هههههههههههه

Mon Dec 11, 03:40:00 PM GMT+2  
Blogger smraa alnil said...

يا دي الهنا يا دي الهنا المهاجر بحاله عندنا
قصدي الريس عندنا
عيب عليك يا ريس دة انا كلي احاسيس
عامة حمدالله علي السلامة انا عارفة ان المشوار متعب بس فين الهليكوبتر يا ريس
ولا الموكب الجمهوري
عامة يا ريس انا اخدت احتياطات الامن في غيابك لا تقلق

Mon Dec 11, 04:05:00 PM GMT+2  
Blogger ahmEd_H said...

بجد تحفه
جامده جدا

Mon Dec 11, 04:55:00 PM GMT+2  
Blogger karakib said...

الرجلتين قصيرين علي فكره مش واحده و واحده ابدا
علي فكره موضوع أنه الواحد يقدر يقول علي كل حاجه طظ ده لو فعلا قدر يعمل كده معناها أنه جلس علي قمة العالم كله

هاني جورج
انتوك

Mon Dec 11, 09:53:00 PM GMT+2  
Blogger zordeak said...

القصيدة دى فاااجرة ..آآآ احم قصدى جمييلة جدا

انا بحب الشعر العامى اوى .., ودى قصيدة عامية جدا جدا اذا صح التعبير

وانا من موقعى هذا بتنبألك بمستقبل جامد فى الشعر العامى

بس هيا الرجل الشمال طويلة شوية
ولا اليمين هيا اللى قصيرة
والنعمة مسخرة
حاجة كده تنسى الهم
وتشيل الغم
جايين الدنيا ايد قدام
وايد ورا

طظين تلاتة ومية
ده حاميها حراميها
دور على الاحلام
تلقاها متكسرة

وانت يا عم انت
خليتنا نعيش فى عذاب
ولا انت علشان ريس
نبقى احنا يعنى كلاب ؟

انا اصلى ضهرى انتنى
من كتر مطاطيت
ساكت بقالى كام سنة
يا اخوانا حيلى اتهد

ده حتى الفرخة جالها زكام
والسمك اتشل وجاله حول
والبيض غلى
اى والله البيض غلى
بص يا بيه
البيضة بقت بجنيه
ويا ريتها كبيرة
دى صغيرة

بص معايا كده
هيا الفردة الشمال طويلة
ولا اليمين لسه قصيرة

انا عارف ان حقوق الطبع والنشر محفوظة يا سمراء .., انا بس كنت بهزر
:)

Tue Dec 12, 02:11:00 AM GMT+2  
Blogger أنـــا حـــــــــرة said...

يالهوى انتى الى كاتبه الكلام ده
انا كنت فاكراكى هتقولى بتاع حد مشهور

انتى عديتى يابنتى
عبقرية بجد
من احلى الحجات اللى قريتها فى العامية

جميلة جدا
فكرتها مفتكسة و بجد عايزة تتبخرى

Tue Dec 12, 12:37:00 PM GMT+2  
Blogger smraa alnil said...

ahmed_h

شكريا يا احمد علي زيارتك وتعليقك والحمد لله ان الكلام عجبك
اتمني انك تكررها
___________________________________

karakib

بص يا هاني
بالنسبة للرجلتينفهي فعلا واحدة طويلة والتانية قصيرة
عشان بس دايما حياتنا متغيرة
يعني هي جت علي رجل البنطلون
ما العاقل يا سيدي بتقال عليه مجنون
ههههه ما علينا

مش معني اني قلت قبل كدة ان الواحد لازم يقول علي كل اللي جواه بغض النظر علي اللي ادامه يبقي احنا نقول طظ
ومش معني ان اللي يقدر يقول طظ علي اي حاجة يبقي دة وصل لقمة العالم كله
لانه هيخسر كتير
يقول طظ لاهله ولؤسائه والمدرسين واللي ماشين في الشارع والبياعين والصحاب واي حد
يبقي ساعتها خسر كل حاجة
وطالما خسر كل حاجة هتقولي هيكسب نفسه
مفيش نفسه من غير ناس
حتي لو دول اشرار ومنافقين
بس وظف طظ دي للمواقف اللي تقول فيها طظ
مش اكتر من كدة
ولا انت ايه رايك

Tue Dec 12, 02:01:00 PM GMT+2  
Blogger smraa alnil said...

zordeak

ههههههههههه ما تيجي تكتب انت احسن
والله عال
طب ما تيجي تكتب معايا في البتاع دة ونطلع كلام انما ايه حاجة كدة زي فردة البنطلون
ههههههه
علي العموم يا سيدي كلامك والله عجبني وعندك حق في ل كلمة قلتها
ابقي الف كدة وابقي وريني انت كاتب ايه
بس عايزة اقولك اني ماليش في الشعر العامي خالص
ودي من التجارب القليلة مووووووووت اللي تكاد تتعد علي صابع الايد الواحدة اللي كاتبة فيها شعر عامي
شكرا لزيارتك واتمني تكرارها
___________________________________

انا حرة

اتبخر مرة واحدة علي ايه يا حسرة
بس مبسوطة ان كلامي عجبك والله
وبعدين انت مش قلتيلي عديت فين
وانا يا سيتي انا لاعبقرية ولا حاجة
زي زي اي حد بيعرف يعبر عن اللي بيحسوا
يعني لا جبت زيادة ولا نقصت
متقطعيش وابقي تعلي زوي كل شوية
بطلي بخل شوية

Tue Dec 12, 02:09:00 PM GMT+2  
Blogger elgharep said...

أهم حاجة فى كل اللى أنت قلتيه أنه بيخلينى أضحك وسؤال ولو مافهوش زعل
أشمعنى الحمة اللى مركزة عليها فى البوست
الغريب

Tue Dec 12, 02:56:00 PM GMT+2  
Blogger Amr Ahmed said...

هاي سمراء

ازيك

انا لا استطيع الا ان اصفق لك حتي الغد

انتي رائعة

تفرد في الموضوع


اتمني اشوفلك مشاركات تانية


قصدي قصائد تانية


يا شاعرة النيل

وتحياتي

Tue Dec 12, 08:31:00 PM GMT+2  
Blogger عمر said...

سمراء: رائع بجد.. حقيقي عجبتني جدا برافو عليكي انت موهوبة جدا جدا جدا..

انت متأثر من البوست... حاروح أقراه تاني

سلام

Tue Dec 12, 10:08:00 PM GMT+2  
Blogger بين الأمل و اليأس said...

معلش فاتتني دي نسيت استأذن منك بس هي اساسا من كتر ماعجبتني عملت كا والله كان قصدي خير وعلى فكره قبل ماتقولي انا كتبت في الاخر اننا قريتها في مدونه من المدونات بس بصراحه مقلتش لمين
بس بجد انا مت على نفسي من الضحك وكمان عجباني مووت واحييكي عليها
بس بجد مكنتش اقصد هي عجباني مش اكتر وبعتها عفويا هو انا هافضل اعتزر ماتعديها بقه مكنتش غلطه
انا مش عارف اقفل غير لما اصبلح دا بس مش عارف قوليلي انتي اعمل ايه عشان متزعليش وانا موافق على الحكم
ومتقلقيش حقوق الطبع والنشر محفوظه
وربنا يسترها

Wed Dec 13, 01:25:00 AM GMT+2  
Blogger elkamhawi said...

تعااااااااااااااااالى بقى عشان متقوليش خايف

Wed Dec 13, 10:18:00 AM GMT+2  
Blogger أنـــا حـــــــــرة said...

مانا باجى اهو
هو انا مش موجودة عندك فى اخر 3 بوستات يعنى مقطعتش حاجة
هتلزقيها فيا بقى و تقولى انا اللى قطعت و اللى اتقطع يتخيط يا اختى


عموما انتى عديتى من شط الموهوبين لشط الناس اللى بحبهم

حلو كده ؟

Wed Dec 13, 11:45:00 AM GMT+2  
Blogger متغيرة شوية said...

تخيلي بقى لو الفردة وردة دي طلعت موضة.
وتلاقي كل الناس ماشيين بيها ومعتقدين انهم عملوا اللي ما يعمل

Wed Dec 13, 11:57:00 AM GMT+2  
Blogger وجع دماغ said...

أول زيارة
لكنى لم اتوقع ما قرأت
البوست جميل
الفكرة أكثر من رائعة
أعتقد أنى صأصبح قارىء دائم
تحياتى

Wed Dec 13, 03:24:00 PM GMT+2  
Blogger كلمه said...

looooooooool ... alaaaaaaah ...bgd 7elwa 2wy 2wy 2wyyyy ...bsm elah ma sha2 allah Tooooo7faaaaaaa ..... mesh ba7sed wlahy bs fe3lan 3agabtny 25er 7aga

de 2wel marah 2shof elblog da ...bs esra7a gamed elteneeeeen
nice work bgd ..wtgg :D

Wed Dec 13, 03:57:00 PM GMT+2  
Blogger smraa alnil said...

الغريب
كويس انك ضحكت والله
دة الضحك اهم
بالنسبة للحمة
لانها تعتبر غلة اوي دلوقتي وزمانها ان رخيص اوي برضه
كيلو الللحمة ب 35 جنية في حين ان في موظفين بيقبضوا 165 جنية في الشهر
واللحمة تقريبا مش بيشوفوها الا في المواسم
بس غريب ان تسال عن اللحمة يا غريب :))
___________________________________

ahmed amr

شاعرة النيل مرة واحدة
اكمني يعني مسمية نفسي سمراء النيل
انا يا ابني مش توديني في داهية انا لا شاعرة نيل ولا شاعرة ترع حتي
بس انا خايفة لاديك توعجكك من كتر التصفيق
مرحب بيك في اي وقت يا احمد
___________________________________

عمر
روح اقراه تاني مش هقولك لا
البوست بوستك يا ريس
وشكرا علي كلامك يا عمر
___________________________________

بين الامل والياس

طب قول المدونة ي بتاعتي
سايبها نكرة كدة
اهو زمان دور النشر والمطابع والكتاب والمؤلفين هينسبوها لنفسهم
هههههههه
عاجبك كدة يعني
عامة انا مش زعلانة
وبعدين بلاش حكمي دي لاني وزيرة امن دولة يعني ممكن اوديك ورا الشمس
ههههههههه
حصل الخير وفعلا ربنا يسترها

Wed Dec 13, 07:14:00 PM GMT+2  
Blogger smraa alnil said...

القمحاوي

جيت يا خويا ويارتني ما جيت
واكتشفت الفاجعه الكبري
ياريتك كنت خفت
ايه يا ابني اللي انا شفته دة
خليني هنا احسن
__________________________________

انا حرة

طبعا حلو اي حاجة تيجي منك تبقي حلوة
ودة يشرفني اني اخرج من قائمة الموهبين لقائمة اللي بتحيهم
وربك يديم المعروف
يارب
_______________________________

متغيرة شوية

تصدقي تبقي موضه وحاجة فانتستيك مووووووووت
بس المشكلة اني انا اللي هبقي صاحبة الاصدار دة
واسمي بقي يتكتب في المجلات
وابقي مشهورة بقي
_________________________________

Wed Dec 13, 07:29:00 PM GMT+2  
Blogger smraa alnil said...

وجع دماغ

دة شرف ليا انك تكون قارئ ليا علي طول
والله شرفتني بجد وانبسط اوي بتعلقيك
منور يا وجع
بس مش طالباها بقي وجع دماغ
:)
__________________________________
كلمة

walahhin ana mabsota kteer we ibsha2 allah msh tb2a akher mara tzorny fiha
we mabsota in el blog 3agbk
thx for ur visit

Wed Dec 13, 08:18:00 PM GMT+2  
Blogger elkamhawi said...

ماشى ماشى براحتك بس عمرك ما هتقدرى تنكرى انى مش شبهه

Wed Dec 13, 11:12:00 PM GMT+2  
Blogger Ironcobra said...

عليا النعمة حاجة أخر مسخرة .

Wed Dec 13, 11:28:00 PM GMT+2  
Blogger tota said...

سمراء
عارفة بعد قراءة البوست صمت قليلا الا انى لم اضحك مطلقا البوست فيه كم سخرية بمرارة برغم ما يبدو من مرح الكلمات الا انه وصلنى مر جدا
السخرية من كل شىء ومن اى شىء لانه لم يعد شىء مرضى من الاساس ولاننا فى حالة مزاجية عجيبة اصبحنا نرى عيوب كل شىء بوضوح

بوست غريب لكن جميل
تحياتى

Thu Dec 14, 12:08:00 AM GMT+2  
Blogger 3rby said...

تعرفي ايه اكتر حاجة بتضايقني
لما حد ينفضلي
حتي لو تعليقي اهبل
المفروض تهتمي لاني اهتميت ودخلت وعلقت

Thu Dec 14, 02:16:00 AM GMT+2  
Blogger Hamed Ibrahim said...

كلام تهييس بس جميل !

Thu Dec 14, 02:52:00 AM GMT+2  
Blogger islamz said...

سموورة .. مش عارف ليه حاسس بوجع فى الكلمات .. انا حاسس انك بتتكلمى من غلبك زى ما بيقولو .. جميلة تعبيراتك اوى يخرب عقلك .. يا بنتى انتى عديتى فى البوست ديه .. خيالك عمره ما خانك والمرة دى وهمية .. خللى بالك من كلامك كده على طوول والمرة الجاية بوستاتك عاوزها طلقة معدية .. تحيااااتى .. والسلام ختام

:]

Thu Dec 14, 10:04:00 AM GMT+2  
Blogger MAKSOFA said...

مشاء الله عليك
داانت فنانه بجد

Thu Dec 14, 02:00:00 PM GMT+2  
Blogger Amr Ahmed said...

هاي سمراء

ايه الجمال ده

دانتي موهبة بقي

اختيارك للكلمات والتعبيرات رائع

الله يحرمك يا عبد الفتاح

ويحسن الينا

بااااااااااي سمورة

Thu Dec 14, 06:29:00 PM GMT+2  
Blogger Lion king™ said...

حلوة اوي دي
عجباني فكرة رجل البنطلون وكل ما اقرائها اضحك
وافتر اي حد مهمش يقولك هو انت مفكرني رجل بنطلون
اهي طلع ليها فايدة اهي والصورة معبرة جدا
:)
تحياتي

Thu Dec 14, 08:33:00 PM GMT+2  
Blogger islamz said...

لااااااه .. اعترض ان حد غيري يستخدم اسم سموورة .. مليش دعوة يا عم عمرو انا اول واحد اقول الاسم ده .. يعنى كوبي رايتد من الاخر .. ولا ايه يا سمووورة .. :[

Thu Dec 14, 11:03:00 PM GMT+2  
Blogger ادم المصري said...

ههههههههههههههه
جامده طحن جدا جدا جدا


مش عارف اقولك ايه
بصراحه مالكيش حل


انا مبهور جدا جدا جدا


انا حاولت اوزنها يمكن تكون موزونه

بس احلي حاجة فيها انها تلقائية .. لا وزن ولا يحزنون

بس الموسيقي فيها رائعه .. غير تلقائيتها مالهاش حل


بصراحه انا شكلي كدا هاغير منك .. تعرفي انتي اصلا مالكيش حل

Thu Dec 14, 11:42:00 PM GMT+2  
Blogger aymen.farouk said...

زورينى

Fri Dec 15, 05:59:00 AM GMT+2  
Blogger gamal said...

لكى تحياتى أولا
معذرة أنى دخلت المدونة بدون أستئذان ولكن جذبنى أسم سمراء النيل
فدخلت وأتطلعت
فكم هى جميلة حقا
انا حاولت أعمل بنصيحتك ولا أشغل بالى هل الفردة طويلة ولا قصيرة انا قطعـت البنطلون وخليته شورت وريحت نفسى
تمنياتى لكى بالتوفيق

Fri Dec 15, 05:01:00 PM GMT+2  
Blogger Sampateek said...

انت فنانة بجد
برافو عليكي
تحياتي

Fri Dec 15, 08:11:00 PM GMT+2  
Anonymous empire said...

الله بجد

Sat Dec 16, 09:14:00 AM GMT+2  
Blogger smraa alnil said...

القمحاوي
_________

ماشي بس رايح فين يا ابني انا لما شفت صورتك قلت بالظبط ايه اللي جاب القلعه جنب البحر
والنبي خليني ساكتة احسن :p
___________________________________

ironcopra
_________

دة اللي قدرك عليه ربنا , حاجة اخر مسخرة
دي اول زيارة ليك اتمني انها تتكرر تاني وشكرا ليك علي الكومنت المسخرة دة :p
___________________________________

توتا

اولا ربنا يخليكي
ثانيا مش عارفة ليه بحس انك حزينة جدا علي طول
الحزن لازم يكون جوانا بس لازم نخفيه
انا معاكي ان البوست يوصل الواحد لمرحلة الالم انا وانا بكتبه كنت شايفة سخرية من الواقع اللي احنا فيه طبعا انا سعيدة بزيارتك ليا كل شوية
تحياتي

Sat Dec 16, 12:01:00 PM GMT+2  
Blogger smraa alnil said...

3rby
____

تصدق وتامن بالله انا مش كنت واخدة بالي والله
مش تزعل بس غصب عني دة كل الا عربي
هو انا جبت غير عربي
خلاص بقي مش تزعل
صافي يا لبن
وبعدين لا يا سيدي انا مش كنت بفكر في القصيدة دي وانا بلبس البنطلون
متخلينيش اقولك بقي كنت بفكر فيها فين عامة مش عايزاك تزعل مني بس والله مش فضتلك انا فعلا مش اخدت بالي
انت لسة زعلان؟؟؟؟
___________________________________

حامد ابراهيم

فعلا كلام تهييس بس متنكرش انه حقيقي
بيتكلم عن واقعنا
شكرا ليك
تحياتي
___________________________________

اسلام

بوستاتي طلقة معدية يبقي عايزني اروح في داهية
بس عندك حق انا قلت الكلام دة من غلبي ومن القرف اللي انا فيه
مش بقولك انت اللي رافع من معنوياتي
ادعيلي بس ان بوستاتي المرة الجاية تبقي احلي ومش فيها حزن وكابة لحسن انا ناوية انكد عليكم
___________________________________

مكسوفة
ربنا يخليكي يا قمر
فنانة مرة واحدة مش للدرجة دي يعني
شكرا ليكي وبقي اغلطي مرة تانية وابقي زورينا كدة مش تقطعي
___________________________________

amr ahmed

انت مش كنت تعرف اني موهوبه
دة انا صيتي وصل لاوروبا والدول المتقدمة
علي العموم شكرا ليك
يا جدعان دة انتو رفعتوا روحي المعدنية
ومبسوطة ان اختياراتي عجبتك
ابقي اسأل بقي
__________________________________

lion king

طبعا ليها فايدة شفت بقي طلع ايه فايدتها
كويس انها خليتك تضحك
بس ايه حكاية انت فاكرني رجل بنطلون دي
تصدق اول مرة اسمع عنها
بس شفت انت الصورة
بس البت مش لابسة بنطلون شكلها كدة قصرته وخلته جيبة
___________________________________

اسلام

ههههههههههههههه طب احلها ازاي دي
بص بقي يا عمرو الحق يقال ان فعلا اسلام اول واحد يناديني بالاسم دة
يعني حقوق الملكية ليه هو
وبص بقي يا اسلام
عمرو برضه صاحبنا يعني هو بيناديني من عشمه فيا والاسم كمان عجبه منك عشان كدة حب يستخدمه
وبعدين انت وعمرو زي الاخوات
يعني معلش بقي فوتهاله المرة دي
وانت يا عمرو ابقي استأذن من سلام ف استخدام هذا الاسم العبقري
هههههههههه
كدة حلو
___________________________________

ادم المصري

يا ابني بطل غيرة بقي علي خلق الله
نضفوا نفسكم من جوة بقي بلاش الحقد الطبقي بتاع الشعب
هههههههههههه
مش عايزة اقولك ان دي اقل حاجة عندي (وش واحدة بطلع لسانها)
بس تعالي هنا ايه حكاية مالليش حل دي يعني مش في امل يا دكتور
بجد انا مبسوطة اوي بتعليقك
وبعدين يا سيدي ربنا مش يجي غيرة ولا حاجة احنا نيجي ايه جنبك ولاجنب اي حد بيكتب هنا
دة انا يا دوب لسة بقول يا هادي
تصدق ان انت كمان رافع من معنوياتي

__________________________________

ايمن فاروق

زورتك يا باشا وجاري كتابة التعليق

Sat Dec 16, 12:29:00 PM GMT+2  
Blogger smraa alnil said...

gamal

ههههههههه
اول حاجة انت تدخل وتشرف في اي وقت من غيرما تستأذن
ثاني حاجة شكرا ان اسمي لفت نظرك
تالت حاجة احسن حاجة انك ريحت نفسك من رجل البنطلون وخليته شورت بس خلي بالك جايز رجل الشورت طبع برضه فردة وفردة احسن حاجة خليك في الجلاليب
اهي طراوة برضه
شكرا لزيارتك واتمني انها تتكرر
___________________________________

كلبوزة لكن سبماتيك

ربنا يخليكي يا كلبوزتي
وشكرا علي زيارتك واتمني انك تكرريها البلوج بلوجك في اي وقت
___________________________________

empire

الله عليك انت
شكرا ليك وعلي تعليقك بجد انبسطت بيه
تحياتي

Sat Dec 16, 12:34:00 PM GMT+2  
Blogger karakib said...

أنا شايف أنه كلامك صح بس الطظ اللي قلت عليها .. يمكن ما وضحتش كلامي اوي
الطظ هي أني ما اتعلقش بأي حاجه بشكل مرضي حتي و لو كان حب حتي و لو كانت فرصه لن تتكرر
الأنسان لوحده يقدر يعمل كل حاجه .. و في رأيي أنه عادة و أكرر عادة الناس مستعده تساعد دايما لما تحس أنه اللي هيتساعد مش محتاج مساعده و لا حاجه
الدنيا يوم فوق و يوم تحت بس ده يرجع للحاله النفسيه لأني باشوف ناس كل حاجه معاهم تحت أنما هما حاسين أنها فوق .. الأحساس الأبتسامه اللي علي وجوههم
حاجات كتير
الطظ مش معناها أقول الطظ للناس في وشها بس معناها اللي قصدته أني ما اعتمدش علي أي حاجه او حد و هو ده اللي بيخلي البن ادم حاسس انه علي قمة العالم و ده صعب جدا طبعا لكن أدينا بنحاول

Sat Dec 16, 02:41:00 PM GMT+2  
Blogger 3rby said...

تؤ تؤ تؤ
ههه

Sat Dec 16, 04:32:00 PM GMT+2  
Blogger Ironcobra said...

أولا يا ماعلينا مسخرة ليست سخرية مما كتبتية أو أستهزاء بالعكس دة مدح , حيث أن كلمة مسخرة في اللغة العربية هي الكوميديا السوداء الساخرة .
حتى في أيام يوسف بك وهبي لما كانوا يحبوا يوصفوا مسرحية كوميدية هادفة و ساخرة كانوا يصفونها بالمسخرة .

Mon Dec 18, 08:52:00 PM GMT+2  
Blogger Ironcobra said...

أسف يا سمراء قلت لك ماعلينا معلهش الواحد دماغة ملخبطة خالص .

Mon Dec 18, 08:55:00 PM GMT+2  
Blogger كركوبة said...

جميلة قوى
تحفة بجد يا سمراء
انا افتكرته ف الاول شعر ل نجم

Fri Dec 22, 12:52:00 PM GMT+2  

Post a Comment

Links to this post:

Create a Link

<< Home